1 "Ntendekeya chehemo pa kupiikiya litambiko kwa mbau gwa nkongo gwa nchita. Chehemo jhenie ilenganila pande yoha utandamaho gwake mita ibhele na nucho upana gwake mita ibhele na nucho. Na kimo chake mita jhimo na lobo. 2 Mu kila kimbokotole chehemo jheniye pa kupiikiya litambiko, ntendekeye imbetule ipakubhehe kilebhe chimo nu chehemo jhenie pa kupiikiya litambiko. Chehemo jhoha nkilima shaba. 3 Ntendekeya yombo yake, ibhegha yukukengela malio na lichepeto kujhole malio na mabakule yukulelela na hyoma yukughalambukii nyama na ijhonjo yukujhipulii mwotu. Yombo yoha yenio ntendekeya kwa shaba. 4 Peniya, chehemo pakupiikiya litambiko lwenio ntendekeye lwaho lwa shaba na kunhwalicha pete ncheche, jhimo mu kila kimbetule. 5 Lwaho lwenio namubheka pahe jha luminiko kupala uhikila pakate jha chehemo pakupiikiya litambiko jhenie. 6 Hele, ntendekeya mighomba jha nchegha jhikugheghe chehemo pa kupiikiya litambiko na jhenio mikilima kwa shaba. 7 Mighomba jhenio mijhingiya ikobhokelo yenie kila upande chehemo pakupiikiya litambiko, kipinde chukughegha. 8 Ntendekeya chehemo pa kupiikiya litambiko kwa mbau na nkate jhake libhaa hwaa, tela na nnandanikilo ghuninangiya kukitombe kola."

9 "Ntengenecha lwane lwa Lihema lya nyahinyahi lya kukonganikila. Upande gwa kuchine cha lwane kubhaha na ngobho jhitengenichwe kwa ngobho nhuo jhina kuhalala, ibhaha na utandamaho gwa mita makome ncheche na ncheche kuupandi ghumo. 10 Mapanjiya gheniya ghakamulilwa na heke makome mabhele gha shaba na itamilo ya shaba. Nambo itabhilo yake na ikobhekelo itendekilwe kwa madine gha feza. 11 Ibhaha hele naha kwa upandi gwa kachikachine, utandamaho gwa mapanjiya mita makome ncheche na ncheche, na heke jhake makome mabhele ya chaba, nambo ikobhokelo yake naibhaha ya madine gha feza. 12 Upandi ghulitipikii lyobha mu lihema lya kukonganikila kubhaha na lwalo lwa mita makome mabhele niibhele na chabine nunhwano na heke yake kome na itamilo yake kome. 13 Upandi ghulihumii lyobha kubhii nnyango, lipanjiya libhaha na upana gwa mita makome mabhele niibhele. 14 Lipanjiya lya upandi ghumo gwa nnyango ubhaha nuupana gwa mita chita na nucho, pamonga na heke itato na itamilo yake itato. 15 Hele, upandi gwa ubhele gwa nnyango, lipanjiya lyake libhaha mita chita na nucho, pamonga na heke itato na itamilo yake itato. 16 Nnyango gwenio gwa kujhingili mu lwane ubhaha na lipanjiya, kutandamala kwake mita ticha, ngobho nhuo jhina kuhalala hake jhilembelekiwe kwa ngojhe ya lange jha buluu na chambalau na ngele. Lipanjiya lyenie likamuliwa na heke ncheche na itamilo ncheche. 17 Heke yoha kutindii lwane ikamulilwa na mighomba jha feza, itabhilo yake ibhaha ya feza na itamilo yake ibhaha ya shaba. 18 Lwane jhenie kutandamala kwake kubhaha mita makome ncheche na ncheche, ujhanuko gwake mita makome mabhele niibhele na ukolongwa gwake mita ibhele na nucho. Lipanjiya lyake libhaha lya ngobho nhuo jhina kuhalala na itamilo ya shaba. 19 Yombo yoha yukutumii mu Lihema lya kukonganikila, pamonga na ighinge yoha ya lwane ipalwa ibha ya shaba."

20 "Malaghila Akaichilahele bhannetela mahuta ghighajhaka mbone hake gha micheitune, kunhwalo gwa mule, kupala mule ijhaka machiko ghoha ghangapeta. 21 Alune na yana yake bhabheka mule jhenie upandi gwa panja gwa lipanjiya, palonge jha Lichanduko lya Lilaghano, nkate jhake ibhi ipande ya maghanga ghighajhandikwe mihilo. Mule yene ijhaka muda ghoha kutumbuli kimiye ade lukela. Akaichilahele bhoha na ibheluko yabhe bhaukamula nhwilo ghongo machiko ghoha ghangapeta."