1 Lichiko limo Mucha akibha alucha lilongo lya mambelele lya nkoano mundo, Yetulo mpiya litambiko jwa ku Mediane. Mucha ngalilongocha lilongo lyene ade kunjenga, ngahika kukitombe chuku Holebu, kitombe cha Chapanga. 2 Peniya ntumiche jwa kunane jwa Chapanga ngampitila Mucha kupete lulime lwa mwotu panakate jha kiheghejha. Mucha ngalola na ngakangicha pakiheghejha pijhaka mwotu na pitinika jhe. 3 Mucha ngahechwika na kulonge, "Chenje ndi kilebhe cha kukangacha hake! Kiheghejha kijhaka mwotu nambo kitinika jhe, denda ningukiye maha."

4 Chapanga palola kubhehe Mucha aghalambwike kukilingulii kiheghejha, ngankemita kubhoke pena, "Mucha! Mucha!"

Mucha ngajhangwila.

"Mii pamba!"

5 Chapanga nganobholela, "Nkoto kuheghele pamba na hula maghubache ghino, nhwalo chehemo jhanyemite ndi jha nyahinyahi." 6 Peniya Chapanga ngannobholela Mucha, "Nenga ndi Chapanga jwa tate gwino ndi Chapanga jwa Ulahimo ndi Chapanga jwa Ichaka ndi Chapanga jwa Yakobu." Mucha pajhohina gheniya ngayekilila kumiho kwake, nhwalo ajhogwipa kunninguli Chapanga.

7 Peniya Bhambo Chapanga ngalongila, "Nighabwene mang'ahe gha bhando bhango bhibhabhi Ku Michile na nyohine kulela kwabhe, nhwalo gwa bhibhang'aha bhena bhibhajhemelela mahengo ghabhe. Na nenga nighamanye mang'ahe ghabhe, 8 bhahe nhulwike kwakombola mu mang'ahe gha Akamichile, nimmohe mu kilambo chene na kumpeleka kukilambo cha maha na kikolongwa, kilambo chikibholile na yamaha kulema na kukoleka. Kilambo cha Akakanane na Akaahite na Akaamole na Akapeliche na Akahive na Akayebuche na ngohe bhitama Akayebuche. 9 Chakaka kulela kwa Akaichilahele kunhikile, na nenga mwene chiming'awa na Akamichile. 10 Ngohe nanintuma kwa munanhota nkolongwa Falao, kupala makabhohe bhando bhango, kubhoka mu kilambo chuku Michile."

11 Nambo Mucha ngannyangwila Chapanga, "Ne meneke ade nyende kwa Falao kwabhoha Akaichilahele ku Michile?"

12 Nambo Chapanga ngajhendilila kunnobholela, "Nenga namma pamonga na mwenga. Chamwabhoha Akaichilahele na kuhika kunnyinamii nenga Chapanga pa kitombe chenje. Chene naibha nginyililo ngolongwa kubhehe nenga Chapanga ndi jhunitumite."

13 Nambo Mucha ngannyangwila kabhele, "Anda najhendi Akaichilahele na kwalobhole, ‘Chapanga jwa tate gwino andumite kwino,’ nabhene nabhangonya, ‘Ikemwa ghane?’ Nalobholela nike?"

14 Chapanga ngannobholila Mucha, "NENGA NDI JHUMILE. Yene mwalobholela Akaichilahele bhoha. Jwajho Jwaikemwa, NENGA JHUMILE, ndi jwandumite kwino."

15 Hele, Chapanga ngannobholela Mucha, mwalobholela Akaichilahele kubhehe, Bhambo Chapanga jwa Ulahimo na Chapanga jwa Ichaka na Chapanga jwa Yakobu, andumite kwino. Lyene ndi liina lyango machiko ghoha ghangapeta, na ndi chibhangomboka mu ibheluko yoha. 16 Nnyende makakonganiche ighogholo ya Akaichilahele na kwalobhole Chapanga jwa tate gwino, Chapanga jwa Ulahimo, jwa Ichaka, jwa Yakobu, ambitile na kunobholela ningukii na kulola gheniya ghimitendelwa kwenio ku Michile. 17 Nilaghi kubhehe nanimmoha mu malagho ghino, kwenio ku Michile na kumpeleka mu kilambo cha Akakanane na Akaahite na Akaamole na Akapeliche na Akahive na Akayebuche, chinimpeleka mu kilambo chikibholile na chamaha kukoleka na kulema.

18 Bhene nabhanyokanakiya, pena mwenga na ighogho na munyendela munanhota nkolongwa jwa ku Michile na kunnobholela, Bhambo Chapanga, Chapanga jwa Akaebulaniya atupitile. Ngohe tunyopa nyeketele tujhende kunjenga tukatame kwa machiko matato, tukampii litambiko Bhambo Chapanga gwito. 19 Nambo nimanya kubhehe munanhota nkolongwa jwa ku Michile nanekekeya jhe nnyende ade achokelekewe. 20 Yene nahatambula lubhoko lwango kwabula Akamichile kwa ikangacho yimbandenda pakate jhabhe. Pughapetita gheniya munanhota nkolongwa nanekekeya nnyendengane.

21 Kabhele chanatenda Akamichile bhapale Akaichilahele, na kwenio ku Michile nammoke jhe jhajhe. 22 Kila mwikeghe Mwichilahele nannyopa nkoche mundo Mmichile na mwikeghe jhojhoha jwaitama pakajhake ampe yombo ya feza na chaabo pamonga ngobho. Mawalika bhana bhino na akachikana bhino. Yene ndi chimwapoka Akamichile ilebhe yabhe.