1 Bezaleli na Oliabo ngabhanchone Alune ngobho ya lembulembu kwa kutumii nyuche ya mangoma gha mambelele gha lange jha buluu, chambalau na ngele Alune ngobho yukuntumikii chegele hemo jha nyahinyahi Bhambo Chapanga mu Lihema lilibhi Nyahinyahi, ngita pannaghila Mucha.

2 Ngabhanchone kichibao kwa ngobho nhuo mbuu kulembelekeya kwa nyuche ya chaabo na mangoma gha mambelele gha lange jha buluu na chambalau na ngele. 3 Ngabhayanita chaabo nu kueketa nyuche inying'inyile kupala kuloka pamonga na nyuche ya lange jha buluu, ya chambalau na ngele, nu koloka nyuche yenio kuupunde mu ngobho nhuo mbuu. 4 Kichibao chenie kiwalilwa na luhunga ibhele mu malombolo ghake mabhele kupala kuitabha mumabhegha. 5 Luhunga lulukamulila kwa upunde panane jhake kupala kutabha lukibha kilebhe chimo telatela na kichibao chenio, na ngalutenganichwa kwa ilebhe yeye, chaabo, nyuche ya buluu, na chambalau na ngele, nu kulembelekeya mu ngobho nhuo mbuu kukolokwa, ngita Bhambo Chapanga channaghila Mucha. 6 Peniya, ngabhaleta maghanga gha sadolunike nu kubheka ikobhokelo ya chaabo. Na panane jha maghanga gheniya ngibhajhandika maina kome na mabhele gha yana ya Yakobu, ngita muhule chiujhandikwa. 7 Ngabhabheka ilebhe yenie mu luhunga lwa mumabhegha gha kichibao chenio, kupala kombokela yana kome na ibhele ya Yakobu, ngita Bhambo Chapanga channaghila Mucha.

8 Mapunde ngibhatenginicha kimpuko ka panganga ngita chibhatenginicha kichibao, kwa ngobho nhuo mbuu nu kulembelekeya chaabo na nyuche ya lange jha buluu na lange jha chambalau na lange ngele. 9 Kipuko chenio ngakikonjitwa na kikibha na pande ncheche ilenganila, utandamaho na upana gwake ukibha chentimita makome mabhele na ibhele. 10 Kampuko keniya kikalembelikiwii ku michitale ncheche jha maghanga gha bei ngolongwa, nchitale ghukutumbula ukibha gwa maghanga gha akiki na topache na alumache ngele, 11 nchitale gwu ubhele ukibha na madine gha chumalide na maghanga gha jhohale gha lange jha samawate na alumache, 12 nchitale gwa utato ukibha na maghanga gha yachito, jha akiki ngele na amesisito, 13 na nchitale gwa ncheche ukibha gwa maghanga gha zabalajade, ya chohamu na yasipe, ghoha ngaghabhekitwa muibanilo ya chaabo. 14 Bhahe, pakibha na maghanga kome na mabhele ghighandikwe mahina kome na mabhele gha yana ya Yakobu. Ghakibha ghajhandikwe ngita pibhajhandika muhule, kila lighanga likajhandikwe liina limo kombokela yana kome na ibhele. 15 Ngabhatenginicha mikupo jha chaabo jhambone kunhwalo gwa kampuko ka panganga. 16 Ngabhatenginicha ibanilo ibhele ya chaabo, nu kubheka pete yene mumalombolo mabhele ghu kunane gha kampuko keniya. 17 Mikupo mibhele jha chaabo jhenio ngabhabanila mupete yenio mukampuko ka panganga. 18 Nyenja ibhele yela jha imikupu ya chaabo ngalombanicha muibainilo ibhele hela ngibhibheka ikamulane na ipande ibhele yumabhegha ya kichibao, upande gwa nnonge. 19 Ngabhatenginicha pete henge ibhele ya chaabo upande gwa pahe nkate jha kichibao chenio, na kubheka palonge munyenje ibhele ya pahe jha kichibao, chehemo jhilombanicha nu luhunga lola lululokwitwe kwa upunde hake. 20 Peniya ngabhatengenecha pete henge ibhele ya chaabo nu kubheka nnonge munyenje ya pahe muipande kichibao, chehemo pukulombanicha na luhunga lukoloka ku upunde hake. 21 Ngabhatabhita kimpuko cha panganga panane pikichibao na kulombanicha na pete ya kichibao ku lughojhe lwa lange jha buluu, kupala kampuko keniya kangamboghombala jhe nambo kitamii luhunga lululokitwe ku upunde hake, ngita Bhambo Chapanga channaghila Mucha.

22 Ngabhatendekeya likanjo lya lange jha kibuluu jhu kuwalii nkate jha kichibao. 23 Likanjo lyenie ikibha na chehemo jha kupeteche muto panakate, na jhenie ngabhatindikiya lupendecho lwa koloka kupala ingajhepuka jhe. 24 Muminiko jha pahe jha likanjo ngabhapuma malembelekeo gha makongamanga gha lange jha buluu, ya chambalau na lange ngele, na ngobho nhuo mbuu. 25 Peniya ngabhatendekeya mangengecha gha chaabo, na ngabhajhepanicha likomamanga limo na lingengecha limo kutindii muminiko jha likanjo lyenio. 26 Yene, mangengecha na likomamanga ngighakengamana kutindi miniko jha likanjo lyenio, ngita Bhambo Chapanga pannaghalikila Mucha.

27 Hele ngabhachonila magwanda Alune na yanamundo likote lya ngobho nhuo ya mbuu. 28 Kwa kitambala kinhuo ngabhatenginicha kilemba na kopiya na kaputula kukolokwa, 29 na hunga ya nyuche nhuo mbuu yukolokwa kwa nyuche ya lange jha kibuluu na chambalau na ngele nu kolokwa kukulembekeya, ngita Bhambo Chapanga channaghila Mucha. 30 Peniya, ngabhatenginicha kibate cha chaabo ku nhwalo jha hingo jha nyahinyahi na kujhandika panane jhake ngita punde jwatendekeya muhuli, "Jwapihitwe kwa Bhambo Chapanga." 31 Ngibhatabhalila nnonge jha kilemba kulughojhe lwa lange jha kibuluu, ngita Bhambo Chapanga pannaghila Mucha.

32 Bhahe, lihengo lyoha lyukutengenecha Lihema li Nyahinyahi ngibhajhomolila. Akaichilahele ngabhajhomolila ghoha ngita Bhambo Chapanga channaghila Mucha. 33 Ngabhannetila Mucha Lihema li Nyahinyahi na yombo yake yoha, itabhilo yake na mafelemo ghake na mbaghalo yake na heke yake na itamilo yake, 34 na kiyekelelo chikitendekwii kwa mambendela gha mambelele ghankambaku na mbuhe kikilimwe lange ngele, lipanjiya lya Chehemo Jha Nyahinyahi, 35 lichanduko lya Lilaghano, na heke jha nchegha jhukugheghe na kiyekelelo chake, 36 mecha na yombo yake yoha, na mabumunda jhiipiitwa palonge jha Bhambo Chapanga, 37 kilebhe cha chaabo jhambone jhukubheke mule na mule yake na yombo yake yoha pamonga na mahuta gha mule, 38 lichanduko lya chaabo na mahuta ghukupakaya na ubane ghununguli petelele, lipanjiya lya nnyango gwa Lihema li Nyahinyahi, 39 lichanduko likupiikiya matambiko cha shaba na lwaho lwake lwa shaba, mighomba jhake na yombo yake yoha, na libakule likolongwa na kitamilo chake, 40 mapanjiya gha lwane na heke yake na itamilo yake na lipanjiya lya nnyango gwa lwane na ngojhe yake na ighinge yake na yombo yoha ipakutumika mu Lihema li Nyahinyahi, 41 na ngobho yoha ilokwitwe maha hake nhwalo ghu kutumikii Chehemo Jha Nyahinyahi, yane ngobho ya nyahinyahi ya mpiya litambiko Alune, na yana mundo kwa lihengo lyenio lya upiya litambiko. 42 Akaichilahele ngabhateila kila kilebhe ngita Bhambo Chapanga pannaghila Mucha. 43 Mucha ngakagwila kila kilebhe, na ngamanya kubhehe bhakibha bhatehi kila kilebhe ngita Bhambo Chapanga chalaghila. Yene Mucha ngabhajhope mota kwa Chapanga.