1 Bhambo Chapanga ngannobholila Mucha, 2 "Malobholele Akaichilahele bhalete hupo, na mwenga nampokela. Nampokela kuhumii kwa bhando bhibhapiya changakangwa. 3 Mpokela hupo henge, chaabo na madine gha feza na Shaba, 4 luche itengenichwe kwa mangoma gha mambelele gha lange jha buluu na chambalao, na ngele na ngobho nhuu ina kuhalala na ngobho itengenichwe kwa mangoma gha mbuhe, 5 na mambendela gha kinyama chu umbwane chkikiemwa mupomboo ghighapakwii lange ngele na mambendela gha mbuhe na mbau jha nkongo ghukemwa nchhita, 6 na mahuta ku nhwalo jha mule na ndimbililo ya mahuta ghukupakaya nu ubane ghukunungila petelele, 7 na maghanga gha bei ngolongwa ghighakemwa shohamo na maghanga ghange, ku nhwalo jha kulembelekeya ngobho jhawala mpiya litambiko panganga na kinpuko cha panganga. 8 Helahela Akaichilahele bhatengenecha Lihema li Nyahinyahi, kupala nenga ndame panakate jhabhe. 9 Ntengenecha Lihema lyenio na ilebhe yake yoha ngita limbakunnangiya."

10 Akaichilahele bhatengenecha lichanduko lya mbau ya nchita, lilibhii na utandamaho gwake ubhaha chentimeta miya jhimo na likome limo na upana gwake chentimita chitine na chita na kukola kwake kubhaha chentimita chitine na chita. 11 Milikilima lichanduko lyenie kwa chaabo jhambone nkate na panja nu kulibhinikila chaabo chehemo jhoha. 12 Peniya militengenechela pete ncheche nu kuwalicha mu makongono ghake, kila lukongono pete jhimo. 13 Ntengenecha nchegha gwa nnchita nu kukilima chaabo. 14 Michegha jhenio mijhingiya mu pete ibhii pande ibhele ya lichanduko, nhwalo gwa kugheghela lyenio Lichanduko. 15 Michegha jhenie iighala momo mu pete, jhangabhoka ng'o mwenio. 16 Nkate jha lichanduko lyenie mmeka ibao ibhele ya maghanga imbakumpe, inyandike mihilo jhango.

17 "Peniya, panane jha lichanduko ntendekeya kiyekelelo cha chaabo jhamaha chikibhii na utandamalo gwake chentimita miya jhimo na likome limo nupana gwake chentimita chitine na chita nuutandamalo gwake chentimita chetine na chita. 18 Helahela nantendekeya ulandano gwa ihumbe ibhele ina mapapanilo kukuyana mukipala, ikemwa makelube, mibheka mujhomokelo gwa kiyekelo kongo na kongo. 19 Kihumbe chimo kukijhomokela kiyekelelo na chenge kukijhomokela. Mibheka ihumbe yenio ilombane mujhomokelo mu kiyekelo, bhabha kilebhe chimo na chenie kiyekelelo chenio kongo na kongo. 20 Ihumbe yenio nailoleyana, mapapanilo ghake ghabhaha anda ghimbuluka na kughubika kiyekelelo, miho ghabhe ghalolekeya kiyekelelo chenie. 21 Nkate jha lichanduko mmeka ibao ibhele ya maghanga nu kubheka kiyekelelo panane jhake. 22 Nenga nangongana na mwenga peniya, nu kubhoka panane jha kiyekelelo chenie panakate jha ihumbe yenio ibhii panane jha lichanduko, nanongela namwenga peniya nu kumpe mihilo jhoha jha kwalobholela Akaichilahele.

23 "Ntengenecha mecha jha nkongo gwa nchita, kutandamala kwake kubhaha chentimita makome nane na nane na upana gwake chentimita makome ncheche na ncheche na ukolongwa gwake chentimita chitine na chita. 24 Mecha jhenie muikilima chaabo jhambone na kutindikii lubiniko lwa chaabo chehemo jhoha. 25 Peniya, ntindikiya ntengo ghu ubao gwake chentimita chitine na chita, kupala ilebhe yangagwe pahe jhe, kubhoka peniya nkilima chaabo jhambone chehemo jhoha. 26 Mitengenechela pete ncheche ya chaabo na kuijhingiya muimbokotole yoha mu makongono ghake. 27 Pete yenie ibhaha pahina na nkoghoto ghutindii mecha na ibhaha yukamulii nchegha jhukugheghe mecha jhenio. 28 Ntengenecha nchegha jha nkongo gwa nchita nu kupakaya chaabo, michegha jhenie ibhaha jhukugheghe mecha. 29 Ntengenecha chaane na ikombe yukubheke ubane pamecha na majhage na yombo yukubhekela matambiko ghukunywegha. Yombo yenio yoha ntendekeya kwa chaabo jhambone. 30 Mecha jhenio mibheka nnonge jha lichanduko lya lilaghano, na panane jha mecha jhenie mmeka mabumunda ghala ghighapiitwa litambiko palonge jhango, machiko ghoha ghangapeta.

31 "Ntengenecha kilebhe chukubheke lumule kwa chaabo jhambone. Kinala chake na kijhemo chake kibhaha kilebhe chimo, ndambi ya kilebhe chenio ndi ikombe yukubheke mahuta na itumba ya malobha ghake, yoha iyanwa mu kilebhe chimo tugha cha chaabo. 32 Mandabhe chita ipitila kila upande gwa kijhemo, mandabhe matato upande ghumo na ndambe itato ghonge upande. 33 Mu kila lutambe kubhaha ikombe itato ilandana ngita malobha gha mlozi, kila lutambe lumo lundumbache lwake na lilobha lyake. 34 Na mu kijhemo chenio kubhaha ikombe ncheche ilandana na malobha gha mlozi, pamonga na ndumbache yake ya malobha. 35 Panakate puipitii mandabhe ghala chita, pahe jhake pabhaha na kihundo chimochimo. 36 Ihundo yenie na mandabhe ghake ibhaha kilebhe chimo na kilebhe chenio, na choha kiyanwa kwa chaabo jhambone. 37 Helahela ntengenecha mule chaba nhwalo jha kilebhe chenie nu kubheka panane jhake kupala imulikila nnonge. 38 Hele ntengenecha nkache nchokombe ghukupiikiya utambe na yahane yakubhehe liho kwa chaabo jhambone. 39 Ntumiya kilo makome matato nu nhwano jha chaabo jhambone kutendekeya kilebhe chenio na yombo yake. 40 Chakaka ntendekeya maha tela na chinnaghalikilwa kukitombe kola"