1 "Ghanga ndi malaghalikilo ghimipalwa malobholela Akaichilahele. 2 Anda munhemile mmanda Mwibulaniya nantumikila kwa yaka chita, nambo chaka cha chaba nabhaa mahulo nu kubhoka changa malepo ghoghoha. 3 Anda anhemililwa changatolela mwikeghe, abhoka kanjika. Nambo anda ahikita nu nhwana mundo, abhoka nuhwanamundo. 4 Anda munahota gwake akantolekii mwikeghe, nu kupata yana ikeghe pange jhe inalome, bhahe, mwikeghe jwenio na yana yake nabhaha ya munahota gwake, na mmanda jwenio nabhoka kanjika. 5 Nambo mmanda jwenio anda alongi, nimpala munahota gwake, nu nhwana mundo na yana yake anda mbaijhe kujhenda nukubhehe mahulo, 6 bhahe, munahota gwake ampeleka chehemo palonge jha Chapanga. Kwenio najhemekwa pannyango nukuhotola lichikilo lyake kwa luchungulo. Jwenio najhendelela kubhehe mmanda utamo gwake gwoha."

7 Mundo anda anchulwiche kamwale gwake kubhehe mmanda, kamwale jwenio nalekekelwa jhe mahulo ngita chibhabhehe akabhanda akanalome. 8 Anda munahota jwenio jwanhemile abhaha jhumo jwa akakeghe bhake, peniya ngalekita kumpala, munahota jwenio nannekela tate gwake ankombole. Munahota jwenio ahoto jhe kunchulucha kwa bhando bha ilambo henge, nhwalo nahobholeka jhe. 9 Anda mundo anhemile mmanda mwikeghe nu kuntolanikiya mwana mundo, jwanhemile kamwale jwenio antendela ngita mwana mundo. 10 Anda antolii mwikeghe jhonge, angaleka jhe kumpe chakulya nhwanamundo jhukutumbula na ngobho nukujhendele kugholoka nako ngita chateila pibhatolina. 11 Anda nu kumpe jhe mambu gheniya matato, bhahe, mwikeghe jwenio akibhokela nu kubhehe mahulo changamalepo ghoghoha.

12 "Mundo jhojhoha jwambula nnyake nu kunkoma na jwenie ipalwa akomwa. 13 Nambo anda ntei kwa namii jhe, peniya nkoma jwenio atilila chehemo pinipahagwile kupala abhaha ghome kwenio. 14 Nambo mundo anda anyingilile namiye nu kunkoma, ata abhutukila chehemo jha kupiikiya litambiko, mumwoye kwenio nu munkome.

15 "Mundo jhojhoha jwapakumbula tate mundo amu majhemundo, ipalwa akomwa.

16 "Jwampukii mundo kupala kunchulucha nu kuntenda mmanda gwake, ipalwa akomwa.

17 "Jhojhoha jwannyope likoto tate mundo amu majhe mundo, ipalwa akomwa.

18 "Anda bhando bhabhele bhakomine, na jhumo ambulite nnyake kwa lighanga amu lingume changankoma, nambo ankocholine ade kulwalwa nu kugholoka pakindanda, 19 anda jwenio jwambulitwe abhiinjelembo pandina na kuhoto kuchepelela kwa nkongocho, jwenio jwakochuline nnyake nalekekewa. Nambo nanepa machiko ghagholwike pikindanda, na ipalwa anwaha ade papa kulama.

20 "Anda mundo ambulite mmanda gwake munalome anda jhe mwikeghe kwa luyato nu kunkoma papa, ipalwa ahadabulwa. 21 Nambo mmanda jwenio abhii ghome kwa lichiko limo amu mabhele, munahota gwake nahadabulwa jhe. Nhwalo kunwaha mmanda jwenio tela nukuhadabulwa."

22 Anda akanalome bhakomine nu kunkocholana mwikeghe jhuna ndumbo ade ndumbo jhake kuhangabhika, panga kibhengo chenge, jhola jwankochwile mwikeghe jwenio nalepechwa malepo ngita chapala unganamundo na nnyomola mihalo chapakunhadabula. 23 Nambo anda ghapitii indokole henge kwa mwikeghe jwenio, jwatei gheniya malepo ghake ughome kwa ughome. 24 liho kwa liho na lino kwa lino na lubhoko kwa lubhoko na lugholo kwa lugholo, 25 kujhochwa mwotu kwa kujhochwa mwotu na libhanga kwa libhanga na lindulumiya kwa lindulumiya.

26 Mundo anda ambulite mmanda gwake munalome amu mwikeghe nu kulihangabhana liho lyake, annekekeya mahulo ngita malepo gha liho lyake. 27 Hele, anda ambulite ade kunkolopola lino mmanda gwake munalome amu mwikeghe, annekekeya mahulo kwa kunnepa kunhwalo jha lino lyake.

28 Ng'ombi anda ankungite mundo kwa linyelo nu kunkoma, ng'ombi jwenio nakomwa kwa maghanga na nyama jhake mangalye jhe. Nkolo ng'ombi nabhajhe na lilemwa. 29 Nambo anda ng'ombi jwenio ayobhalii kwakunga manyelo bhando, nkolo ng'ombi ngalobholilwa nambo ankongiti jhe, anda ng'ombi jwenio akomite mundo kabhele ade abhulwa maghanga na nkolo ng'ombi akomwa. 30 Nambo, mundo jwenio anda alepichwe malepo kupala kughombola ughome gwake, nkolo ng'ombi ipalwa alepa malepo ghoha ghighapalwa. 31 Ng'ombi anda ankungite manyelo mwana munalome amu mwikeghe, luhadabulo lwake lolo. 32 Anda ng'ombi ankungite manyelo mmanda munalome amu mwikeghe, nkolo ng'ombi nanepa nkolo mmanda jwenio mbijha ipande makome matato, na ng'ombi jwenio ipalwa akomwe kwa kubulwa maghanga.

33 Mundo anda alilekite libhomba lyangahyekelela amu ahembite libhomba ahyekelii jhe, peniya ng'ombi amu liponda litumbukile mwenio, 34 jwahembita libhomba, ipalwa annepa nkolo kinyama chenio, na kinyama chikiwile kibhaha chake jwenio jwahembite libhomba. 35 Ng'ombi jwa mundo anda ankungite ng'ombi jwa mundo jhonge nu kunkoma, pena, nabhachulucha ng'ombi jwabhii ghome jhola, nu kubhaghana mbijha yake, helahela nabhabhaghana nyama jha ng'ombi jwawii jhola. 36 Nambo anda ng'ombi jwenio akayobhalile kwakunga ajhabhe manyelo na nkolo ankongite jhe, nkolo ng'ombi ipalwa alepwa ng'ombi jhonge. Na ng'ombi jwawile nahighalika kubhehe jwake.