10 "Minmin nynh eri thing te thingkua kha a rae cih hae; tuh-e tuh asaepaw dong ning khaw kheit, akopaw dong kheit khaw kheit, ahangpaw dong kheit khaw kheit athua cih. 11 Tuh-e alungkhu te atolang kha sui ccipaw te na thei cih, po voilu lan sui te arae kha na mia cih zah na rae cih. 12 Sui bawtary ccangpali na rae cih zah thingkua apaki ki pali kyakhe, voikheit lang ze ccangning ccite na sae cih. 13 Eri thing kha puihnawpaw ccong lang na rae cih zah sui te na thei cih. 14 Te thingkua puih nawlan puihnawpaw ccong kha thingkua apaki kya umpaw sui bawtary hae lungkhu lang na ruh cih. 15 Puinawpaw ccong tuh thingkua kya-e sui bawtary hae kya po a um cih zah ccanglang na lah lan khyh. 16 Nang kae pya cih paw byakinnaw kha thingkua lungkhu na nung cih.

17 Dong ning khaw kheit sae zah dong kheit khaw kheit akopaw thingkua ahu kha sui ccipaw te na rae cih.✝ 18 Sui te raepaw cherubim ccangning kha na rae cih; tuh-e hae tuh thingkua ahu voikheit voikheit langkhe na deihping cih. 19 Thingkua hu voikheih lang dung khe cherubim ccangkheit, ccangpaw voikheit lang dung khe cherubim ccangkheit na rae cih zah, thingkua ahu dung san ning kyakhe cherubim hae kha na rae cih. 20 Cherubim hae tuh mih sake kha avawlan a daw cih hae zah thingkua ahu kha phang a bong cih hae. Mih mae tuh a hawiliakuh cih hae zah, thingkua hu kalan khe a do cih hae. 21 Ahu kha thingkua vawlan na khang cih zah, kae pya cih paw byakinnaw kha thingkua lungkhu na nung cih.

22 Tuin kya namaw te tungku lan, te ahu vawlan, byakin thingkua vawlan umpaw cherubim ccangning laku kyate Israel hae hanlan kaw kae pyapaw balyn kha kae pya cih.

1 Bezalel nynh eri thing te thingkua kha a rae; tuh-e tuh dong ning khoi asae, dong kheit khoi ko zah dong kheit khoi ahang.

1 Bawipaw nynh Moses kha hynhte a hopya: 2 Masaty sawpaw kya-e masaty nin kyakhe tungkunaw beikbu kha na sak cih. 3 Tuh-e beikbu lungkhu khe byakin thingkua kha na nung cih, te thingkua kha zokhawpaw boei khate na zokhaw cih.

20 Moses nynh byakinnaw kha lah zah thingkua lungkhu khe a sang, puihnawpaw ccong hae kha ruh hae zah ahu kha thingkua vawlan khe a hu; 21 te thingkua kha beikbu lungkhu lang teekhae zah zokhawpaw boei khate byakin thingkua kha phang a zokhaw; tuh-e tuh Bawipaw nynh kaw a pya thyhte Moses nynh a cyipaw nynh thua.

89 Moses nynh Bawipaw te byahoku khylan tungkunaw bu lungkhu lang he a tee te, byakin thingkua vawlan umpaw thawccinaw haungnaw luki, cherubim ccangning laku kyate amaw kalan a hopyapaw roi kha a thae; Tuhcite amaw kha a hopya.

33 Tuhcite minmin tuh Bawipaw mua kyate nin thum laanccia asawnaw lang a cceih hae, Bawipaw kya-e byakin thingkua tuh nin thum laanccia asawnaw mih malang khe minmin hanlan haeungnaw hmin ccung khylan a cceih ty, 34 ryahmin kyate he a cceih hae te, Bawipaw maeking tuh khuadae ccyh kya mih luki khe a um.

35 Tuh-e thingkua tuh he a ccia takyhte, Moses nynh,

"Pou Bawipaw , thoku tua, na rhaw hae tuh phiariphiarae um hae sah,✝

te na rhaw hae tuh na malang khe ccue hae sah," a ci.

36 Te thingkua tuh a haeung takyh vae ze, Moses nynh,

"Pou Israel athong patae hae Bawipaw , yn kitua," a ci.

1 Bawipaw nynh Moses kha, 2 "Israel hae kha hopah hae lah, mih puizia kya-e cciakhaetu hae balyn kyate puizia phu kheit cci hanlan hoitang ccangkheit ccite hoitang haw lae ning kha minmin kyate lawtua. Mih hoitang raveih kyakhe mih min kha ccarou zei lah, 3 Levi hoitang kyakhe Aaron min kha zeitua. Pawccecize puizia phu kheit cci kya-e lupi hae hanlan hoitang ccangkheit cci athua cih. 4 Tuh-e hoitang hae kha tungkunaw bu lungkhu, byakinnaw malang nang te ah tungkunaw khe nung hae. 5 Te ka popaw ccungccaw kya-e hoitang tuh anaw yn toih cih; tuhcite Israel hae nynh nang kha palei ae rawse hae zah ae ccohnuaku hae paw kha ka daesah cih," a cipya. 6 Moses nynh Israel hae kha a hopya hae; te mih cciakhaetu hae balyn nynh mih puizia thyhte, cciakhaetu lu kheit hanlan hoitang ccangkheit ccite, hoitang haw lae ning kha Moses kalan a pya hae; Aaron hoitang tuh mih hoitang hae kya a umbua. 7 Tukeiccuze Moses nynh hoitang hae kha ccaekiakhannaw bu lungkhu Bawipaw malang khe a nung hae.

8 Awkhualan khe Moses nynh ccaekiakhannaw bu lungkhu lang he a tee tuh, Levi phin kya-e Aaron hoitang tuh anaw phe la toih vae, apaw lungkuhpaw mah la um vae zah apaw phe la paw vae, te avoipaw almond thae hae kha la thae hae.✝ 9 Oute Moses nynh hoitang hae balyn kha Bawipaw malang kyate Israel hae balyn kalan a cciakhae; minmin nynh do hae zah mih hoitang raveih kha a lawku hae. 10 Te Bawipaw nynh Moses kha, "Rawsetu hae hanlan raeringnaw pyapaw lante Aaron hoitang kha byakinnaw malang khe bua nung; tuhteze nynh kae yn ccohnuaku hae paw kha na daesah kho cih, tuhkhyhze tuh a chihsei cih hae," a cipya. 11 Moses nynh tuhcite a cyi; Bawipaw nynh kaw a pya thathyhte a cyi.

14 Ccungccaw hae tuh Jordan vaw zua khylan mih bu kyate he a pou hae te, byakin thingkua a puihtu ranpibawi hae tuh ccungccaw hae malang a cceih hae. 15 Loohrue ccyh balyn kya Jordan vaw tuh varang lang cia pong aleikuh. Tukeiccuze byakin thingkua a puihtu hae tuh Jordan vaw thua hae zah, tuh-e a puihtu ranpibawi hae ccuphe nynh tui kha he a sy te, 16 palung langte aluapaw tui tuh phang thadyn zah, asawnaw umpaw Zerethan khua pe e Adam khua kyacia tui tuh san kheit kya atingkuh thung; Arabah rili cikuhpaw Rili Chih kalan alua hae paw tuh marya a kan hae; te ccungccaw hae tuh Jeriko khua langkhe hawite a zua hae. 17 Israel hae balyn tuh laerou kyate vaw khuraw a zua cciamang lya hae te minphuin pynpi nynh laerou kyate khuraw a zua kou hae makhia, Bawipaw byakin thingkua a puihtu ranpibawi hae tuh Jordan vaw angaelung laerou kyakhe phang a thadyn hae.

18 Bawipaw byakin thingkua a puihtu ranpibawi hae tuh Jordan vaw angaelung kyate pou hae zah, ranpibawi hae ccuphe nynh laerou kha he a sy te, Jordan vaw tuh a luamae hawte luathui zah, Jordan vaw tuh atakaw lya hawte varang lang balyn aleikuh vae.

1 Israel hae keiccuze Jeriko khua tuh alungkhu lang te thuasah, atolang te thuasah phang a khaw hae; tukeiccuze a poupaw te a teepaw humhung mah um khyh. 2 Bawipaw nynh Joshua kha, "Dotua, Jeriko khua tuh a siapharan te a rhawkaw hae ryte na kuih kya kae pya vae. 3 Khua kha na voilu cih oh, rhawkaw balyn nynh se kheit a voilu cih hae, tuhcite nin taruh lungkhu na cyih cih oh, 4 ranpibawi lu sari nynh byakin thingkua malang khe tuutepaw ki mungkae ccangsari kha a ccyngkuh cih hae. Nin sarinaw nin vae tuh khua kha vae sari na voilu cih oh, ranpibawi hae nynh mungkae kha a tu cih hae. 5 Minmin nynh tuutepaw ki kha tu hae zah, mungkae roi kha he na thae oh te, ccungccaw balyn nynh thawmawte a sia cih hae; te khua koihnawpaw khualungrua tuh marya a ting cih zah, ccungccaw hae balyn tuh lawbabin lan malang a cceih cih hae," a cipya. 6 Tukeiccuze Nun ccapaw Joshua nynh ranpibawi hae kha ko hae zah, "Byakin thingkua kha lah oh lah, Bawipaw byakin thingkua malang khe ranpibawi lu sari nynh tuutepaw ki ccangsari kha ccyng oh," a cipya hae. 7 Ccungccaw hae balyn kha mah, "Malang cceih oh lah, khuapi kha voilu oh, zunghe a ccyngkuh hae paw kha Bawipaw byakin thingkua malang cceih oh," a cipya hae.

20 Tukeiccuze ccungccaw hae tuh sia hae zah mungkae kha a tu hae. Ccungccaw hae nynh mungkae roi kha he a thae takaw hae te, thawte sia hae zah khualungrua tuh marya a ting; tukeiccuze ccungccaw hae tuh khua lungkhu lang lawbabin lan tee hae zah khua kha a law hae.✝

2 Filistin hae tuh Israel hae kha dou khylan atantante um hae zah, rhaw he a tuk hae tuh Filistin hae nynh Israel hae kha tae hae zah, rhawtuknaw hmin kya thong pali loukaw a chih hae. 3 Rhawkaw hae tuh ryahmin kalan he oun thua hae te, Israel piccan hae nynh, "Pawccemou atunin kya Bawipaw nynh Filistin hae malang khe rhaw oun shungsah? Bawipaw tuh aening kalan yn cceih zah ah rhaw hae thungnaw kyate oun khum nawlan, Bawipaw byakin thingkua kha Shiloh khua kyate hynh-e kalan cciakhae oh sih," a ci hae. 4 Tukeiccuze Shiloh khua langkhe ccungccaw saw hae zah, cherubim laku kya umpaw vaaw Bawipaw byakin thingkua tuh tuin kyate a cciakhae hae. Eli ccapaw hae lu ning Hofni te Finehas tuh Pachia byakin thingkua ryte a um hae.✝

5 Bawipaw byakin thingkua tuh ryahmin kalan he a thuakhae hae te, Israel hae balyn tuh laephi phe thyh lan thawte a sia hae. 6 Tuh-e a siarua hae paw roi kha Filistin hae nynh he a thae hae tuh, "Hebru hae ryahmin kya tuhcite thawte a siarua hae paw tuh paw suilan mou athua?" a ci hae. Minmin nynh Bawipaw byakin thingkua tuh ryahmin kya a thua vae cipaw he a nyh hae te, 7 Filistin hae tuh rih hae zah, "Mih ryahmin kya pachia hae a thua vae hae," a ci hae. Te minmin nynh, "Aening hanlan ngaethya lan kou um! Pawccecize hynhcihawpaw hynh langmawlya cyihkuh boi khyh. 8 Aening hanlan ngaethya lan kou um! E athungpaw pachia hae huhan kyate hum nynh mou oun luesah kho cih? E hae tuh ramkaw kya Izip hae kha shethya aphuinphuin te a theih hae paw pachia hae nynh thua hae. 9 Pou Filistin hae, nae rawthung sah lah, pisepuisaku tua oh, Hebru hae tuh nae see lang a la tang hae hawte, minmin see lang na tang khyh nawlan oh, pisepuisakuh oh lah, rhawtuk oh," a ci hae.

10 Tukeiccuze Filistin hae nynh a tuk hae; Israel hae tuh shung hae zah mimaw inn raveih lang a ccue hae. Myarya lepaw chiakunaw um zah, Israel ccu rhawkaw thong sung thum a chih hae. 11 Pachia thingkua kha a lua hae; Eli ccapaw hae lu ning Hofni te Finehas tuh a chih hae.

6 Ashdod khuaccaaw hae kha Bawipaw kuih nynh vawsaw a pya hae, Ashdod khua te a pepan um hae paw kha mih thinphangsah hae zah balyh ccinaw te vawsaw a pya hae. 7 Ashdod khuaccaaw hae nynh uccaw a umtuzia kha he a muih hae tuh, minmin nynh, "Israel Pachia thingkua a thungnaw nynh aening tungvaw te ah pachia Dagon tungvaw kya vawsaw oun pya keiccuze tuh-e thingkua tuh aening kya a um lanpaw thua khyh," a ci hae. 8 Tukeiccuze ccungccaw sawte Filistin bawi hae balyn kha pum hae zah, "Israel Pachia thingkua hynh pawtemou ah cyih cih oh?" a ci hae. Gath khuaccaaw hae nynh, "Pachia thingkua tuh kaening kalan nue thua sah," a ci hae. Tukeiccuze minmin nynh Israel Pachia thingkua kha Gath khua lang a nue hae. 9 Thuasalama Gath khua lang a cciakhae kou hae te, Bawipaw kuih nynh tuh-e khua tuh rawse zah myarya lepaw siikunaw kha a umsah; khuaccaaw hae adih ale balyn kha detah hae zah balyh te a ccisah hae. 10 Tukeiccuze Israel Pachia thingkua kha Ekron khua lang a ky hae. Pachia thingkua tuh tuin khua kya he a thua te, Ekron khuaccaaw hae nynh, "Kaening te kae ccungccaw hae hynh chia khylan Israel Pachia thingkua tuh pawccemou kae kalan oun cciakhae hae?" cite a sia hae. 11 Tukeiccuze ccungccaw sawte Filistin bawi hae balyn kha pum hae zah, "Israel Pachia thingkua hynh ccanglang ky oh, kaening te kae ccungccaw hae hynh oun chia khyh nawlan amaw a umnaw hmin lang kisah oh," a ci hae. Pawccecize khua pynpi kya chinawpaw siikunaw a um. Pachia kuih nynh tuin kya vawsaw myarya a pya hae;

1 Bawipaw thingkua tuh Filistin ram kya sawpaw sah sari a um. 2 Te Filistin hae nynh ranpibawi hae te apawe hae paw kha ko hae zah, "Bawipaw thingkua hynh pawtemou kae cyih cih? A umnaw langkhe paw uccaw te mou kae kyde cih cipaw oun hopya tua oh," a cipya hae. 3 Minmin nynh, "Israel Pachia thingkua kha na ky oh ze, amaw makhaete ky nan oh, cyiseinaw silawnaw khate kisah oh. Tetuh nae ngedan cih zah shawkhaw na thua cih oh," a ci hae.

10 Ccungccaw hae nynh tuhcite a cyi hae; matei zukuhpaw vaetua pinung sa ning kha vaetuale taphu khang hae zah, mih taw hae kha inn kya a khung hae. 11 Bawipaw thingkua ryte sui te raekuhpaw mih balyh azuh hae te sui pazu hae a nungnaw hae paw thingkua kha vaetuale vawlan a khang hae. 12 Vaetua hae tuh Beth-shemesh laanpi langkhe lawbabin lan sia biate a cceih hae; voilang ranglang maekuh khyh hae, Filistin bawi hae nynh Beth-shemesh ramri cia a zui hae.

13 Beth-shemesh khuaccaaw hae tuh accya kya mih chanvuih a rue cciamang hae. Ngawdo hae zah thingkua kha he a muih hae tuh, lungpawte a cciadue hae. 14 Vaetuale tuh Beth-shemesh khuapaw Joshua loo lungkhu lang tee zah tuin kya a thadyn. Tuin kya lungtungpi a um; vaetuale thingphe kha koi hae zah vaetua hae kha Bawipaw kalan maee-ute silawnaw lang a mang hae. 15 Levi phin hae nynh Bawipaw thingkua te a pe umpaw thingkua, sui uccaw hae a umnahpaw kha lah hae zah, lungtungpi vawlan a nung hae. Te Beth-shemesh khuaccaaw hae nynh maee-ute silawnaw kha rae hae zah, tuin nin khe Bawipaw kalan silawnaw a rae hae.

1 Te Kiriath-jearim khuaccaaw hae nynh oun cceih hae zah Bawipaw thingkua kha lah hae zah, mua vaw umpaw Abinadab inn langkhe a cciakhae hae. Minmin nynh Bawipaw thingkua a do-oihtu lang Abinadab ccapaw Eleazar kha a thyaasah hae.✝

2 Kiriath-jearim khua kyakhe tuh-e thingkua a thua nin kyate ccyh hynhsepi cia, kum kuin loukaw a um; te Israel hae balyn nynh Bawipaw kalan bawmnaw mue khylan a sia hae.

12 "Pachia thingkua liate Obed-edom a innbyn hae te a inn um hae paw balyn tuh Bawipaw nynh hythua a pya hae," cite David Siapharan kha a hopya hae. Tukeiccuze David nynh cceih zah Pachia thingkua kha Obed-edom inn kyate David khua lang lungpawte a cciakhae; 13 Bawipaw thingkua a puihtu hae nynh kaw taruh he a kaw hae te, tangnuapaw sa kheit te sahiin athopaw sa kheit khate si a law. 14 David nynh Bawipaw malang khe a thawzung balynte a law; David tuh laaw te kuakuhpaw ranpibawi angki a kikuh. 15 Tuhcite David te Israel hae balyn nynh sia biate, mungkae tu biate Bawipaw thingkua kha a cciakhae hae.

1 Te Bawipaw byakin thingkua kha Zion cikuhpaw David khua kyate cciakhae khylan, Solomon nynh Israel piccan hae balyn, mih phin raveih kya-e lu hae balyn, Israel ciihan cciakhaetu hae balyn kha Jerusalem khua, Solomon Siapharan malang a pum hae.✝ 2 Israel ccungccaw balyn tuh sawpaw sah sarinaw Ethanim saw lungkhu poi kyakhe Solomon Siapharan malang a sueluakuh hae.✝ 3 Israel piccan hae balyn tuh oun cceih hae zah, ranpibawi hae nynh thingkua kha a puih hae. 4 Bawipaw thingkua, tungkunaw bu te bu kya umpaw athyaapaw angphe hae balyn kha ranpibawi hae te Levi phin hae nynh a cciakhae hae. 5 Solomon Siapharan te a malang pumkuh hae paw Israel zapi hae balyn nynh amaw ryte thingkua malang khe myarya lungpaw tuu hae te tangnuapaw hae riatae um leipaw khate si a law hae. 6 Ranpibawi hae nynh Bawipaw byakin thingkua kha beikinn alungkhu lang e hminthyaa kya, hmin thyaa huaccepaw kya, cherubim sake hae zakaw, amaw hmin kyakhe a nung hae. 7 Pawccecize cherubim hae nynh mih sake hae kha thingkua umnaw luki khe daw hae zah, thingkua te puihnawpaw ccong hae kha a dawpya hae. 8 Puihnawpaw ccong hae tuh eih asae keiccuze adung kha alungkhu lang e hminthyaa malang, hminthyaa kyate muih kho athua; thuasalama atolang te muih kho thua khyh; atunin cia tuin kya a um hae. 9 Israel hae nynh Izip ram kyate a pou lya hae ze, Bawipaw nynh minmin ryte byakinnaw a raenaw Horeb mua kya Moses nynh a la sangpaw lungphe phe ning laelan, thingkua lungkhu kya ccangpaw pawpaw mah um khyh.✝ 10 Ranpibawi hae nynh hminthyaa kyate he a pou hae tuh, Bawipaw inn tuh maeking phe abeih,✝ 11 maeking keiccuze ranpibawi hae tuh ryalaw lan thadyn kho khyh hae; pawccecize Bawipaw phu-enaw tuh Bawipaw inn kya phe abeih.

14 Pou mih lungzi leipaw ccaaw hae,

oun kithui oh,

cite Bawipaw nynh a ci,

pawccecize kae tuh

nae bawi nynh ka thua;

khua khuakheit kyate lu kheit,

innbyn byn kheit kyate

lu ning kae ko cih oh zah,

Zion lang kae cciakhae cih oh.

15 Ka lungry yn tungpaw tuurin hae kha kae nungpah cih oh zah, minmin nynh hawnaw te nythyanaw khate ae ccangpah cih oh. 16 Te ram lungkhu kya na pungzae oh zah he na lungthung oh tetuh, minmin nynh Bawipaw kya-e byakin thingkua kong kha ho vae lan khyh hae. Tuh-e thingkua kha mih thinlung kya um vae lan khyh, liathui leite a ning vae cih hae; ccangpaw kha mah rae vae lan khyh hae, cite Bawipaw nynh a ci.

1 Masaty byakinnaw nynh heize Pachia beiknaw phung hae te laephi vaw e beikinnthyaa kha a hoi. 2 Pawccecize beikbu kha sak hae zah, masaty khaan kya maeekhuatung, ccaboi te Nungpyapaw sanlou a um hae; tuh-e khaan tuh Hmin Thyaa a ci hae.✝ 3 Ccangningnaw zokhawpaw boei nulang khe Athyaa Huaccepaw Hmin a ci hae paw khaan a um.✝ 4 Tuh-e khaan kya mynkhuhpaw unawpaw sui silawhang te sui te po lekuh lan alaeekuhpaw byakin thingkua a um, tuh-e lungkhu kyatuin manna nungnawpaw sui ang, anaw toihpaw Aaron hoitang te byakin lungphe hae a um.✝ 5 Tuh-e byakin thingkua vawlan phu-enaw kya-e cherub hae nynh ngaethyaumsahnaw tungkhung kha phang a dawkhaw hae, tuh-e kong tuh atu phe ccing lan ah ho kho loh khyh oh.✝

19 Vaawlang a umpaw Pachia beikinn tuh hungkuh zah, a beikinn kyakhe amaw kya-e byakin thingkua kha muih athua; te khozaw alaekuh, roi accae, kholung athyh, innrysuekuh zah myarya lepaw hya accah.✝