Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
ଇସ୍ୱରନ୍ ନୋଅନ୍ଆଡଙ୍ ବରେନ୍, "ଅଡ଼୍କୋ ଜାତି ମରଞ୍ଜି ଆସନ୍ ଅନଞିଡ୍ ଜୋଗାନ୍ ତୁୟାୟ୍ଲାୟ୍ । ଞେନ୍ ଆନିଞ୍ଜିଆଡଙ୍ ରବ୍ବୁତାଜି, ଇନିଆସନ୍ଗାମେଣ୍ଡେନ୍ ଆ ସଙ୍ଗତାଞ୍ଜି ପୁର୍ତିଲୋଙନ୍ ଗୋଗୋୟ୍ଲେ ପାଙ୍ତେ । ଗୋପର ଅରାନ୍ ବାତ୍ତେ ଆମନ୍ ଆସନ୍ ଅବୟ୍ ଜାଜ୍ଜନ୍ ତୁବା; ଆନ୍ନା ଆନ୍ନା ବକରାନ୍ ତୁବ୍ଲେ ଅମ୍ମଗଡ୍ ଡ ବାରେଗଡ୍ ତାରୁନ୍ ବାତ୍ତେ ଜବ୍ଲିଡ୍ବା । ଜାଜ୍ଜ ଏନ୍ନେଗନ୍ ତୁବା ଅରଣ୍ଡଡିନ୍ ଆଡନେଙ୍ଗା ୟାଗିସଅ ସନ୍ତି, ରନକୋଡନ୍ ପଚାସ ସନ୍ତି, ତୋଣ୍ଡୋନ୍ ଆଡନେଙ୍ଗା ତିରିସି ସନ୍ତି । ଆଜିଅଲନ୍ ସିଲଡ୍ ବସନ୍ତି ଅମ୍ରେଙ୍ଲେ ଜାୟ୍ତାନ୍ ଜର୍କାନ୍ ତୁବା ଆରି ତିଗଡ୍ ଡୁଆରାନ୍ ଡକ୍କୋଆ । ଆରି ୟାଗିମଲା ଏମ୍ମେଲେ ଜାଜ୍ଜନ୍ ତୁବା ।
ପ୍ରବୁନ୍ ନୋଅନ୍ଆଡଙ୍ ବରେନ୍, "ଆମ୍ବେନ୍ କୁତ୍ତାମାବେନ୍ ସରିନ୍ ଜାଜ୍ଜଲୋଙନ୍ ଗନ୍ନାବା; ଇନିଆସନ୍ଗାମେଣ୍ଡେନ୍ ପୁର୍ତିଲୋଙନ୍ ଆମନ୍ ଡରମ୍ମମର୍ ଗାମ୍ଲେ ଗନିୟ୍ଗିୟ୍ଲୋଙ୍ଞେନ୍ ରାଙ୍ଡାଏନ୍ ।
ବୁବ୍ଡାନ୍ ସିଲଡ୍ ଡନୋବନ୍ ଆଞନାଙ୍ ଆସନ୍ ନୋଅନ୍, ଡ ଆଡୁକ୍ରିନ୍, ଡ ଆ ଅନଞ୍ଜି, ଡ ଆକଉନଞ୍ଜି ସରିନ୍ ଜାଜ୍ଜଲୋଙନ୍ ଗନ୍ଲଞ୍ଜି । ଇସ୍ୱରନ୍ ଆବ୍ରାଞେନ୍ ଅନ୍ତମ୍ ମଡ଼ିର୍ ଅଡ଼େ ଏର୍ମଡ଼ିର୍ ଜନ୍ତୁନ୍ ଡ ଅନ୍ତିଡଞ୍ଜି ଆରି କିମ୍ପୋଙନ୍ ବାତ୍ତେ ଆତ୍ରଙିୟ୍ତଞ୍ଜି ଅଡ଼୍କୋନ୍ ଆଜନ୍ତୁଜି ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ଆତେ ତଙ୍ବାଗୁ ଲେକାୟ୍, ନୋଅନ୍ ଆମଙ୍ ଜିର୍ରେ ଜାଜ୍ଜଲୋଙନ୍ ଇୟ୍ଲେ ଗନେଜି । ସାତ ଡିନା ଆଡ୍ରେନ୍ ସିଲଡ୍ ଇସ୍ୱରନ୍ ପୁର୍ତିନ୍ ଆନବ୍ବୁବ୍ଡା ଆସନ୍ ତରୁବନ୍ ଆପ୍ପାୟ୍ଲାୟ୍ ।
ଇସ୍ୱରନ୍ ଆବ୍ରାଞେନ୍ ଅନ୍ତମ୍ ଅଡ଼୍କୋନ୍ ଆ ଜନ୍ତୁ ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ଆତେ ନୋଅନ୍ ଆମଙ୍ ଜିର୍ରାଜି, ଆରି ପ୍ରବୁନ୍ ଜାଜ୍ଜନ୍ ଆସନଙ୍ ଇଙଡେନ୍ ।
ବାକୁଡ଼ି ଡିନା ଜାୟ୍ ପୁର୍ତିଲୋଙନ୍ ଜଡ଼ିତିରନ୍ ଅଡ଼ୋଲାୟ୍, ଆରି ଡାଆନ୍ ଗୋଗୋୟ୍ଲେ ଆପ୍ରାଙେନ୍ ଜାଜ୍ଜନ୍ ଡାଆଲୋଙନ୍ ମଙେନ୍ । ଆରି ଡାଆନ୍ ଗୋଗୋୟ୍ଲେ ଆପ୍ରାଙେନ୍ ଜାଜ୍ଜନ୍ ଡାଆଲୋଙନ୍ ମଙେନ୍ ।
ପୁର୍ତିଲୋଙନ୍ ଡକୋନ୍ ଅଡ଼୍କୋନ୍ ଆ ପରାନ୍ନାଜି ଇସ୍ୱରନ୍ ରବ୍ବୁଏନ୍ । ଆନିନ୍ ମନ୍ରାନ୍, ଜନ୍ତୁଜି, ଆରି ଅନ୍ତିଡଞ୍ଜି ରବ୍ବୁଆଜେନ୍ । ନୋଅନ୍ ଡ ଜାଜ୍ଜଲୋଙନ୍ ଆନିନ୍ ସରିନ୍ ଆଡ୍ରକୋଲଞ୍ଜି ଅଡ଼୍କୋନ୍ ଆ ଜନ୍ତୁଜି ତୁମ୍ ଡନୋବନ୍ ଞାଙେଞ୍ଜି ।
ପୁର୍ତିଲୋଙନ୍ ଗିଙ୍ଲେ ଆଡ୍ରକୋଲନ୍ ଆ ଡାଆ ବସଅ ପଚାସ ଡିନା ଆତିକି ଅସୋୟ୍ଲେ ପାଙେନ୍ । ସାତ ଆଙ୍ଗାୟ୍ ବକୁଡ଼ି ସାତ ଡିନାଲୋଙ୍ ଆରାରାଟ୍ ବରୁଲୋଙନ୍ ଜାଜ୍ଜନ୍ ରଏଏନ୍ ।
ବାକୁଡ଼ି ଡିନା ଡେଏନ୍ କି ନୋଅନ୍ ଜାଜ୍ଜନ୍ ଆଜର୍କା ରୋଏନ୍ ଆରି ଅବୟ୍ କାକାନ୍ ଅବ୍ନେଙେଙେନ୍ । ଆନିନ୍ ଆରି ଅଃୟର୍ରନାୟ୍, ବନ୍ଡ ଡାଆନ୍ ଅନ୍ରଙ୍ ଅଞଡେନ୍ ଜାୟ୍ ଅଡ଼େତେ ଅଡ଼େନେ ଏଙେନ୍ଡାଲନ୍ ଡକୋଲନ୍ । ଆରି ବତର ଡାଆନ୍ ଅସୋଜେନ୍ ଅଡ଼େ ଇଜ୍ଜା ଜନନାନ୍ ଆସନ୍ ନୋଅନ୍ ଆରି ଅବୟ୍ କୁକ୍କୁରନ୍ ଅବ୍ନେଙେଙେନ୍, ବନ୍ଡ ତି ଆବନେଡ଼ା ଜାୟ୍ ପୁର୍ତିଲୋଙନ୍ ଡାଆନ୍ ତୁମ୍ ଆଡ୍ରକୋଏନ୍ ଆସନ୍, କୁକ୍କୁରନ୍ ତରାର୍ଡୋୟ୍ନେନ୍ ଅଃଞାଙ୍ଲୋ । ତିଆସନ୍ ଜାଜ୍ଜଲୋଙନ୍ ୟର୍ରନାୟ୍, ଆରି ନୋଅନ୍ କୁକ୍କୁରନ୍ ଞମ୍ଲେ ଅମ୍ମ ଜାଜ୍ଜନ୍ ଅମ୍ଗନେନ୍ । ଆରି ସାତ ଡିନା ଆଡ୍ରେନ୍ ସିଲଡ୍ ଆରି ବତର କୁକ୍କୁରନ୍ ଅବ୍ନେଙେଙେନ୍ । ସାଲ୍ଲୁମ୍ ଆଡିଡ୍ କୁକ୍କୁରନ୍ ଆ ତଅଡ୍ଲୋଙ୍ ଅବୟ୍ ଆଲେଡେଙ୍ ଜିତ ଅଲନ୍ ଞମ୍ଲେ ୟର୍ରନାୟ୍ । ତିଆସନ୍ ପୁର୍ତିନ୍ ଆ ଡାଆ ଅସୋଜେନ୍ ଗାମ୍ଲେ ନୋଅନ୍ ଜନାଏନ୍ । ସାତ ଡିନା ଆଡ୍ରେନ୍ ସିଲଡ୍ ନୋଅନ୍ ଆରି କୁକ୍କୁରନ୍ ଅବ୍ନେଙେଙେନ୍; ବନ୍ଡ କୁକ୍କୁରନ୍ ନୋଅନ୍ ଆମଙ୍ବାନ୍ ଅଃୟର୍ରନାୟ୍ ।
ନୋଅନ୍ ତୁଡ୍ରୁସଅ ବବର୍ସେଙ୍ ଆଡ୍ରେନ୍ ଆଡିଡ୍, ତି ଆବର୍ସେଙ୍ ଆପର୍ତମ୍ମୁ ଆଙ୍ଗାୟ୍ ଆପର୍ତମ୍ମୁ ଡିନାଇଙନ୍ ପୁର୍ତିନ୍ ଆ ଡାଆ ଅଞଡେନ୍, ନୋଅନ୍ ଜାଜ୍ଜନ୍ ଆବିଲେଙ୍ ତେକ୍କେଲେ ଆଗ୍ରିଜେନ୍ ଲବନ୍ ଆସର୍ ରାଙ୍ଡାଏନ୍ ।
ଇସ୍ୱରନ୍ ନୋଅନ୍ଆଡଙ୍ ବରେନ୍, "ଡୁକ୍ରିନମ୍, ଡାଙ୍ଗାଡ଼ାଅନମ୍ଜି ଡ କଉନ୍ନମ୍ଜି ସରିନ୍ ଜାଜ୍ଜଲୋଙନ୍ ସିଲଡ୍ ଡୁଙ୍ନାୟ୍ବା । ଆରି ଆମନ୍ ସରିନ୍ ଡକୋନ୍ ଆଜନ୍ତୁଜି, ଅନ୍ତିଡଞ୍ଜି ଡ କିମ୍ପୋଙନ୍ ବାତ୍ତେ ଆତ୍ରଞିୟ୍ତଞ୍ଜି ଅଡ଼୍କୋନ୍ ଆଜନ୍ତୁଜି ଅମ୍ଡୁଙାୟ୍, ପୁର୍ତିଲୋଙନ୍ ଆନିଞ୍ଜି ଗୋଗୋଜେତଜି ଆରି ଆନିଞ୍ଜି ବରିୟ୍ଡେଏତଜି ।"
ଇସ୍ୱରନ୍ ନୋଅନ୍ ଡ ଆ ଡାଙ୍ଗାଡ଼ାଅନଞ୍ଜିଆଡଙ୍ ବରେଞ୍ଜି, "ଆମ୍ବେଞ୍ଜି ସରିନ୍, ପୁର୍ବାଃତେ କେଜ୍ଜାବେଞ୍ଜି ସରିନ୍ ଆରି ଆମ୍ବେଞ୍ଜି ସରିନ୍ ଆଡ୍ରକୋଲଞ୍ଜି ଆ ଜନ୍ତୁଜି ଅଡ଼୍କୋନ୍ ସରିନ୍, ଆରି ଜାଜ୍ଜଲୋଙନ୍ ସିଲଡ୍ ଆମ୍ବେଞ୍ଜି ସରିନ୍ ଆଡ୍ରୁଙ୍ଲନାଞଞ୍ଜି ଅଡ଼୍କୋନ୍ ଆ ପରାନ୍ନାନ୍, ଅଡ଼୍କୋନ୍ ଆ ଅନ୍ତିଜି ଡ ଅଡ଼୍କୋନ୍ ଆ ଜନ୍ତୁଜି ସରିନ୍ ଞେନ୍ ସିବ୍ଡେୟ୍ ବର୍ରନ୍ ଗବ୍ରିତାୟ୍ । ଞେନ୍ ସିବ୍ଡେୟ୍ ବର୍ରନାୟ୍ ଡ ଅଡ଼୍କୋ ଆ ପରାନ୍ନା ବୁବ୍ଡାଡାଲେ ଅଃରବ୍ବୁଆଜି; ଆଙ୍ଗିୟ୍ ଆରି ପୁର୍ତିନ୍ ଅଃବୁବ୍ଡାଏ ।
ଞେନ୍ ମେଗଲୋଙନ୍ ସୁସୁରୁଆଙନ୍ ଅବ୍ରାଙ୍ଡାତାୟ୍ । ତିଆତେ ଞେନ୍ ଡ ପୁର୍ତିନ୍ ଆସନ୍ ଅନଗଡ୍ ଅରମ୍ମଡନ୍ ଡେତେ ।
ଡର୍ନେନ୍ ବାତ୍ତେ ନୋଅନ୍ ତି ଆବନେଡ଼ା ଜାୟ୍ ଅଃର୍ରାଙ୍ଡାଏନ୍ ଆ ବର୍ନେଜି ଇସ୍ୱରନ୍ ଆମଙ୍ ସିଲଡ୍ ପୁର୍ବାଃତେବରନ୍ ଅମ୍ଡଙେନ୍ । ଆନିନ୍ ଇସ୍ୱରନ୍ ଆ ବନାଁୟ୍ ମାନ୍ନେଲେ ଅବୟ୍ ଜାଜନ୍ ତୁବ୍ଲେ ଆ କୁତ୍ତମ୍ମାଞ୍ଜି ଅମେଙେଞ୍ଜି । ଆରି ପୁର୍ତିନ୍ ଆ ମନ୍ରାଜି ପନବ୍ରଡନ୍ ଞାଙେଞ୍ଜି, ବନ୍ଡ ନୋଅନ୍ ଆ ଡର୍ନେନ୍ ବାତ୍ତେ ଡରମ୍ମଗଡନ୍ ଆ ଓଞୋଲ୍କୁଜନ୍ ଞାଙେନ୍ ।
ପୁର୍ବାନ୍ ନୋଅନ୍ ଡୋଙ୍ଗାନ୍ ଆତ୍ରୁବେନ୍ ଆ ଡିନ୍ନା ଇସ୍ୱରନ୍ ଗୋଗୋୟ୍ ସନଏନ୍ ବାତ୍ତେ ଜଗେଲେ ଡକୋଲନ୍, ତି ଆ ଡିନ୍ନା ତି ଆ ପୁରାଡ଼ାମର୍ଜି ପେଲ୍ଲାଲଞ୍ଜି । ତି ଆ ଡୋଙ୍ଗାଲୋଙ୍ ଅସୋୟ୍ ମନ୍ରା ଗନ୍ଲଞ୍ଜି, ଆଟଜଣ ତୁମ୍ ଡାଆଲୋଙନ୍ ସିଲଡ୍ ଅମେଙେଞ୍ଜି । ତିଆତେ ନମି ଆମ୍ୱେଞ୍ଜି ଅନୁରନ୍ ଏଞ୍ରାଙ୍ତେନ୍ ଆ ତବ୍ବୁବ୍ଡା ଅନ୍ତମ୍, କେନ୍ ଆ ତବ୍ବୁବ୍ଡା ଡଅଙନ୍ ଆଡିଲ୍ ଅନବ୍ତତ୍ତଡନ୍ ଆସନ୍ ତଡ୍, ଆର୍ପାୟ୍ ମନଙ୍ ବିବେକନ୍ ଆଞନାଙ୍ ଆସନ୍ ଇସ୍ୱରନ୍ ଆମଙ୍ ପାର୍ତନାନେନ୍ ଡ ଜିସୁ କ୍ରିସ୍ଟନ୍ ଆ ୟନର୍ମେଙ୍ ବାତ୍ତେ ନମି ଆମ୍ୱେଞ୍ଜି ଅନୁରନ୍ ଏଞାଙ୍ତେ । ଜିସୁ କ୍ରିସ୍ଟନ୍ ରୁଆଙନ୍ ଜିର୍ରେ ଇସ୍ୱରନ୍ ଆର୍ଜଡ଼ୋମ୍ସିଗଡ୍ ଆତଙ୍କୁମ୍ ଡକୋତନ୍, ଆରି ରୁଆଙ୍ ପାଙ୍ଲଙ୍ବର୍ମରଞ୍ଜି, ରନପ୍ତିନ୍ ଡ ବୋର୍ସାନ୍ ଆନିନ୍ଆଡଙ୍ ମାନ୍ନେଲେ ଡକୋତଞ୍ଜି ।
ଆରି ନୋଅନ୍ ଆ ବନେଡ଼ା ଏଙ୍ଗାଗୋ ଡେଏନ୍, ମନ୍ରା ଡାଙ୍ଗଡ଼ାଅନନ୍ ଆଜିର୍ତାଞନ୍ ଆଡିଡ୍ ଏତ୍ତେଗୋ ମା ଡେତେ । ଇନିଆସନ୍ଗାମେଣ୍ଡେନ୍ ଗଗଡାନ୍ ଅଣ୍ଡ୍ରଙ୍ ଜିରାଞନ୍ ଆରି ନୋଅନ୍ ଡାଆ ଜାଜଲୋଙନ୍ ଆଗ୍ରନ୍ଲନ୍ ଆ ଡିନ୍ନା ଜାୟ୍ ମନ୍ରାଞ୍ଜି ଏଙ୍ଗାଲେ ଗାଏଞ୍ଜି ଜୋମେଞ୍ଜି, ବିବାନେଲୋଙନ୍ ଡ ଅନବ୍ବିବାଲୋଙନ୍ ମଗାଡେଞ୍ଜି, ଆରି ଗଗଡାନ୍ ଜିର୍ରାୟ୍ କି ଅଡ଼୍କୋ ମନ୍ରାନ୍ ଇୟ୍ଲାୟ୍ ମାବ୍ୟାଏନ୍ ଆ ଡିନ୍ନା ଜାୟ୍ ଇନି ଡେତେ ତିଆତେ ଆନିଞ୍ଜି ଅଃଜ୍ଜନାଲଜି । ମନ୍ରା ଡାଙ୍ଗଡ଼ାଅନନ୍ ଆଜିର୍ତାଞନ୍ ଆ ଡିନ୍ନା ଜନଙ୍ ଏତ୍ତେଗନ୍ ଡେତେ । ତିଆଡିଡ୍ ବାଗୁ ମନ୍ରା ବସେଙ୍ଲୋଙନ୍ କାବ୍ବାଡ଼ାତଞ୍ଜି, ଅବୟ୍ନେଆଡଙ୍ ଅନୋରୋଙନ୍ ଡେତେ, ଆରି ଅବୟ୍ନେଆଡଙ୍ ଅନମ୍ରେଙନ୍ ଡେତେ । ବାଗୁ ଆଇମରଞ୍ଜି ରିଡ୍ଡିଁୟ୍ତଞ୍ଜି, ଅବୟ୍ନେଆଡଙ୍ ଅନୋରୋଙନ୍ ଡେତେ, ଆରି ଅବୟ୍ନେଆଡଙ୍ ଅନମ୍ରେଙନ୍ ଡେତେ ।"