1 ଇସ୍ୱରନ୍‌ ନୋଅନ୍‌ ଡ ଆନିନ୍‌ ସରିନ୍‌ ଜାଜ୍ଜଲୋଙନ୍‌ ଆଡ୍ରକୋଲଞ୍ଜି ଜାଡ଼ିଆନ୍‌ ଡ ଅସିଅଙ୍‌ ଆଜନ୍ତୁଜି ଅଃକରୋଡାଲୋ; ତିଆସନ୍‌ ଇସ୍ୱରନ୍‌ ରିଙ୍ଗେନ୍‌ ଆପ୍ପାୟ୍‌ଲେ*, ଆରି ଡାଆନ୍‌ ଅବ୍‌ସୋଜେନ୍‌ । 2 ପୁର୍ତିଲୋଙନ୍‌ ସିଲଡ୍‌ ଆଡ୍ରୁଙ୍‌ଲନାଞନ୍‌ ଆ ଡାଆ ଡ ରୁଆଙନ୍‌ ସିଲଡ୍‌ ଆରଡ଼ୋଲାଞନ୍‌ ଆ ତରୁବ୍‌ ଅଡ଼୍‌କୋନ୍‌ ଡଙ୍‌ଡଙେନ୍‌ । ଆରି ତରୁବନ୍‌ ଆରେଙେନ୍‌, 3 ପୁର୍ତିଲୋଙନ୍‌ ଗିଙ୍‌ଲେ ଆଡ୍ରକୋଲନ୍‌ ଆ ଡାଆ ବସଅ ପଚାସ ଡିନା ଆତିକି ଅସୋୟ୍‌ଲେ ପାଙେନ୍‌ । 4 ସାତ ଆଙ୍ଗାୟ୍‌* ବକୁଡ଼ି ସାତ ଡିନାଲୋଙ୍‌ ଆରାରାଟ୍‌ ବରୁଲୋଙନ୍‌ ଜାଜ୍ଜନ୍‌ ରଏଏନ୍‌ । 5 ଡାଆନ୍‌ ଅସୋୟ୍‌ଲେ ପାଙ୍‌ଲେ, ଆରି ଦସ ଆଙ୍ଗାୟ୍‌* ଆପର୍ତମ୍ମୁ ଡିନାଇଙନ୍‌ ଆବବ୍‌ ବୁରଞ୍ଜି ରାଙ୍‌ଡାଏନ୍‌ ।

6 ବାକୁଡ଼ି ଡିନା ଡେଏନ୍‌ କି ନୋଅନ୍‌ ଜାଜ୍ଜନ୍‌ ଆଜର୍‌କା ରୋଏନ୍‌ 7 ଆରି ଅବୟ୍‌ କାକାନ୍‌ ଅବ୍‌ନେଙେଙେନ୍‌ । ଆନିନ୍‌ ଆରି ଅଃୟର୍ରନାୟ୍‌, ବନ୍‌ଡ ଡାଆନ୍‌ ଅନ୍‌ରଙ୍‌ ଅଞଡେନ୍‌ ଜାୟ୍‌ ଅଡ଼େତେ ଅଡ଼େନେ ଏଙେନ୍‌ଡାଲନ୍‌ ଡକୋଲନ୍‌ । 8 ଆରି ବତର ଡାଆନ୍‌ ଅସୋଜେନ୍‌ ଅଡ଼େ ଇଜ୍ଜା ଜନନାନ୍‌ ଆସନ୍‌ ନୋଅନ୍‌ ଆରି ଅବୟ୍‌ କୁକ୍କୁରନ୍‌ ଅବ୍‌ନେଙେଙେନ୍‌, 9 ବନ୍‌ଡ ତି ଆବନେଡ଼ା ଜାୟ୍‌ ପୁର୍ତିଲୋଙନ୍‌ ଡାଆନ୍‌ ତୁମ୍‌ ଆଡ୍ରକୋଏନ୍‌ ଆସନ୍‌, କୁକ୍କୁରନ୍‌ ତରାର୍‌ଡୋୟ୍‌ନେନ୍‌ ଅଃଞାଙ୍‌ଲୋ । ତିଆସନ୍‌ ଜାଜ୍ଜଲୋଙନ୍‌ ୟର୍ରନାୟ୍‌, ଆରି ନୋଅନ୍‌ କୁକ୍କୁରନ୍‌ ଞମ୍‌ଲେ ଅମ୍ମ ଜାଜ୍ଜନ୍‌ ଅମ୍‌ଗନେନ୍‌ । 10 ଆରି ସାତ ଡିନା ଆଡ୍ରେନ୍‌ ସିଲଡ୍‌ ଆରି ବତର କୁକ୍କୁରନ୍‌ ଅବ୍‌ନେଙେଙେନ୍‌ । 11 ସାଲ୍ଲୁମ୍‌ ଆଡିଡ୍‌ କୁକ୍କୁରନ୍‌ ଆ ତଅଡ୍‌ଲୋଙ୍‌ ଅବୟ୍‌ ଆଲେଡେଙ୍‌ ଜିତ ଅଲନ୍‌ ଞମ୍‌ଲେ ୟର୍ରନାୟ୍‌ । ତିଆସନ୍‌ ପୁର୍ତିନ୍‌ ଆ ଡାଆ ଅସୋଜେନ୍‌ ଗାମ୍‌ଲେ ନୋଅନ୍‌ ଜନାଏନ୍‌ । 12 ସାତ ଡିନା ଆଡ୍ରେନ୍‌ ସିଲଡ୍‌ ନୋଅନ୍‌ ଆରି କୁକ୍କୁରନ୍‌ ଅବ୍‌ନେଙେଙେନ୍‌; ବନ୍‌ଡ କୁକ୍କୁରନ୍‌ ନୋଅନ୍‌ ଆମଙ୍‌ବାନ୍‌ ଅଃୟର୍ରନାୟ୍‌ ।

13 ନୋଅନ୍‌ ତୁଡ୍ରୁସଅ ବବର୍ସେଙ୍‌ ଆଡ୍ରେନ୍‌ ଆଡିଡ୍‌, ତି ଆବର୍ସେଙ୍ ଆପର୍ତମ୍ମୁ ଆଙ୍ଗାୟ୍‌ ଆପର୍ତମ୍ମୁ ଡିନାଇଙନ୍‌ ପୁର୍ତିନ୍‌ ଆ ଡାଆ ଅଞଡେନ୍‌, ନୋଅନ୍‌ ଜାଜ୍ଜନ୍‌ ଆବିଲେଙ୍‌ ତେକ୍କେଲେ ଆଗ୍ରିଜେନ୍‌ ଲବନ୍‌ ଆସର୍‌ ରାଙ୍‌ଡାଏନ୍‌ । 14 ବାଗୁ ଆଙ୍ଗାୟ୍‌ ବକୁଡ଼ି ସାତ ଡିନା ଆଡ୍ରେନ୍‌ ସିଲଡ୍‌ ପୁର୍ତିନ୍‌ ଅଡ଼୍‌କୋନ୍‌ ଅସରେନ୍‌ ।

15 ଇସ୍ୱରନ୍‌ ନୋଅନ୍‌ଆଡଙ୍‌ ବରେନ୍‌, 16 "ଡୁକ୍ରିନମ୍‌, ଡାଙ୍ଗାଡ଼ାଅନମ୍‌ଜି ଡ କଉନ୍‌ନମ୍‌ଜି ସରିନ୍‌ ଜାଜ୍ଜଲୋଙନ୍ ସିଲଡ୍‌ ଡୁଙ୍‌ନାୟ୍‌ବା । 17 ଆରି ଆମନ୍‌ ସରିନ୍‌ ଡକୋନ୍‌ ଆଜନ୍ତୁଜି, ଅନ୍ତିଡଞ୍ଜି ଡ କିମ୍ପୋଙନ୍‌ ବାତ୍ତେ ଆତ୍ରଞିୟ୍‌ତଞ୍ଜି ଅଡ଼୍‌କୋନ୍‌ ଆଜନ୍ତୁଜି ଅମ୍‌ଡୁଙାୟ୍‌, ପୁର୍ତିଲୋଙନ୍‌ ଆନିଞ୍ଜି ଗୋଗୋଜେତଜି ଆରି ଆନିଞ୍ଜି ବରିୟ୍‌ଡେଏତଜି ।" 18 ତିଆସନ୍‌ ନୋଅନ୍‌ ଆ ଡୁକ୍ରିନ୍‌, ଆ ଡାଙ୍ଗାଡ଼ାଅନଞ୍ଜି ଡ ଆ କଉନଞ୍ଜି ସରିନ୍‌ ଜାଜ୍ଜଲୋଙନ୍‌ ସିଲଡ୍‌ ଡୁଙ୍‌ଲନାଜି । 19 ଅନ୍ତିଡଞ୍ଜି, ଜନ୍ତୁଜି, କିମ୍ପୋଙନ୍‌ ବାତ୍ତେ ଆତ୍ରଞିୟ୍‌ତଞ୍ଜି ଅଡ଼୍‌କୋନ୍‌ ଆ ଜନ୍ତୁଜି ଜାଜ୍ଜଲୋଙନ୍‌ ସିଲଡ୍‌ ଡୁଙ୍‌ଲନାଜି ।

20 ତିଆସନ୍‌ ନୋଅନ୍‌ ଇସ୍ୱରନ୍‌ ଆସନ୍‌ ଅବୟ୍‌ ତନମ୍ପିଲନ୍‌ ତୁବେନ୍‌; ଆରି ତି ଆତନମ୍ପିଲ୍‌ଲୋଙ୍‌ ଅଡ଼୍‌କୋନ୍‌ ମଡ଼ିର୍‌ ଅନ୍ତିଡନ୍‌ ଡ ଜନ୍ତୁଜି ଇସ୍ୱରନ୍‌ ଆଞୁମ୍‌ଲୋଙ୍‌ ଅନମଙନ୍‌ ତିୟେନ୍‌ । 21 ଅନମଙ୍‌ ତନୁମ୍ମୋଡନ୍‌ ଆନୁର୍‌ ବାତ୍ତେ ପ୍ରବୁନ୍‌ ମଅଁୟ୍‌ଡାଏନ୍‌ ଆରି ଆ ଅମ୍ମଲଙନ୍‌ ଇଃୟମେନ୍‌, "ମନ୍‌ରାନ୍‌ ଆ ପେଲ୍ଲା ଆସନ୍‌ ଞେନ୍‌ ଆଙ୍ଗିୟ୍‌ ଆରି ପୁର୍ତିନ୍‌ ଅଃସୟ୍‌ପଆୟ୍‌ ଇନିଆସନ୍‌ଗାମେଣ୍ଡେନ୍‌ ଞେନ୍‌ ଜନା ଆ ସନ୍ନାଇଙନ୍‌ ମା ସିଲଡ୍‌ ମନ୍‌ରାନ୍‌ ଆଲନୁମ୍‌ଜି* ମନଙ୍‌ତଡ୍‌; ତିଆସନ୍‌ ଏନ୍ନେଗନ୍‌ ଆରି ଆଙ୍ଗିୟ୍‌ ଅଡ଼୍‌କୋନ୍‌ ଆ ପରାନ୍ନା ଅଃରବ୍ବୁଆୟ୍‌ । 22 ଡିଅଙ୍ଗା ଡିନା ଜାୟ୍‌ ପୁର୍ତିନ୍‌ ଡକୋ, ଡିୟ୍‌ତେ ଡିନା ଜାୟ୍‌ ବୁଡ୍‌ବୁଡ୍‌ନେନ୍‌ ଆରି ଗଡ୍‌ଗଡ୍‌ନେନ୍‌ ଆଡିଡ୍‌ । ଅଡ଼୍‌କୋ ଡିନାନ୍‌ ରଙାନ୍‌ ଡ ଉଙ୍‌ରୁଡନ୍‌, ଡାଗାଗାଜନ୍‌ ଡ ରଙାଗାଜନ୍‌, ଡିନାନ୍‌ ଡ ତଗଲନ୍‌ ଡକୋତନ୍‌ ।"