1 ତି ସିଲଡ୍‌ଲ୍ଲନ୍‌ ଇସ୍ରାଏଲନ୍‌ ଆନିନ୍‌ଡମ୍‌ ଅଡ଼୍‌କୋନ୍‌ ଆଜନବ୍‌ ଞମ୍‌ଲେ ଜିରେନ୍‌, ଆରି, ବେର୍‌ସେବାଲୋଙ୍‌ ପଡ୍‌ଲନ୍‌ ଆପେୟନ୍‌ ଇସାକନ୍‌ ଆ ଇସ୍ୱର ଆସନ୍‌ ଆନିନ୍‌ ଅମଙେନ୍‌ । 2 ସିଲତ୍ତେ ଇସ୍ୱରନ୍‌ ଇସ୍ରାଏଲନ୍‌ଆଡଙ୍‌ ତଗଲନ୍‌ ତନାଲ୍‌ମଡନ୍‌ ବାତ୍ତେ ବରେନ୍‌, "ଏ ଜାକୁବ, ଏ ଜାକୁବ ।" ସିଲତ୍ତେ ଆନିନ୍‌ ଜାଲଙେନ୍‌, "ଗିଜା, ଞେନ୍‌ ତେନ୍ନେ ଡକୋ ।" 3 ତିଆଡିଡ୍‌ ଆନିନ୍‌ ବରେନ୍‌, "ଞେନ୍‌ ଇସ୍ୱର; ଆମନ୍‌ ମିସର୍‌ ଆଜନିର୍‌ ଆସନ୍‌ ବତଙ୍‌ଡଙମ୍‌; ଇନିଆସନ୍‌ଗାମେଣ୍ଡେନ୍‌ ଞେନ୍‌ ତେତ୍ତେ ଆମନ୍‌ଆଡଙ୍‌ ବ ସୋଡ଼ା କେଜ୍ଜା ଏଅମ୍ମେତାୟ୍‌ । 4 ଞେନ୍‌ ଆମନ୍‌ ସରିନ୍‌ ମିସର୍‌ ଡେସାନ୍‌ ଜିର୍ତେ; ଆରି, ଞେନ୍‌ ଜାୟ୍‌ ତେତ୍ତେ ସିଲଡ୍‌ ଆମନ୍‌ଆଡଙ୍‌ ଆଜାଡ଼ିନ୍‌ ଆବ୍‌ଡିତବେନ୍‌, ଆରି, ଜୋସେପନ୍‌ ଆନିନ୍‌ଡମ୍‌ ଆସି ବାତ୍ତେ ଆମନ୍‌ଆଡଙ୍‌ ଅଃପିଡ୍‌ମଡ୍‌ତମ୍‌ ।" 5 ତି ସିଲଡ୍‌ଲ୍ଲନ୍‌ ଜାକୁବନ୍‌ ବେର୍‌ସେବାନ୍‌ ସିଲଡ୍‌ ଜିରେନ୍‌; ଆରି, ଆନିନ୍‌ଆଡଙ୍‌ ଆନୋରୋଙ୍‌ ଆସନ୍‌ ପାରୋନ୍‌ ଅଙ୍ଗା ଗାଡ଼ିନ୍ ଆପ୍ପାୟେନ୍‌, ତେତ୍ତେ ଇସ୍ରାଏଲନ୍‌ ଆ ଡାଙ୍ଗାଡ଼ାଅଞ୍ଜି ଆପେୟଞ୍ଜି ଜାକୁବନ୍‌ଆଡଙ୍‌ ଡ ଆପସିଜଞ୍ଜି ଆରି ଆଡୁକ୍ରିଞ୍ଜିଆଡଙ୍‌ ଓରୋଙେଞ୍ଜି । 6 ତି ସିଲଡ୍‌ଲ୍ଲନ୍‌ ଆନିଞ୍ଜି, ଆଗ୍ରାମ୍‌ଗାମ୍‌, ଜାକୁବନ୍‌ ଡ ଆକେଜ୍ଜାନ୍‌ ଅଡ଼୍‌କୋନ୍‌, ଆଜନ୍ତୁଡମଞ୍ଜି ଡ କିନାନ୍‌ ଡେସାଲୋଙ୍‌ ଆରର୍ଜେଏନ୍‌ ଅଡ଼୍‌କୋନ୍‌ ଆନର୍ଜେ ପାଙ୍‌ଲେ ମିସର୍‌ ଡେସାନ୍‌ ଅଡ଼ୋଏଞ୍ଜି । 7 କେନ୍‌ ଅନ୍ତମ୍‌ ଜାକୁବନ୍‌ ଆ ଡାଙ୍ଗାଡ଼ାଅନନ୍‌ ଆ ଡାଙ୍ଗଡ଼ିଅନନ୍‌ ଆ ଉଲ୍ଲେଙଞ୍ଜି ଅଡ଼୍‌କୋଞ୍ଜି ମିସର୍‌ ଡେସାନ୍‌ ଜିରେଞ୍ଜି । 8 ମିସର୍‌ ଡେସାନ୍‌ ଆଜିର୍ରେଞ୍ଜି ଆ ଇସ୍ରାଏଲ୍‌ କେଜ୍ଜା, ଆଗ୍ରାମ୍‌ଗାମ୍‌, ଜାକୁବନ୍‌ ଡ ଆ ଡାଙ୍ଗାଡ଼ାଅନଞ୍ଜି ଆଞୁମ୍‌ । ଜାକୁବନ୍‌ ଆ ସୋଡ଼ା ଡାଙ୍ଗାଡ଼ାଅନ୍‌ ରୁବେନ୍‌ । 9 ରୁବେନନ୍‌ ଆ ଡାଙ୍ଗାଡ଼ାଅନ୍‌ ଅନୋକନ୍‌, ପଲ୍ଲୁ, ଇସ୍ରୋଣନ୍‌ ଡ କର୍ମି । 10 ସିମିୟୋନନ୍‌ ଆ ଡାଙ୍ଗାଡ଼ାଅନ୍‌ ଜିମୁଏଲ, ଜାମିନନ୍‌, ଓଅଦ୍‌, ଜାକିନ୍‌, ସୋଅରନ୍‌ ଆରି ଆଡୁକ୍ରିନ୍‌ କିଣାନିଅବୟ୍‌ ଆ ଡାଙ୍ଗାଡ଼ାଅନ୍‌ ସୋଅର । 11 ଲେବିନ୍‌ ଆଡାଙ୍ଗାଡ଼ାଅନ୍‌ ଗେର୍ସୋନ, କଆତନ୍‌ ଡ ମରାରି । 12 ଜିଉଦାନ୍‌ ଆ ଡାଙ୍ଗାଡ଼ଅନ୍‌ ଏରନ୍‌, ଓନନ୍‌, ସେଲା, ପେରସ୍‌ ଡ ସେରଅ; ବନ୍‌ଡ ଏରନ୍‌ ଡ ଓନନ୍‌ କିନାନ୍‌ ଡେସାଲୋଙ୍‌ ରବୁଲୋଜି । ପେରସନ୍‌ ଆ ଡାଙ୍ଗାଡ଼ାଅନ୍‌ ଇସ୍ରୋଣନ୍‌ ଡ ଆମୁଲ୍ଲ । 13 ଇସାକରନ୍‌ ଆଅନ୍‌ ତୋଲୟ, ପୁୟ, ଜୋବନ୍‌ ଡ ସିମ୍ରୋଣନ୍‌ । 14 ସବୁଲୁନନ୍‌ ଆ ଡାଙ୍ଗାଡ଼ାଅନ୍‌ ସେରଦନ୍‌, ଏଲୋନ୍‌ ଡ ଜଅଲେଲ । 15 କେନ୍‌ଆନିଞ୍ଜି ଡ ଆଇସିଜନ୍‌ ଦିଣାନ୍‌, ପଦ୍ଦନ୍‌ ଅରାମଲୋଙ୍‌ ଜାକୁବନ୍‌ ଆମଙ୍‌ସିଲଡ୍‌ ଆକନୋଡ୍‌ ଲେୟାନ୍‌ ଆଅନ୍‌ । କେନ୍‌ଆନିଞ୍ଜି ଡାଙ୍ଗାଡ଼ାଅନ୍‌ ଡାଙ୍ଗଡ଼ିଅନ୍‌ଲୋଙନ୍‌ ତେତିସି ପୁରାଡ଼ା ଡକୋଏଞ୍ଜି । 16 ଗାଦନ୍‌ ଆ ଡାଙ୍ଗାଡ଼ାଅନ୍‌ ସିପୋନ୍‌, ଅଗିନ୍‌, ସୁନିନ୍‌, ଇସବୋନ୍‌, ଏରି, ଅରୋଦିନ୍‌ ଡ ଅରେଲି । 17 ଆସେରନ୍‌ ଆ ଡାଙ୍ଗାଡ଼ାଅନ୍‌ ଜିମ୍ନା, ଜିସ୍‌ବା, ଜିସ୍‌ବି, ବରିଅନ୍‌ ଡ ଆତନାନଞ୍ଜି ସେରଅନ୍‌ । ଆରି, ବରିଅନ୍‌ ଆ ଡାଙ୍ଗାଡ଼ାଅନ୍‌ ଏବରନ୍‌ ଡ ମଲ୍‌କିଏଲନ୍‌ । 18 ଲାବନନ୍‌ ଆ ଡାଙ୍ଗଡ଼ିଅନ୍‌ ଲେୟାନ୍‌ଆଡଙ୍‌ ସିଳ୍ପା ଆଞୁମ୍‌ ଅଙ୍ଗା ଆକମ୍ୱାରିବୟ୍‌ ତିୟେନ୍‌, ଆନିନ୍‌ ଜାକୁବନ୍‌ ଆସନ୍‌ କେନ୍‌ ଆଅଞ୍ଜିଆଡଙ୍‌ କୋଡେନ୍‌ । କେନ୍‌ଆନିଞ୍ଜି ସଓଡ଼ ମନ୍‌ରା । 19 ଆରି, ଜାକୁବନ୍‌ ଆଡୁକ୍ରି ରାଏଲନ୍‌ ଆ ଡାଙ୍ଗାଡ଼ାଅନ୍‌ ଆଞୁମ୍‌ ଜୋସେପ ଡ ବିନ୍ୟାମିନ୍‌ । 20 ଜୋସେପନ୍‌ ଆ ଡାଙ୍ଗାଡ଼ାଅନ୍‌ ମନଃସିନ୍‌ ଡ ଇପ୍ରିଅମନ୍‌ ମିସର୍‌ ଡେସାଲୋଙ୍‌ କୋଡେଞ୍ଜି; ଓନ୍‌ ଆଗଡ଼ା ପୋଟିପର୍‌ ଆରାଓଡ଼ାନ୍‌ ଆ ଡାଙ୍ଗଡ଼ିଅନ୍‌ ଆସନତନ୍‌ ଆନିଞ୍ଜିଆଡଙ୍‌ କୋଡେନ୍‌ । 21 ଆରି, ବିନ୍ୟାମିନନ୍‌ ଆଅନ୍‌ ବେଲା, ବେକର, ଅସ୍‌ବେଲା, ଗେରା, ନାମାନ୍‌, ଏଇ, ରୋସ, ମୁପ୍‌ପିମ୍‌, ଉପ୍‌ପିମ୍‌ ଡ ଅର୍ଦ । 22 କେନ୍‌ ଚଉଦ ଜଣ ଜାକୁବନ୍‌ ଆମଙ୍‌ ସିଲଡ୍‌ ଆକନୋଡ୍‌ ରାଏଲନ୍‌ ଆଅଞ୍ଜି । 23 ଆରି ଦାନନ୍‌ ଆ ଡାଙ୍ଗାଡ଼ାଅନ୍‌ ଉସିମ୍‌ । 24 ନପ୍ତାଲିନ୍‌ ଆ ଡାଙ୍ଗାଡ଼ାଅନ୍‌ ଜଅସିଏଲ, ଗୁନି, ଜେତ୍ସର ଡ ସିଲେମନ୍‌ । 25 ଲାବନନ୍‌ ଆ ଡାଙ୍ଗଡ଼ିଅନ୍‌ ରାଏଲନ୍‌ଆଡଙ୍‌ ବିଲ୍‌ଆନ୍‌ ଆଞୁମ୍‌ ଅଙ୍ଗା ଆକମ୍ୱାରିବୟ୍‌ ତିୟେନ୍‌, ଆନିନ୍‌ ଜାକୁବନ୍‌ ଆସନ୍‌ କେନ୍‌ ଆଅଞ୍ଜିଆଡଙ୍‌ କୋଡେନ୍‌; ଅଡ଼୍‌କୋନ୍‌ ମାୟ୍‌ମାୟ୍‌ଲେ କେନ୍‌ଆନିଞ୍ଜି ସାତ ଜଣ । 26 ଜାକୁବନ୍‌ ଆକୁଣ୍ଡୁବ୍‌ ସିଲଡ୍‌ ଅଙ୍ଗା ଆପୁରାଡ଼ାଜି ଆନିନ୍‌ ସରିନ୍‌ ମିସର୍‌ ଅଡ଼ୋଏଞ୍ଜି, ଜାକୁବନ୍‌ ଆକଉଞ୍ଜି ଉମ୍‌ରେଙ୍‌ଲେ ଆନିଞ୍ଜି ଅଡ଼୍‌କୋନ୍‌ ମାୟ୍‌ମାୟ୍‌ଲେ ୟାଗୁଡ଼ି ତୁଡ୍‌ରୁ ପୁରାଡ଼ା ଡକୋଏଞ୍ଜି । 27 ମିସର୍‌ଲୋଙ୍‌ ଜୋସେପନ୍‌ ଅଙ୍ଗା ଆ ଡାଙ୍ଗାଡ଼ାଅଞ୍ଜି କନୋଡ୍‌କୋଡନ୍‌ ଡେଏଞ୍ଜି, ଆନିଞ୍ଜି ବାଗୁ ପୁରାଡ଼ା । ମିସର୍‌ ଡେସାନ୍‌ ଆଜିର୍ରେଞ୍ଜି ଜାକୁବନ୍‌ ଆସିଙ୍‌ମର୍‌ଜି ଅଡ଼୍‌କୋନ୍‌ ସତୁରି ଜଣ ଡକୋଏଞ୍ଜି ।

28 ତି ସିଲଡ୍‌ଲ୍ଲନ୍‌ ଜୋସେପନ୍‌ ଗୋସନ୍‌ ଆଡେସା ଆଜନିର୍‌ ଆତଙର୍‌ ଏଙ୍ଗାଲେ ଅବ୍‌ତୁଜେଜି, ତିଆସନ୍‌ ଜାକୁବନ୍‌ ଆମ୍ମୁଙ୍‌ ଜିଉଦାନ୍‌ଆଡଙ୍‌ ଆମଙ୍‌ବାନ୍‌ ଆପ୍ପାୟେନ୍‌; ତି ସିଲଡ୍‌ଲ୍ଲନ୍‌ ଆନିଞ୍ଜି ଗୋସେନ୍‌ ଆଏରିଆଲୋଙ୍‌ ଅଡ଼ୋଏଞ୍ଜି । 29 ସିଲତ୍ତେ ଜୋସେପନ୍‌ ଆପେୟନ୍‌ ଇସ୍ରାଏଲନ୍‌ ସରିନ୍‌ ଆରନବାଙ୍‌ ଆସନ୍‌ ରତାନ୍‌ ସଜାୟ୍‌ଲେ ଗୋସେନ୍‌ ଆଏରିଆ ଜିରେନ୍‌; ଆରି, ଆନିନ୍‌ଆଡଙ୍‌ ରବାଙ୍‌ଲେ ଆସଙ୍କାନ୍‌ କୋଣ୍ତୋଲେ ଗୋଗୋୟ୍‌ ସମୟ୍‌ ୟେଏନ୍‌ । 30 ତିଆଡିଡ୍‌ ଇସ୍ରାଏଲନ୍‌ ଜୋସେପନ୍‌ଆଡଙ୍‌ ବରେନ୍‌, "ନମି ରନବୁଞେନ୍‌ ଡେଏତୋ, ଞେନ୍‌ ମୁକାନମ୍‌ ଗିୟ୍‌ଲାୟ୍‌, ଆମନ୍‌ ତ ନମିଆନ୍ତାନ୍‌ ଆମେଙ୍‌ ଡକୋ ।" 31 ତି ସିଲଡ୍‌ଲ୍ଲନ୍‌ ଜୋସେପନ୍‌ ଆବୋଞାଙଞ୍ଜିଆଡଙ୍‌ ଡ ଆପେୟନ୍‌ ଆସିଙ୍‌ମରଜିଆଡଙ୍‌ ବରେନ୍‌, "ଞେନ୍‌ ଜିର୍ରେ ପାରୋନ୍‌ଆଡଙ୍‌ କବରନ୍‌ ତିୟ୍‌ଲେ ଇୟ୍‌ତେ ବର୍ନାୟ୍‌, କିନାନ୍‌ ଆଡେସା ସିଲଡ୍‌ ବୋଞାଙ୍‌ଞେଞ୍ଜି ଡ ଆପେୟ୍‌ଞେନ୍‌ ଆସିଙ୍‌ମର୍‌ଜି ମଙ୍‌ଞେନ୍‌ ଇୟ୍‌ଲାଜି ।" 32 ଆନିଞ୍ଜି ଜନ୍ତୁନ୍‌ ଆତନୁର୍‌ମର୍‌ଜି ଡ ଜନ୍ତୁନ୍‌ ଆବେବାରମର୍‌ଜି, ତିଆସନ୍‌ ଆନିଞ୍ଜି ଆନିଞ୍ଜିଡମ୍‌ ଆତାଙ୍‌ଲେୟ୍‌ଜି ଡ ମେଣ୍ଡା ଅଡ଼୍‌କୋନ୍‌ ପାଙ୍‌ଲାଜି । 33 ସିଲତ୍ତେ ପାରୋନ୍‌ ଆମ୍ୱେଞ୍ଜିଆଡଙ୍‌ ଓଡ୍ଡେଲେ ଅଙ୍ଗା ଆବେବାରମର୍‌ ? କେନ୍‌ ଆବର୍ନେ ଆଙ୍ଗା ବର୍ତବେନ୍‌, 34 ତିଆଡିଡ୍‌ ଆମ୍ୱେଞ୍ଜି ବର୍ନାବା, "କେନ୍‌ ଆ କମ୍ବାରିମର୍‌ଜି ଆପନସିଜଞ୍ଜିମା ସିଲଡ୍‌ ନମିଆନ୍ତାନ୍‌ ପୁର୍ବା ଜୋଜୋଲେଞ୍ଜି ସିଲଡ୍‌ ଜନ୍ତୁନ୍‌ ଆବେବାରମର୍‌ଜି; ସିଲତ୍ତେ ଆମ୍ୱେଞ୍ଜି ଗୋସେନ୍‌ ଆଏରିଆଲୋଙ୍‌ ଡକୋଲନ୍‌ ଏରପ୍ତିତେ; ଇନିଆସନ୍‌ଗାମେଣ୍ଡେନ୍‌ ଜନ୍ତୁନ୍‌ ଆବ୍ରନ୍ତେଞ୍ଜି ମିସ୍ରିଅଞ୍ଜି ଆମଙ୍‌ବା ଏଡ଼ୁର୍‌ମଡ୍‌ଗୋ ।"