1 ତି ସିଲଡ୍‌ଲ୍ଲନ୍‌ ଜାକୁବନ୍‌ ଆ ଡାଙ୍ଗାଡ଼ାଅନଞ୍ଜିଆଡଙ୍‌ ଓଡ୍ଡେଲେ ବରେନ୍‌, ଆମ୍ୱେଞ୍ଜି ରୁକୁନାବା; ତିକ୍କି ଆଓୟୁଙ୍‌ ଆମ୍ୱେଞ୍ଜି ଆସନ୍‌ ଇନି ଗଟେତେ, ତିଆତେ ଆମ୍ୱେଞ୍ଜିଆଡଙ୍‌ ବର୍ତବେନ୍‌ । 2 ଏ ଜାକୁବନ୍‌ ଆ ଡାଙ୍ଗାଡ଼ାଅଞ୍ଜି, ରୁକୁଲନ୍‌ ଅମ୍‌ଡଙ୍‌ବା ଆରି ଆପେୟ୍‌ବେନ୍‌ ଜାକୁବନ୍‌ ଆବର୍ନେ ଅମ୍‌ଡଙ୍‌ବା । 3 ଏ ରୁବେନ୍‌, ଆମନ୍‌ ଆପର୍ତମ୍ମୁ ଡାଙ୍ଗଡ଼ାଅଞେନ୍‌, ବପ୍ପୁଞେନ୍‌ ଡ ବୋର୍ସାଞେନ୍‌ ଆପର୍ତମ୍ମୁନ୍‌ ଆ ଜଅ; ଆରି, ଗନୁଗୁଲୋଙନ୍‌ ସୋଡ଼ା ଡ ରନପ୍ତିଲୋଙନ୍‌ ସୋଡ଼ା । 4 ଆମନ୍‌ ଗଗଡାନ୍‌ ଅନ୍ତମ୍‌, ସନୋଡ଼ାନମ୍‌ ଅଃଡକୋଏ, ଇନିଆସନ୍‌ଗାମେଣ୍ଡେନ୍‌ ଆମନ୍‌ ଆପେୟ୍‌ନମ୍‌ ଆର୍‌ଲୁଡ୍‌ଲୁଡ୍‌ବା ଜିରେନ୍‌; ତିଆତେ ଏର୍ମଡ଼ିର୍‌ ଅବ୍‌ମେନ୍‌ । 5 ସିମିଅନନ୍‌ ଡ ଲେବିନ୍‌ ବାଗୁଞ୍ଜି ବନୋଞାଙ୍‌ । ଆ କଡ଼ିବଞ୍ଜି ସଙ୍ଗତା କାବ୍ବାଡ଼ାନ୍‌ ଆଞନର୍ରମ୍‌ ଅତିଆରନ୍‌ । 6 ଏ ପୁରାଡ଼ା ଞେନ୍‌, ଆନିଞ୍ଜି ଆସସ ଆ ରନବୁରେଙ୍‌ ଗନ୍‌ଡଙେ; ଏ ପନେମେଙ୍‌ ଞେନ୍‌, ଆମନ୍‌ ଆୟଗେବ୍‌ବର୍‌ଲୋଙଞ୍ଜି ଇୟ୍‌ଡଙ୍‌ ମାୟ୍‌ନେ, ଇନିଆସନ୍‌ଗାମେଣ୍ଡେନ୍‌ ଆନିଞ୍ଜି ବରାବ୍ବ୍‌ଲେ ମନ୍‌ରାନ୍‌ ରବୁଏଞ୍ଜି ଆରି ଆଇସୁମ୍‌ଡମଞ୍ଜି ବାତ୍ତେ ତାଙ୍‌ଲିୟଞ୍ଜି ଆଲା ଗଡେଞ୍ଜି । 7 ଆ ବନ୍‌ଡ୍ରାବଞ୍ଜି ସୟ୍‌ପନ୍‌ ଡେଏତୋ, ଇନିଆସନ୍‌ଗାମେଣ୍ଡେନ୍‌ ତିଆତେ ଗୋଗୋୟ୍‌ ବନ୍‌ଡ୍ରାବନ୍‌ ଡକୋଏନ୍‌; ଆ ବନ୍‌ଡ୍ରାବଞ୍ଜି ସୟ୍‌ପନ୍‌ ଡେଏତୋ, ଇନିଆସନ୍‌ଗାମେଣ୍ଡେନ୍‌ ତିଆତେ ଏର୍‌ସନୟୁ ଡକୋଏନ୍‌; ଞେନ୍‌ ଜାକୁବନ୍‌ ଆମଙ୍‌ ସିଲଡ୍‌ ଆନିଞ୍ଜିଆଡଙ୍‌ ଆନ୍ନାତାୟ୍‌ ଡ ଇସ୍ରାଏଲନ୍‌ ଆମଙ୍‌ ସିଲଡ୍‌ ପିରିଙ୍‌ପାଡାନ୍‌ ଏମ୍ମେତାଜି । 8 ଏ ଜିଉଦା, ବୋଞାଙ୍‌ମଞ୍ଜି ଆମନ୍‌ଆଡଙ୍‌ ସେଙ୍କେନ୍‌ତମ୍‌ଜି; ଅସିନମ୍‌ ବନେରାମର୍‌ନମ୍‌ଞ୍ଜି ଆସଙ୍କାଲୋଙ୍‌ ଡକୋତେ; ଆପେୟ୍‌ନମ୍‌ ଆଅଞ୍ଜି ଆମନ୍‌ଆଡଙ୍‌ ଲୋମ୍‌ତମ୍‌ଜି । 9 ଜିଉଦାନ୍‌ ସିଅଁନ୍‌ ଆଅନ୍‌; ଏ ଡାଙ୍ଗାଡ଼ାଅନ୍‌, ଆମନ୍‌ ଅଲବନ୍‌ ଆର୍‌ନବୁ ସିଲଡ୍‌ ଡୋଲନ୍‌ ଜିର୍ରାୟ୍‌; ଆନିନ୍‌ ଡୁଙ୍ଗୁଏନ୍‌, ଆନିନ୍‌ ସିଂଅ ଆରି ଆୟୋଙ୍‌ ସିଅଁନ୍‌ ଅନ୍ତମ୍‌ ଲୁଡେନ୍‌, ଆନ୍ନା ଆନିନ୍‌ଆଡଙ୍‌ ଅବ୍‌ଡୋଏ ? 10 ସିଲୋନ୍‌ ଆ ସନୟୁ ଡନେମରନ୍‌ ଜିଉଦାନ୍‌ ସିଲଡ୍‌ ରାଜାଡାଙନ୍‌ ଆତଲ୍‌ଜଙନ୍‌ ବାଗୁନ୍‌ ପନ୍‌ସୁଆତି ସାସନମରନ୍‌ ଆ ଡାଙ୍ଗୋ ଡନେଡନ୍‌ ଅଃଡେଏନ୍‌ । ଆ ସାସନଲୋଙନ୍‌ ମନାରାଜି ଡକୋନେନ୍‌ ଅଡ଼େତଜି । 11 ଆନିନ୍‌ ଦ୍ରାକ୍ୟାନୁବନ୍‌ ଆତୁୟାୟ୍‌ ଆ ଗୋଡୋୟଁନ୍‌ ଡ ମନଙ୍‌ ଦ୍ରାକ୍ୟାନୁବ୍‌ବାନ୍‌ ଆଅନ୍‌ ଗୋଡୋୟଁନ୍‌ ତବାତେ । ଆନିନ୍‌ ଦ୍ରାକ୍ୟାଡାନ୍‌ ବାତ୍ତେ ଆଗନୁସାୟ୍‌କାବନ୍‌ ଡ ଦ୍ରାକ୍ୟା ମିଞାମନ୍‌ ବାତ୍ତେ ଆସିନ୍‍ରିନ୍‍ ତୋବ୍‌ତେ । 12 ଆମଡନ୍‌ ଦ୍ରାକ୍ୟାଡାନ୍‌ ବାତ୍ତେ ମିଞାମନ୍‌ଗୋ ଡେତେ, ଆଡ଼ୁବନ୍‌ ବାତ୍ତେ ଆଜିନ୍‌ ଜେଏତେ । 13 ସବୁଲୁନ୍‌ ସମେଁୟ୍‌ଣ୍ଡ୍ରାନ୍‌ ଆ ବନ୍ଦରଲୋଙ୍‌ ଡକୋତନେ ଆରି ଆନିନ୍‌ ଜାଜନ୍‌ ଆଡ୍ରକୋନେ ଡେତେ; ଆରି, ସିଦୋନନ୍‌ ଜାୟ୍‌ ଆଡନେନ୍‌ ଆସଣ୍ତି ଡେତେ । 14 ଇସାକନ୍‌ ଗୋଡୋଁୟନ୍‌ ଅନ୍ତମ୍‌, ଆନିନ୍‌ ମେଣ୍ତାନ୍‌ ଆଗୁଆଡ଼ାଲୋଙ୍‌ ଲୁଡ୍‌ତେ; 15 ଆନିନ୍‌ ଲୋଲୋନେ ଡରକୋନେନ୍‌ ଆଗରିଜେନ୍‌ ମନଙ୍‌ ଆରି ଡେସାନ୍‌ ଆଗରିଜେନ୍‌ ସର୍ଡାଡାଗୋ । ତିଆସନ୍‌ ଆନିନ୍‌ ବୁଡ଼ାରନ୍‌ ଆବନୋୟ୍‌ ଆସନ୍‌ ଆଡେନ୍ନାନ୍‌ ଡଜେନ୍‌, କମ୍ୱାରିଲୁମନ୍‌ ଆସନ୍‌ କମ୍ୱାରିଲନେ । 16 ଦାନନ୍‌ ଇସ୍ରାଏଲନ୍‌ ଲାଙ୍‌ଲେଡ୍‌ ଆକେଜ୍ଜା ଅନ୍ତମ୍‌ ଆନିନ୍‌ଡମ୍‌ ଆମନ୍‌ରାଜିଆଡଙ୍‌ ପସୁଆତିତେ । 17 ଦାନନ୍‌ ଅନେଙ୍‌ତଙରନ୍‌ ଆଡ୍ରକୋତନ୍‌ ଆ ଜାଆଡ୍‌ ଅନ୍ତମ୍‌, ତଙରନ୍‌ ଆଡ୍ରକୋତନ୍‌ ଆ ବିସଜଡ୍‌ ଅନ୍ତମ୍‌, ଆନା କୁର୍ତାନ୍‌ ଆତାଲ୍‌ଜଙ୍‌ ଡୋଲ୍‌ତେ, ଆନା କୁର୍ତାଲୋଙନ୍‌ ଆତଙ୍କୁମନ୍‌ ଆମନ୍‌ରା ଅମଡ଼କିଣ୍ଡୋଙ୍‌ ଅସେଡ୍‌ତାୟ୍‌ । 18 ଏ ପ୍ରବୁ, ଞେନ୍‌ ଅନୁର୍‌ନମ୍‌ ଆଜନଗ୍ଗେଲୋଙ୍‌ ଡକୋ । 19 ରାଉମର୍‌ଞ୍ଜି ଗାଦ୍‌ଆଡଙ୍‌ ଜୁରୁତଜି; ବନ୍‌ଡ ଆନିନ୍‌ ୟର୍ରନ୍‌ ଆନିଞ୍ଜିଆଡଙ୍‌ ଜୁରୁତେ । 20 ଆସେରନ୍‌ ବସେଙ୍‌ଲୋଙନ୍‌ ସିଲଡ୍‌ ଗୋଗୋୟ୍‌ ଜନୋମଞ୍ଜି ଞାଙ୍‌ତେ । ଆନିନ୍‌ ରାଜାଞ୍ଜି ଆଜନୋମ୍‌ ଆସନ୍‌ ତିୟ୍‌ଲେ ରପ୍ତିତେ । 21 "ନପ୍ତାଲିନ୍‌ ଅବୟ୍‌ ଅରିଣନ୍‌ ଅନ୍ତମ୍‌ ଡଡ୍ଡଡ୍‌ ଇର୍‌ତେ, ଆନିନ୍‌ ମରଅଁୟ୍‌ଡାନ୍‌ ଆବର୍ନେ ବର୍ତନେ । 22 ଜୋସେପନ୍‌ ଆରଜତେନ୍‌ ଆରାନୁବ୍‌ ଆଲନେଡେଙ୍‌, ଆନିନ୍‌ ଅନେଙ୍‌ ଅଲନ୍‌ ଆରଜତେନ୍‌ ଆରାନୁବ୍‌ ଆଲନେଡେଙ୍‌ ଅନ୍ତମ୍‌; ଆକେଣ୍ତାରଞ୍ଜି ଅଡ଼୍‌କୋନ୍‌ କିନ୍ତାଲନ୍‌ ପଡ୍‌ତେ ।

23 ଞଙାନ୍‌ ବାତ୍ତେ ଆଲ୍‌ଜୁଜ୍ଜେ ମରଞ୍ଜି* ଆନିନ୍‌ଆଡଙ୍‌ ମାଡ୍ଡ ଅବ୍‌ଡଣ୍ଡାୟେଞ୍ଜି

ଆରି ଆନିନ୍ଆଡଙ୍‌ ଞଙାନ୍‌ ଡ ଅଆମନ୍‌ ଞମ୍‌ଲେ ଗଙ୍‌ଗଙ୍‌ରେଡେଞ୍ଜି । 24 ବନ୍‌ଡ ଆଞଙାନ୍‌ ରଡୋ ଗାମ୍‌ଲେ ଡକୋଲନ୍‌, ଆରି ଆ ଡେନ୍ନାନ୍‌ ଜାକୁବନ୍‌ ଆବୋର୍ସା ଇସ୍ୱରନ୍‌, ଇସ୍ରାଏଲନ୍‌ ଆତୁର୍‌ମେନ୍‌ମର୍‌ ଡ ଡନୋବ୍‌ମର୍‌ ଗାମ୍‌ଲେ ଜନାଏଞ୍ଜି । 25 ଆଗ୍ରାମ୍‌ଗାମ୍‌, ଆପ୍ପେୟ୍‌ନମ୍‌ ଆ ଇସ୍ୱର, ଆନ୍ନା ଆମନ୍‌ଆଡଙ୍‌ ସାଜତମ୍‌ ଡ ଅଡ଼୍‌କୋନ୍‌ ସିଲଡ୍‌ ବୋର୍ସା, ଆନ୍ନା ତୋଣ୍ତୋ ରୁଆଙନ୍‌ ସିଲଡ୍‌ ସୁକ୍କାନ୍‌, ଜାୟ୍‌ତାନ୍‌ ଗୋଗୋୟ୍‌ ଡାଆଲୋଙନ୍‌ ସିଲଡ୍‌ ସୁକ୍କାନ୍‌, ମେମେନ୍‌ ଡ ଡରକ୍କୋଅନନ୍‌ ସୁକ୍କାନ୍‌ ତିୟ୍‌ଲେ ଆମନ୍‌ଆଡଙ୍‌ ଆସିର୍ବାଦତମ୍‌, ଆନିନ୍‌ଆଡଙ୍‌ ବାତ୍ତେ ଆସିନ୍‌ ଆ ଡିନା ବୋର୍ସାଏନ୍‌ । 26 ପୁର୍ବା ଜୋଜୋଞେଞ୍ଜି ଆସିର୍ବାଦ ସିଲଡ୍‌ ଆପେୟ୍‌ନମ୍‌ ଆସିର୍ବାଦ ଗୋଗୋୟ୍‌; ତିଆତେ ଆଏଡ଼ର୍‌ ଆବରୁ ଆସଣ୍ତି ଜାୟ୍‌ ଲାର୍ତନେ; ତିଆତେ ଜୋସେପନ୍‌ ଆବବ୍‌ଲୋଙ୍‌, ଆଗ୍ରାମ୍‌ଗାମ୍‌, ଆବୋଞାଙଞ୍ଜି ସିଲଡ୍‌ ଆନାଙ୍‌ସାନ୍‌ ଆଡ୍ରେନ୍‌ ଆ ମନ୍‌ରା ଆବବ୍‌ଲୋଙ୍‌ ଗଟେତେ । 27 ବିନ୍ୟାମିନନ୍‌ ଆଡୋଲେୟ୍‌ ବଲିଆନ୍‌ ଅନ୍ତମ୍‌ । ଡୋତାନ୍‌ ଆଓଲ୍ଲେ ଆନିନ୍‌ ଅଲବନ୍‌ ଜୋମ୍‌ତେ ଆରି ସାଲ୍ଲୁମ୍‌ ଓଲ୍ଲେନ୍‌ ରବ୍ବୁଲେ ବାନ୍ତେତଞ୍ଜି ।" 28 କେନ୍‌ଆନିଞ୍ଜି ଇସ୍ରାଏଲନ୍‌ ବାର କେଜ୍ଜା; କେନ୍‌ ଆପେୟଞ୍ଜି ଆସିର୍ବାଦ ଆ ସୋଡ଼ାମର୍‌ ଆରେମ୍ମେଏନ୍‌ ଆଡିଡ୍‌ କେନ୍‌ ଆବର୍ନେ ବର୍ରନ୍‌ ଡିଲେ ମନ୍‌ରାଆଡଙ୍‌ ଆସିର୍ବାଦଏନ୍‌ ।

29 ଜାକୁବନ୍‌ ଆ ଡ଼ାଙ୍ଗାଡ଼ାଅନଞ୍ଜିଆଡଙ୍‌ ବାଁୟ୍‌ଲେ ବରେଞ୍ଜି, "ଞେନ୍‌ ରବୁଲିଁୟ୍‌ଡେନ୍‌ ମନ୍‌ରାଞେଞ୍ଜି ସରିନ୍‌ ଇପ୍ରୋଣ ଇତିତେ ଆବସେଙ୍‌ଲୋଙ୍‌ ଞେନ୍‌ଆଡଙ୍‌ ତିଲିଁୟ୍‌ବା । 30 ତିଆସନ୍‌ ଅବ୍ରାଆମନ୍‌ ଆମସାନ୍ନି ଆଡ୍ରକୋନେ ଆଡନେ ଆସନ୍‌ କିଣାନ୍‌ ଆଡେସା ମମ୍ରିନ୍‌ ଆମୁକାବା ଅଙ୍ଗା ମକ୍‌ପେଲାନ୍‌ ଆବସେଙ୍‌ ଇତିୟ ଇପ୍ରୋଣନ୍‌ ଆମଙ୍‌ ସିଲଡ୍‌ ଞିଏନ୍‌, ତି ଆ ଇତିୟ ଇପ୍ରୋଣନ୍‌ ଆବସେଙ୍‌ ଆଲୋଙର୍‌ଲୋଙ୍‌ ପୁର୍ବା ଜୋଜୋଞେଞ୍ଜି ଆମଙ୍‌ ଞେନ୍‌ଆଡଙ୍‌ ତିଲିଞ୍‌ବା । 31 ତି ଆଡ୍ରକୋନେଲୋଙ୍‌ ଅବ୍ରାଆମନ୍‌ ଡ ଆଡୁକ୍ରିନ୍‌ ସାରାନ୍‌ ଆତନିଲ୍‌, ଆରି, ତି ଆଡ୍ରକୋନେଲୋଙ୍‌ ଞେନ୍‌ ନିୟ୍‌ ଲେୟାନ୍‌ଆଡଙ୍‌ ତିଲ୍ଲାୟ୍‌; 32 ତି ଆବସେଙ୍‌ ଡ ତେତ୍ତେ ଡକୋନ୍‌ ଆଲୋଙର୍‌ ଇତ୍ତିୟନ୍‌ ଆଅଞ୍ଜି ଆମଙ୍‌ ସିଲଡ୍‌ ଆଞନି ତେତ୍ତେ ଞେନ୍‌ଆଡଙ୍‌ ତିଲିଞ୍‌ବା ।" 33 ଜାକୁବନ୍‌ ଆ ଡାଙ୍ଗାଡ଼ାଅନଞ୍ଜିଆଡଙ୍‌ ଞନଙ୍‌ ବନାଞନ୍‌ ଆତ୍ରିୟେନ୍‌ ସିଲଡ୍‌ ଆନିନ୍‌ ବାଗୁ ତନୋମ୍ପାଡ୍‌ ତୋମ୍ପାଡ୍‌ ଡାଲେ ଆର୍‌ଲନୁଡ୍‌ଲୁଡ୍‌ବାନ୍‌ ଇୟ୍‌ଲେ ରବୁଏ । ମନ୍‌ରାଜି ଆମଙ୍‌ବା ଅନୋରୋଙନ୍‌ ଡେଏନ୍‌ ।