1 ତି ଆଡିଡ୍‌ ଜିଉଦାନ୍‌ ଆବୋଞାଙଞ୍ଜି ଆମଙ୍‌ ସିଲଡ୍‌ ଅଦୁଲ୍ଲମିଅନ୍‌ ଇରାନ୍‌ ଆଞୁମ୍‌ ଅବୟ୍‌ ମନ୍‌ରାନ୍‌ ଆମଙ୍‌ବା ଇୟେନ୍‌ । 2 ତିତେତ୍ତେ ସୁୟନ୍‌ ଆଞୁମ୍‌ କିଣାନିୟନ୍‌ ଆ ମନ୍‌ରା ଆଡାଙ୍ଗଡ଼ିଅନ୍‌ ଆନିନ୍‌ଆଡଙ୍‌ ଗିୟ୍‌ଲେ ବିବାଡାଲନ୍‌ ଆନିନ୍‌ ସରିନ୍‌ ଲୁଡେନ୍‌ । 3 ସିଲତ୍ତେ ଆନିନ୍‌ ତିଲ୍‌କୋଡ୍‌ଡାଲେ ଓବ୍ବାସିୟ୍‌ କୋଡେନ୍‌, ଆନିନ୍‌ ଆଞୁମନ୍‌ ଏର ଅବ୍‌ଞୁମେନ୍‌ । 4 ତି ସିଲଡ୍‌ଲ୍ଲନ୍‌ ଆନିନ୍‌ ଆରି ତିଲ୍‌କୋଡେନ୍‌, ଆନିନ୍‌ ଓବ୍ବାସିଜନ୍‌ କୋଡ୍‌ଲେ ଆଞୁମନ୍‌ ଓନନ୍‌ ଅବ୍‌ଞୁମେନ୍‌ । 5 ଆରି ଆନିନ୍‌ ତିଲ୍‌କୋଡେନ୍‌, ଆନିନ୍‌ ଓବ୍ବାସିଜନ୍‌ କୋଡ୍‌ଲେ ଆଞୁମନ୍‌ ସେଲା ଅବ୍‌ଞୁମେନ୍‌ । କେନ୍‌ ଆନିନ୍‌ ଆକ୍ରୋଡେନ୍‌ ଆଡିଡ୍‌ ଜିଉଦାନ୍‌ କସିବଲୋଙ୍‌ ଡକୋଏନ୍‌ । 6 ତି ସିଲଡ୍‌ଲ୍ଲନ୍‌ ଜିଉଦାନ୍‌ ତାମର୍‌ ଆଞୁମ୍‌ ଅବୟ୍‌ ଡାଙ୍ଗଡ଼ିନ୍‌ ଓରୋଙ୍‌ଲେ ଆସୋଡ଼ା ଡାଙ୍ଗାଡ଼ାଅନ୍‌ ଏରନ୍‌ ସରିନ୍‌ ଅଃବିବାଏନ୍‌ । 7 ବନ୍‌ଡ ଜିଉଦାନ୍‌ ଆସୋଡ଼ା ଡାଙ୍ଗାଡ଼ାଅନ୍‌ ଏରନ୍‌ ପ୍ରବୁ ଆଗନିୟ୍‌ଗିୟ୍‌ଲୋଙ୍‌ ପେଲ୍ଲା ଡକୋଏନ୍‌; ତିଆସନ୍‌ ପ୍ରବୁ ଆନିନ୍‌ଆଡଙ୍‌ ରବୁଏନ୍‌ । 8 ସିଲତ୍ତେ ଜିଉଦାନ୍‌ ଓନନନ୍‌ଆଡଙ୍‌ ବରେନ୍‌, "ବୋଞାଙ୍‌ନମ୍‌ ଆକେଜ୍ଜା ଆନବ୍‌ଗୋଗୋୟ୍‌ ଆସନ୍‌ ଆମନ୍‌ ବୋଞାଙ୍‌ନମ୍‌ ଆଡୁକ୍ରି ସରିନ୍‌ ଲୁଡା ।" 9 ବନ୍‌ଡ ତି ଆପସିୟ୍‌ ଓନନ୍‌ ଆକେଜ୍ଜା ଅଃଡେଏ କେନ୍‌ଆତେ ଜନାଡାଲେ, ଆବୋଞାଙନ୍‌ ଆକେଜ୍ଜା ତନବ୍‌ନଙନ୍‌ ଆସନ୍‌ ଅଃନିସୁମ୍‌ଲୋ ବନ୍‌ଡ ଆବୋଞାଙନ୍‌ ଆଡୁକ୍ରି ସରିନ୍‌ ଲୁଡ୍‌ଲେ ଆନିନ୍‌ ଲବଲୋଙନ୍‌ ଜମ୍ମଲନ୍‌ ଗବ୍‌ଲୋଏନ୍‌ । 10 ଆନିନ୍‌ ଆକାବ୍ବାଡ଼ାନ୍‌ କେନ୍‌ ଏନ୍ନେଗନ୍‌ ଆସନ୍‌ ପ୍ରବୁନ୍‌ ଆଗନିୟ୍‌ଗିୟ୍‌ଲୋଙ୍‌ ମନଙ୍‌ ତଡ୍‌ ଡକୋଏନ୍‌; ତିଆସନ୍‌ ଆନିନ୍‌ ଆନିନ୍‌ଆଡଙ୍‌ ଜାୟ୍‌ ରବୁଏନ୍‌ । 11 ତିଆଡିଡ୍‌ ଜିଉଦାନ୍‌ ଆ କଉନନ୍‌ ତାମରନ୍‌ଆଡଙ୍‌ ବରେନ୍‌, "ଡାଙ୍ଗାଡ଼ାଅନ୍‌ଞେନ୍‌ ସେଲାନ୍‌ ଅନ୍‌ର୍ରଙ୍‌ ସୋଡ଼ାଏନ୍‌ ଜାୟ୍‌ ଆମନ୍‌ ଆଜୁଆର୍‌ବଜଞ୍ଜି ଅନ୍ତମ୍‌ ଆପ୍ପେୟ୍‌ନମ୍‌ ଆସିଂ ଜିର୍ରେ ଇୟ୍‌ଡକୋନା ।" ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଇୟମେନ୍‌, ଓଡେନ୍‌ନଙ୍‌ ଆବୋଞାଙଞ୍ଜି ଅନ୍ତମ୍‌ ସେଲାନ୍‌ ଜାୟ୍‌ ରବୁଡଙେ । ତିଆସନ୍‌ ତାମରନ୍‌ ଆପେୟନ୍‌ ଆସିଙ୍‌ ଜିର୍ରେ ଇୟ୍‌ଲେ ଡକୋନେ । 12 ଆରି ଗୋଗୋୟ୍‌ ଡିନା ଆତିକି, ସୁୟନ୍‌ ଆ ଡାଙ୍ଗଡ଼ିଅନ୍‌ ଜିଉଦାନ୍‌ ଆଡୁକ୍ରି ରବୁଏନ୍‌; ସିଲତ୍ତେ ଜିଉଦାନ୍‌ ବନବ୍‌ୟୋନ୍‌ ଞାଙ୍‌ଲେ ଅଦୁଲ୍ଲମିଅନ୍‌ ଇରାନ୍‌ ଆଞୁମ୍‌ ଆକୁଲମନ୍‌ ସରିନ୍‌ ତିମ୍ନାଲୋଙନ୍‌ ଆମେଣ୍ତାନ୍‌ ଆଉପୁର୍‌ ଆ ଗରଡେଞ୍ଜି ଆମରାଞ୍ଜି ଆମଙ୍‌ବା ଇୟେନ୍‌ । 13 ତିଆଡିଡ୍‌ ଅବୟ୍‌ ମନ୍‌ରାନ୍‌ ତାମରନ୍‌ଆଡଙ୍‌ କବରନ୍‌ ପାଙ୍‌ଲେ ବରେନ୍‌, "ଗିଜା, କୁଞାର୍‌ନମ୍‌ ଆମେଣ୍ତାନ୍‌ ଆଉପୁର୍‌ ଆଗନଡ୍‌ରେଡ୍‌ ଆସନ୍‌ ତିମ୍ନାନ୍‌ ଜିର୍ତେ ।" 14 ସିଲତ୍ତେ ତାମରନ୍‌ ଜୁଆର୍‌କାବନ୍‌ ଲଉୟ୍‌ଲନ୍‌, ଆମନଙନ୍‌ ଆସିନ୍‌ରି ଜିଜିଡାଲନ୍‌ ଆମୁକାନ୍‌ ଅବ୍‌ସସଲେ ତିମ୍ନା ଆତଙର୍‌ବା ଅଇନମରନ୍‌ ଆଗର୍ନେବା ତଙ୍କୁମ୍‌ଲେ ଡକୋଲନେ; ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଗିଜେନ୍‌, ସେଲାନ୍‌ ସୋଡ଼ାଏନ୍‌ ଜାୟ୍‌ ଡେନ୍‌ ଆନିନ୍‌ ସରିନ୍‌ ଅଃନବ୍‌ବିବାଲୋ । 15 ତିଆଡିଡ୍‌ ଜିଉଦାନ୍‌ ଆନିନ୍‌ଆଡଙ୍‌ ଗିୟ୍‌ଲେ ଜୋଣ୍ତଡ଼ିବୟ୍‌ ଅବ୍‌ଡିସୟେନ୍‌, ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଆମୁକାନ୍‌ ଅବ୍‌ସସଲେ ଡକୋଏନ୍‌ । 16 ତିଆସନ୍‌ ଆନିନ୍‌ ତଙର୍‌ବାନ୍‌ ଆମଙ୍‌ବାନ୍‌ ଇୟେନ୍‌ ଆରି ଆ କଉନନ୍‌ଆଡଙ୍‌ ଆନିନ୍‌ ଏର୍ନଃମଡନ୍‌ ବରେନ୍‌, "କାକୁର୍ତିତନାୟ୍‌, ଅମଙ୍‌ବାନମ୍‌ ଆନିୟ୍‌ ଆସନ୍‌ ଞେନ୍‌ଆଡଙ୍‌ ବନାୟଁନ୍‌ ତିୟିଁୟ୍‌ ।" ସିଲତ୍ତେ ତାମରନ୍‌ ବର୍ନେ, "ଆମନ୍‌ ମଙ୍‌ବାଞେନ୍‌ ଆନିୟ୍‌ ଆସନ୍‌ ଇନି ତିୟ୍‌ତିଁୟ୍‌ ?" 17 ଆନିନ୍‌ ବର୍ରନେ, "ମଣ୍ତାଲୋଙନ୍‌ ସିଲଡ୍‌ ଅବୟ୍‌ ଆଅନ୍‌ମେଡନ୍‌ ଆପ୍ପାୟ୍‌ଲେ ତିୟ୍‌ତମ୍‌ ।" ତାମରନ୍‌ ଗାମେନ୍‌, ତିଆତେ ଅନ୍‌ର୍ରଙ୍‌ ଆପ୍ପାୟାଞନ୍‌ ଜାୟ୍‌ ଞେନ୍‌ଆଡଙ୍‌ ଇନ୍ନିଙ୍‌ ବନଣ୍ଡାଗୋ ତିୟ୍‌ଲେଜିରିଁୟ୍‌ । 18 ଜିଉଦାନ୍‌ ବର୍ରନେ, "ଇନି ବନଣ୍ଡାଗୋ ଞେନ୍‌ ଆମନ୍‌ଆଡଙ୍‌ ତିୟମ୍‌ ?" ତାମରନ୍‌ ଗାମେନ୍‌, ଅମଙ୍‌ନମ୍‌ ଡକୋନ୍‌ କେନ୍‌ ଏନ୍‌ସିନମ୍‌ ଡ ତାଡ଼େରନ୍‌, ଆରି ଆମନ୍‌ ଆଞମ୍‌ଞମନ୍‌ ଆ ଡାଙ୍ଗୋ; ଜିଉଦାନ୍‌ କେନ୍‌ ଅଡ଼୍‌କୋନ୍‌ ତାମରନ୍‌ଆଡଙ୍‌ ତିୟେନ୍‌ । ଆରି ଜିଉଦାନ୍‌ ତାମରନ୍‌ ସରିନ୍‌ ଆର୍‌ଲୁଡେଞ୍ଜି ତାମରନ୍‌ ତିଲ୍‌କୋଡେନ୍‌ । 19 ତି ସିଲଡ୍‌ଲ୍ଲନ୍‌ ତାମରନ୍‌ ଡୋଲନ୍‌ ଜିରେନ୍‌, ଆରି, ଆମନଙ୍‌ କାବନ୍‌ ଉୟ୍‌ଲନ୍‌ ଆଜୋଆର୍‌ କାବନ୍‌ ଜିଜିଲନେ । 20 ତି ସିଲଡ୍‌ଲନ୍‌ ଜିଉଦାନ୍‌ ତି ଆଇବୟ୍‌ ଆମଙ୍‌ ସିଲଡ୍‌ ଆବ୍ରଣ୍ତାଏନ୍‌ ଆଜିନିସ ଆପନାଙ୍‌ ଆସନ୍‌ ଆକୁଲମନ୍‌ ଅଦୁଲ୍ଲମିଅନ୍‌ ଇରାନ୍‌ ଆସିଲୋଙ୍‌ ଆଅନ୍‌ମେଡନ୍‌ ଆପ୍ପାୟ୍‌ଲାୟ୍‌, ବନ୍‌ଡ ଆନିନ୍‌ ଆନିନ୍‌ଆଡଙ୍‌ ଅଃରବାଙ୍‌ଲୋ । 21 ତିଆସନ୍‌ ଆନିନ୍‌ ତେତ୍ତେ ଆମନ୍‌ରାଜିଆଡଙ୍‌ ବରେନ୍‌, ଅଇନମନ୍‌ ଆତଙର୍‌ବା ଅଙ୍ଗା ଆଇବୟ୍‌ ଡକୋଏନ୍‌, ଆନିନ୍‌ ଅଡ଼େଙ୍ଗା ? ଆନିଞ୍ଜି ବର୍‌ଲଞ୍ଜି, "କେନ୍‌ତ୍ତେନେ ଅନ୍ନିଙ୍‌ ଆଇବୟ୍‌ ଅଃଡକୋନେ ।" 22 ତି ସିଲଡ୍‌ଲ୍ଲନ୍‌ ଜିଉଦାନ୍‌ ଆମଙ୍‌ବା ୟର୍ରନ୍‌ ଇୟ୍‌ଲେ ବରେ, "ଞେନ୍‌ ଆନିନ୍‌ଆଡଙ୍‌ ଇୟ୍‌ଲେ ଅଃରବାଙ୍‌ଲାୟ୍‌," ଆରି ତେତ୍ତେ ଆ ମନ୍‌ରାଜି ଜାୟ୍‌ ବର୍ରଞ୍ଜି, "କେନ୍‌ ଆଡ୍ରକୋନେଲୋଙ୍‌ ଅନ୍ନିଙ୍‌ ଆଜୋଣ୍ତଡ଼ି ଅଃଡ୍ଡକୋନେଜି ।" 23 ତି ସିଲଡ୍‌ଲ୍ଲନ୍‌ ଜିଉଦାନ୍‌ ବର୍ରନେ, "ଆମଙନ୍‌ ଇନି ଡକୋ ଆନିନ୍‌ ତିଆତେ ଡକ୍କୋଏତୋ । ଞେନ୍‌ ଇନିବା ଗନବ୍‌ରଜନ୍‌ ଞାଙ୍‌ବୋ । ଗିୟ୍‌ବା, ଞେନ୍‌ କେନ୍‌ ଆଅନମେଡ୍‌ ଆପ୍ପାୟ୍‌ଲାୟ୍‌, ବନ୍‌ଡ ଆମ୍ବେନ୍‌ ଆନିନ୍‌ଆଡଙ୍‌ ରବାଙ୍‌ଲେ ଏଃର୍ରପ୍ତିଲୋ ।" 24 ଆରି ୟାଗାଙ୍‌ଗାୟ୍‌ ଆତିକି ଅବୟ୍‌ନେ ଜିଉଦାନ୍‌ଆଡଙ୍‌ ବରେନ୍‌, "କଉନ୍‌ନମ୍‌ ତାମରନ୍‌ ଡାରିତନେ; ଆରି ଡାରିଡାଲନ୍‌ ତିଲ୍‌କୋଡେନ୍‌ ।" ସିଲତ୍ତେ ଜିଉଦାନ୍‌ ବର୍ରନେ, "ଆନିନ୍‌ଆଡଙ୍‌ ଡୁଆରାବାନ୍‌ ଅମ୍‌ଡୁଙ୍‌ଲେ ତଗୋଲୋଙ୍‌ ପିଡ୍‌ବା ।" 25 ତି ସିଲଡ୍‌ଲ୍ଲନ୍‌ ଆନିନ୍‌ଆଡଙ୍‌ ଡୁଆରାବାନ୍‌ ଆରୋରୋଙ୍‌ଲାଞଞ୍ଜି, ଆକୁଞାରନ୍‌ ଆମଙ୍‌ବା କବରନ୍‌ ଆପ୍ପାୟେନ୍‌, କେନ୍‌ ଅଡ଼୍‌କୋନ୍‌ ଆଜନବ୍‌ ଆନ୍ନା ଆତେ, ତି ଆଓବ୍ବାମର୍‌ ବାତ୍ତେ ଞେନ୍‌ ତିଲ୍‌କୋଡ୍‌ଲିଁୟ୍‌ । ଆରି ବର୍ନେ, "କେନ୍‌ ଆଏଙ୍‌ସି ଡ ତାଡ଼େରନ୍‌ ଆରି ଡାଙ୍ଗୋନ୍‌ ଆନ୍ନା ଆତେ ? ତିଆତେ ଅଃମଡ୍‌ଲେ ଗିୟ୍‌ବା ।" 26 ସିଲତ୍ତେ ଜିଉଦାନ୍‌ ତି ଅଡ଼୍‌କୋନ୍‌ ଆଜନବ୍‌ ଞେନ୍‌ଆତେ ଗାମ୍‌ଲେ ବରନେ, "ଆନିନ୍‌ ଞେନ୍‌ ସିଲଡ୍‌ ଗୋଗୋୟ୍‌ ଡରମ୍ମବୟ୍‌, ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆନିନ୍‌ଆଡଙ୍‌ ଡାଙ୍ଗଡ଼ାଅଞେନ୍‌ ସେଲାନ୍‌ଆଡଙ୍‌ ଅଃତିୟ୍‌ଲାୟ୍‌ ।" ବନ୍‌ଡ ଜିଉଦାନ୍‌ ଆରି ଆମଙନ୍‌ ଅଃନିୟ୍‌ଲୋ । 27 ଆରି, ତାମରନ୍‌ ଆ କୋକ୍କୋନେ ବେଡ଼ା ଆରଡ଼ୋଲାଞନ୍‌, ଆକିମ୍ପୋଙ୍‌ଲୋଙ୍‌ ରାବଡ଼ା ଆଅନ୍‌ ଡକୋ ଗାମ୍‌ଲେ ଗିୟ୍‌ତାଏନ୍ । 28 ଆରି ଆନିନ୍‌ ଆ କରୋକ୍‌କୋଡ୍‌ ଡିନାଇଙନ୍‌ ଅବୟ୍‌ ପସିଜନ୍‌ ଆସି ରାଙ୍‌ଡାଏନ୍‌; ସିଲତ୍ତେ ଆନବ୍‌କୋକ୍କୋଡ୍‌ବୟ୍‌ ତି ଆସିଲୋଙନ୍‌ ଲୁଲୁନ୍‌ ଆତାଡ଼େର୍‌ ଜିଲେ ବର୍ନେ, "କେନ୍‌ ଆନିନ୍‌ ଆସୋଡ଼ାବନୋଞାଙ୍‌ ।" 29 ବନ୍‌ଡ ଆନିନ୍‌ ଆସିନ୍‌ ଡିଙ୍‌ଲେ ପାଙେନ୍‌, ଆରି ଆବୋଞାଙନ୍‌ ଆପର୍ତମ୍ମୁନ୍‌ କୋଡେନ୍‌ । ଅନବ୍‌କୋକ୍କୋଡ୍‌ବଜନ୍‌ ଗାମେନ୍‌, "ଓ ଆମନ୍‌ ଏନ୍ନେଲେ ଡୁଙ୍‌ଲନାୟ୍‌ ।" ତିଆସନ୍‌ ଆପର୍ତମ୍ମୁ ଆକ୍ରୋଡେନ୍‌ ଆପସିୟ୍‌ ଆଞୁମ୍‌ ପେରସ ଆମ୍ମୁଙ୍‌ ଜିର୍ରାୟ୍‌ । 30 ତି ସିଲଡ୍‌ଲ୍ଲନ୍‌ ଆସିଲୋଙନ୍‌ ଲୁଲୁନ୍‌ ଆତାଡ଼େର୍‌ ଆଜନିନ୍‌ ଆବୋଞାଙନ୍‌ ଲବଲୋଙନ୍‌ ଜଲୟ୍‌ଲାୟ୍‌, ଆଞୁମନ୍‌ ସେରଅ* ଡକୋଏନ୍‌ ।