1 କେନ୍‌ ଆଡିଡ୍‌ ଜାୟ୍‌ କିଣାନ୍‌ ଡେସାଲୋଙନ୍‌ କାନ୍ତାରାନ୍‌ ଡକୋଏନ୍‌ । 2 ତିଆସନ୍‌ ଆନିଞ୍ଜି ମିସର୍‌ ଡେସା ସିଲଡ୍‌ ଅଙ୍ଗା ଆଜନ୍‌ରୋମ୍‌ ପାଙ୍‌ଲାଜି, ତି ଅଡ଼୍‌କୋନ୍‌ ଆରଞିଡେନ୍‌ ଆପେୟଞ୍ଜି ଆନିଞ୍ଜିଆଡଙ୍‌ ବରେନ୍‌, "ଆମ୍ୱେଞ୍ଜି ଆରି ଇୟ୍‌ଲେ ଇନ୍‌ଲେଞ୍ଜି ଆସନ୍‌ ଜନ୍‌ରୋମନ୍‌ ଞିଲେ ପାଙାୟ୍‌ବା ।" 3 ସିଲତ୍ତେ ଜିଉଦାନ୍‌ ଆନିନ୍‌ଆଡଙ୍‌ ବରେନ୍‌, "ତି ଆ ମନ୍‌ରା ରଡୋ ସିବ୍‌ଡେୟ୍‌ବର୍ରନ୍‌ ବର୍ନେ, ବୋଞାଙ୍‌ବେନ୍‌ ଆମ୍ୱେଞ୍ଜି ସରିନ୍‌ ଅଃଡକୋଲନ୍‌, ଆମ୍ୱେଞ୍ଜି ମୁକାଲେ ଗିୟ୍‌ଲେ ଏରପ୍ତିଏ । 4 ତିଆସନ୍‌ ଆମନ୍‌ ବୋଞାଙ୍‌ଲେନ୍‌ଆଡଙ୍‌ ଞେନ୍‌ ସରିନ୍‌ ଆପ୍ପାୟ୍‌ଲେନ୍‌, ତିଡେନ୍‌ ଇନ୍‌ଲେଞ୍ଜି ଆମନ୍‌ ଆସନ୍‌ ଜନ୍‌ରୋମନ୍‌ ଆଞନି ଆସନ୍‌ ଏଇୟ୍‌ତେ । 5 ବନ୍‌ଡ ବିନ୍ୟାମିନନ୍‌ ଅଃନାପ୍ପାୟ୍‌ଲାୟ୍‌, ଇନ୍‌ଲେଞ୍ଜି ଏଃନିୟେ; ଇନିଆସନ୍‌ଗାମେଣ୍ଡେନ୍‌ ତି ଆ ମନ୍‌ରା ବର୍ନେ, ବୋଞାଙ୍‌ବେନ୍‌ ଆମ୍ୱେଞ୍ଜି ସରିନ୍‌ ଅଃଡକୋଲନ୍‌, ଆମ୍ୱେଞ୍ଜି ମୁକାଲେନ୍‌ ଗିୟ୍‌ଲେ ଏରପ୍ତିଏ ।" 6 ସିଲତ୍ତେ ଜାକୁବନ୍‌ ବରନ୍‌, "ବୋଞାଙ୍‌ବେନ୍‌ ଆରି ଅବୟ୍‌ ଡକୋ, କେନ୍‌ଆତେ ତି ଆମନ୍‌ରାଆଡଙ୍‌ ବର୍ରେ ଞେନ୍‌ଆଡଙ୍‌ ଇନିବା ଏନେଲେ ଏଞର୍ରମ୍‌ଲିଁୟ୍‌ ?" 7 ଆନିଞ୍ଜି ବର୍ରଞ୍ଜି, "ଆନିନ୍‌ ଇନ୍‌ଲେଞ୍ଜି ଡ ଅସିଙ୍‌ଲେଞ୍ଜି ଆବର୍ନେ ବର୍ରଲେନ୍‌, ଆପ୍ପେୟ୍‌ବେନ୍‌ ନମି ଆନ୍ତାନ୍‌ ପଙ୍‌ ଆମେଙ୍‌ ଡକୋ ? ବୋଞାଙ୍‌ବେନ୍‌ ଆରି ଡକୋ ପଙ୍‌ ? ତିଆସନ୍‌ ଆବର୍ନେନ୍‌ ଅନ୍ତମ୍‌ ଇନ୍‌ଲେନ୍‌ ଏଜାଙ୍‌ଲଙ୍‌ଲାୟ୍‌ ବୋଞାଙ୍‌ବେନ୍‌ କେନ୍‌ ତ୍ତେନେ ଓରୋଙାୟ୍‌ବା କେନ୍‌ ଆବର୍ନେ ବର୍ତଲେନ୍‌ ଗାମ୍‌ଲେ ଇନ୍‌ଲେନ୍‌ ଏଙ୍ଗାଲେ ଜନାଲେ ଏରବ୍‌ତିଆୟ୍‌ବନ୍‌ ?" 8 ଜିଉଦାନ୍‌ ଆପେୟନ୍‌ ଜାକୁବନ୍‌ଆଡଙ୍‌ ଆରି ବରେନ୍, "ଆମନ୍‌ ତି ଆ ବେଣ୍ତିଆଆଡଙ୍‌ ଞେନ୍‌ ସରିନ୍‌ ଆପ୍ପାୟା; ଇନ୍‌ଲେଞ୍ଜି ଡୋଲନ୍‌ ଏଜିର୍ତେ, ସିଲତ୍ତେ ଇନ୍‌ଲେଞ୍ଜି ଡ ଆମନ୍‌ ଆରି ପସିଜଞ୍ଜି, ଅଡ଼୍‌କୋନ୍‌ଲେନ୍‌ ଅମେଙ୍‌ଲଙ୍‌ତନ୍‌, ଅଃରବୁଲଙ୍‌ନେ ।" 9 ଆପାଲ୍‌ତେଙନ୍‌ ଞେନ୍‌ ଡକୋ, ଞେନ୍‌ ଆନିନ୍‌ଆଡଙ୍‌ ଆବ୍‌ୟର୍‌ତାୟ୍‌ । ଞେନ୍‌ ଆନିନ୍‌ଆଡଙ୍‌ ଅମଙ୍‌ବାବେନ୍‌ ଅଃନାବ୍‌ୟର୍ରାୟ୍‌ଡେନ୍‌ ଅଡ଼୍‌କୋ ଡିନାନ୍‌ ଆସନ୍‌ ଗନିୟ୍‌ଗିୟ୍‌ଲୋଙ୍‌ବେନ୍‌ ଞେନ୍‌ ଡୋସାମର୍‌ ଡେତିଁୟ୍‌ । 10 ଇନ୍‌ଲେଞ୍ଜି ଡିୟ୍‌ନେ ଅଃଡିଙ୍‌ଲେନ୍‌ବନ୍‌, ଞେନ୍‌ ଆରି ବାଗୁତର ଇୟ୍‌ଲେ ଏୟର୍ତନାୟ୍‌ବନ୍‌ ।

11 ସିଲତ୍ତେ ଆପେୟଞ୍ଜି ଜାକୁବନ୍‌ ଆନିଞ୍ଜିଆଡଙ୍‌ ବରେଞ୍ଜି, "ଏତ୍ତେଲ୍‌ଡେନ୍‌, ଅବୟ୍‌ କାବ୍ବାଡ଼ାନ୍‌ ଲୁମ୍‌ବା; ଆମ୍ୱେଞ୍ଜି ତର୍ଡମ୍‌ ଆସିମ୍ମାଲୋଙ୍‌ କେନ୍‌ ଆଡେସା ମନଙ୍‌ ଜିନିସଞ୍ଜି, ଗୁଗ୍‌ଗୁଡ଼ନ୍‌, ଆଡଙନ୍‌, ଲଙିଡ୍‌ ଜିନିସନ୍‌, ଲଙିଡ୍‌ମେନ୍‌, ପେସ୍ତାନ୍‌ ଡ ବାଦାମନ୍‌ ଅର୍ସୋୟ୍‌ ପାଙ୍‌ଲେ ତି ଆ ମନ୍‌ରାଆଡଙ୍‌ ଇୟ୍‌ତିୟ୍‌ବା । 12 ଆରି, ତର୍ଡମ୍‌ ଆସିଲୋଙ୍‌ ବାଗୁନ ତଙ୍କାନ୍‌ ପାଙ୍‌ବା ଆରି ଜନିରାବେନ୍‌ ଆମୁକ୍କାଲୋଙ୍‌ ଅଙ୍ଗା ଆତଙ୍କା ଡକୋଏନ୍‌, ତି ନିୟ୍‌ ଅକାଲୋଙ୍‌ବେନ୍‌ ପାଙ୍‌ବା; ଓଡେନ୍‌ନଙ୍‌ ତିଆତେ ଅଲ୍‌ନଅଡ଼ଏ । 13 ଆରି, ବୋଞାଙ୍‌ବେନ୍‌ ବେଞ୍ଜାମିନନ୍‌ଆଡଙ୍‌ ଓରୋଙ୍‌ଲେ ଆରି ତି ଆ ମନ୍‌ରା ଆମଙ୍‌ବା ଇୟ୍‌ବା । 14 ଅଡ଼୍‌କୋନ୍‌ ସିଲଡ୍‌ ବୋର୍ସା ଆ ଇସ୍ୱର ଆମ୍ୱେଞ୍ଜିଆଡଙ୍‌ ତି ଆ ମନ୍‌ରା ଆମଙ୍‌ବା ଏନେଲେ ସାୟୁମ୍‌ବେନ୍‌ତୋ, ଏଙ୍ଗାଲେ ଆନିନ୍‌ ବ ବୋନୋଞାଙ୍‌ବେନ୍‌ ଆଡଙ୍‌ ଡ ବିନ୍ୟାମିନନ୍‌ଆଡଙ୍‌ ଉମ୍‌ରେଙ୍‌ତେ । ବନ୍‌ଡ ଞେନ୍‌ଆଡଙ୍‌ ଡାଙ୍ଗଡ଼ାଅନନ୍‌ ଅବୟ୍‌ତଡନ୍‌ ଅନ୍ତମ୍‌ ଡେଲିଁୟ୍‌ଡେନ୍‌ ଡେଇଁୟ୍‌ତୋ ପୟ୍‌ସେଙ୍‌ ।"

15 ସିଲତ୍ତେ ଆନିଞ୍ଜି ତି ରନବାଙନ୍‌ ଆଜନବ୍‌ ଡ ବାଗୁନ ତଙ୍କାନ୍‌ ଆରି ବିନ୍ୟାମିନନ୍‌ ସରିନ୍‌ ଓରୋଙ୍‌ଲେ ମିସର୍‌ ଡେସାନ୍‌ ଜିର୍ରେ ଜୋସେପନ୍‌ ଆମୁକାବା ତନଙେଞ୍ଜି । 16 ତିଆଡିଡ୍‌ ଜୋସେପନ୍‌ ଆନିଞ୍ଜି ସରିନ୍‌ ବିନ୍ୟାମିନନ୍‌ଆଡଙ୍‌ ଗିୟ୍‌ଲେ ଆସିଙନ୍‌ ଆଡନେମର୍‌ଆଡଙ୍‌ ବରେନ୍‌, "କେନ୍‌ ଆମନ୍‌ରାଜିଆଡଙ୍‌ ଅସିଙ୍‌ଞେନ୍‌ ଓରୋଙାଜି ଆରି ଜନ୍ତୁନ୍‌ ରବୁଲେ ଜନୋମ୍‌ ଜନବନ୍‌ ଇୟ୍‌ତୁବା; କେନ୍‌ ଆନିଞ୍ଜି ତମ୍ୱାନ୍‌ ଆଓଲ୍ଲେ ଞେନ୍‌ ସରିନ୍‌ ଗାଗାତନ୍‌ଜି ।" 17 ତି ସିଲଡ୍‌ଲ୍ଲନ୍‌ ତି ଆ ମନ୍‌ରା ଜୋସେପନ୍‌ ଆବନାଁୟ୍‌ବର୍‌ ଅନ୍ତମ୍‌ ଲୁମ୍‌ଲେ ଆନିଞ୍ଜିଆଡଙ୍‌ ଜୋସେପନ୍‌ ଆସିଙ୍‌ ଓରୋଙେନ୍‌ । 18 ଆରି, ଜୋସେପନ୍‌ ଆସିଙ୍‌ ଅନୋରୋଙନ୍‌ ଆଡ୍ରେନ୍‌ ସିଲଡ୍‌ ଆନିଞ୍ଜି ବତଙ୍‌ଲେ ତର୍ଡମ୍‌ କଡାଡ଼ିଲଞ୍ଜି, "ଆମ୍ମୁଙ୍‌ ଜନିରାଲୋଙ୍‌ଲେନ୍‌ ଅଙ୍ଗା ଆତଙ୍କା ରଏନ୍‌, ତିଆସନ୍‌ ଇନ୍‌ଲେଞ୍ଜିଆଡଙ୍‌ କେନ୍‌ତ୍ତେନେ ଓରୋଙ୍‌ଲଙ୍‌ଲନ୍‌; ନମି ଆନିନ୍‌ ଅବ୍‌ଗେଗେଲେ ଇନ୍‌ଲେଞ୍ଜି ଡ ଗୋଡୋଁୟ୍‌ଲେନ୍‌ ଅଡ଼୍‌କୋନ୍‌ ପାଙ୍‌ଲେ ଇନ୍‌ଲେଞ୍ଜିଆଡଙ୍‌ କମ୍ୱାରିଗୋ ଡକୋଲଙ୍‌ତନେ ।" 19 ତିଆସନ୍‌ ଆନିଞ୍ଜି ଜୋସେପନ୍‌ ଆସିଙନ୍‌ ଆଡନେମର୍‌ ଆମଙ୍‌ବା ଇୟ୍‌ଲେ ଅସିଙନ୍‌ ଆଗ୍ରନ୍ନେ ଡରକୋନେଲୋଙ୍‌ ଆନିନ୍‌ ସରିନ୍‌ କଡାଡ଼ିଲନ୍‌ ବରେଞ୍ଜି, 20 "ପ୍ରବୁ, ଇନ୍‌ଲେଞ୍ଜି ଆମ୍ମୁଙ୍‌ ଜନ୍‌ରୋମନ୍‌ ଆଞନିବା ଏଇୟ୍‌ଲାୟ୍‌; 21 ଞେନ୍‌ ଅସିଙନ୍‌ ଏଜିର୍ରେନ୍‌ ଆତଙର୍‌ଲୋଙ୍‌, ଞେନ୍‌ ଅକ୍କାଲେଞ୍ଜି ଏଉୟ୍‌ଲାୟ୍‌, ଆରି ଅଡ଼୍‌କୋ ମନ୍‌ରାନ୍‌ ଆ ସକ୍କାଲୋଙ୍‌ ତଙ୍କାନ୍‌ ଡକୋଏନ୍‌ । ଅକ୍କାଲୋଙ୍‌ଲେନ୍‌ ଏଙ୍ଗାଲେ ଜିର୍ରାୟ୍‌ ଇନ୍‌ଲେଞ୍ଜି ଜନାତଡ୍‌ । ଞେନ୍‌ ତି ଆତଙ୍କା ଆନାବ୍‌ଡିଡ୍‌ ଆସନ୍‌ ଏଇୟ୍‌ଲାୟ୍‌ ଆରି ଅସୋୟ୍‌ ବାତ୍ୟାନ୍‌ ଆପନାଙ୍‌ ଆସନ୍‌ ତଙ୍କାନ୍‌ ଏପାଙ୍‌ଲାୟ୍‌ । 22 ଆରି, ଜନ୍‌ରୋମନ୍‌ ଆଞନି ଆସନ୍‌ ଇନ୍‌ଲେଞ୍ଜି ଆରି ତଙ୍କାନ୍‌ ଏପାଙ୍‌ଲାୟ୍‌; ବନ୍‌ଡ ତି ଆତଙ୍କା ଜନିରାଲୋଙ୍‌ଲେନ୍‌ ଆନ୍ନା ଡକୋଏନ୍‌, ଇନ୍‌ଲେଞ୍ଜି ତିଆତେ ଜନତଡ୍‌ ।" 23 ସିଲତ୍ତେ ଅସିଙନ୍‌ ଆ କମ୍ବାରିମର୍‌ ବର୍ରନେ "ବାଉଲ୍ଲିଡେଡଙ୍‌ବେନ୍‌ । ବତଙ୍‌ଡଙ୍‌ବେନ୍‌ । ଇସ୍ୱରବେନ୍‌, ଆପ୍ପେୟ୍‌ବେନ୍‌ ଆ ଇସ୍ୱର, ଜନିରାଲୋଙ୍‌ବେନ୍‌ ଆମ୍ୱେଞ୍ଜିଆଡଙ୍‌ ଅନର୍ଜେ ତିୟ୍‌ଲବେନ୍‌; ତଙ୍କାବେନ୍‌ ଅମଙ୍‌ଞେନ୍‌ ଡକୋଏନ୍‌ ।" ସିଲତ୍ତେ ଆନିନ୍‌ ସିମିଅନନ୍‌ଆଡଙ୍‌ ଅମ୍‌ଡୁଙ୍‌ଲେ ଆମଙ୍‌ବାଞ୍ଜି ଓରୋଙ୍‌ଲାୟ୍‌ । 24 ତି ସିଲଡ୍‌ଲ୍ଲନ୍‌ ଆନିନ୍‌ ଆନିଞ୍ଜିଆଡଙ୍‌ ଜୋସେପନ୍‌ ଆଅମସିଙ୍‌ ଓରୋଙ୍‌ଲେ ଡାଆନ୍‌ ତିୟେନ୍‌, ଆନିଞ୍ଜି ଆଜଙ୍‌ଲଞ୍ଜି; ଆରି, ଆନିନ୍‌ ଆ ଗୋଡୋଞଞ୍ଜିଆଡଙ୍‌ ଜନୋମଞ୍ଜି ତିୟେନ୍‌ । 25 ଆରି ତମ୍ୱାନ୍‌ ଆଓଲ୍ଲେ ଆଡିଡ୍‌ ଜୋସେପନ୍‌ ଜିର୍ତାୟ୍‌ ଗାମ୍‌ଲେ ଆନିଞ୍ଜି ରନବାଙ୍‌ ଜନବନ୍‌ ସଜାୟେଞ୍ଜି; ଇନିଆସନ୍‌ଗାମେଣ୍ଡେନ୍‌ ଆନିଞ୍ଜି ତେତ୍ତେ ଗାଗାତଞ୍ଜି ଗାମ୍‌ଲେ ଅମ୍‌ଡଙେଞ୍ଜି । 26 ତି ସିଲଡ୍‌ଲ୍ଲନ୍‌ ଜୋସେପନ୍‌ ଅସିଙନ୍‌ ଆଜିର୍ରାଞନ୍‌, ଆନିଞ୍ଜି ଆସିଲୋଙଞ୍ଜି ଆ ରନବାଙ୍‌ ଜନବନ୍‌ ଆମଙ୍‌ବାନ୍‌, ଅମସିଙନ୍‌ ପାଙ୍‌ଲେ ଆନିନ୍‌ଆଡଙ୍‌ ତୁଡ଼ୁମ୍‌ଲେ ଲୋମେଞ୍ଜି । 27 ସିଲତ୍ତେ ଆନିଞ୍ଜି ଏଙ୍ଗାଗୋ ଡକୋଜି ଗାମ୍‌ଲେ ଜୋସେପନ୍‌ ଆନିଞ୍ଜିଆଡଙ୍‌ ବରେଞ୍ଜି, "ଆପ୍ପେୟ୍‌ବେନ୍‌ ଆସୁକ୍କାନ୍‌ ପଙ୍‌ ? ଆମ୍ୱେଞ୍ଜି ଅଙ୍ଗା ଆବୁଡାମର୍‌ ଆବର୍ନେ ଏବର୍ରନେ, ଆନିନ୍‌ ନମିଆନ୍ତାନ୍‌ ଡକୋ ପଙ୍‌ ?" 28 ଆନିଞ୍ଜି ବର୍‌ଲଞ୍ଜି, "କମ୍ୱାରିନମ୍‌, ଆପେୟ୍‌ଲେନ୍‌ ସୁକ୍କା ଡକୋ, ଆନିନ୍‌ ନମିଆନ୍ତନ୍‌ ଆମେଙ୍‌ଡକୋ । ସିଲତ୍ତେ ଆନିଞ୍ଜି ବରୁମ୍‌ଲେ ଲୋମେଞ୍ଜି ।" 29 ଅଙ୍ଗାଆଡିଡ୍‌ ଜୋସେପନ୍‌ ଆବୋଞାଙନ୍‌ ବିଞ୍ଜାମିନନ୍‌ଆଡଙ୍‌ବରେନ୍‌, ଆନିନ୍‌ ଗାମେନ୍‌, "ଆମନ୍‌ ଆନା ଆବର୍ନେ ଞେନ୍‌ଆଡଙ୍‌ ବର୍ରିଁୟ୍‌, କେନ୍‌ଆତେ ଆସନ୍ନା ବନୋଞାଙ୍‌ନମ୍‌ । ଏ ଡାଙ୍ଗାଡ଼ାଅନ୍‌, ଇସ୍ୱରନ୍‌ ଆମନ୍‌ଆଡଙ୍‌ ଆସିର୍ବାଦଅମ୍‌ତୋ ।" 30 ସିଲତ୍ତେ ଆବୋଞାଙନ୍‌ ଆସନ୍‌ ଜୋସେପନ୍‌ ଆଉଗର୍‌ ଡନୁଙ୍‌ୟମନ୍‌ ବାତ୍ତେ ଗୋସ୍ସୋର୍ରେ ଆଡ୍ରେନ୍‌ ଆସନ୍‌ ଆନିନ୍‌ ୟନେନ୍‌ ଆସନ୍‌ ଡରକୋନେନ୍‌ ସାଜେନ୍‌; ଆରି ଆନିନ୍‌ ଆବକ୍ରାସିଙ୍‌ଲୋଙନ୍‌ ଜିର୍ରେ ତେତ୍ତେ ଇୟ୍‌ଲେୟେୟେଡାନେ । 31 ତି ସିଲଡ୍‌ଲ୍ଲନ୍‌ ଆନିନ୍‌ ଆମଡ୍ଡାଲନ୍‌ ଡୁଆରାବାନ୍‌ ଡକୋଏନ୍‌, ଆରି, ଲଡ୍‌ଲଡ୍‌ଜିଲନ୍‌ ଜନୋମନ୍‌ ଆଜନବ୍‌ ଆବନାନ୍ତେ ଆସନ୍‌ ବାଞେନ୍‌ । 32 ସିଲତ୍ତେ ଆକମ୍ୱାରିଞ୍ଜି ଜୋସେପନ୍‌ ଡ ଆବୋଞାଙଞ୍ଜି ଆସନ୍‌, ଆରି, ଆନିନ୍‌ ସରିନ୍‌ ଆଗାଗାନେମର୍‌ ମିସ୍ରିୟନ୍‌ ଆ ମନ୍‌ରାଜି ଆସନ୍‌ ତରଙ୍‌ଆନ୍ନା ବାନ୍ତେଏଞ୍ଜି, ଇନିଆସନ୍‌ଗାମେଣ୍ଡେନ୍‌ ଏବ୍ରିଅମରଞ୍ଜି ସରିନ୍‌ ଆଗାଗାନେ ଆସନ୍‌ ମିସ୍ରିଅମରଞ୍ଜି ଞନର୍ରମନ୍‌ ଅଡ୍ଡକୋଲୋ; ତିଆତେ ମିସ୍ରିୟଞ୍ଜି ଏଡ଼ୁର୍‌ମଡ୍‌ ଆକାବ୍ବାଡ଼ା । 33 ତି ସିଲଡ୍‌ଲ୍ଲନ୍‌ ଜୋସେପନ୍‌ ଆମୁକାବା ଆନିଞ୍ଜି ଆସୋଡ଼ା ଆସୋଡ଼ାନ୍‌ ଆତ୍ରଙ୍କୁମ୍‌ଲୋଙ୍‌ ଡ ଆସନ୍ନା ଆସନ୍ନାନ୍‌ ଆତ୍ରଙ୍କୁମ୍‌ଲୋଙ୍‌ ତଙ୍କୁମେଞ୍ଜି; ସିଲତ୍ତେ ଆନିଞ୍ଜି ତର୍ଡମ୍‌ ସାନ୍ନି ଡେଏଞ୍ଜି । 34 ଆରି କମ୍ବାରିମରଞ୍ଜି ଜୋସେପନ୍‌ ଆମେଜଲୋଙ୍‌ ସିଲଡ୍‌ ଜନୋମଞ୍ଜି ପାଙ୍‌ଲେ ଆନ୍ନାମରଞ୍ଜିଆଡଙ୍‌ ବନ୍ତାଲେ ତିୟେଞ୍ଜି, ବନ୍‌ଡ ଆନିଞ୍ଜି ଆନ୍ନା ବୋଞାଙଞ୍ଜି ସିଲଡ୍‌ ବିଞ୍ଜାମିନନ୍‌ ଗୋଗୋୟ୍‌ ମନ୍‌ଲୟ୍‌ ତର ବନ୍ତାଲେ ତିୟେଞ୍ଜି । ଆନିଞ୍ଜି ଜୋମ୍‌ଲେ ଗାଲେ ଆନିନ୍‌ ସରିନ୍‌ ସର୍ଡାଲଞ୍ଜି ।