1 ତି ସିଲଡ୍‌ଲ୍ଲନ୍‌ ଜୋସେପନ୍‌ ଆସିଙନ୍‌ ଆଡନେମର୍‌ଆଡଙ୍‌ ବାଞେନ୍‌, "କେନ୍‌ ଆ ମନ୍‌ରାଜି ଆଜନିରାଲୋଙ୍‌ ଡିଅଙ୍ଗା ଜନ୍‌ରୋମନ୍‌ ଞମ୍‌ତେ, ଡିୟ୍‌ତେନ୍‌ ବବ୍‌ରିୟ୍‌ଲେ ତିଆଜି, ଆରି, ଡିଲେ ମନ୍‌ରାନ୍‌ ଆତଙ୍କା ଆଜନିରାଞ୍ଜି ଆମୁକ୍କାଲୋଙ୍‌ ଡକ୍କୋଆ । 2 ଆରି ଆସନ୍ନାମରନ୍‌ ଆଜନିରାଲୋଙ୍‌ ଆନିନ୍‌ ଜନ୍‌ରୋମନ୍‌ ଆଞରିଏନ୍‌ ଆତଙ୍କା ସରିନ୍‌ ଗିଲ୍ଲଞେନ୍‌, ତି ଆରୁପା ଗିଲ୍ଲନ୍‌ ଡକ୍କୋଆ ।" ସିଲତ୍ତେ ଆନିନ୍‌ ଜୋସେପନ୍‌ ଆବର୍ନେ ଅନ୍ତମ୍‌ ଲୁମେନ୍‌ । 3 ଆରି ଆସ୍ରାଆରେନ୍‌ ସିଲଡ୍‌, ଆନିଞ୍ଜି ଗୋଡୋଞଞ୍ଜି ସରିନ୍‌ ଆପ୍ପାୟେଞ୍ଜି । 4 ଆରି, ଗଡ଼ାନ୍‌ ସିଲଡ୍‌ ଡୁଙ୍‌ଲନ୍‌ ଗୋଗୋୟ୍‌ ସଙାୟ୍‌ ଅନ୍‌ରଙ୍‌ ଜିରେଞ୍ଜି, ଜୋସେପନ୍‌ ଆସିଙନ୍‌ ଆଡନେମର୍‌ଆଡଙ୍‌ ବରେନ୍‌, "ଆମନ୍‌ ଡୋଲନ୍‌ ତି ଆମନ୍‌ରାଆଡଙ୍‌ ସନ୍‌ଡୋଙ୍‌ଲେ ଇର୍ରେ ଆନିଞ୍ଜି ରବାଙ୍‌ଲେ ଇୟ୍‌ବରାଜି, ଆମ୍ୱେଞ୍ଜି ମନଙ୍‌ କାବ୍ବାଡ଼ାନ୍‌ ଏର୍‌ଲନୁମନ୍‌ ଇନିବା ଇର୍ସେ କାବ୍ବାଡ଼ାନ୍‌ ଲୁମେନ୍‌ ? 5 ପ୍ରବୁଲେନ୍‌ ଅଙ୍ଗାଲୋଙ୍‌ ଗରାଡାନେତେ ଡ ତିବାତ୍ତେ ଗଙାୟ୍‌ତେ, ତି ଆଗିଲ ପଙ୍‌ ଅକେନ୍‌ତଡ୍‌ ? କେନ୍‌ଏଡ୍‌ନେଲେ ଆକାବ୍ବାଡ଼ା ବାତ୍ତେ ଆମ୍ୱେଞ୍ଜି ଇର୍ସେନ୍‌ ଏଲୁମେନ୍‌ ।" 6 ଜୋସେପନ୍‌ ଆ କମ୍ୱାରି ଆବର୍ନେ ଅମ୍‌ଡଙ୍‌ଲେ କୁର୍ତାଲୋଙ୍‌ ଡାୟ୍‌ଲେ ଆନିଞ୍ଜିଆଡଙ୍‌

ରବାଙ୍‌ଡାଲେ କେନ୍‌ ଅଡ଼୍‌କୋନ୍‌ ଆବର୍ନେ ବର୍ନେ । 7 ସିଲତ୍ତେ ଆନିଞ୍ଜି ବର୍‌ଲଞ୍ଜି, "ପ୍ରବୁଲେନ୍‌ ଇନିବା କେନ୍‌ଏଡ୍‌ନେଲେ ଆବର୍ନେ ବର୍ରନେ ?" କମ୍ୱାରିବେଞ୍ଜି କେନ୍‌ଏଡ୍‌ନେଲେ ଆକାବ୍ବାଡ଼ା ଆଲନୁମ୍‌ ଆସନ୍‌ ସଙାୟ୍‌ ଡକୋଏତୋ । 8 ଗିଜା, ତର୍ଡମ୍‌ ତର୍ଡମ୍‌ ଆଜନିରା ଆମୁକ୍କାଲୋଙ୍‌ ଆମ୍ମୁଙ୍‌ ଆଡିଡ୍‌ ଅଙ୍ଗା ଆତଙ୍କା ଏଞାଙ୍‌ଲାୟ୍‌; ତିଆତେ ଇନ୍‌ଲେଞ୍ଜି କିଣାନ୍‌ ଡେସାନ୍‌ ସିଲଡ୍‌ ଆରି ଅମଙ୍‌ବାନମ୍‌ ଏଆବ୍‌ୟର୍ରାୟ୍‌; ଏତ୍ତେଲ୍‌ଡେନ୍‌ ଏଙ୍ଗାଲେ ପ୍ରବୁନମ୍‌ ଆସିଙ୍‌ ସିଲଡ୍‌ ରୁପା କି ସୁନା ଏରାଉନାୟ୍‌ ? 9 କମ୍ୱାରିନମ୍‌ଞ୍ଜି ଆମଙ୍‌ ସିଲଡ୍‌ ଆନା ଆମଙ୍‌ ଞାଙ୍‌ତେ, ଆନିନ୍‌ ରବୁଏତୋ, ଆରି, ଇନ୍‌ଲେଞ୍ଜି ଜାୟ୍‌ ପ୍ରବୁନ୍‌ ଆ କମ୍ୱାରି ଏଡେତାୟ୍‌ । 10 ସିଲତ୍ତେ ଆନିନ୍‌ ବର୍ନେ, "ମନଙ୍‌, ବର୍ନେବେନ୍‌ ଅନ୍ତମ୍‌ ଡେଏତୋ; ଆନା ଆମଙ୍‌ ସିଲଡ୍‌ ତିଆତେ ଞାଙ୍‌ତନେ, ଆନିନ୍‌ କମ୍ୱାରିଲେନ୍‌ ଡେତେ, ବନ୍‌ଡ ଆନ୍ନାମରଞ୍ଜି ଡୋସା ତଡ୍‌ ଡେତଜି ।" 11 ସିଲତ୍ତେ ଆନିଞ୍ଜି ତାଡ଼ନ୍‌ ଲବଲୋଙନ୍‌ ତର୍ଡମ୍‌ ତର୍ଡମ୍‌ ଆଜନିରା ପଡ୍‌ଲନ୍‌ ଅଡ଼୍‌କୋଞ୍ଜି ତର୍ଡମ୍‌ ତର୍ଡମ୍‌ ଆଜନିରା ଉଜେଞ୍ଜି । 12 ଅସିଙନ୍‌ ଆଡନେମର୍‌ ସୋଡ଼ା ବନୋଞାଙ୍‌ ସିଲଡ୍‌ ଆସନ୍ନା ବନୋଞାଙ୍‌ ଆମଙ୍‌ ଜାୟ୍‌ ସାୟ୍‌ସାଜେନ୍‌; ଆରି ବିନ୍ୟାମିନ୍‌ ଆଜନିରାଲୋଙ୍ ତି ଆଗିଲ ଞାଙେନ୍‌ । 13 ତିଆଡିଡ୍‌ ଆନିଞ୍ଜି ତର୍ଡମ୍‌ ତର୍ଡମ୍‌ ଆସିନ୍‌ରି ପେଏଞ୍ଜି, ଆରି ଅଡ଼୍‌କୋନ୍‌ ଗୋଡୋୟଁନ୍‌ ଅଃବୋୟ୍‌ଲେ ଗଡ଼ାନ୍‌ ୟର୍ରଞ୍ଜି ।

14 ଆରି ଜିଉଦାନ୍‌ ଡ ଆବୋଞାଙଞ୍ଜି ଜୋସେପନ୍‌ ଆସିଙ୍‌ଲୋଙ୍‌ ଗନ୍‌ଲଞ୍ଜି; ଜୋସେପନ୍‌ ତି ଆଡିନା ଜାୟ୍‌ ତେତ୍ତେ ଡକୋଏନ୍‌; ତିଆସନ୍‌ ଆନିଞ୍ଜି ଆନିନ୍‌ ଆତେମଡ୍‌ ଲାବତୟ୍‌ଲଞ୍ଜି । 15 ସିଲତ୍ତେ ଜୋସେପନ୍‌ ଆନିଞ୍ଜିଆଡଙ୍‌ ବରେନ୍‌, "ଆମ୍ୱେଞ୍ଜି ଇନିବା କେନ୍‌ ଏନ୍ନେଲେ ଏଲୁମେନ୍‌ ? ଆମ୍ବେନ୍‌ ଜନାଲେ ଏଃର୍ରପ୍ତିଲୋ ଞେନ୍‌ ଅଡ଼୍‌କୋନ୍‌ ଆସସବରଞ୍ଜି ଜନାତାୟ୍‌ ଅମଙ୍‌ଞେନ୍‌ ଆନ୍ନିଙ୍‌ ଆମନ୍‌ରା ଏନ୍ନେଲେ ଆଙ୍ଗିୟ୍‌ ଏନ୍ନେଲେ ଅଃଲୁମେ ?" 16 ସିଲତ୍ତେ ଜିଉଦାନ୍‌ ବର୍ରନେ, "ଇନ୍‌ଲେଞ୍ଜି ପ୍ରବୁନ୍‌ ଆମୁକାବା ଆରି ପଙ୍‌ ଜାଲଙ୍‌ଲେ ଏରପ୍ତିଆୟ୍‌ ? ଆରି ଇନି ଆବର୍ନେ ଏବର୍ନାୟ୍‌ ? ଆରି ଏଙ୍ଗାଲେ ଇନ୍‌ଲେଞ୍ଜିଆଡଙ୍‌ ଏର୍‌ଡୋସା ଏଏମ୍ମେନାୟ୍‌ ? ଇସ୍ୱରନ୍‌ କମ୍ୱାରିନମ୍‌ଞ୍ଜି ଆ ଡୋସା ଅବ୍‌ଗିୟ୍‌ତାଏନ୍‌; ଗିଜା, ଇନ୍‌ଲେଞ୍ଜି ଡ ଆନାଆମଙ୍‌ ସିଲଡ୍‌ ଗିଲନ୍‌ ଞାଙ୍‌ଲନେ ଆନିନ୍‌, ଆରି ଅଡ଼୍‌କୋନ୍‌ଲେନ୍‌ ପ୍ରବୁନମ୍‌ ଆ କମ୍ୱାରି ଏଡେତାୟ୍‌ ।" 17 ସିଲତ୍ତେ ଜୋସେପନ୍‌ ବର୍ରନେ, "ଏନେଲେ ଆକାବ୍ବାଡ଼ା ଇନ୍‌ଲେଞ୍ଜି ସିଲଡ୍‌ ସଙାୟ୍‌ ଡକୋଏତୋ; ଆନାଆମଙ୍‌ ସିଲଡ୍‌ ଗିଲନ୍‌ ଞାଙ୍‌ଲନେ, ଆନିନ୍‌ କମ୍ୱାରିଲେନ୍‌ ଡେତେ; ବନ୍‌ଡ ଆମ୍ୱେଞ୍ଜି ଉଗୁରିୟ୍‌ ଆପେୟନ୍‌ ଆମଙ୍‌ବା ଜିର୍ବା ।"

18 ସିଲତ୍ତେ ଜିଉଦାନ୍‌ ଜୋସେପନ୍‌ ଆମଙ୍‌ବା ଇୟ୍‌ଲେ ବରେନ୍‌, "ଏ ପ୍ରବୁ, କେନ୍‌ କମ୍ୱାରିନମ୍‌ଆଡଙ୍‌ ଅଲୁଡ୍‌ଲୋଙ୍‌ନମ୍‌ ବ ବର୍ନେ ଆବର୍ନେ ଆସନ୍‌ ରୟଙନ୍‌ ତିୟା ଡ କମ୍ୱାରିନମ୍‌ଞ୍ଜି ଆଡଙ୍‌ ବରାବ୍‌ଡଙେଜି; ଇନିଆସନ୍‌ଗାମେଣ୍ଡେନ୍‌ ଆମନ୍‌ ପାରୋନ୍‌ ଅନ୍ତମ୍‌ ।" 19 ଏ ପ୍ରବୁ କମ୍ୱାରିନମ୍‌ଞ୍ଜିଆଡଙ୍‌ ବରେଞ୍ଜି, "ଆପେୟ୍‌ବେନ୍‌ ଅଡ଼େ ଓବ୍ବାବେନ୍‌ ଡକୋ ପଙ୍‌ ?" 20 ସିଲତ୍ତେ ଇନ୍‌ଲେଞ୍ଜି ଆମନ୍‌ଆଡଙ୍‌ ଏଜାଲଙ୍‌ଲାୟ୍‌, ଆପେୟ୍‌ଲେନ୍‌ ଡକୋ, ଆନିନ୍‌ ଆବୁଡାମର୍‌; ଆରି, ଆବନୁଡାଇଁଙ୍‌ ଅବୟ୍‌ ଡାଙ୍ଗଡ଼ାଅନନ୍‌ ଡକୋ, ଆନିନ୍‌ ଆସନ୍ନାମର୍‌; ବନ୍‌ଡ ଆବୋଞାଙନ୍‌ ରବୁଏନ୍‌, ଆନିନ୍‌ତୁମ୍‌ ଆୟୋଙନ୍‌ ଆସନ୍ନା ଡାଙ୍ଗାଡ଼ାଅନ୍‌; ତିଆସନ୍‌ ଆପେୟନ୍‌ ଆନିନ୍‌ଆଡଙ୍‌ ଡୁଙ୍‌ୟମ୍‌ତେ । 21 ସିଲତ୍ତେ ଆମନ୍‌ କେନ୍‌ ଆକମ୍ୱାରିଆଡଙ୍‌ ବରେନ୍‌, "ଆମ୍ୱେଞ୍ଜି ଆନିନ୍‌ଆଡଙ୍‌ ଅମଙ୍‌ବାଲେନ୍‌ ଓରୋଙାୟ୍‌ବା, ଞେନ୍‌ ଆନିନ୍‌ଆଡଙ୍‌ ଗିୟ୍‌ଡମ୍‌ଲାୟ୍‌* ।" 22 ସିଲତ୍ତେ ଇନ୍‌ଲେଞ୍ଜି ଆମନ୍‌ଆଡଙ୍‌ ଏବର୍ରାୟ୍‌, "ତି ଆବେଣ୍ତିଆସିୟ୍‌ ଆପେୟନ୍‌ଆଡଙ୍‌ ଅମ୍‌ରେଙ୍‌ଲେ ଅଃରପ୍ତିଏ; ଆନିନ୍‌ ଆପ୍ପେୟନ୍‌ଆଡଙ୍‌ ଉମ୍‌ରେଙ୍‌ଲେ ଜିର୍ରାୟ୍‌ଡେନ୍‌, ଆପ୍ପେୟନ୍‌ ରବୁତେ ।" 23 ସିଲତ୍ତେ ଆମନ୍‌ କେନ୍‌ ଆକମ୍ୱାରିଆଡଙ୍‌ ବରେନ୍‌, "ଆମ୍ୱେଞ୍ଜି ସରିନ୍‌ ଆସନ୍ନା ବୋଞାଙ୍‌ ଅଃଜିରାୟ୍‌ଡେନ୍‌, ଆମ୍ୱେଞ୍ଜି ଆରି ମୁକାଞେନ୍‌ ଗିୟ୍‌ଲେ ଏରପ୍ତିଏ ।" 24 ତି ସିଲଡ୍‌ଲ୍ଲନ୍‌ ଇନ୍‌ଲେଞ୍ଜି କମ୍ୱାରିନମ୍‌ ଆଗ୍ରାମ୍‌ଗାମ୍‌, ଆପେୟ୍‌ଲେନ୍‌, ଆମଙ୍‌ ଅଡ଼ୋଡାଲେ ଆନିନ୍‌ଆଡଙ୍‌ ପ୍ରବୁଲେନ୍‌ କେନ୍‌ ଅଡ଼୍‌କୋନ୍‌ ଆବର୍ନେ ଏବର୍ରାୟ୍‌ । 25 ତି ସିଲଡ୍‌ଲ୍ଲନ୍‌ ଆପେୟ୍‌ଲେନ୍‌ ବର୍ନେ, "ଆମ୍ୱେଞ୍ଜି ଆରି ବତର ଇୟ୍‌ଲେ ଇନ୍‌ଲେଞ୍ଜି ଆସନ୍‌ ଜନ୍‌ରୋମନ୍‌ ଞିଲେ ପାଙାୟ୍‌ବା ।" 26 ସିଲତ୍ତେ ଇନ୍‌ଲେଞ୍ଜି ଏବର୍ରନାୟ୍‌, "ଇୟ୍‌ଲେ ଏରପ୍ତିଏ; ଆସନ୍ନା ବନୋଞାଙ୍‌ ଇନ୍‌ଲେଞ୍ଜି ସରିନ୍‌ ଡକୋଏନ୍‌ଡେନ୍‌, ଏତ୍ତେଲ୍‌ଡେନ୍‌ ଇୟ୍‌ଲେ ଏରପ୍ତିତେ; ଇନିଆସନ୍‌ଗାମେଣ୍ଡେନ୍‌ ଆସନ୍ନା ବନୋଞାଙ୍‌ ଇନ୍‌ଲେଞ୍ଜି ସରିନ୍‌ ଅଃଡକୋଲୋଡେନ୍‌, ଇନ୍‌ଲେଞ୍ଜି ତି ଆ ମନ୍‌ରା ଆମୁକା ଗିୟ୍‌ଲେ ଏରପ୍ତିଆୟ୍‌ ।" 27 ସିଲତ୍ତେ କମ୍ୱାରିନମ୍‌, ଆପ୍ପେୟ୍‌ଞେନ୍‌, ଆନିନ୍‌ ଇନ୍‌ଲେଞ୍ଜିଆଡଙ୍‌ ବର୍ରଲେନ୍‌, ଆମ୍ୱେଞ୍ଜି ଜନା, ତି ଆଡୁକ୍ରି ସିଲଡ୍‌ ବାଗୁ ଡାଙ୍ଗଡ଼ାଅନନ୍‌ ଡେଏଞ୍ଜି । 28 ଆନିଞ୍ଜିଲୋଙ୍‌ ସିଲଡ୍‌ ଅବୟ୍‌ନେ ଜୋସେପନ୍‌ ଞେନ୍‌ଆଡଙ୍‌ ଅମ୍‌ରେଙ୍‌ଲେ ଜିର୍ରିଁୟ୍‌ । ଆନିନ୍‌ ଜାଡ଼ିଆ ଜନ୍ତୁଞ୍ଜି ସିରଡ୍‌ ପାରଡ୍‌ ଏମ୍ମେଏଞ୍ଜି, ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆନିନ୍‌ଆଡଙ୍‌ ଆରି ଅଃଗିୟ୍‌ଲାୟ୍‌ । 29 ନମି ଅମଙ୍‌ଞେନ୍‌ ସିଲଡ୍‌ କେନ୍‌ଆନିନ୍‌ଆଡଙ୍‌ ଓରୋଙ୍‌ଲେ ଇନ୍ନିଙ୍‌ ଡେଏନ୍‌ ଡେନ୍‌, ଏତ୍ତେଲ୍‌ଡେନ୍‌ ଡଅଙ୍‌ଞେନ୍‌ ୟେୟେଡାନ୍‌ ବାତ୍ତେ କେନ୍‌ ବାଅ ବବ୍‌ଞେନ୍‌ ଆଡିଡ୍‌ ମସାନ୍ନିନ୍‌ ଏଆପ୍ପାୟ୍‌ତିଁୟ୍‌ । 30 ତିଆସନ୍‌ କମ୍ୱାରିନମ୍‌ ଆପେୟ୍‌ ଆନିନ୍‌ ଆମଙ୍‌ ଞେନ୍‌ ଅଡ଼ୋଏଣ୍ଡେନ୍‌, ଇନ୍‌ଲେଞ୍ଜି ସରିନ୍‌ କେନ୍‌ ଆବେଣ୍ଡିଆ ଅଃଡକୋଲୋଡେନ୍‌, କେନ୍‌ ଆବେଣ୍ଡିଆ ଅବୟ୍‌ତଡନ୍‌ ଗିୟ୍‌ଲେ ତାଡ଼ନ୍‌ ରବୁତେ । 31 ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଆପୁରାଡ଼ା କେନ୍‌ ଆବେଣ୍ଡିଆ ଆପୁରାଡ଼ା ବାତ୍ତେ ଆତନବାଡ୍‌ ଡକୋ । ସିଲତ୍ତେ କେନ୍‌ କମ୍ୱାରିନମ୍‌ଞ୍ଜି ୟେୟେଡାନ୍‌ ବାତ୍ତେ, ଆପେୟଞ୍ଜି ଆଡଙ୍‌ ମସାନ୍ନିନ୍‌ ଆପ୍ପାୟ୍‌ତଜି । 32 ଆରି, କମ୍ୱାରିନମ୍‌ ଞେନ୍‌, ଆପେୟ୍‌ଞେନ୍‌ ଆମଙ୍‌ କେନ୍‌ ଆବେଣ୍ଡିଆ ଆସନ୍‌ ତନଙ୍‌ଲାୟ୍‌, ଞେନ୍‌ ଆନିନ୍‌ଆଡଙ୍‌ ଅମଙ୍‌ବାନମ୍‌ ଅଃନୋରୋଙ୍‌ଲାୟ୍‌ଡେନ୍‌, ଏତ୍ତେଲ୍‌ଡେନ୍‌ ଞେନ୍‌ ଆଏଡ଼ର୍‌ ଆପେୟନ୍‌ ଆମଙ୍‌ବା ଡୋସାତିଁୟ୍‌ । 33 ତିଆସନ୍‌ କାକୁର୍ତିତନାୟ୍‌ ପ୍ରବୁ, ଆନିନ୍‌ ଆପାଲ୍‌ତେଙନ୍‌ ଞେନ୍‌ କମ୍ୱାରିନମ୍‌ ଏମ୍ମେଲେ ଡକୋତନାୟ୍‌, ବନ୍‌ଡ କେନ୍‌ ଆବେଣ୍ତିଆଆଡଙ୍‌ ବୋଞାଙ୍‌ଞେଞ୍ଜି ସରିନ୍‌ ଆପ୍ପାୟା । 34 ଇନିଆସନ୍‌ଗାମେଣ୍ଡେନ୍‌ କେନ୍‌ ଆବେଣ୍ଡିଆ ଞେନ୍‌ ସରିନ୍‌ ଅଃଡକୋଲୋଡେନ୍‌, ଞେନ୍‌ ଏଙ୍ଗାଲେ ଆପେୟ୍‌ ଞେନ୍‌ ଆମଙ୍‌ ଜିର୍ରେ ରପ୍ତିଏ ? ଆରି, ଆପେୟନ୍‌ଆଡଙ୍‌ ଅଙ୍ଗା ଆତନଙଡ୍‌ ଗଟେତେ, ତିଆତେ ଏଙ୍ଗାଲେ ଗିୟ୍‌ଲେ ରପ୍ତିଆୟ୍‌ ?