1 ତି ସିଲଡ୍‌ଲ୍ଲନ୍‌ ରାଏଲନ୍‌ ଜାକୁବନ୍‌ ଆସନ୍‌ ଅନ୍ନିଙ୍‌ ଆ ଅନ୍‌ଜି ଅକ୍କୋଲୋ, ତିଆସନ୍‌ ରାଏଲନ୍‌ ଆବୋଲ୍‌ମାୟନ୍‌ଆଡଙ୍‌ ସଙ୍ଗତାଡାଲେ ଜାକୁବନ୍‌ଆଡଙ୍‌ ବରେନ୍‌, "ଞେନ୍‌ଆଡଙ୍‌ ଅଅନନ୍‌ ତିୟିଁୟ୍‌, ଇଜ୍ଜାଡେନ୍‌ ଞେନ୍‌ ରବ୍ବୁତନାୟ୍‌ ।"

2 ସିଲତ୍ତେ ଜାକୁବନ୍‌ ରାଏଲନ୍‌ ଆଉପରେଙ୍‌ ବରାବେନ୍‌ ଆରି ଆନିନ୍‌ ବର୍ରନେ; "ଞେନ୍‌ ଇନି ଇସ୍ୱରନ୍‌ । ଆନିନ୍‌ ସିନା ଆମନ୍‌ଆଡଙ୍‌ ପସିଜନ୍‌ ଆତନିୟ୍‌ମର୍‌ ।"

3 ତିଆଡିଡ୍‌ ରାଏଲନ୍‌ ବର୍ରନେ, "କେରେ ଗିଜା, କମ୍ୱାରିବୟ୍‌ଞେନ୍‌ ବିଲ୍‌ଆନ୍‌ ଡକୋ, ଆନିନ୍‌ ସରିନ୍‌ ଲୁଡା, ଆନିନ୍‌ ଓବ୍ବାସିଜନ୍‌ କୋଡ୍‌ଲେ ଅସିଲୋଙ୍‌ଞେନ୍‌ ତିୟ୍‌ଲିୟ୍‌ଡେନ୍‌, ଆନିନ୍‌ ଅନ୍ତମ୍‌ ଞେନ୍‌ ଜାୟ୍‌ ଡାଙ୍ଗଡ଼ାଅନନ୍‌ ଞାଙ୍‌ତାୟ୍‌ ।" 4 ଆରି ଆନିନ୍‌ ଆକମ୍ୱାରିବଜନ୍‌ ବିଲ୍‌ଆନ୍‌ ସରିନ୍‌ ଆନିନ୍‌ଆଡଙ୍‌ ଅଃବିବାଏନ୍‌ । 5 ସିଲତ୍ତେ ଜାକୁବନ୍‌ ଆନିନ୍‌ ସରିନ୍‌ ଆର୍‌ଲୁଡେନ୍‌, ବିଲ୍‌ଆନ୍‌ ତିଲ୍‌କୋଡ୍‌ଡାଲେ ଅବୟ୍‌ ଓବ୍ବାସିଜନ୍‌ କୋଡେନ୍‌ । 6 ସିଲତ୍ତେ ରାଏଲନ୍‌ ବର୍ରନେ, "ଇସ୍ୱରନ୍‌ ଞେନ୍‌ଆଡଙ୍‌ ଅଃପନ୍‌ସୁଆତିଲିୟ୍‌, ଆରି ପାର୍ତନାଞେନ୍‌ ଅମ୍‌ଡଙ୍‌ଡାଲେ ଞେନ୍‌ଆଡଙ୍‌ ଡାଙ୍ଗଡ଼ାଅନନ୍‌ ତିୟ୍‌ଲିଁୟ୍‌," ତିଆସନ୍‌ ଆଞୁମନ୍‌ ଦାନ୍‌ (ଆଗ୍ରାମ୍‌ଗାମ୍‌ ପନ୍‌ସୁଆତି) ଡକୋଏନ୍‌ । 7 ତି ସିଲଡ୍‌ଲ୍ଲନ୍‌ ରାଏଲନ୍‌ ଆକମ୍ୱାରିବୟ୍‌ ବିଲ୍‌ଆନ୍‌ ଆରି ତିଲ୍‌କୋଡ୍‌ଡାଲେ ଜାକୁବନ୍‌ ଆସନ୍‌ ଅନବ୍‌ବାଗୁ ଆ ଡାଙ୍ଗାଡ଼ାଅନ୍‌ କୋଡ୍‌ଲେ ତିୟେନ୍‌ । 8 ତିଆଡିଡ୍‌ ରାଏଲନ୍‌ ବର୍ରନେ, "ବୋଲ୍‌ମାୟ୍‌ଞେନ୍‌ ବାତ୍ତେ ଅଲ୍‌ଜୁଜେଲେ ଜିନୟ୍‌ଲିଁୟ୍," ତିଆସନ୍‌ ଆଞୁମନ୍‌ ନପ୍ତାଲି (ଆଗ୍ରାମ୍‌ଗାମ୍‌ ଅଲ୍‌ଜୁଜେ) ଡକୋଏନ୍‌ ।

9 ତି ସିଲଡ୍‌ଲ୍ଲନ୍‌ ଲେୟାନ୍‌ ଅଃତିଲ୍‌କୋଡିଙ୍‌ ଗାମ୍‌ଲେ ଜନାଲେ ସିଲ୍‌ପାନ୍‌ ଆଞୁମ୍‌ ଆକମ୍ୱାରିବଜନ୍‌ଆଡଙ୍‌ ଓରୋଙ୍‌ଲେ ଜାକୁବନ୍‌ ବାତ୍ତେ ଅଃବିବାଏନ୍‌ । 10 ସିଲତ୍ତେ ଲେୟାନ୍‌ ଆକମ୍ୱାରିବୟ୍‌ ସିଲ୍‌ପାନ୍‌ ଆମଙ୍‌ସିଲଡ୍‌ ଜାକୁବନ୍‌ ଆସନ୍‌ ଅବୟ୍‌ ଡାଙ୍ଗଡ଼ାଅନନ୍‌ କୋଡ୍‌ଲେତିୟେନ୍‌ । 11 ସିଲତ୍ତେ ଲେୟାନ୍‌ ବରର୍ନେ, "ଇନି କେନ୍‌ ଆକରମା !" ତିଆସନ୍‌ ଆଞୁମନ୍‌ ଗାଦ୍‌ (ଆଗ୍ରାମ୍‌ଗାମ୍‌ କରମ୍ମା) ଡକୋଏନ୍‌ । 12 ତି ସିଲଡ୍‌ଲ୍ଲନ୍‌ ଲେୟାନ୍‌ ଆକମ୍ୱାରିବଜୟ ସିଲ୍‌ପାନ୍‌ ଜାକୁବନ୍‌ ଆସନ୍‌ ଅନବ୍‌ବାଗୁ ଡାଙ୍ଗଡ଼ାଅନନ୍‌ କୋଡ୍‌ଲେ ତିୟେନ୍‌ । 13 ସିଲତ୍ତେ ଲେୟାନ୍‌ ବର୍ରନେ, "ଞେନ୍‌ ମାଡ୍ଡ ସର୍ଡା । ନମି ଡାଙ୍ଗଡ଼ିବଜଞ୍ଜି ଞେନ୍‌ଆଡଙ୍‌ ସର୍ଡାଡମ୍‌ ଗାମ୍‌ତିଁୟ୍‌ଞ୍ଜି," ତିଆସନ୍‌ ଆନିନ୍‌ ଆଞୁମନ୍‌ ଆସେର୍‌ ଆଗ୍ରାମ୍‌ଗାମ୍‌ ସର୍ଡା ଅବ୍‌ଞୁମେନ୍‌ ।

14 ତି ସିଲଡ୍‌ଲ୍ଲନ୍‌ ଗମ୍ମନ୍‌ ଆ ଗଗ୍ଗନେବେଡ଼ାନ୍‌ ରୁବେନନ୍‌ ବସେଙନ୍‌ସିଲଡ୍‌ ଦୁଦାଜନ୍‌ ପାଙ୍‌ଲେ ଆୟୋଙନ୍‌ ଲେୟାନ୍‌ଆଡଙ୍‌ ତିୟେନ୍‌ । ସିଲତ୍ତେ ରାଏଲନ୍‌ ଲେୟାନ୍‌ଆଡଙ୍‌ ବରେନ୍‌, "ଡାଙ୍ଗଡ଼ାଅନମ୍‌ ଆପ୍ରାଙ୍‌ଲାଞନ୍‌ ଆ ଦୁଦାଜନ୍‌ ଅସୋୟ୍‌ ଞେନ୍‌ଆଡଙ୍‌ ତିୟିଁୟ୍‌ ।"

15 ସିଲତ୍ତେ ରାଏଲନ୍‌ ବର୍ରନେ, "ଆମନ୍‌ ଅୟ୍‌ତବ୍‌ଞେନ୍‌ ଆଡଙ୍‌ ରୁୟ୍‌ଲିଁୟ୍‌, କେନ୍‌ ପଙ୍‌ ସନ୍ନାଡମ୍‌ ଆବର୍ନେ ? ଡାଙ୍ଗଡ଼ାଅଞେନ୍‌ ଆପ୍ରାଙ୍‌ଲାଞନ୍‌ ଆ ଦୁଦାଜନ୍‌ ଜାୟ୍‌ ପଙ୍‌ ରୁୟ୍‌ତେ ?" ସିଲତ୍ତେ ରାଏଲନ୍‌ ବର୍ରନେ, "ଡାଙ୍ଗଡ଼ାଅନମ୍‌ ଆ ଦୁଦାଜନ୍‌ ଆପାଲ୍‌ତେଙ୍‌ ଆନିନ୍‌ ଲଙେ ଆତଗଲ୍‌ ଆମନ୍‌ ସରିନ୍‌ ଲୁଡେତୋ ।"

16 ଜାକୁବନ୍‌ ସାଲ୍ଲୁମନ୍‌ ଆଡିଡ୍‌ ବସେଙନ୍‌ ସିଲଡ୍‌ ଆଜିର୍ରାଞନ୍‌ ଆଡିଡ୍‌ ଲେୟାନ୍‌ ଜାକୁବନ୍‌ଆଡଙ୍‌ ଆରନବାଙ୍‌ ଆସନ୍‌ ଡୁଆରାବାନ୍‌ ଇୟ୍‌ଲେ ଆନିନ୍‌ଆଡଙ୍‌ ବରେନ୍‌, "ଆମନ୍‌ ଲଙେ ଆତଗଲ୍‌ ଞେନ୍‌ ସରିନ୍‌ ଲୁଡା; ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆମନ୍‌ ସରିନ୍‌ ଲରୁଲାଞନ୍‌ ଆସନ୍‌ ଦୁଦାଜନ୍‌ ତିୟ୍‌ଲେ ଆପାଲ୍‌ତେଙନ୍‌ ଆମନ୍‌ଆଡଙ୍‌ ଞାଙ୍‌ଲମ୍‌ ।" ତିଆସନ୍‌ ଆନିନ୍‌ ତି ଆତଗଲ୍‌ ଲେୟାନ୍‌ ସରିନ୍‌ ଲୁଡେନ୍‌ ।

17 ସିଲତ୍ତେ ଇସ୍ୱରନ୍‌ ଲେୟାନ୍‌ ଆ ପାର୍ତନା ଆରମ୍‌ଡଙେନ୍‌, ଆନିନ୍‌ ପାଙ୍ଗୁରନ୍‌ଡାଲେ ଜାକୁବନ୍‌ ଆସନ୍‌ ଅନବ୍‌ମନ୍‌ଲୟ୍‌ ଡାଙ୍ଗାଡ଼ାଅନ୍‌ କୋଡେନ୍‌ । 18 ସିଲତ୍ତେ ଲେୟାନ୍‌ ବରର୍ନେ, "ଅୟ୍‌ତବ୍‌ଞେନ୍‌ ଆଡଙ୍‌ କମ୍ୱାରିବଜନ୍‌ ଆତ୍ରିୟ୍‌ଲାଞନ୍‌, ଇସ୍ୱରନ୍‌ ଆବଡିନ୍‌ ଞେନ୍‌ଆଡଙ୍‌ ତିୟ୍‌ଲିଁୟ୍‌," ତିଆସନ୍‌ ଆନିନ୍‌ ଆଞୁମନ୍‌ ଇସାକର* ଡକ୍କୋଏନ୍‌ । 19 ତି ସିଲଡ୍‌ଲ୍ଲନ୍‌ ଲେୟାନ୍‌ ଆରି ବତର ତିଲ୍‌କୋଡ୍‌ଡାଲେ ଜାକୁବନ୍‌ ଆସନ୍‌ ତୁରୁସନଣ୍ଡୋଙ୍‌ ଆ ଡାଙ୍ଗାଡ଼ାଅନ୍‌ କୋଡେନ୍‌ । 20 ସିଲତ୍ତେ ଲେୟାନ୍‌ ବର୍ରନେ, "ଇସ୍ୱରନ୍‌ ଞେନ୍‌ଆଡଙ୍‌ ମନଙ୍‌ ତନିୟ୍‌ଗୋ ତିୟ୍‌ଲିଁୟ୍‌; ନମିସିଲଡ୍‌ ଅୟ୍‌ତବ୍‌ଞେନ୍‌ ଞେନ୍‌ ସରିନ୍‌ ଡକୋତନାୟ୍‌, ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆନିନ୍‌ଆଡଙ୍‌ ଆସନ୍‌ ତୁଡ୍ରୁ ଡାଙ୍ଗାଡ଼ାଅନ୍‌ କୋଡ୍‌ଲାୟ୍‌," ତିଆସନ୍‌ ଆନିନ୍‌ ଆଞୁମନ୍‌ ସବୁଲୁନ୍‌* ଡକୋଏନ୍‌ । 21 ତି ସିଲଡ୍‌ଲ୍ଲନ୍‌ ଆନିନ୍‌ ଅବୟ୍‌ ଡାଙ୍ଗଡ଼ିଅନନ୍‌ ଆକ୍ରୋଡେନ୍, ଆଞୁମନ୍‌ ଦିଣା ଡକୋଏନ୍‌ ।

22 ତି ସିଲଡ୍‌ଲ୍ଲନ୍‌ ଇସ୍ୱରନ୍‌ ରାଏଲନ୍‌ଆଡଙ୍‌ ମନେଏନ୍‌ ଆରି ଇସ୍ୱରନ୍‌ ଆ ପାର୍ତନାନ୍‌ ଅମ୍‌ଡଙ୍‌ଲେ ଆ‌ନିନ୍‌ଆଡଙ୍‌ ପାଙ୍ଗୁରନନ୍‌ ଆ ବୋର୍ସା ତିୟେନ୍‌ । 23 ସିଲତ୍ତେ ଆନିନ୍‌ ତିଲ୍‌କୋଡ୍‌ଡାଲେ ଡାଙ୍ଗଡ଼ାଅନନ୍‌ କୋଡ୍‌ଲେ ବରର୍ନେ, "ଇସ୍ୱରନ୍‌ ନମିଞେନ୍‌ ଗନବ୍‌ରୟ୍‌ମଡ୍‌ ଞେନ୍‌ ସବ୍‌ଙାଜେନ୍‌ ।" 24 ତିଆସନ୍‌ ଆଞୁମନ୍‌ ଜୋସେପ* ତିୟ୍‌ଲେ ବର୍ନେ, "ପ୍ରବୁନ୍‌ ଞେନ୍‌ଆଡଙ୍‌ ଆରି ଅବୟ୍‌ ଡାଙ୍ଗଡ଼ାଅନନ୍‌ ତିୟିଁୟ୍‌ତୋ ।"

25 ଆରି ରାଏଲନ୍‌ ଆମଙ୍‌ସିଲଡ୍‌ ଜୋସେପନ୍‌ କନୋଡନ୍‌ ଆଡ୍ରେନ୍‌ସିଲଡ୍‌ ଜାକୁବନ୍‌ ଲାବନନ୍‌ଆଡଙ୍‌ ବରେନ୍‌, "ଞେନ୍‌ଆଡଙ୍‌ ଆପ୍ପାୟିନ୍‌, ଞେନ୍‌ ଡରକୋନେଞେନ୍‌ ଆଡେସା ଜିର୍ତେ । 26 ଞେନ୍‌ ଅଙ୍ଗା ଆ ମନ୍‌ରାଜି ଆସନ୍‌ କମ୍ୱାରି କାବ୍ବାଡ଼ାନମ୍‌ ଲୁମ୍‌ଲାୟ୍‌, ତି ଡୁକ୍ରିଞେଞ୍ଜିଆଡଙ୍‌ ଡ ଅନ୍‌ଞେଞ୍ଜିଆଡଙ୍‌ ଓରୋଙ୍‌ଲେ ଆଜନିର୍‌ ତିୟିଁୟ୍‌; ଇନିଆସନ୍‌ଗାମେଣ୍ଡେନ୍‌ ଏଙ୍ଗାଲେ କମ୍ୱାରିନ୍‌ ଡକୋଲନ୍‌ କାବ୍ବାଡ଼ାଲନାୟ୍‌, ତିଆତେ ଆମନ୍‌ ଜନା ।"

27 ତିଆଡିଡ୍‌ ଲାବନନ୍‌ ଆନିନ୍‌ଆଡଙ୍‌ ବରେନ୍‌, "କାକୁର୍ତିତନାୟ୍‌, ଆମନ୍‌ ଞେନ୍‌ଆଡଙ୍‌ ସାୟୁମିୟ୍‌, ଇନିଆସନ୍‌ଗାମେଣ୍ଡେନ୍‌ ଲାଗରେଙ୍‌ନମ୍‌ ପ୍ରବୁନ୍‌ ଞେନ୍‌ଆଡଙ୍‌ ଆସିର୍ବାଦଲିଁୟ୍‌, କେନ୍‌ଆତେ ଞେନ୍‌ ଡିଡିଡାଲେ ଜନାଲିଁୟ୍‌ । 28 ତିଆସନ୍‌ ଆମନ୍‌ ଆମନ୍‌ଡମ୍‌ ବଡିନମ୍‌ ଗବ୍‌ରିଆ, ଞେନ୍‌ ତିଆତେ ଆମନ୍‌ଆଡଙ୍‌ ତିୟ୍‌ତମ୍‌ ।"

29 ସିଲତ୍ତେ ଜାକୁବନ୍‌ ଆନିନ୍‌ଆଡଙ୍‌ ବରେନ୍‌, "ଞେନ୍‌ ଏଙ୍ଗାଲେ କମ୍ୱାରିନ୍‌ ଡକୋଡାଲନ୍‌ କାବ୍ବାଡ଼ାଲନାୟ୍‌ ଡ ଅମଙ୍‌ବାଞେନ୍‌ ଜନ୍ତୁନମ୍‌ଞ୍ଜି ଏଙ୍ଗାଲେ ଡକୋଜି, ତିଆତେ ଆମନ୍‌ ଜନା । 30 ଇନିଆସନ୍‌ଗାମେଣ୍ଡେନ୍‌, ଞେନ୍‌ ଅନ୍‌ରଙ୍‌ ଜିରାଞନ୍‌ ଆମ୍ମୁଙ୍‌ ଅସୋୟ୍‌ଡମ୍‌ ଅନର୍ଜେନମ୍‌ ଡକୋଏନ୍‌, ବନ୍‌ଡ ନମି ମରଙ୍‌ଲେ ଗୋଗୋଜେନ୍‌; ଆରି ଞେନ୍‌ ଅଡ଼େଙ୍ଗା ଜାକିଁୟ୍‌ ତନୁରନ୍‌ ଆସନ୍‌ ମେଣ୍ତାନମ୍‌ଜି ଗଙେନ୍‌ ପ୍ରବୁନ୍‌ ଆମନ୍‌ଆଡଙ୍‌ ଆସିର୍ବାଦଲମ୍‌; ବନ୍‌ଡ କୁତ୍ତମାଞେନ୍‌ ଆସନ୍‌ ଆଙ୍ଗା ଅର୍ଜେଆୟ୍‌ ?"

31 ସିଲତ୍ତେ ଲାବନନ୍‌ ବର୍ନେ, "ଞେନ୍‌ ଆମନ୍‌ଆଡଙ୍‌ ଇନି ତିୟମ୍‌ ?" ଜାକୁବନ୍‌ ବର୍ନେ, "ଆମନ୍‌ ଇନ୍ନିଙ୍‌ ଆତନିୟ୍‌ ଅଃଲାଗେଅମ୍‌; ଆମନ୍‌ ଞେନ୍‌ ଆସନ୍‌ ଅବୟ୍‌ କାବ୍ବାଡ଼ାନ୍‌ ଲୁମେଡେନ୍‌, ତିଡେନ୍‌ ଞେନ୍‌ ଜନ୍ତୁନମ୍‌ଜିଆଡଙ୍‌ ଆରି ବତର ତୁଡ୍ରୁ ବନ୍ତାୟ୍‌ । 32 ଲଙେ ଞେନ୍‌ ଗୋସ୍ସାଲୋଙନ୍‌ ସିଲଡ୍‌ ଅଡ଼୍‌କୋନ୍‌ ଜିର୍ରେ ମେଣ୍ତାଞ୍ଜି ଆମଙ୍‌ସିଲଡ୍‌ ଆରିଗେରିଗେନ୍,ଆତୁୟ୍‌ରାଞ୍ଜି, ୟଗାରାନ୍‌ ଆମେଣ୍ତାଜି, ଆରି କିମେଡଞ୍ଜି ଆମଙନ୍‌ସିଲଡ୍‌ ଆତୁୟ୍‌ରାଞ୍ଜି ଡ ଆରିଗେରିଗେନ୍‌ ଆକିମ୍‌ମେଡ୍‌ଜିଆଡଙ୍‌ ଆନ୍ନାତାୟ୍‌; ତି ଅଡ଼୍‌କୋନ୍‌ ବଡିଞେନ୍‌ ଅନ୍ତମ୍‌ ଡେତେ । 33 ତି ସିଲଡ୍‌ଲ୍ଲନ୍‌ ତେମଡ୍‌ନମ୍‌ ଅଙ୍ଗାଆଡିଡ୍‌ ବଡିଞେନ୍‌ ଆବର୍ନେ ଅଡ଼ୋତାୟ୍‌, ତିଆଡିଡ୍‌ ଡରମ୍ମଞେମ୍‌ ବର୍ନେଞେନ୍‌ ସାକିନ୍‌ ତିୟ୍‌ତେ, ଆଗ୍ରାମ୍‌ଗାମ୍‌, କିମେଡଞ୍ଜି ଆମଙ୍‌ବା ଆରିଗେରିଗେନ୍‌ ଡ ଆତୁୟ୍‌ରାନ୍‌ ଆକିମ୍‌ମେଡ୍‌ ଆନା ଡ ମେଣ୍ତାଞ୍ଜି ଆମଙ୍‌ବା ୟଗାରାନ୍‌ ଆମେଣ୍ତା ଡିଅଙ୍ଗା ଆନା ଡକୋତଜି, ତିଆତେ ବନ୍ତାଞେନ୍‌ ଅନ୍ତମ୍‌ ଡନିଡିନ୍‌ ଡେତେ ।" 34 ସିଲତ୍ତେ ଲାବନନ୍‌ ବର୍ନେ, "ଅଡ଼େ, ବର୍ନେନମ୍‌ ଅନ୍ତମ୍‌ ଡେଏତୋ ।" 35 ତି ସିଲଡ୍‌ଲ୍ଲନ୍‌ ଆନିନ୍‌ ତିଆଡିଡ୍‌ନାମା ଆଗରିଡନ୍‌ ଡ ଆତୁୟ୍‌ରାନ୍‌ ଆବୋଡ୍ଡାମେଡ୍‌ ଆରି ଆରିଗେରିଗେନ୍‌ ଡାତୁୟ୍‌ରାନ୍‌ ଅସୋୟ୍‌ ଜେଏରାନ୍‌ ଆଇମେଡଞ୍ଜି, ଆରି, ୟଗାରାନ୍‌ ଆମେଣ୍ତା ଅଡ଼୍‌କୋନ୍‌ ତରଙ୍‌ଆନା ଏମ୍ମେଲେ ଆଡାଙ୍ଗାଡଅନଞ୍ଜି ଆସିଲୋଙ୍‌ ସୋରୋପ୍ପାୟେନ୍‌; 36 ଆରି ଆନିନ୍‌ ଆନିନ୍‌ଡମ୍‌ ଡ ଜାକୁବନ୍‌ ଆମଙ୍‌ସିଲଡ୍‌ ୟାଗିଡିନା ଆତଙର୍‌ ଆସଙାୟ୍‌ ଡକୋଏନ୍‌; ଆରି ଜାକୁବନ୍‌ ଲାଙ୍‌ଲେଡ୍‌ ଲାବନନ୍‌ ଆ ଜନ୍ତୁଜି ତୁରେନ୍‌ ।

37 ଆରି ଜାକୁବନ୍‌ ଲିବନିନ୍‌ ଆରି ଲୁସ୍‌ ଆରି ଅର୍ମୋନନ୍‌ ଆରାନୁବ୍‌ ଆଲେଡେଙନ୍‌ ଆକେନ୍‌ଡାର୍‌ ଅଡେନ୍‌, ଆରି ଆକୋର୍‌ରାଙ୍‌ ଲୁୟ୍‌ଲେ ଜେଏନ୍‌ ଆଗାରା ତବେନ୍‌ । 38 ତି ସିଲଡ୍‌ଲ୍ଲନ୍‌ ଅଙ୍ଗାଲୋଙ୍‌ ଜନ୍ତୁଜି ଗାଡାନେବାନ୍‌ ଜିର୍ତାଜି, ତେତ୍ତେ ଆମୁକ୍କାବାଞ୍ଜି ଆକୁଣ୍ତଡାଲୋଙ୍‌ ଅରାନ୍‌ ଆକେନ୍‌ଡାର୍‌ ଅଡ଼୍‌କୋନ୍‌ ଅବ୍‌ତୋଣ୍ଡୋଲେ ଡକ୍କୋଏନ୍‌; ସିଲତ୍ତେ ଆଗରାଡାଲଞ୍ଜି ଆଡିଡ୍‌ ଆନିଞ୍ଜି ଅଲ୍‌ସଙ୍ଗଏଞ୍ଜି । 39 ଆରି ତି ଆକେଣ୍ତାର୍‌ବା ଆସ୍ରଙ୍ଗଲଞ୍ଜି ଆ ଜନ୍ତୁଜି ଆଗାରାଗାରା ଆରି ଆରିଗେରିଗେ ଡ ଆତୁୟ୍‌ରାତୁୟ୍‌ରା ଆଅନ୍‌ମେନନ୍‌ କୋଡେଞ୍ଜି । 40 ସିଲତ୍ତେ ଜାକୁବନ୍‌ ତି ଆଅନ୍‌ମେନନ୍‌ଜି ଆନ୍ନାଏନ୍‌, ଆରି ଲାବନନ୍‌ ଆଗାରାଗାରାନ୍‌ ଡ ୟଗାରାନ୍‌ ଅଡ଼୍‌କୋନ୍‌ ଆଗାଡର୍‌ଜି ଆଇମେନଞ୍ଜିଆଡଙ୍‌ ଅବ୍‌ସଙ୍ଗଏନ୍‌; କେନ୍‌ ଅନ୍ତମ୍‌ ଆନିନ୍‌ ଲାବନନ୍‌ ଆଗୋସ୍ସା ବାତ୍ତେ ଏର୍ମନାୟ୍‌ମାୟନ୍‌ ଆମଣ୍ତାନ୍‌ ଆନ୍ନା ଡକୋଏନ୍‌ । 41 ଆରି ଜେଲ୍‌ଜେଲ୍‌ରାନ୍‌ ଆ ଜନ୍ତୁଜି ଆସ୍ରଙ୍ଗତଞ୍ଜି ଆଡିଡ୍‌ ଆମୁକ୍କାବାଞ୍ଜି ମିଞାମନ୍‌ ଆଜବ୍‌ତଡନ୍‌ ଆସିନ୍ନ ଅନ୍ତମ୍‌ ଆତିର୍‌ଗଡ଼େୟ୍‌ ଆଡ୍ରକୋଲନ୍‌ ଆଡାଙ୍ଗୋ ଡକ୍କୋଏନ୍‌ । ତିଆସନ୍‌ ଜେଲ୍‌ଜେଲ୍‌ ଜନ୍ତୁଞ୍ଜି ତୁମ୍‌ ଆତିର୍‌ଗଡ଼େୟ୍‌ ଆତିର୍‌ଗଡ଼େୟ୍‌ଆତେ କୋଡେଞ୍ଜି । 42 ସିଲତ୍ତେ ଜେଲ୍‌ଜେଲ୍‌ତଡଞ୍ଜି ଆ ଜନ୍ତୁଜି ଲାବନନ୍‌ ଆତେ ଡେଏନ୍‌ ଡ ଜେଲ୍‌ଜେଲ୍‌ରାନ୍‌ ଆ ଜନ୍ତୁଜି ଜାକୁବନ୍‌ ଆତେ ଡେଏନ୍‌ । 43 ତିଆସନ୍‌ ଜାକୁବନ୍‌ ଗୋଗୋୟ୍‌ ଗମାଙେନ୍‌, ଆରି ଆଜନ୍ତୁନ୍‌, କମ୍ୱାରିମରନ୍‌ କମ୍ୱାରିବଜନ୍‌, ଓଟନ୍‌ ଆରି ଗୋଡୋୟଁଞ୍ଜି ଗୋଗୋଜେଞ୍ଜି ।