1 ତି ସିଲଡ୍‌ଲ୍ଲନ୍‌ ପାରୋନ୍‌ ବାଗୁ ବର୍ସେଙ୍‌ ଆତିକି ଅବୟ୍‌ ଗନୁମ୍‌ତେନ୍‌ ଗିଜେନ୍‌; ଗିୟ୍‌ବା, ଆନିନ୍‌ ନିଡ଼ ଅଲନ୍‌ ଆନେଙ୍‌ ଆତନଙ୍‌ ଡକୋଏନ୍‌ । 2 ଆରି ଗିୟ୍‌ବା, ଅମ୍ମ ଅଲନ୍‌ ସିଲଡ୍‌ ସାତଟା ଜେଲ୍‌ଜେଲ୍‌ ମନଙ୍‌ରାନ୍‌ ଆତାଙ୍‌ଲେୟ୍‌ଜି ଡୁଙ୍‌ଲନ୍‌ ଅଗାବନ୍‌ ଜୋମେଞ୍ଜି । 3 ଆନିଞ୍ଜି ସିଲଡ୍‌ ଗିୟ୍‌ବା, ଆନ୍ନା ସାତଟା ଆରେଙ୍କଡ଼ାନ୍‌ ଆତାଙ୍‌ଲିୟ୍‌ ଅଲନ୍‌ ସିଲଡ୍‌ ଡୁଙ୍‌ଲନ୍‌ ଅନେଙ୍‌ ଅଲନ୍‌ ତି ଆତାଙ୍‌ଲେୟ୍‌ଜି ଆମଙ୍‌ବା ତନଙେଞ୍ଜି । 4 ସିଲତ୍ତେ ତି ଆରେଙ୍କଡ଼ାନ୍‌ ଆତାଙ୍‌ଲେୟ୍‌ଜି ସାତଟା ଜେଲ୍‌ଜେଲ୍‌ ମନଙ୍‌ରାନ୍‌ ଆତାଙ୍‌ଲେୟ୍‌ଆଡଙ୍‌ ଜୋମେଞ୍ଜି । କେନ୍‌ ଏନେଲେ ଆଗ୍ରିଜେନ୍‌ ଆଡିଡ୍‌ ପାରୋନ୍‌ ମଡ଼େଏନ୍‌ । 5 ତି ସିଲଡ୍‌ଲ୍ଲନ୍‌ ଆନିନ୍‌ ଆରି ଡିମଡ୍‌ଡାଲନ୍‌ ଅନବ୍‌ ବଗୁ ତର ଗନୁମ୍‌ତେନ୍‌ ଗିଜେନ୍‌; ଅବୟ୍‌ ଆଗ୍ରଲେବେତେନ୍‌* ଆନୁବ୍‌ ସାତଟା ମନଙ୍‌ ସିସାନ୍‌ ତିଁୟ୍‌ଲାଙେନ୍‌ । 6 ଆନିଞ୍ଜି ଆତିକି ଡରୁଙ୍‌ୟୋଙ୍‌ଗଡ୍‌ ଆରିଙ୍ଗେ ବାତ୍ତେ ସାତଟା ଆସର୍‌ ଆଗନଲେଞ୍ଜି ଡୁଙ୍‌ଲନାୟ୍‌ । 7 ଆରି, ଅକେନ୍‌ ସାତଟା ଆସର୍‌ ଆଗଲେ ସିସାଞ୍ଜି କେନ୍‌ ସାତଟା ମନଙ୍‌ ଆତିଁୟ୍‌ଲାଙ୍‌ ଆଗଲେ ସିସାଞ୍ଜି ମଏଞ୍ଜି । କେନ୍‌ ଏନ୍ନେଲେ ଆଗ୍ରିଜେନ୍‌ ଆଡିଡ୍‌ ପାରୋନ୍‌ ମଡ଼େଏନ୍‌, ବନ୍‌ଡ ଗନୁମ୍‌ତେ ଗାମ୍‌ଲେ ଜନାଏନ୍‌ । 8 ଆରି, ଡୋତାନ୍‌ ଆମନନ୍‌ ବତଙେନ୍‌, ସିଲତ୍ତେ ଆନିନ୍‌ ମନ୍‌ରାନ୍‌ ଆପ୍ପାୟ୍‌ଲେ ମିସର୍‌ ଡେସାନ୍‌ ଆ ମନ୍ତ୍ରମର୍‌ଜି ଡ ପଣ୍ତିତ ଅଡ଼୍‌କୋଞ୍ଜିଆଡଙ୍‌ ଓଡ୍ଡେଏନ୍‌; ବନ୍‌ଡ ପାରୋନ୍‌ ଆନିଞ୍ଜି ଆମଙ୍‌ ଆ ଗନୁମ୍‌ତେନ୍‌ ଆବର୍ନେ ବର୍ନେ, ଆନିଞ୍ଜି ସିଲଡ୍‌ ଆନ୍ନିଙ୍‌ ଆଅର୍ତ ପାରୋନ୍‌ଆଡଙ୍‌ ବର୍ରେ ଅଃରପ୍ତିଲଜି । 9 ତିଆଡିଡ୍‌ ମୁଡ଼ା ଗାଗାନେନ୍‌ ଆପନାଙ୍‌ତିୟ୍‌ ଜୋମ୍‌ମର୍‌ ପାରୋନ୍‌ ଆମୁକାବା କାକୁର୍ତିଲନେ, ଲଙେ ଞେନ୍‌ ଇର୍ସେଡମ୍‌ଞେନ୍‌ ମନ୍ନେତାୟ୍‌ । 10 ପାରୋନ୍‌ ଆ କମ୍ୱାରି ଞେନ୍‌ଆଡଙ୍‌ ଡ ମୁଡ଼ା ଡିୟ୍‌ଡିୟ୍‌ନେମରନ୍‌ ବରାବ୍‌ଡାଲନ୍‌ ଇନ୍‌ଲେଞ୍ଜିଆଡଙ୍‌ ବଣ୍ତିସିଙ୍‌ଲୋଙନ୍‌ ଇଙଡ୍‌ଲେ ଡକୋଏନ୍‌ । 11 ସିଲତ୍ତେ ଞେନ୍‌ ବାଗୁନ୍‌ଲେନ୍‌ ଆବତଗଲନ୍‌ ବାଗୁନ୍‌ଲେନ୍‌ ଗନୁମ୍‌ତେନ୍‌ ଏଗିୟ୍‌ଲାୟ୍‌; ଆରି, ବାଗୁନ୍‌ଲେନ୍‌ ଆଗନୁମ୍‌ତେ ଆଗରାମ୍‌ଗାମ୍‌ ତରଙାନ୍ନା ଡକୋଏନ୍‌ । 12 ଇନ୍‌ଲେଞ୍ଜି ସରିନ୍‌ ଡନୋବ୍‌ମରନ୍‌ ଆ କମ୍ୱାରି ବୟ୍‌ନେ ଏବ୍ରିଅ ବେଣ୍ତିଆ ଡକୋଏନ୍‌; ଇନ୍‌ଲେଞ୍ଜି ଆନିନ୍‌ଆଡଙ୍‌ ଗନୁମ୍‌ତେନ୍‌ ଆବର୍ନେ ଏବର୍ରନାୟ୍‌, ଆନିନ୍‌ ଇନ୍‌ଲେଞ୍ଜିଆଡଙ୍‌ ତି ଆଅର୍ତ ବର୍ନେ, "ରମ୍ମଙ୍‌ ମନ୍‌ରା ଆଗନୁମ୍‌ତେ ଆଅର୍ତ ବର୍ନେ । 13 ସିଲତ୍ତେ ଆନିନ୍‌ ବାଗୁନ୍‌ଲେନ୍‌ଆଡଙ୍‌ ଏଙ୍ଗାଲେ ଆଅର୍ତ ବର୍ନେ, ତିଅନ୍ତମ୍‌ ଗଟେଏନ୍‌; ଞେନ୍‌ ଆମ୍ମୁଙ୍‌ ଆତ୍ରଙ୍କୁମ୍‌ଲୋଙ୍‌ ରୟଙନ୍‌ ଞାଙ୍‌ଲାୟ୍‌ ଆରି ଆନିନ୍‌ ୟନୋଡନ୍‌ ଡେଏନ୍‌ ।" 14 ତିଆଡିଡ୍‌ ପାରୋନ୍‌ ଜୋସେପନ୍‌ଆଡଙ୍‌ ଅବ୍‌ନୋଡ୍ଡେଏନ୍‌, ମନ୍‌ରାଞ୍ଜି ବଣ୍ତିସିଙନ୍‌ ସିଲଡ୍‌ ଆନିନ୍‌ଆଡଙ୍‌ ଲଓରୋଙ୍‌ଲାଜି; ଆନିନ୍‌ କୋଙ୍‌କୋଙ୍‌ତମ୍‌ଲନ୍‌ ଆରି ଆନ୍ନା ଆ ଅଙ୍ଗି ଜିଜିଲନ୍‌, ଆନିନ୍‌ ପାରୋନ୍‌ ଆମଙ୍‌ବା ଇୟେନ୍‌ । 15 ସିଲତ୍ତେ ପାରୋନ୍‌ ଜୋସେପନ୍‌ଆଡଙ୍‌ ବରେନ୍‌, "ଞେନ୍‌ ଅବୟ୍‌ ଗନୁମ୍‌ତେନ୍‌ ଏଗିୟ୍‌ଲାୟ୍‌, ଆନ୍ନିଙ୍‌ ତି ଆଅର୍ତନ୍‌ ବର୍ରନ୍‌ ଅଃରପ୍ତିଏଜି; ବନ୍‌ଡ ଞେନ୍‌ ବର୍ନେନମ୍‌ ଏଅମ୍‌ଡଙ୍‌ଲାୟ୍‌, ଡ ଆମନ୍‌ ଗନୁମ୍‌ତେନ୍‌ ବରନ୍‌ ଅମ୍‌ଡଙ୍‌ଲେ, ତି ଆଅର୍ତନ୍‌ ବର୍ରନ୍‌ ରପ୍ତିତେ ।" 16 ସିଲତ୍ତେ ଜୋସେପନ୍‌ ବରନ୍‌, "ତିଆତେ ଅସିଂଲୋଙ୍‌ଞେନ୍‌ ତଡ୍‌, ବନ୍‌ଡ ଇସ୍ୱରନ୍‌ ପାରୋନ୍‌ଆଡଙ୍‌ ମନଙ୍‌ ଆଜନାଲଙ୍‌ ତିୟ୍‌ତେ ।"

17 ସିଲତ୍ତେ ପାରୋନ୍‌ ଜୋସେପନ୍‌ଆଡଙ୍‌ ବରେନ୍‌, "ଗନୁମ୍‌ତେବାଞେନ୍‌, ଗିଜା, ଞେନ୍‌ ଅନେଙ୍‌ଅଲନ୍‌ ଆତନଙ୍‌ ଡକୋଲିଁୟ୍‌ ।" 18 ସିଲତ୍ତେ ଅମ୍ମଅଲନ୍‌ ସିଲଡ୍‌ ଜେଲ୍‌ଜେଲ୍‌ ମନଙ୍‌ରା ସାତଟା ତାଙ୍‌ଲିୟନ୍‌ ଡୁଙ୍‌ଲନ୍‌ ଅଗାବନ୍‌ ଜୋମେଞ୍ଜି । 19 ତି ସିଲଡ୍‌ଲ୍ଲନ୍‌ ଆନିଞ୍ଜି ସିଲଡ୍‌ ଆରି ସାତଟା ଏର୍‌ବପ୍ପୁ ଆରେଙ୍କଡ଼ାନ୍‌ ଆତାଙ୍‌ଲେୟ୍‌ଜି ଡୁଙ୍‌ଲନାଜି; ଞେନ୍‌ ଆନିଞ୍ଜି ଅନ୍ତମ୍‌ ଜେଲ୍‌ଜେଲ୍‌ତଡନ୍‌ ଆତାଙ୍‌ଲେୟ୍‌ଜି ଅମରାନ୍‌ ମିସର୍‌ ଡେସାନ୍‌ ଆଙ୍ଗିୟ୍‌ ଅନ୍‌ରଙ୍‌ ଗିଜାୟ୍‌ । 20 ଆରି, ତି ଏର୍‌ବପ୍ପୁନ୍‌ ଆରେଙ୍କଡ଼ାନ୍‌ ଆତାଙ୍‌ଲେୟ୍‌ଜି ଆମ୍ମୁଙ୍‌, ଜେଲ୍‌ଜେଲ୍‌ରାନ୍‌ ତି ସାତଟା ଆତାଙ୍‌ଲେୟ୍‌ଆଡଙ୍‌ ଜୋମେଞ୍ଜି । 21 ବନ୍‌ଡ ଆଜ୍ରୋମେଞ୍ଜି ସିଲଡ୍‌ ଆକିମ୍ପୋଙ୍‌ଞ୍ଜି ଆଜ୍ରୋମେଞ୍ଜି ଅନ୍ତମ୍‌ ଅଃରାଙ୍‌ଡାଲୋ; ଆନିଞ୍ଜି ଆମ୍ମୁଙ୍‌ ଅନ୍ତମ୍‌ ଆବାମ୍ବା* ଡକୋଏଞ୍ଜି । ଏନ୍ନେଗନ୍‌ ଆଡିଡ୍‌ ମଡ଼େଲିଁୟ୍‌ । 22 ତି ସିଲଡ୍‌ଲ୍ଲନ୍‌ ଆରି ଞେନ୍‌ ଗନୁମ୍‌ତେଲୋଙନ୍‌ ଗିୟ୍‌ଲାୟ୍‌ ଡ, ଗିଜା, ଅବୟ୍‌ ଆଗ୍ରଲେବେତେନ୍‌ ଆନୁବ୍‌ ସାତଟା ଆତିଁୟ୍‌ଲାଙ୍‌ ଡ ମନଙ୍‌ ଗଲେଏନ୍‌ । 23 ତି ସିଲଡ୍‌ଲ୍ଲନ୍‌ ଡରୁଙ୍‌ୟୋଙ୍‌ଗଡ୍‌ ଆରିଙ୍ଗେ ଆସର୍‌, ଆପୋନ୍‌ଲାନ୍‌ ସାତଟା ତିଁୟ୍‌ଲାଙେନ୍‌ ଗଲେଏନ୍‌ । 24 ଆରି, ତି ଆପୋନ୍‌ଲାନ୍‌ ଆସିସା, ତି ମନଙ୍‌ ସାତଟା ଆଗ୍ରଲେଏନ୍‌ ଆସିସାଆଡଙ୍‌ ମଏନ୍‌ । କେନ୍‌ ଆଗନୁମ୍‌ତେ ଞେନ୍‌ ମନ୍ତ୍ରମରଞ୍ଜିଆଡଙ୍‌ ଏବର୍ରାୟ୍‌, ବନ୍‌ଡ ଆନ୍ନିଙ୍‌ କେନ୍‌ ଆଅର୍ତନ୍‌ ଞେନ୍‌ଆଡଙ୍‌ ବର୍ରେ ଅଃରପ୍ତଲିଁୟ୍‌ଞ୍ଜି ।

25 ସିଲତ୍ତେ ଜୋସେପନ୍‌ ପାରୋନ୍‌ଆଡଙ୍‌ ବରେନ୍‌, "ପାରୋନ୍‌ ଆଗନୁମ୍‌ତେ ବାଗୁନ୍‌ ଆବୟନ୍‌; ଇସ୍ୱରନ୍‌ ଇନି ଆଲନୁମ୍‌ ଇସ୍ସୁମ୍‌ତେ, ତିଆତେ ପାରୋନ୍‌ ଆଡଙ୍‌ ଅବ୍‌ଜନାଏନ୍‌ ।" 26 ତି ସାତଟା ମନଙ୍‌ ତାଙ୍‌ଲିୟନ୍‌ ସାତ ବର୍ସେଙ୍‌ ଅନ୍ତମ୍‌, ଆରି, ତି ସାତଟା ମନଙ୍‌ ଆଗ୍ରଲେଏନ୍‌ ଆସିସା ଜାୟ୍‌ ସାତ ବର୍ସେଙ୍‌ ଅନ୍ତମ୍‌, ଗନୁମ୍‌ତେନ୍‌ ଆବୟନ୍‌ । 27 ସିଲତ୍ତେ ତିକ୍କି ଆଡ୍ରୁଙ୍‌ଲନାଞଞ୍ଜି ତି ସାତଟା ଏର୍‌ବନପ୍ପୁନ୍‌ ଆରେଙ୍କଡ଼ାନ୍‌ ଆତାଙ୍‌ଲେୟ୍‌ଜି ସାତ ବର୍ସେଙ୍‌ ଅନ୍ତମ୍‌; ଆରି ଡରୁଙ୍‌ୟୋଙ୍‌ଗଡ୍‌ ଆରିଙ୍ଗେ ବାତ୍ତେ ଆସରନ୍‌ ସାତଟା ଆସିସାନ୍‌ ସାତ ବର୍ସେଙ୍‌ କାନ୍ତାରାନ୍‌ ଅନ୍ତମ୍‌ । 28 ଞେନ୍‌ ପାରୋନ୍‌ଆଡଙ୍‌ ବର୍ତାୟ୍‌ ଇସ୍ୱରନ୍‌ ଇନି ଆଲନୁମ୍‌ ଇସ୍ସୁମ୍‌ତେ, ତିଆତେ ପାରୋନ୍‌ଆଡଙ୍‌ ଅବ୍‌ଜନାଏନ୍‌ । 29 ଗିଜା, ସମରା ମିସର୍‌ ଡେସାଲୋଙନ୍‌ ସାତ ବର୍ସେଙ୍‌ ମନଙ୍‌ ଜନ୍‌ରୋମନ୍‌ ଏଲ୍‌ତେ । 30 ଆରି ସାତ ବର୍ସେଙ୍‌ କାନ୍ତାରାତେ; ମନ୍‌ରାଞ୍ଜି ମନଙ୍‌ ଆରେଲ୍‌ତେନ୍‌ ଆବର୍ସେଙ୍‌ କରୋଡାତଜି ଆରି କାନ୍ତାରାନ୍‌ ବାତ୍ତେ ଡେସାନ୍‌ ଅସେଡ୍‌ତେ । 31 ତିକ୍କି ଆଜିର୍ତାଞନ୍‌ ଆକାନ୍ତାରା ଆସନ୍‌ ଡେସାଲୋଙନ୍‌ ଜନ୍‌ରୋମନ୍‌ ଏଃନେଲେ; ଇନିଆସନ୍‌ଗାମେଣ୍ଡେନ୍‌ ତିଆଡିଡ୍‌ ବରନ୍ତଙନ୍‌ କାନ୍ତାରାତେ । 32 ପାରୋନ୍‌ ବାଗୁ ତର ଗନୁମ୍‌ତେନ୍‌ ଆଗ୍ରିଜେନ୍‌ ଆନିଃୟମ୍‌ କେନ୍‌ ଡ, ଇସ୍ୱରନ୍‌ ବାତ୍ତେ ତିଆତେ ଆଜାଡ଼ିନ୍‌ ଗବ୍‌ରିଏନ୍‌, ଆରି, ଇସ୍ୱରନ୍‌ ତିଆତେ ଲଡଙ୍‌ତେ । 33 ତିଆସନ୍‌ ନମି ପାରୋନ୍‌ ଅବୟ୍‌ ବୁଡ୍ଡି ଡ ଗିଆନମରନ୍‌ ଗିୟ୍‌ଲେ ମିସର୍‌ ଡେସାନ୍‌ ତବ୍‌ନଙେତୋ । 34 କେନ୍‌ ଆସନ୍‌ ପାରୋନ୍‌ କେନ୍‌ ଏନେଲେ ଲୁମେତୋ, ଆରି ଡେସାଲୋଙନ୍‌ ସୋଡ଼ାମରଞ୍ଜି ତବ୍‌ନଙ୍‌ଲେ ସାତ ବର୍ସେଙ୍‌ ଜନ୍‌ରୋମନ୍‌ ଆରେଲ୍‌ତେନ୍‌ ଆଡିଡ୍‌ ମିସର୍‌ ଡେସାନ୍‌ ସିଲଡ୍‌ ମନ୍‌ଲୟ୍‌ବନ୍ତା ଜନ୍‌ରୋମନ୍‌ ଜାଏତଜି । 35 ଆରେଲ୍‌ତେନ୍‌ ଆବର୍ସେଙ୍‌ ଆଜନ୍‌ରୋମ୍‌, ତର୍ମୁମ୍‌ଲେ ଆଡନକ୍କୋ ଆସନ୍‌ ଅଡ଼୍‌କୋ ଗଡ଼ାରେଙନ୍‌ ଆବନର୍‌ ଆସନ୍‌ ଆନିଞ୍ଜିଆଡଙ୍‌ ବାଞେଞ୍ଜି । 36 ସାତ ବର୍ସେଙ୍‌ ଆକ୍ରାନ୍ତାରାତେନ୍‌ ଆଡିଡ୍‌ ଅଡ଼୍‌କୋ ମୋସର ଡେସାନ୍‌ ଜନୋମନ୍‌ ତିୟ୍‌ଲେ ଏରପ୍ତିତେ । ତିଆସନ୍‌ କାନ୍ତାରାନ୍‌ ବାତ୍ତେ ମିସର୍‌ଡେସାନ୍‌ ଆମନ୍‌ରାଜି ଡୋଲଜନ୍‌ ବାତ୍ତେ ଅଃଡଣ୍ଡଏଜି ।

37 ତିଆଡିଡ୍‌ ପାରୋନ୍‌ ଡ ଆକମ୍ୱାରିଞ୍ଜି ଆଗନିୟ୍‌ଗିୟ୍‌ଲୋଙ୍‌ କେନ୍‌ ଆବର୍ନେ ମନଙ୍‌ ଡିସୟେଞ୍ଜି । 38 ସିଲତ୍ତେ ପାରୋନ୍‌ ଆ କମ୍ୱାରିଞ୍ଜିଆଡଙ୍‌ ବରେନ୍‌, "ଇନ୍‌ଲେଞ୍ଜି କେନ୍‌ ଆନିନ୍‌ ଅନ୍ତମ୍‌ ପଙ୍‌ ଆ ମନ୍‌ରା ଆରି ଞାଙ୍‌ବୋ ? କେନ୍‌ ଆମଙନ୍‌ ଇସ୍ୱରନ୍‌ ଆପୁରାଡ଼ା ଡକୋ ।" 39 ସିଲତ୍ତେ ପାରୋନ୍‌ ଜୋସେପନ୍‌ଆଡଙ୍‌ ବରେନ୍‌, "ଇସ୍ୱରନ୍‌ ଆମନ୍‌ଆଡଙ୍‌ କେନ୍‌ ଅଡ଼୍‌କୋନ୍‌ ଅବ୍‌ଜନାଲମ୍‌, ତିଆସନ୍‌ ଆମନ୍‌ ଅନ୍ତମ୍‌ ବୁଡ୍ଡି ଡ ଗିଆନମରନ୍‌ ଆନ୍ନିଙ୍‌ ଅବୟ୍‌ ତଡ୍‌; 40 ଆମନ୍‌ ଡେସାଲେନ୍‌ ଆସୋଡ଼ାମର୍‌ ଡେଆ; ମନ୍‌ରାଞେଞ୍ଜି ଅଡ଼୍‌କୋନ୍‌ ବର୍ନେନମ୍‌ ମାନ୍ନେତଜି, ତରଙ୍କୁମ୍‌ କୁର୍ସିଲୋଙନ୍‌ ଆମନ୍‌ ସିଲଡ୍‌ ଞେନ୍‌ ସୋଡ଼ା ଡେତାୟ୍‌ ।" 41 ପାରୋନ୍‌ ଜୋସେପନ୍‌ଆଡଙ୍‌ ଆରି ବରେନ୍‌, "ଗିଜା, ଞେନ୍‌ ଆମନ୍‌ଆଡଙ୍‌ ସମ୍ପରା ମିସର୍‌ ଡେସାନ୍‌ ଆତୋଣ୍ତୋ ସାସନ୍‌ ଆସନ୍‌ ଏତବ୍‌ନଙ୍‌ଲମ୍‌ ।" 42 ତି ସିଲଡ୍‌ଲ୍ଲନ୍‌ ପରୋନ୍‌ ଆନିନ୍‌ଡମ୍‌ ଆସିଲୋଙନ୍‌ ଏନ୍‌ସିନ୍‌ ତବ୍‌ଲେ ଜୋସେପନ୍‌ ଆସିଲୋଙ୍‌ ତିୟ୍‌ଲେ ଆନିନ୍‌ଆଡଙ୍‌ ଲମନନ୍‌ ଆସିନ୍‌ରି ଅବ୍‌ରଲେ ଆସଙ୍କାଲୋଙନ୍‌ ସୁନାନ୍‌ ଆରି ଅବ୍‌ତଲେଞ୍ଜି । 43 ଆରି, ଆନିନ୍‌ ଆନିନ୍‌ଆଡଙ୍‌ ବାଗୁତରଲୋଙ୍‌ ଅମ୍‌ଡାଜେନ୍‌; ଆରି ମନ୍‌ରାଞ୍ଜି ଆମୁକାବାନ୍‌ ତୁଡ଼ୁମ୍ବା ତୁଡୁମ୍‌ବା ଗାମ୍‌ଲେ ଅପ୍ପୁଙ୍‌ବରେଞ୍ଜି । କେନ୍‌ ଅନ୍ତମ୍‌ ଆନିନ୍‌ ଆନିନ୍‌ଆଡଙ୍‌ ଅଡ଼୍‌କୋ ମିସର୍‌ ଡେସାନ୍‌ ଆତୋଣ୍ତୋ ତବ୍‌ନଙେନ୍‌ । 44 ପାରୋନ୍‌ ଜୋସେପନ୍‌ଆଡଙ୍‌ ବରେନ୍‌, "ଞେନ୍‌ ପାରୋ ରାଜା ବନ୍‌ଡ ଅଡ଼୍‌କୋ ମିସର୍‌ ଡେସାରେଙନ୍‌ ଆମନ୍‌ ଏର୍‌ବନାଞନ୍‌ ଅନ୍ନିଙ୍‌ ଆ ମନ୍‌ରା ଇନ୍ନିଙ୍‌ ଲୁମ୍‌ଲେ ଅରପ୍ତିଏ ।" 45 ଆରି, ପାରୋନ୍‌ ଜୋସେପନ୍‌ ଆଞୁମ୍‌ ସାପନତ୍‌-ପାନେଅ ଅବ୍‌ଞୁମେନ୍‌, ଆରି ଓନ୍‌ ଆଗଡ଼ାବାୟ୍‌ ପୋଟିପର୍‌ ଆ ରାଓଡ଼ା ଆଡାଙ୍ଗଡ଼ିଅନ୍‌ ଆଞୁମ୍‌ ଆସନତ୍‌ ଆନିନ୍‌ ସରିନ୍‌ ଜୋସେପନ୍‌ ଅଃବିବାଏନ୍‌ । ଜୋସେପନ୍‌ ସମ୍ପରା ମିସର୍‌ ଡେସାଲୋଙ୍‌ ବୁଲ୍ଲେଲେ ଗିଜେନ୍‌ । 46 ଜୋସେପନ୍‌ ତିରିସି ବର୍ସେଙ୍‌ ଆଡ୍ରେନ୍‌ ଆଡିଡ୍‌ ମିସ୍ରିୟନ୍‌ ଆରାଜା ପାରୋନ୍‌ ଆମୁକାବା ତନଙେନ୍‌; ତି ସିଲଡ୍‌ଲ୍ଲନ୍‌ ଜୋସେପନ୍‌ ପାରୋନ୍‌ ଆମଙ୍‌ ସିଲଡ୍‌ ଜିର୍ରେ ସମ୍ପରା ମିସର୍‌ ଡେସାନ୍‌ ବୁଲେଲେ ଗିଜେନ୍‌ । 47 ତି ସିଲଡ୍‌ଲ୍ଲନ୍‌ ଅକାନ୍ତାରାଲୋନ୍‌ ଆ ସାତ ବର୍ସେଙ୍‌ ଜନ୍‌ରୋମନ୍‌ ଗୋଗୋୟ୍‌ ଏଲେନ୍‌ । 48 ଜୋସେପନ୍‌ ତି ଆ ସାତ ବର୍ସେଙ୍‌ଲୋଙ୍‌ ମିସର୍‌ ଡେସାନ୍‌ ଆରଗୁରେନ୍‌ ଅଡ଼୍‌କୋନ୍‌ ଆଜନ୍‌ରୋମ୍‌ ତର୍ତୁମ୍‌ଲେ ଗଡ଼ାଲୋଙନ୍‌ ଡକୋଏନ୍‌; ଆରି, ଅଙ୍ଗା ଅଙ୍ଗା ଆଗଡ଼ା ଏର୍ରେ ଡିଅଙ୍ଗା ଜନ୍‌ରୋମନ୍‌ ଅଗୁରେନ୍‌, ତି ଅଡ଼୍‌କୋନ୍‌ ତି ଆଗଡ଼ାଲୋଙ୍‌ ତର୍ତୁମେଞ୍ଜି । 49 କେନ୍‌ ଅନ୍ତମ୍‌ ଜୋସେପନ୍‌ ସମେଁୟ୍‌ଣ୍ଡ୍ରାନ୍‌ ଆଲକିୟ୍‌ ଅନ୍ତମ୍‌ ଗୋଗୋୟ୍‌ ଜନ୍‌ରୋମନ୍‌ ତର୍ତୁମେନ୍‌ ଡ, ତିଆତେ ଆରି ଅଃତରେଡ୍‌ଲଜି; ଇନିଆସନ୍‌ଗାମେଣ୍ଡେନ୍‌ ତିଆତେ ବେସି ଗୋଗୋୟ୍‌ ଡକୋଏନ୍‌ । 50 ଆରି କାନ୍ତାରାନ୍‌ ଆ ବର୍ସେଙ୍‌ ଆମ୍ମୁଙ୍‌ ଜୋସେପନ୍‌ ଆ ଡାଙ୍ଗାଡ଼ାଅନ୍‌ ବାଗୁ ଜନମ୍ମୁ ଡେଏଞ୍ଜି, ଓନନ୍‌ ଆଗଡ଼ାବାୟ୍‌ ପୋଟିପେର୍‌ ରାଓଡ଼ାନ୍‌ ଆଡାଙ୍ଗଡ଼ିଅନ୍‌ ଆସନତ୍‌ ଆଞୁମ୍‌ବୟ୍‌ ଆନିଞ୍ଜିଆଡଙ୍‌ କୋଡେନ୍‌ । 51 ସିଲତ୍ତେ ଜୋସେପନ୍‌ ଆସୋଡ଼ା ଡାଙ୍ଗାଡ଼ାଅନ୍‌ ଆଞୁମ୍‌ ମନଃସି*ଡକୋଏନ୍‌, ଇନିଆସନ୍‌ଗାମେଣ୍ଡେନ୍‌ ଆନିନ୍‌ ବର୍ନେ, "ଇସ୍ୱରନ୍‌ ଅଡ଼୍‌କୋନ୍‌ ଡୁକଞେନ୍‌ ଡ ଆପ୍ପେୟ୍‌ସିଙନ୍‌ କବ୍‌ରୋଡାଲିଁୟ୍‌ ।" 52 ଆରି, ଅନବ୍‌ବାଗୁ ଆଡାଙ୍ଗାଡ଼ାଅନ୍‌ ଆଞୁମ୍‌ ଇପ୍ରିଅମ୍‌* ଡକୋଏନ୍‌, ଇନିଆସନ୍‌ଗାମେଣ୍ଡେନ୍‌ ଆନିନ୍‌ ବର୍ନେ, "ପରାନ୍‌ଡଣ୍ତନ୍ ଆଡେସାଲୋଙ୍‌ ଇସ୍ୱରନ୍‌ ଞେନ୍‌ଆଡଙ୍‌ ମବ୍‌ଲୟ୍‌ଲିୟ୍‌ ।" 53 ତି ସିଲଡ୍‌ଲ୍ଲନ୍‌ ମିସର୍‌ ଡେସାଲୋଙ୍‌ ଜନ୍‌ରୋମନ୍‌ ଆରେଲେନ୍‌ ଆ ସାତ ବର୍ସେଙ୍‌ ଅଞିଡେନ୍‌ । 54 ଆରି, ଜୋସେପନ୍‌ ଆବର୍ନେ ଅନ୍ତମ୍‌ ସାତ ବର୍ସେଙ୍‌ କାନ୍ତାରାନ୍‌ ଡେତେ; ସିଲତ୍ତେ ଅଡ଼୍‌କୋନ୍‌ ଆଡେସାରେଙ୍‌ କାନ୍ତାରାଏନ୍‌, ବନ୍‌ଡ ସମ୍ପରା ମିସର୍‌ ଡେସାଲୋଙ୍‌ ଜନୋମନ୍‌ ଡକୋଏନ୍‌ । 55 ଆରି, ସମ୍ପରା ମିସର୍‌ ଡେସାଲୋଙ୍‌ ଆକ୍ରାନ୍ତାରାଏନ୍‌, ମନ୍‌ରାଞ୍ଜି ଅଡ଼୍‌କୋନ୍‌ ଜନୋମ୍‌ଜୋମନ୍‌ ଆସନ୍‌ ପାରୋନ୍‌ ଆମଙ୍‌ବା ବାବାବ୍‌ଲେ ବେଡେଞ୍ଜି; ସିଲତ୍ତେ ପାରୋନ୍‌ ମିସରିଅନ୍‌ ଅଡ଼୍‌କୋନ୍‌ ଆମନ୍‌ରାଆଡଙ୍‌ ବରେନ୍‌, ଆମ୍ୱେଞ୍ଜି ଜୋସେପନ୍‌ ଆମଙ୍‌ ଇୟ୍‌ବା; ଆନିନ୍‌ ଇନି ଗାମ୍‌ତମ୍‌, ତିଆତେ ଲୁମ୍‌ବା । 56 ତିଆଡିଡ୍‌ ଅଡ଼୍‌କୋନ୍‌ ଆଡେସାଲୋଙ୍‌ କାନ୍ତାରାଏନ୍‌, ଜୋସେପନ୍‌ ଅଡ଼୍‌କୋନ୍‌ ଆଡ୍ରକୋନେରେଙ୍‌ ଆଜନ୍‌ରୋମ୍‌ ଉର୍ରେ ମିସ୍ରିୟଞ୍ଜିଆଡଙ୍‌ ଜନ୍‌ରୋମନ୍‌ ତମେନ୍‌; ଡେଲୋଜନଙ୍‌ଡେନ୍‌ ମିସର୍‌ ଡେସାଲୋଙନ୍‌ କାନ୍ତାରାନ୍‌ ଗୋଗୋୟ୍‌ଲେ ପାଙେନ୍‌ । 57 ଆରି, ଅଡ଼୍‌କୋନ୍‌ ଆଡେସା ଆ ମନ୍‌ରାଜି ମିସର୍‌ ଡେସାନ୍‌ ଜନ୍‌ରୋମନ୍‌ ଆଞନି ଆସନ୍‌ ଜୋସେପନ୍‌ ଆମଙ୍‌ ଇୟେଞ୍ଜି । ଇନିଆସନ୍‌ଗାମେଣ୍ଡେନ୍‌ ଅଡ଼୍‌କୋନ୍‌ ଆଡେସାଲୋଙ୍‌ କାନ୍ତାରାନ୍‌ ଡକୋଏନ୍‌