1 ତି ସିଲଡ୍‌ଲ୍ଲନ୍‌ ଜୋସେପନ୍‌ ଜିର୍ରେ ପାରୋନ୍‌ଆଡଙ୍‌ କବରନ୍‌ ଆପ୍ପାୟ୍‌ଲେ ବରେନ୍‌, "ଆପେୟ୍‌ଞେନ୍‌ ଡ ବୋଞାଙ୍‌ଞେଞ୍ଜି କିନାନ୍‌ ଡେସା ସିଲଡ୍‌ ଆ ତାଙ୍‌ଲେୟନ୍‌ ଡ ଜନ୍ତୁନ୍‌ ଆମଣ୍ତା ଅଡ଼୍‌କୋନ୍‌ ପାଙ୍‌ଲେ ଜିର୍ରାଜି; ଗିଜା, ଆନିଞ୍ଜି ଗୋସେନ୍‌ ଆଏରିଆଲୋଙ୍‌ ଡକୋଜି ।" 2 ଆରି, ଜୋସେପନ୍‌ ଆବୋଞାଙଞ୍ଜି ସିଲଡ୍‌ ମନ୍‌ଲୟ୍‌ ମନ୍‌ରାଆଡଙ୍‌ ଓରୋଙ୍‌ଲେ ପାରୋନ୍‌ ସରିନ୍‌ ଅବ୍‌ରବାଙେଞ୍ଜି । 3 ସିଲତ୍ତେ ପାରୋନ୍‌ ଜୋସେପନ୍‌ ଆବୋଞାଙ୍‌ଜିଆଡଙ୍‌ ବରେନ୍‌, "ଆମ୍ୱେନ୍‌ ଅଙ୍ଗା ଆବେବାର ଏଲୁମ୍‌ତେ ?" ଆନିଞ୍ଜି ପାରୋନ୍‌ଆଡଙ୍‌ ବରେଞ୍ଜି, "କେନ୍‌ କମ୍ୱାରିନମ୍‌ଞ୍ଜି ପୁର୍ବା ଜୋଜୋଞ୍ଜି ସିଲଡ୍‌ ଜନ୍ତୁନ୍‌ ଆବ୍ରନ୍ତେଞ୍ଜି ।"

4 ଆନିଞ୍ଜି ପାରୋନ୍‌ଆଡଙ୍‌ ଆରି ବରେଞ୍ଜି, "ଇନ୍‌ଲେଞ୍ଜି କେନ୍‌ ଆଡେସାଲୋଙ୍‌ ଆଡକୋନେ ଆସନ୍‌ ଏଜିର୍ରାୟ୍‌; ଇନିଆସନ୍‌ଗାମେଣ୍ଡେନ୍‌ କେନ୍‌ କମ୍ୱାରିନମ୍‌ଞ୍ଜି ଆ ଜନ୍ତୁଜି ଆସନ୍‌ ଇନ୍ନିଙ୍‌ ତରୁର୍ତାଙନ୍‌ ଅବୟ୍‌ ତଡ୍‌; କିନାନ୍‌ ଡେସାଲୋଙ୍‌ ଗୋଗୋୟ୍‌ କାନ୍ତାରାଏନ୍‌; ତିଆସନ୍‌ ଏକାକୁର୍ତିତନାୟ୍‌, ଆମନ୍‌ କେନ୍‌ ଆକମ୍ୱାରିଆଡଙ୍‌ ଗୋସେନ୍‌ ଆଏରିଆଲୋଙ୍‌ ଡରକୋନେନ୍‌ ତିୟାଜି ।" 5 ସିଲତ୍ତେ ପାରୋନ୍‌ ରାଜା ଜୋସେପନ୍‌ଆଡଙ୍‌ ବାଞେନ୍‌, "ଆପେୟ୍‌ନମ୍‌ ଡ ବୋଞାଙ୍‌ନମ୍‌ଜି ଅମଙ୍‌ବାନମ୍‌ ଜିର୍ରାଜି, 6 ମିସର୍‌ ଡେସାନ୍‌ ମୁକାବାନମ୍‌ ଡକୋ; ଡେସାନ୍‌ ଆ ମନଙ୍‌ ଆଡ୍ରକୋନେଲୋଙ୍‌ ଆପେୟ୍‌ନମ୍‌ ଡ ବୋଞାଙ୍‌ନମ୍‌ଞ୍ଜିଆଡଙ୍‌ ଡକ୍କୋଆଜି; ଗୋସେନ୍‌ ଆଏରିଆଲୋଙ୍‌ ଆନିଞ୍ଜି ଡକୋନେତଜି; ଆରି, ଆନିଞ୍ଜି ସିଲଡ୍‌ ଆନାଆଡଙ୍‌ ରନପ୍ତିମର୍‌ ଗାମ୍‌ଲେ ଅବ୍‌ଡିସୟ୍‌ତେ, ଆନିଞ୍ଜିଆଡଙ୍‌ ଜନ୍ତୁଞେଞ୍ଜି ଆମଣ୍ତା ଆ ସୋଡ଼ାମର୍‌ ଏମ୍ମେଲାଜି ।"

7 ତି ସିଲଡ୍‌ଲ୍ଲନ୍‌ ଜୋସେପନ୍‌ ଆପେୟନ୍‌ ଜାକୁବନ୍‌ଆଡଙ୍‌ ଓରୋଙ୍‌ଲେ ପାରୋନ୍‌ ଆତେମଡ୍‌ଲୋଙ୍‌ ତବ୍‌ନଙେନ୍‌; ସିଲତ୍ତେ ଜାକୁବନ୍‌ ପାରୋନ୍‌ଆଡଙ୍‌ ଆସିର୍ବାଦଏନ୍‌ । 8 ତିଆଡିଡ୍‌ ପାରୋନ୍‌ ଜାକୁବନ୍‌ଆଡଙ୍‌ ବରେନ୍‌, "ଡିଅଙ୍ଗା ମିୟ୍‌ନୁମ୍‌ ଡେଲମ୍‌ ?"

9 ଜାକୁବନ୍‌ ପାରୋନ୍‌ଆଡଙ୍‌ ବରେନ୍‌, "ଅନମେଙ୍‌ ଡିନାଞେନ୍‌ ବସଅ ତିରିସି ବର୍ସେଙ୍‌; ଅନମେଙ୍‌ ଡିନାଞେନ୍‌ ଅସୋୟ୍‌ ଡ ବରନ୍ତଙନ୍‌; ଆରି ପୁର୍ବା ଜୋଜୋଞେଞ୍ଜି ଆନମେଙ୍‌ ଡିନା ଅନ୍ତମ୍‌ ତଡ୍‌ ।" 10 ତି ସିଲଡ୍‌ଲ୍ଲନ୍‌ ଜାକୁବନ୍‌ ପାରୋନ୍‌ଆଡଙ୍‌ ଆସିର୍ବାଦଲେ ଆମୁକାବାନ୍‌ ସିଲଡ୍‌ ଜିରେନ୍‌ । 11 ସିଲତ୍ତେ ଜୋସେପନ୍‌ ପାରୋନ୍‌ ଆ ବନାଁୟ୍‌ବର୍‌ ଅନ୍ତମ୍‌ ମିସର୍‌ ଡେସାନ୍‌ ଆମନଙ୍‌ ଆଡ୍ରକୋନେରେଙ୍‌, ଆଗ୍ରାମ୍‌ଗାମ୍‌, ରାମିସେସ୍‌ ଆଏରିଆରେଙ୍‌ ଆପେୟନ୍‌ ଡ ଆବୋଞାଙଞ୍ଜିଆଡଙ୍‌ ଡରକୋନେନ୍‌ ତିୟେନ୍‌ । 12 ଆରି, ଜୋସେପନ୍‌ ଆପେୟନ୍‌ ଡ ଆବୋଞାଙଞ୍ଜିଆଡଙ୍‌ ଆରି ଆପେୟନ୍‌ ଆସିଙ୍‌ମର୍‌ଜିଆଡଙ୍‌ ଆ ଜନୋମ୍‌ଜୋମ୍‌ ଆଜନବ୍‌ ତିୟ୍‌ଲେ ଅରାଞେଞ୍ଜି ।

13 ତି ଆବନେଡ଼ା ଆକ୍ରାନ୍ତାରାଏନ୍‌ ଆସନ୍‌ ଅଡ଼୍‌କୋନ୍‌ ଆଡେସା ଜନୋମ୍‌ଜୋମନ୍‌ ଆଜନବ୍‌ ଅବାବ ଡେନ୍‌; ସିଲତ୍ତେ ମିସର୍‌ ଡେସା ଡ କିନାନ୍‌ ଆ ଡେସା ଆ ମନ୍‌ରାଜି କାନ୍ତାରାନ୍‌ ଆସନ୍‌ ରାଉଡାଜେଞ୍ଜି । 14 ଆରି ମିସର୍‌ ଡେସାଲୋଙ୍‌ ଡ କିନାନ୍‌ ଆ ଡେସାଲୋଙ୍‌ ଡିଅଙ୍ଗା ରୁପାନ୍‌ ଡକୋଏନ୍‌, ମନ୍‌ରାଞ୍ଜି ତିଆତେ ତିୟ୍‌ଲେ ଜନ୍‌ରୋମନ୍‌ ଆଞରିଏଞ୍ଜି ଆସନ୍‌, ଜୋସେପନ୍‌ ଅଡ଼୍‌କୋନ୍‌ ଆରୁପା ରୁକୁଲେ ପାରୋନ୍‌ ଆସିଙ୍‌ ପାଙେନ୍‌ । 15 ତି ସିଲଡ୍‌ଲ୍ଲନ୍‌ ମିସର୍‌ ଡେସାଲୋଙ୍‌ ଡ କିନାନ୍‌ ଡେସାଲୋଙ୍‌ ରୁପାନ୍‌ ଅବାବ ଡେଏନ୍‌, ମିସର୍‌ ଆ ମନ୍‌ରାଜି ଅଡ଼୍‌କୋନ୍‌ ଜୋସେପନ୍‌ ଆମଙ୍‌ ଜିର୍ରେ ବରେଞ୍ଜି, "ଇନ୍‌ଲେଞ୍ଜିଆଡଙ୍‌ ଜନୋମ୍‌ଜୋମନ୍‌ ଆଜନବ୍‌ ତିୟ୍‌ଲେନ୍‌, ରୁପାଲେନ୍‌ ଅଞିଡ୍‌ତେ ଗାମ୍‌ଲେ ଇନିବା ଇନ୍‌ଲେଞ୍ଜି ମୁକାବାନମ୍‌ ରବୁଲେନ୍‌ ?" 16 ସିଲତ୍ତେ ଜୋସେପନ୍‌ ବର୍ରନେ, "ଜନ୍ତୁବେଞ୍ଜି ତିୟ୍‌ବା; ରୁପାନ୍‌ ଅଞିଡେନ୍‌, ତିଡେନ୍‌ ଜନ୍ତୁନ୍‌ ଆପାଲ୍‌ତେଙ୍‌ ଞେନ୍‌ ଆମ୍ୱେଞ୍ଜିଆଡଙ୍‌ ଜନ୍‌ରୋମନ୍‌ ତିୟ୍‌ତବେନ୍‌ ।" 17 ସିଲତ୍ତେ ଆନିଞ୍ଜି ଜୋସେପନ୍‌ ଆମଙ୍‌ବା ରମ୍ମଙ୍‌ ରମ୍ମଙ୍‌ ଆଜନ୍ତୁ ପାଙ୍‌ଲାଜି; ସିଲତ୍ତେ ଜୋସେପନ୍‌ କୁର୍ତାନ୍‌ ଡ ମେଣ୍ତାନ୍‌ ଆରି ତାଙ୍‌ଲିୟନ୍‌ ଡ ଗୋଡୁଞନ୍‌ ଅଡ଼୍‌କୋନ୍‌ ବର୍ରେ ଆନିଞ୍ଜିଆଡଙ୍‌ ଜନ୍‌ରୋମନ୍‌ ତିୟେଞ୍ଜି; କେନ୍‌ ଅନ୍ତମ୍‌ ଜୋସେପନ୍‌ ଜନ୍ତୁନ୍‌ ଆପାଲ୍‌ତେଙ୍‌ ଆନିଞ୍ଜିଆଡଙ୍‌ ଜନ୍‌ରୋମନ୍‌ ତିୟ୍‌ଲେ ତି ଆ ବର୍ସେଙ୍‌ ତୁଲାୟେନ୍‌ । 18 ଆରି, ତି ଆ ବର୍ସେଙ୍‌ ଆବ୍ରରିୟ୍‌ଗାଜେନ୍‌, ଅନବ୍‌ବାଗୁ ବର୍ସେଙ୍‌ଲୋଙ୍‌ ଆନିଞ୍ଜି ଜୋସେପନ୍‌ ଆମଙ୍‌ବା ଜିର୍ରେ ବରେଞ୍ଜି, "ରୁପାଲେନ୍‌ ଅଡ଼୍‌କୋନ୍‌ ଅଞିଡେନ୍‌; ତିଆତେ ପ୍ରବୁଲେନ୍‌ ଆମଙ୍‌ ଏଃସସନାୟ୍‌; ଆରି, ଜନ୍ତୁଲେନ୍‌ ଅଡ଼୍‌କୋନ୍‌ ଜାୟ୍‌ ପ୍ରବୁନ୍‌ ଆତେ ଡେଏନ୍‌; ନମି ପ୍ରବୁନ୍‌ ଆତେମଡ୍‌ଲୋଙ୍‌ ଡଅଙ୍‌ଲେନ୍‌ ଡ ଲବନ୍‌ ଉମ୍‌ରେଙ୍‌ଲେ ଆରି ଇଡ୍‌ନିଙ୍‌ ଅବୟ୍‌ ତଡ୍‌ । 19 ତିଆସନ୍‌ ଲବଲେନ୍‌ ଅମ୍ପରା ଇନ୍‌ଲେଞ୍ଜି ଇନିବା ଗନିୟ୍‌ଗିୟ୍‌ଲୋଙ୍‌ନମ୍‌ ରବୁଲେନ୍‌ । ଜନୋମ୍‌ଜୋମନ୍‌ ତିୟ୍‌ଲେ ଇନ୍‌ଲେଞ୍ଜିଆଡଙ୍‌ ଡ ଲବଲେନ୍‌ ଞିଲେ ପାଙା । ଏତ୍ତେଲ୍‌ଡେନ୍‌ ଇନ୍‌ଲେଞ୍ଜି ଡ ଲବଲେନ୍‌ ପାରୋନ୍‌ ଆ କମ୍ୱାରି ଡେତଲେନ୍‌, ତି ସିଲଡ୍‌ଲ୍ଲନ୍‌ ଇନ୍‌ଲେଞ୍ଜିଆଡଙ୍‌ ଜମ୍ମଲନ୍‌ ତିୟ୍‌ଲେମ୍ବା; ଏତ୍ତେଲ୍‌ଡେନ୍‌ ଅମେଙ୍‌ତଲେନ୍‌; ଇଜ୍ଜାଡେନ୍‌ ଇନ୍‌ଲେନ୍‌ ରବୁତଲେନ୍‌, ଆରି, ଲବନ୍‌ ଜାୟ୍‌ ଗୁରୁଡ୍ଡେତେ ।" 20 ଏନ୍ନେଲେ ଆକାନ୍ତାରା ଆନିଞ୍ଜି ଆସନ୍‌ ବରନ୍ତଙନ୍‌, ତିଆସନ୍‌ ମିସରନ୍‌ ଆମନ୍‌ରାଜି ରମ୍ମଙ୍‌ ରମ୍ମଙ୍‌ ଆଲବ ତମେଞ୍ଜି, ତି ଅଡ଼୍‌କୋନ୍‌ ଆଲବ ପାରୋନ୍‌ ଆସନ୍‌ ଜୋସେପନ୍‌ ଞିଏନ୍‌, ତିଆସନ୍‌ ଅଡ଼୍‌କୋନ୍‌ ଆଲବ ଆରୋଣନ୍‌ ଆତେ ଡେଆଜେନ୍‌ । 21 ସିଲତ୍ତେ ଆନିନ୍‌ ମିସର୍‌ ବମନେଙ୍‌ ସିଲଡ୍‌ ଆରି ବମନେଙ୍‌ ଜାୟ୍‌ ଗଡ଼ାଲୋଙନ୍‌ ଆମନ୍‌ରାଞ୍ଜି ଡକୋଏନ୍‌ । 22 ଆନିନ୍‌ ରାଓଡ଼ାଞ୍ଜି ତୁମ୍‌ ଆଲବ ଅଃଞିଲୋ; ଇନିଆସନ୍‌ଗାମେଣ୍ଡେନ୍‌ ରାଓଡ଼ାଞ୍ଜି ପାରୋନ୍‌ ଆମଙ୍‌ ସିଲଡ୍‌ ବଡିନ୍‌ ଞାଙେଞ୍ଜି; ତିଆସନ୍‌ ପାରୋନ୍‌ ଆତ୍ରିୟେଞ୍ଜି ଆବଡି ବାତ୍ତେ ଆନିଞ୍ଜି ଅମେଙେଞ୍ଜି ତିଆସନ୍‌ ଆନିଞ୍ଜି ରମ୍ମଙ୍‌ ରମ୍ମଙ୍‌ ଆଲବ ଅଃତମ୍‌ଲଜି । 23 ତିଆସନ୍‌ ଜୋସେପନ୍‌ ପ୍ରର୍ଜାଞ୍ଜିଆଡଙ୍‌ ବରେନ୍‌, "ଗିୟ୍‌ବା, ଞେନ୍‌ ପାରୋନ୍‌ ଆସନ୍‌ ଆମ୍ୱେଞ୍ଜିଆଡଙ୍‌ ଡ ଲବବେନ୍‌ ଅଡ଼୍‌କୋନ୍‌ ଞିଲାୟ୍‌; ନମି କେନ୍‌ ଆଜ୍ଜମଲ୍‌ ପାଙ୍‌ଲେ ଲବଲୋଙନ୍‌ ଇୟ୍‌ବୁଡ୍‌ବା । 24 ବନ୍‌ଡ ଇନି ଏଞାଙ୍‌ତେ, ମନ୍‌ଲୟ୍‌ ବନ୍ତାଲୋଙ୍‌ ସିଲଡ୍‌ ବବନ୍ତା ରାଜାନ୍‌ଆଡଙ୍‌ ତିୟ୍‌ବା, ଆରି ଉଞ୍ଜି ବନ୍ତାଆତେ ଆମ୍ବେନ୍‌ ଆରି କୁତ୍ତାମାବେନ୍‌ ଆଜନୋମ୍‌ ଆସନ୍‌ ଆରି ଜମ୍ମଲନ୍‌ ଆସନ୍‌ ଡକ୍କୋବା ।" 25 ସିଲତ୍ତେ ଆନିଞ୍ଜି ବର୍ରଞ୍ଜି, "ଆମନ୍‌ ପରାନ୍ନାଲେନ୍‌ ଡୋବେନ୍‌; ଆମନ୍‌ ସାୟୁମ୍‌ଲଲେନ୍‌ ଡେନ୍‌, ଇନ୍‌ଲେଞ୍ଜି ପାରୋନ୍‌ ଆ କମ୍ୱାରି ଏଡେତାୟ୍‌ ।" 26 ମନ୍‌ଲୟ୍‌ ବନ୍ତା ପାରୋନ୍‌ ଞାଙ୍‌ତେ, ମିସରନ୍‌ ଅଡ଼୍‌କୋନ୍‌ ଆଲବ ଆବର୍ନେ ଜୋସେପନ୍‌ ଆଗ୍ରବ୍‌ରିଏନ୍‌ ଅନଗଡ୍‌ ନମି ଆନ୍ତାନ୍‌ ସଡ଼େତେ; ରାଓଡ଼ାଞ୍ଜି ତୁମ୍‌ ଆଲବ ପାରୋନ୍‌ ଆତେ ଅଃଡେଲୋ ।

27 ତି ଆଡିଡ୍‌ ଇସ୍ରାଏଲନ୍‌ ମିସର୍‌ ଗୋସନ୍‌ ଆଏରିଲୋଙ୍‌ ଡକୋଲନେ, ଆରି, ଆନିଞ୍ଜି ତେତ୍ତେ ଡନେନ୍‌ ଞାଙ୍‌ଲେ ଗୋଗୋଜେଞ୍ଜି ଡ ଜବ୍ର କେଜ୍ଜା ଡେଏଞ୍ଜି । 28 ଜାକୁବନ୍‌ ମିସର୍‌ ଡେସାଲୋଙ୍‌ ସତର ବର୍ସେଙ୍‌ ଜାୟ୍‌ ଡକୋଲନେ, ଆନିନ୍‌ ବସଅ ବାକୁଡ଼ି ସାତ ବର୍ସେଙ୍‌ ଜାୟ୍‌ ଡକୋଲନ୍‌ । 29 ଇସ୍ରାଏଲନ୍‌ ଆ ରନବୁ ବେଡ଼ାନ୍‌ ତୁୟାଲାୟ୍‌ ଗାମ୍‌ଲେ ଆନିନ୍‌ ଆଜ୍ରନାଏନ୍‌, ଆନିନ୍‌ ଆ ଡାଙ୍ଗାଡ଼ାଅନନ୍‌ ଜୋସେପନ୍‌ଆଡଙ୍‌ ଓଡ୍ଡେଡାଲେ ବରେନ୍‌, "ଗନିୟ୍‌ଗିୟ୍‌ଲୋଙ୍‌ନମ୍‌ ଞେନ୍‌ ସନାୟୁମନ୍‌ ଞାଙ୍‌ଲାୟ୍‌ଡେନ୍‌, ବୁଲୁଲୋଙ୍‌ଞେନ୍‌ ଅସିନମ୍‌ ଡକ୍କୋଡାଲେ ପର୍ମାଡ଼ାନା ଡ ଞେନ୍‌ଆଡଙ୍‌ ମିସର୍ ଡେସାଲୋଙନ୍‌ ଏତିଲ୍‌ଡଙିଁୟ୍‌ । 30 ବନ୍‌ଡ ଞେନ୍‌ ପୁର୍ବାଜୁଜୁଞେଞ୍ଜି ସରିନ୍‌ ଲୁଡ୍‌ଲାୟ୍‌ଡେନ୍‌, ଆମ୍ୱେନ୍‌ ଞେନ୍‌ଆଡଙ୍‌ କେନ୍‌ ଆ ମିସର୍‌ ଡେସା ସିଲଡ୍‌ ପାଙ୍‌ଲେ ଆନିଞ୍ଜି ଆମସାନ୍ନିଲୋଙ୍‌ ଆୟ୍‌ତିୟ୍‌ବା ।" ସିଲତ୍ତେ ଜୋସେପନ୍‌ ବର୍ନେ, "ବର୍ନେନମ୍‌ ଅନ୍ତମ୍‌ ଲୁମ୍‌ତାୟ୍‌ ।" 31 ସିଲତ୍ତେ ଜାକୁବନ୍‌ ଜୋସେପନ୍‌ଆଡଙ୍‌ ପର୍ମାଡ଼ାନେନ୍‌ ଆସନ୍‌ ଆବ୍ରନେନ୍‌, "ଆନିନ୍‌ ଆମଙନ୍‌ ପର୍ମାଡ଼ାଲନେ ।" ତିଆଡିଡ୍‌ ଇସ୍ରାଏଲନ୍‌ ଲୁଲ୍ଲୁଡିଙନ୍‌ ଆରବବ୍‌ଗଡ୍‌ତେନ୍‌ ଡକୋଲନ୍‌ ଇସ୍ୱରନ୍‌ଆଡଙ୍‌ ସେଙ୍କେଏନ୍‌ ।