1 ତି ଆଡ୍ରେନ୍‌ ସିଲଡ୍‌ ତନାଲ୍‌ମଡନ୍‌ ବାତ୍ତେ ପ୍ରବୁନ୍‌ ଅବ୍ରାମନ୍‌ଆଡଙ୍‌ ଆବର୍ରେନ୍‌ ଆନିନ୍‌ ଅମ୍‌ଡଙେନ୍‌, "ଏ ଅବ୍ରାମ୍‌, ବତଙ୍‌ଡଙମ୍‌ । ଞେନ୍‌ ଆମନ୍‌ଆଡଙ୍‌ ଡୋବ୍‌ତମ୍‌ ଆରି ଓୟୋଁଲ୍‌କୁୟ୍‌ନମ୍‌ ତିୟ୍‌ତଲ୍‌ ।"

2 ତିସିଲଡ୍‌ ଅବ୍ରାମନ୍‌ ଗାମେନ୍‌, "ଏ ପ୍ରବୁ, ଓୟୋଁଲ୍‌କୁୟ୍‌ଞେନ୍‌ ଆମନ୍‌ ଞେନ୍‌ଆଡଙ୍‌ ଇନି ତିୟ୍‌ତିଁୟ୍‌, ଞେନ୍‌ ପସିୟ୍‌ ତଡ୍‌ ? ଦମ୍ମେସକବାୟ୍‌ ଏଲିଆଜରନ୍‌ ଅସିଙ୍‌ଞେନ୍‌ ଆନର୍ଜେ ଜୋମ୍‌ତେ । 3 ଅବ୍ରାମନ୍‌ ବର୍ରନେ, ଆମନ୍‌ ଞେନ୍‌ଆଡଙ୍‌ ଅଅନନ୍‌ ଅଃତିୟ୍‌ଲିଁୟ୍‌, ତି ଆସନ୍‌ ଅସିଂଙ୍‌ଲୋଙ୍‌ଞେନ୍‌ ଆକ୍ରୋଡେଞ୍ଜି ଆ କମ୍ବାରିମର୍‌ ଅନର୍ଜେଞେନ୍‌ ଜୋମ୍‌ତେ ।"

4 ତି ଆଡିଡ୍‌ ଆ ଆରି ବତର ପ୍ରବୁନ୍‌ ଆନିନ୍‌ଆଡଙ୍‌ ଆବର୍ରେନ୍‌ ଆନିନ୍‌ ଅମ୍‌ଡଙେନ୍‌, "ତି ଆକମ୍ବାରିମର୍‌ ଏଲିଆଜରନ୍‌ ଅନର୍ଜେନମ୍‌ ଅଃଜ୍ଜୋମେ; ଡାଙ୍ଗାଡ଼ାଅନ୍‌ନମ୍‌ ଅନର୍ଜେନମ୍‌ ଜୋମ୍‌ତେ ।" 5 ପ୍ରବୁ ଆନିନ୍‌ଆଡଙ୍‌ ଡାଣ୍ଡନ୍‌ ଓରୋଙ୍‌ଲେ ବରେନ୍‌, "ଆମନ୍‌ ରୁଆଙନ୍‌ ଆଙାଙ୍‌ଲେ ତୁତୁଜଞ୍ଜି ଡିଡିଲେ ରପ୍ତିତେ, ଏତ୍ତେଲ୍‌ଡେନ୍‌ ଡିଡିଡାଲେ ବର୍ନା । ଆନିନ୍‌ ଆ ଆରି ବର୍ରନେ,କେନ୍‌ ଅନ୍ତମ୍‌ କେଜ୍ଜାନମ୍‌ ଡେତେ ।" 6 ଅବ୍ରାମନ୍‌ ପ୍ରବୁନ୍‌ଆଡଙ୍‌ ଆଡର୍ରନ୍‌ ସିଲଡ୍‌, ପ୍ରବୁ ସର୍ଡାଏନ୍‌କି ଆନିନ୍‌ଆଡଙ୍‌ ଡରମ୍ମମର୍‌ ଗାମ୍‌ଲେ ଡନିନ୍ ଡେଏନ୍‌ ।

7 ପ୍ରବୁନ୍‌ ଆନିନ୍‌ଆଡଙ୍‌ ବରେନ୍‌, "ଆନା ଆମନ୍‌ଆଡଙ୍‌ କେନ୍‌ ଆଡେସା ଆତନିୟ୍‌ ସନ୍‌ ବାବିଲୋନିଆ ଡକୋନ୍‌ ଉର୍‌ ସିଲଡ୍‌ ଓରୋଙ୍‌ଲମ୍‌ ତି‌ ଆପ୍ରବୁ ଞେନ୍‌ ।"

8 ବନ୍‌ଡ ଅବ୍ରାମନ୍‌ ଗାମେନ୍‌, "ଏ ପ୍ରବୁ, ଞେନ୍‌ କେନ୍‌ ଆଡେସା ଆଡନେମର୍‌ ଡେତାୟ୍‌ ଗାମ୍‌ଲେ ଞେନ୍‌ ଏଙ୍ଗାଲେ ଜନାଇଁୟ୍‌ ?"

9 ପ୍ରବୁନ୍‌ ବର୍ରନେ, "ଆମନ୍‌ ୟାଗି ବର୍ସେଙ୍‌ ଆଡ୍ରେତେନ୍‌ ଅବୟ୍‌ ସଡ୍ଡାନ୍‌, ଅବୟ୍‌ କିମେଡନ୍‌, ଅବୟ୍‌ ମେଣ୍ଡାନ୍‌, ଆରି ଅବୟ୍‌ ପାରାନ୍‌ ଡ କୁକୁରନ୍‌ ଆଅନ୍‌ ଞେନ୍‌ ଆସନ୍‌ ପାଙାୟ୍‌ ।" 10 ଅବ୍ରାମନ୍‌ ଅଡ଼୍‌କୋନ୍‌ ଆଜନ୍ତୁଜି ଇସ୍ୱରନ୍‌ ଆମଙ୍‌ବା ପାଙ୍‌ଲେ ଅଡ଼୍‌କୋନ୍‌ଆତେ ବାଗୁ ଡେୟ୍‌ଡେୟ୍‌ ଏମ୍ମେଲେ ଅବ୍‌ତୟ୍‌ତୟ୍‌ଲେ ବାଗ୍‌ଡାଡ଼ି ଏମ୍ମେଲେ ଡକ୍କୋଏନ୍‌ ବନ୍‌ଡ ଅନ୍ତିଡଞ୍ଜି ବାଗୁ ଡେୟ୍‌ଡେୟ୍‌ ଅଃନେମେଲୋ । 11 ଅନ୍ତିଡଞ୍ଜି ଆରବୁ ଜନ୍ତୁଞ୍ଜି ଆଜନୋମ୍‌ ଆସନ୍‌ ଏଙ୍‌ଲାଜି, ବନ୍‌ଡ ଅବ୍ରାମନ୍‌ ଅନ୍ତିଡଞ୍ଜିଆଡଙ୍‌ ଗଙ୍ଗଙେନ୍‌ । 12 ଆବ୍ରୁବ୍‌ୟୋଙେନ୍‌ ଆଡିଡ୍‌ ଅବ୍ରାମନ୍‌ ମାଡ୍ଡ ଆମ୍ରବ୍‌ମବ୍‌ଡାଏନ୍‌ ଲୁଡେନ୍‌ ଆରି ଆର୍‌ଲୋଙଡେନ୍‌ ବତଙେନ୍‌ । 13 ପ୍ରବୁନ୍‌ ଅବ୍ରାମନ୍‌ଆଡଙ୍‌ ବରେନ୍‌, "କେଜ୍ଜାନମ୍‌ ଉଞ୍ଜିସଅ ବର୍ସେଙ୍‌ ବଡେସା ଜିର୍ରେ ଇୟ୍‌ତେ ଡକୋନେଜି, ଆରି ଆନିଞ୍ଜି ପନବ୍‌ରଡନ୍‌ ଞାଙ୍‌ତଜି । 14 ବନ୍‌ଡ ଆନିଞ୍ଜି ଅଙ୍ଗା ଆଡେସା ଆମନ୍‌ରାଜି ଆମଙ୍‌ କମ୍ବାରିନ୍‌ ଡକୋଡାଲନ୍‌ କାବ୍ବାଡ଼ାତଞ୍ଜି, ଞେନ୍‌ ଆନିଞ୍ଜିଆଡଙ୍‌ ଡଣ୍ଡାୟ୍‌ତାଜି; ଆରି ଆନିଞ୍ଜି ତିଆଡେସା ସିଲଡ୍‌ ଆୟର୍ତନାଞଞ୍ଜି ଆଡିଡ୍‌ ଆନିଞ୍ଜି ଗୋଗୋୟ୍‌ ଆରନ୍ନା ପାଙ୍‌ଲେ ୟର୍ତନାଜି । 15 ଆମନ୍‌ ଗୋଗୋୟ୍‌ ବର୍ସେଙ୍‌ ଅମେଙ୍‌ଲେ ଡକୋଡାଲନ୍‌ ଆବନୁଡାଇଙ୍‌ ରବୁତମ୍‌ ଆରି ଆମନ୍‌ଆଡଙ୍‌ ତିଲ୍‌ତମ୍‌ଜି । 16 କେଜ୍ଜାନମ୍‌ଜି ଉଞ୍ଜି କନୋକ୍କୋଡ୍‌ ଆତିକି କେଜ୍ଜାନମ୍‌ଜି କେନ୍‌ ଆଡେସା ୟର୍ତନାଜି; ତିଆଡିଡ୍‌ ଇମୋରିଅନ୍‌ ଆମନ୍‌ରାଜି ଇର୍ସେ କାବ୍ବାଡ଼ାନ୍‌ ଲୁମ୍‌ଲେ ପେଲ୍ଲାତଞ୍ଜି ତିଆସନ୍‌ ଆନିଞ୍ଜିଆଡଙ୍‌ ଡଣ୍ଡାୟ୍‌ତାଜି ।" 17 ଆରି ବୁବ୍‌ୟୋଙ୍‌ଡାଲେ ଲୋଙଡ୍‌ଲେ ଆପ୍ରାଙେନ୍‌ ସିଲଡ୍‌, ଓମୋଡନ୍‌ ଆଡ୍ରୁଙ୍‌ତନାୟଁନ୍‌ ଅବୟ୍‌ କୋଡ଼ାତୁଡନ୍‌ ଆରି ଆଡୁଡୁନ୍‌ ଆବଡ଼ାତୋଡ୍‌ ବାଗୁଡେୟ୍‌ଡେୟ୍‌ ଏମ୍ମେଲେ ଆଡକ୍କୋନ୍‌ ଆଜନ୍ତୁଜି ଆମଡ୍ଡିଗଡ୍‌ ଜିରେନ୍‌ । 18 ତି ଆଡିଡ୍‌ ପ୍ରବୁନ୍‌ ଅବ୍ରାମନ୍‌ ସରିନ୍‌ ବନାଁୟ୍‌ବରନ୍‌ ଗବ୍‌ରିଲେ ବର୍ରନେ, "ଞେନ୍‌ ମିସର୍‌ ଆଲସିଲଡ୍‌ ପରାତ୍‌ ଆଲଜାୟ୍‌ କେନ୍‌ ଆଡେସା କେଜ୍ଜାନମ୍‌ଜିଆଡଙ୍‌ ତିୟ୍‌ତାଜି, 19 କେନିଅନ୍‌, କନଜିଅନ୍‌, ଡ କଦ୍‌ମୋନିଅନ୍‌, 20 ଇତିଅନ୍‌, ପରିସିଅନ୍‌, ରପାୟିଅନ୍‌, 21 ଇମୋରିଅନ୍‌, କିଣାନିଅନ୍‌, ଗିର୍ଗାସିଅନ୍‌ ଡ ଜିବୁସିଅଞ୍ଜି ଆଡେସା ଆଲବ ଅଡ଼୍‌କୋନ୍‌ ତିୟ୍‌ଲମ୍‌ ।"