1 ଆରି ଜାକୁବନ୍‌ ଆପ୍ପେୟ୍‌ଲେନ୍‌ ଆନର୍ଜେ ଅଡ଼୍‌କୋନ୍‌ ରାଉଲନେ ଆରି ଆପ୍ପେୟ୍‌ଲେନ୍‌ ଆନର୍ଜେ ସିଲଡ୍‌ କେନ୍‌ ଅଡ଼୍‌କୋନ୍‌ ଆନିନ୍‌ ଅର୍ଜେଏନ୍‌, ଲାବନନ୍‌ ଆ ଡାଙ୍ଗାଡ଼ାଅଞ୍ଜି ଆବର୍ନେ ଜାକୁବନ୍‌ ଅମ୍‌ଡଙେନ୍‌ । 2 ଆରି ଲାବନନ୍‌ ଆମ୍ମୁଙ୍‌ ଅନ୍ତମ୍‌ ତଡ୍‌, କେନ୍‌ଆତେ ଜାକୁବନ୍‌ ଆମୁକାନ୍‌ ଗିୟ୍‌ଲେ ଜନାଏନ୍‌ । 3 ତି ସିଲଡ୍‌ ପ୍ରବୁ ଜାକୁବନ୍‌ଆଡଙ୍‌ ବରେନ୍‌, "ଆମନ୍‌ ଆପେୟ୍‌ନମ୍‌ ଆଡେସା ଆ କୁଲମ୍‌ଜି ଆମଙ୍‌ବା ୟର୍ନା, ଞେନ୍‌ ଆମନ୍‌ ସରିନ୍‌ ଏଡକୋତନାୟ୍‌ ।"

4 ତିଆସନ୍‌ ଅଙ୍ଗା ଆ ପଡ଼ିଆରେଙ୍‌ ଆନିନ୍‌ ଆ ମେଣ୍ଡାନ୍‌ ଜଗ୍ଗେଲେ ଡକୋଲନ୍‌ ତେତ୍ତେ ସିଲଡ୍‌ ଜାକୁବନ୍‌ ରାଏଲନ୍‌ ଡ ଲେୟାନ୍‌ଆଡଙ୍‌ ଓଡ୍ଡେଏଞ୍ଜି । 5 ଆନିନ୍‌ ଆନିଞ୍ଜିଆଡଙ୍‌ ବରେଞ୍ଜି, ଞେନ୍‌ ଗିୟ୍‌ତାୟ୍‌ ଆପ୍ପେୟ୍‌ବେନ୍‌ ଆନିଃୟମ୍‌ ଆମ୍ମୁଙ୍‌ ଅନ୍ତମ୍‌ ତଡ୍‌; ବନ୍‌ଡ ଆପେୟ୍‌ଞେନ୍‌ ଆ ଇସ୍ୱର ଞେନ୍‌ ସରିନ୍‌ ଡକୋ । 6 ବୋର୍ସାଞେନ୍‌ ବାତ୍ତେ ଏଙ୍ଗାଲେ ଆପ୍ପେୟ୍‌ବେନ୍‌ ଆସନ୍‌ କାବ୍ବାଡ଼ାଲନାୟ୍‌ ଆମ୍ବେଞ୍ଜି ଜନା । 7 ଡେଲୋଜନଙ୍‌ଡେନ୍‌ ଆପ୍ପେୟ୍‌ବେନ୍‌ ଞେନ୍‌ଆଡଙ୍‌ ପାତ୍ୟାଲେ ଦସ୍‌ତର ବଡିଞେନ୍‌ ତାନେନ୍‌; ବନ୍‌ଡ ଇସ୍ୱରନ୍‌ ଞେନ୍‌ଆଡଙ୍‌ ଅନବ୍‌ସେଡନ୍‌ ଆସନ୍‌ ଆନିନ୍‌ଆଡଙ୍‌ ଅଃବାଁୟ୍‌ଲୋ । 8 ଇନିଆସନ୍‌ଗାମେଣ୍ଡେନ୍‌ ଆନିନ୍‌ ବର୍ରନେ, ଆରିଗେରିଗେନ୍‌ ଆ ଜନ୍ତୁ ବଡିନମ୍‌ ଅନ୍ତମ୍‌ ଡେଏତୋ, ତିଆଡିଡ୍‌ ଅଡ଼୍‌କୋନ୍‌ ଆଜନ୍ତୁ ଆରିଗେରିଗେନ୍‌ ଆତେ କୋଡେଞ୍ଜି, ଆରି ଆଗରିନ୍‌ ଆ ଜନ୍ତୁଜି ବଡିନମ୍‌ ଅନ୍ତମ୍‌ ଡେଏତୋ, ଆଙ୍ଗାଆଡିଡ୍‌ ଆନିନ୍‌ କେନ୍‌ ଆବର୍ନେ ବର୍ରନେ, ତିଆଡିଡ୍‌ ଅଡ଼୍‌କୋନ୍‌ ଆଜନ୍ତୁ ଆଗରିନ୍‌ ଆଅନ୍‌ମେଡ୍‌ କୋଡେଞ୍ଜି । 9 କେନ୍‌ଅନ୍ତମ୍‌ ଇସ୍ୱରନ୍‌ ଆପ୍ପେୟ୍‌ବେନ୍‌ ଆଜନ୍ତୁ ପାଙ୍‌ଲେ ଞେନ୍‌ଆଡଙ୍‌ ତିୟ୍‌ଲିଁୟ୍‌ ।

10 ଜନ୍ତୁଜି ଆତିଲ୍‌କୋଡିଙନ୍‌, ଗନୁମ୍‌ତେବାଞେନ୍‌ ଞେନ୍‌ ଗିୟ୍‌ଲାୟ୍‌, ଆରି ଓବ୍ବାମେଡନ୍‌ ଆସ୍ରଙ୍ଗଏଞ୍ଜି ଅଡ଼୍‌କୋନ୍‌ ଆ ଅନ୍‌ମେଡନ୍‌ ଆଗରିଗରି, ଆରିଗେରିଗେ ଆରି ଆତୁୟ୍‌ରାତୁୟ୍‌ରା । 11 ତିଆଡିଡ୍‌ ଇସ୍ୱରନ୍‌ ଆ ପାଙ୍‌ଲଙ୍‌ବର୍‌ମର୍‌ ଗନୁମ୍‌ତେବାନ୍‌ ଞେନ୍‌ଆଡଙ୍‌ ଜାକୁବ ଗାମ୍‌ଲେ ଓଡ୍ଡେଲିଁୟ୍‌, ଞେନ୍‌ ବର୍ରନାୟ୍‌, ଗିଜା, ଞେନ୍‌ କେନ୍‌ତେନ୍ନେ । 12 ସିଲତ୍ତେ ଆନିନ୍‌ ବର୍ରନେ "ନମିଞେନ୍‌ ଆଙାଙା, ଆସ୍ରଙ୍ଗଏଞ୍ଜି ଅଡ଼୍‌କୋନ୍‌ ଆ ଗୋସ୍ସାମେନନ୍‌ ଆଗରି, ଆରିଗେରିଗେ ଡ ଆତୁୟ୍‌ରାଜି; ଇନିଆସନ୍‌ଗାମେଣ୍ଡେନ୍‌ ଲାବନନ୍‌ ଆମନ୍‌ଆଡଙ୍‌ ଏଙ୍ଗାଲେ ଞନ୍‌ରମ୍‌ଲଞ୍ଜି*, ତିଆତେ ଞେନ୍‌ ଏଗିୟ୍‌ଲାୟ୍‌ । 13 ଅଙ୍ଗାଲୋଙ୍‌ ଆମନ୍‌ ଅବୟ୍‌ ସୋଣ୍ତାଙନ୍‌ ଅବିସେକଏନ୍‌ ଡ ଅମଙ୍‌ଞେନ୍‌ ବାସାଲନ୍‌, ତି ଆବେତେଲ୍‌ ଆ ଇସ୍ୱର ଞେନ୍‌; ନମିଞେନ୍‌ କେନ୍‌ ଆଡେସା ଅମ୍‌ରେଙ୍‌ଲେ କୁଲମ୍‌ନମ୍‌ଞ୍ଜି ଆଡେସା ୟର୍ରନା !"

14 ସିଲତ୍ତେ ରାଏଲନ୍‌ ଡ ଲେୟାନ୍‌ ଜାକୁବନ୍‌ଆଡଙ୍‌ ଜାଲଙ୍‌ଲେ ବରେଞ୍ଜି, "ଆପ୍ପେୟ୍‌ଲେନ୍‌ ଆସିଙ୍‌ ବନ୍ତାଲେନ୍‌ ଡ ଡନେଲେନ୍‌ ଆରି ଇନି ଡକୋ ।" 15 ଇନ୍‌ଲେଞ୍ଜି ପଙ୍‌ ଆପେୟ୍‌ଲେନ୍‌ ଆମଙ୍‌ ବଡେସାବୟଜି ଅନ୍ତମ୍‌ ତଡ୍‌ ପଙ୍‌ ? ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଇନ୍‌ଲେଞ୍ଜିଆଡଙ୍‌ ତମ୍‌ଲେ ତଙ୍କାଲେନ୍‌ ଅଡ଼୍‌କୋନ୍‌ ଜୋମ୍‌ତେ । 16 ତିଆସନ୍‌ ଇସ୍ୱରନ୍‌ ଆପ୍ପେୟ୍‌ଲେନ୍‌ ଆମଙ୍‌ସିଲଡ୍‌ ଅଙ୍ଗା ଅଡ଼୍‌କୋନ୍‌ ଆନର୍ଜେ ପାଙେନ୍‌, ତି ଅଡ଼୍‌କୋନ୍‌ ଇନ୍‌ଲେଞ୍ଜି ଆତେ ଆରି ଅଅନ୍‌ଲେଞ୍ଜି ଆତେ । ତିଆସନ୍‌ ଇସ୍ୱରନ୍‌ ଆମନ୍‌ଆଡଙ୍‌ ଇନିଗାମ୍‌ଲମ୍‌ ଆମନ୍‌ ତିଆତେ ଲୁମା ।

17 ସିଲତ୍ତେ ଜାକୁବନ୍‌ ଡୋଲନ୍‌ ଆ ଡାଙ୍ଗାଡ଼ାଅନଞ୍ଜି ଡ ଆଡୁକ୍ରିଞ୍ଜିଆଡଙ୍‌ ଓଟଲୋଙନ୍‌ ଅବ୍‌ତଙ୍କୁମେନ୍‌ ।

18 ଆରି ଆନିନ୍‌ଡମ୍‌ ଆରର୍ଜେଏନ୍‌ ଆଜନ୍ତୁ ଅଡ଼୍‌କୋନ୍‌, ଆଗ୍ରାମ୍‌ଗାମ୍‌, ପଦନ୍‌ ଅରାମଲୋଙ୍‌ ଅଙ୍ଗା ଆଜନ୍ତୁ ଡ ଅଙ୍ଗା ଆନର୍ଜେ ଞାଙେନ୍‌, ତିଆତେ ପାଙ୍‌ଲେ କିଣାନ୍‌ ଡେସାନ୍‌ ଆପ୍ପେୟନ୍‌ ଇସାକନ୍‌ ଆମଙ୍‌ ଜିରେଞ୍ଜି । 19 ତିଆଡିଡ୍‌ ଲାବନନ୍‌ ମେଣ୍ତାନ୍‌ ଆଉପ୍ପୁର୍‌ ଆଗନଡ୍‌ ଆସନ୍‌ ଇୟେନ୍‌, ଆରି ରାଏଲନ୍‌ ଆପ୍ପେୟନ୍‌ ଆସନୁମ୍‌ଜି ରାଉଲନେ । 20 ଆରି ଜାକୁବନ୍‌ ଆଜନିରଞ୍ଜି ଇନ୍ନିଙ୍‌ ଏର୍‌ନବ୍‌ଜନାନ୍‌ ଅରାମିଅନ୍‌ ଲାବନନ୍‌ଆଡଙ୍‌ ପାତ୍ୟାଏନ୍‌ । 21 କେନ୍‌ ଅନ୍ତମ୍‌ ଆନିନ୍‌ ଆନର୍ଜେନ୍‌ ଅଡ଼୍‌କୋନ୍‌ ପାଙ୍‌ଲେ ଜିରେନ୍‌, ଆରି ଡୋଲନ୍‌ ପରାତ୍‌ ଆଲ ପଡ୍‌ଲେ ଗିଲିଅଦ୍‌ ଆବରୁବା ସେଙ୍‌ମଡ୍‌ଲେ ଜିରେନ୍‌ ।

22 ତି ସିଲଡ୍‌ଲ୍ଲନ୍‌ ଲାବନନ୍‌ ଏର୍ତାଲୋଙ୍‌ ଜାକୁବନ୍‌ ଆଜନିର୍‌ ଅବ୍‌ଜନାଏଞ୍ଜି । 23 ସିଲତ୍ତେ ଆନିନ୍‌ ଆକୁଲମଞ୍ଜି ସରିନ୍‌ ଜାକୁବନ୍‌ ଆ କୁନ୍‌ଡୋଙ୍‌ବାନ୍‌ ସଣ୍ତୋଙ୍‌ଲେ ସାତଡିନା ଆତଙର୍‌ ଇର୍ରେ ଗିଲିଅଦ ଆବରୁବା ଆନିନ୍‌ଆଡଙ୍‌ ରବାଙେଞ୍ଜି । 24 ବନ୍‌ଡ ଇସ୍ୱରନ୍‌ ତଗଲନ୍‌ ଗନୁମ୍‌ତେବାନ୍‌ ଅରାମିଅ ଲାବନନ୍‌ ଆମଙ୍‌ବା ଅଡ଼ୋଡାଲେ ଆନିନ୍‌ଆଡଙ୍‌ ବରେନ୍‌, "ଗିୟ୍‌ଡମ୍‌ନା ଜାକୁବନ୍‌ଆଡଙ୍‌ ଇନ୍ନିଙ୍‌ ବବ୍‌ତଙ୍‌ଡଙ୍‌ ।" 25 ତି ସିଲଡ୍‌ଲ୍ଲନ୍‌ ଲାବନନ୍‌ ଜାକୁବନ୍‌ଆଡଙ୍‌ ଆର୍ରବାଙେନ୍‌ ଆଡିଡ୍‌ ଜାକୁବନ୍‌ ଆ ତମ୍ୱୁସିଂଙ୍‌ ତୋଣ୍ତୋ ବରୁନ୍‌ ଡକୋଏନ୍‌, ଆରି ଲାବନନ୍‌ ନିୟ୍‌ ଆକୁଲମଞ୍ଜି ସରିନ୍‌ ଗିଲିଅଦନ୍‌ ଆ ବରୁଲୋଙ୍‌ ତମ୍ୱୁସିଙନ୍‌ ତୁବେଞ୍ଜି ।

26 ଆରି ଲାବନନ୍‌ ଜାକୁବନ୍‌ଆଡଙ୍‌ ବରେନ୍‌, "ଆମନ୍‌ ଇନିବା ଞେନ୍‌ଆଡଙ୍‌ ପାତ୍ୟାଲିଁୟ୍‌ ଆରି ଡାଙ୍ଗଡ଼ିଅନ୍‌ଞେଞ୍ଜିଆଡଙ୍‌ କଡ଼ିବନ୍‌ ବାତ୍ତେ ଆଜ୍ରୁଜେତଞ୍ଜି ଆ ମନ୍‌ରାଜି ଅନ୍ତମ୍‌ ଓରୋଙ୍‌ଲାୟ୍‌ । 27 ଆମନ୍‌ ଇନିବା ଞେନ୍‌ଆଡଙ୍‌ ପାତ୍ୟାଲିଁୟ୍‌ ଆରି ଏର୍ବନରନ୍‌ ସଲନ୍‌ ଏଜିର୍ରାୟ୍‌ ? ଆମନ୍‌ ଞେନ୍‌ଆଡଙ୍‌ ବର୍ରିୟ୍‌ନଙ୍‌, ଞେନ୍‌ ଜନୋଞ୍ଜୋନ୍‌ ବୁଜ୍ଜିନ୍‌ ତିୟ୍‌ଲେ ସର୍ଡାନ୍‌ ଡ କନନନ୍‌ ଆରି ଡେବ୍‌ଡିଙନ୍‌ ଡ ରାୟ୍‌ଡିଙ୍ଗନ୍‌ ବାତ୍ତେ ଜୋଞ୍ଜୋନ୍‌ତବେନ୍‌ବନ୍‌ । 28 ଆମନ୍‌ ଡାଙ୍ଗାଡ଼ାଅନ୍‌ ଡ ଡାଙ୍ଗଡ଼ିଅନ୍‌ଞେଞ୍ଜି ଆଡଙ୍‌ ଜନୋର୍ଜୋରନ୍‌ ଜାୟ୍‌ ଞେନ୍‌ଆଡଙ୍‌ ରୟଙନ୍‌ ଅଃତିୟ୍‌ଲିଁୟ୍‌ । କେନ୍‌ ଅବୟ୍‌ ଆଉଲୁମରନ୍‌ ଆକାବାଡ଼ା । 29 ଞେନ୍‌ ଆମନ୍‌ଆଡଙ୍‌ ଗାଗ୍ରେଲମ୍‌ ମା, ବନ୍‌ଡ ରୁବନ୍‌ ଆତଗଲ୍‌ ଆପ୍ପେୟ୍‌ନମ୍‌ ଆ ଇସ୍ୱର ଞେନ୍‌ଆଡଙ୍‌ ବର୍ରିୟ୍‌ ଜାକୁବନ୍‌ଆଡଙ୍‌ ଇନ୍ନିଙ୍‌ ବବ୍‌ତଙ୍‌ଡଙେ । 30 ଞେନ୍‌ ଜନା ଡ ଆମନ୍‌ ଗୋଗୋୟ୍‌ ବର୍ସେଙ୍‌ ଡକୋଲନ୍‌ ତିଆସନ୍‌ ଅସିଙନ୍‌ ୟର୍ରନ୍‌ ରପ୍ତିତେ, ବନ୍‌ଡ ଅସିଂଞେନ୍‌ ଡକୋନ୍‌ ଆସନୁମ୍‌ଜି ଇନିବା ଏରାଉଲନେ ?"

31 ସିଲତ୍ତେ ଜାକୁବନ୍‌ ଲାବନନ୍‌ଆଡଙ୍‌ ଜାଲଙ୍‌ଲେ ବରେନ୍‌, "ଞେନ୍‌ ବତଙ୍‌ଲିୟ୍‌; ଇନିଆସନ୍‌ଗାମେଣ୍ଡେନ୍‌ ଞେନ୍‌ ଇୟମ୍‌ଲାୟ୍‌ ଡ ଆମନ୍‌ ମଙ୍‌ଞେନ୍‌ ସିଲଡ୍‌ ଡାଙ୍ଗଡ଼ିଅନ୍‌ନମ୍‌ଜିଆଡଙ୍‌ ବଡଗାଁୟ୍‌ ରୁୟ୍‌ଲେ ପାଙ୍‌ତେ । 32 ବନ୍‌ଡ ଆମନ୍‌ ଆନା ଆମଙ୍‌ସିଲଡ୍‌ ସନୁମ୍‌ନମ୍‌ଜି ଞାଙ୍‌ତେ, ଆନିନ୍‌ ଅଃନମେଙେ । ଅମଙ୍‌ଞେନ୍‌ ଆମନ୍‌ ଆତେ ଇନି ଡକୋ ତିଆତେ କୁଲମ୍‌ଞେଞ୍ଜି ଆତେମଡ୍‌, ଅଃମଲେ ପାଙା" ଇନିଆସନ୍‌ଗାମେଣ୍ଡେନ୍‌ ରାଏଲନ୍‌ ଆର୍ରାଉଲନ୍‌ ଆବର୍ନେ ଜାକୁବନ୍‌ ଜନା ତଡ୍‌ ।

33 ଲାବନନ୍‌ ଆପର୍ତମ୍ମୁନ୍‌ ଜାକୁବନ୍‌ ଆତମ୍ୱୁସିଙ୍‌ ଇୟ୍‌ଲେ ସାଜେ; ଆରି ଲେୟାନ୍‌ ଆତମ୍ୱୁସିଙ୍‌ ଡ ବାଗୁ ଆକମ୍ୱାରିବଜନ୍‌ ଆତମ୍ୱୁସିଙ୍‌ ଇୟ୍‌ଲେ ସାଜେ, ବନ୍‌ଡ ଆସନୁମଞ୍ଜି ଅଃଞାଙ୍‌ଲୋ । ତିଆସନ୍‌ ଆନିନ୍‌ ରାଏଲନ୍‌ ଆତମ୍ୱୁସିଙ୍‌ ଇୟ୍‌ଲେ ସାଜେ । 34 ବନ୍‌ଡ ରାଏଲନ୍‌ ତି ଆସନୁମ୍‌ଜି ପାଙ୍‌ଲେ ଓଟନ୍‌ ଆତ୍ରଙ୍କୁମ୍‌ ଆବନେଲ୍‌କାବନ୍‌ ଆ ଅମ୍ମ ଡକ୍କୋଡାଲେ ତୋଣ୍ଡୋନ୍‌ ତଙ୍କୁମ୍‌ଲେ ଡକୋଲନ୍‌ । ଲାବନନ୍‌ ଆତମ୍ୱୁସିଂଙନ୍‌ ସମ୍ପରାନ୍‌ ଆସ୍ରାଜେନ୍‌ ନିୟ୍‌ ଅଃଞାଙ୍‌ଲୋ । 35 ତିଆଡିଡ୍‌ ରାଏଲନ୍‌ ଆପ୍ପେୟନ୍‌ଆଡଙ୍‌ ବରେନ୍‌, "ତେମଡ୍‌ନମ୍‌ ଞେନ୍‌ ଡୁଲନ୍‌ ଅଃରପ୍ତିଲାୟ୍‌ ଗାମ୍‌ଲେ ପ୍ରବୁଞେନ୍‌ ବରାବ୍‌ଡଙେ ତଡ୍‌, ଇନିଆସନ୍‌ଗାମେଣ୍ଡେନ୍‌ ଞେନ୍‌ ନମି ଡଅଙ୍‌ଞେନ୍‌ ମନଙ୍‌ ତଡ୍‌ ।" ତିଆସନ୍‌ ଲାବନନ୍‌ ସାଜେନ୍‌ ବନ୍‌ଡ ଆସନୁମଞ୍ଜି ଅଃଞାଙ୍‌ଲୋ ।

36 ଜାକୁବନ୍‌ ମାଡ୍ଡ ବରାବେନ୍‌ କି ଲାବନନ୍‌ଆଡଙ୍‌ କଞେନ୍‌; ଆରି ଜାକୁବନ୍‌ ଲାବନନ୍‌ଆଡଙ୍‌ ଜାଲଙ୍‌ଲେ ବରେନ୍‌, "ଞେନ୍‌ ଇନି ଆଡୋସାଲୁମ୍‌ଲାୟ୍‌ ଡ ଇନି ଆଇର୍ସେ ଲୁମ୍‌ଲାୟ୍‌ ଡ, ଆମନ୍‌ ବାବନ୍‌ରାବ୍‌ ଞେନ୍‌ଆଡଙ୍‌ ସନ୍‌ଡୋଙ୍‌ଲେ ଗଙ୍‌ଲେ ପାଙ୍‌ଲିଁୟ୍‌ ? 37 ନମି ଆମନ୍‌ ଅଡ଼୍‌କୋନ୍‌ ଜିନିସଞେଞ୍ଜି ସାୟ୍‌ସାଜାଜେନ୍‌ ଆରି ଅସିଂଙ୍‌ନମ୍‌ ଆ ଜିନିସଜି ଇନ୍ନିଙ୍‌ ଞାଙେନ୍‌ ପଙ୍‌ ? ତିଆତେ କୁଲମ୍‌ଞେନ୍‌ ଡ କୁଲମ୍‌ନମ୍‌ଞ୍ଜି ଆ ମୁକ୍କାବା ଡକ୍କୋଆ, ଆରି କେନ୍‌ଆନିଞ୍ଜି ବାଗୁନ୍‌ଲେନ୍‌ଆଡଙ୍‌ ଅଃପନ୍‌ସୁଆତି ଲଙ୍‌ନେତଜି । 38 ବକୁଡ଼ି ବର୍ସେଙ୍‌ ଡେନ୍‌ ଆମନ୍‌ ସରିନ୍‌ ଞେନ୍‌ ଡକୋଲନାୟ୍‌; ମେଣ୍ତାନମ୍‌ ଡ କିମେଡ୍‌ନମ୍‌ଜି ଅଃଜଲୟ୍‌କୋଡ୍‌ଲଜି, ଆରି ଞେନ୍‌ ଗୋସ୍ସାମେନ୍‌ନମ୍‌ଜି ଞେନ୍‌ ଅଃଜୋମ୍‌ଲାୟ୍‌ । 39 ବନ୍‌ଡ ଅଙ୍ଗାଆଡିଡ୍‌ ଜାଡ଼ିଆ ଜନ୍ତୁଞ୍ଜି ମେଣ୍ଡାବେଞ୍ଜି ରବ୍ବୁତଜି, ଏଙ୍ଗାଲ୍‌ ଜାକିଁୟ୍‌ ଡେଏତୋ ଗାମ୍‌ଲେ ଞେନ୍‌ ଅଃଗାମ୍‌ଲାୟ୍‌ । ବନ୍‌ଡ ତଗଲ୍‌ ଡେଏତୋ ତମ୍ବା ଡେଏତୋ ମେଣ୍ଡାଞେନ୍‌ ରାଉଲନ୍‌ ଆପ୍ରାଙେଞ୍ଜି ଆମେଣ୍ଡା ଆପାଲ୍‌ତେଙ୍‌ ଞେନ୍‌ ମେଣ୍ଡାଞେନ୍‌ ଅବ୍‌ତାଣ୍ଡେଲାୟ୍‌ । 40 ତମ୍ବାନ୍‌ ଡାଗାନ୍‌ ଆରି ତଗଲନ୍‌ ରଙାନ୍‌ ସଏଲାୟ୍‌ । ଏନ୍ନେଲେ ଞେନ୍‌ ଡକୋଲିଁୟ୍‌ । 41 ଞେନ୍‌ ବକୁଡ଼ି ବର୍ସେଙ୍‌ ଜାୟ୍‌ ଅସିଂଙ୍‌ନମ୍‌ ଡକୋଲନାୟ୍‌; ବାଗୁ ଡାଙ୍ଗଡ଼ିଅନମ୍‌ ଆସନ୍‌ ସଉଦ ବର୍ସେଙ୍‌ ଆରି ଜନ୍ତୁଜିଆଡଙ୍‌ ଆସନ୍‌ ତୁଡ୍‌ରୁ ବର୍ସେଙ୍‌ କମ୍ୱାରି କାବ୍ବାଡ଼ାନ୍‌ ଲୁମ୍‌ଲାୟ୍‌; ତି ଆଡିନା ଆମନ୍‌ ଦସତର ବଡିଞେନ୍‌ ତାନେନ୍‌ । 42 ଆପ୍ପେୟ୍‌ଞେନ୍‌ ଆ ଇସ୍ୱର, ଅବ୍ରାଆମନ୍‌ ଆ ଇସ୍ୱର ଡ ଇସାକନ୍‌ ଆ ଇସ୍ୱର, ଞେନ୍‌ ସରିନ୍‌ ଅଃଡକୋଲନ୍‌ନଙ୍‌, ଆମ୍ବେଞ୍ଜି ଞେନ୍‌ଆଡଙ୍‌ ଆରିକାସିନ୍‌ ଏଆପ୍ପାୟ୍‌ତିଁୟ୍‌ବନ୍‌ । ବନ୍‌ଡ ଆମ୍ବେନ୍‌ ଆସନ୍‌ ଞେନ୍‌ କାବ୍ବାଡ଼ାଡାଲନ୍‌ ଞେନ୍‌ ଅଙ୍ଗା ଦୁକ ଞାଙ୍‌ଲାୟ୍‌ ତିଆତେ ଇସ୍ୱରନ୍‌ ଗିଜେନ୍‌, ତିଆସନ୍‌ ରୁବନ୍‌ଆତଗଲ୍‌ ଆମ୍ବେନ୍‌ଆଡଙ୍‌ ପନ୍‌ସୁଆତିଲବେନ୍‌ ।"

43 ସିଲତ୍ତେ ଲାବନନ୍‌ ଜାକୁବନ୍‌ଆଡଙ୍‌ ଜାଲଙ୍‌ଲେ ବରେନ୍‌, "କେନ୍‌ ଆଡାଙ୍ଗଡ଼ିସିୟ୍‌ଜି ଡାଙ୍ଗଡ଼ିଅଞେଞ୍ଜି ଡ କେନ୍‌ ଆପସିୟ୍‌ଜି ପସିୟ୍‌ଞେଞ୍ଜି ଆରି କେନ୍‌ ଆ ଗୋସ୍ସାମେନନ୍‌ ଗୋସ୍ସାମେନ୍‌ଞେନ୍‌, ଆରି, ଇନିଜି ଗିୟ୍‌ତେ, ତି ଅଡ଼୍‌କୋନ୍‌ ଞେନ୍‌ ଆତେ; କେନ୍‌ ଆସନ୍‌ କେନ୍‌ ଡାଙ୍ଗଡ଼ିଅନ୍‌ଞେଞ୍ଜିଆଡଙ୍‌ ଡ ଆନିଞ୍ଜି ଆକ୍ରୋଡେଞ୍ଜି ଆ ଆନିଞ୍ଜିଆଡଙ୍‌ ଞେନ୍‌ ଇନି ଏଙ୍ଗାଆୟ୍‌ ? 44 ଜିରାୟ୍‌, ଞେନ୍‌ ବାଗୁଲେନ୍‌ ଅନଗଡନ୍‌ ଗବ୍‌ରିନେତୋ, ତିଆତେ ଞେନ୍‌ ଆସନ୍‌ ସାକିନ୍‌ ଡେଏତୋ ।" 45 ତିଆଡିଡ୍‌ ଜାକୁବନ୍‌ ଅବୟ୍‌ ଅରେଙନ୍‌ ପାଙ୍‌ଲେ ସୋଣ୍ଡାଙନ୍‌ ଅନ୍ତମ୍‌ ସୁବେନ୍‌ । 46 ଆରି, ଜାକୁବନ୍‌ ଆ କୁଲମଞ୍ଜିଆଡଙ୍‌ ବରେନ୍‌, "ଆମ୍ୱେଞ୍ଜି ଅରେଙନ୍‌ ସାୟ୍‌ବା," ସିଲତ୍ତେ ଆନିଞ୍ଜି ଅରେଙନ୍‌ ପାଙ୍‌ଲେ କୁଡ଼ାୟେଞ୍ଜି, ଅଡ଼୍‌କୋଞ୍ଜି ତି ଆଡ୍ରକୋନେ ଆରେଙ୍‌ବା ଗାଗାଲଞ୍ଜି । 47 ତି ସିଲଡ୍‌ଲ୍ଲନ୍‌ ଲାବନନ୍‌ ଆଞୁମ୍‌ ଜିଗର-ସାଅଦୁତା* ଅବ୍‌ଞୁମେନ୍‌, ବନ୍‌ଡ ଜାକୁବନ୍‌ ଆଞୁମନ୍‌ ଗଲୟଦ୍‌ ଆକନୁଡ଼ାୟର୍‌ ସାକି ଅବ୍‌ଞୁମେନ୍‌ । 48 ତିଆଡିଡ୍‌ ଲାବନନ୍‌ ବରର୍ନେ, "କେନ୍‌ ଆ କନୁଡ଼ାୟର୍‌ ଲଙେ ଆମନ୍‌ ଡ ଞେନ୍‌ ଆସନ୍‌ ସାକିନ୍‌ ଡକୋଲନେ ।" ତିଆସନ୍‌ ଆଞୁମନ୍‌ ଗଲୟଦ୍‌ ଡ ମିସ୍ପା ଜନଗ୍ଗେ ଡରକୋନେ ଡକ୍କୋଏନ୍‌ । 49 ଇନିଆସନ୍‌ଗାମେଣ୍ଡେନ୍‌ ଆନିନ୍‌ ବର୍ରନେ, "ଇନ୍‌ଲେଞ୍ଜି ତର୍ଡମ୍‌ ଅଃନଲ୍‌ଗିୟ୍‌ଲବୁ ନିୟ୍‌ଡେନ୍‌, ପ୍ରବୁନ୍‌ ଞେନ୍‌ ଡ ଆମନ୍‌ ଆ ଜନଗ୍ଗେମର୍‌ ଡେତେ ।" 50 ଲାବନନ୍‌ ବର୍ରନେ, "ଆମନ୍‌ ଡାଙ୍ଗଡ଼ିଅନ୍‌ଞେଞ୍ଜିଆଡଙ୍‌ ଅବ୍‌ଡଣ୍ଡାୟେଣ୍ଡେନ୍‌ ଆରି ଆନ୍ନା ଆଇବୟ୍‌ ସରିନ୍‌ ବିବାଲନ୍‌ଡେନ୍‌, କେନ୍‌ ଆବର୍ନେ ଞେନ୍‌ ଅଜ୍ଜନାଇଁୟ୍‌ ବନ୍‌ଡ ଇସ୍ୱରନ୍‌ ଜନାତେ ଆରି ଆମନ୍‌ଆଡଙ୍‌ ଡଣ୍ଡାୟ୍‌ତମ୍‌ ।" 51 ଆରି ଲାବନନ୍‌ ଜାକୁବନ୍‌ଆଡଙ୍‌ ବରେନ୍‌, କେନ୍‌ ସଣ୍ତିଞେନ୍‌ ଗିଜା, ଆରି, ବାଗୁଲେନ୍‌ ଆମଡ୍ଡି ଞେନ୍‌ ଆସ୍ରୁବ୍‌ଲାଞନ୍‌ କେନ୍‌ ଆସୋଣ୍ତାଙ୍‌ ଗିଜା । 52 କେନ୍‌ ଆକନୁଡ଼ାୟ୍‌ଅରେଙନ୍‌ ପଡେନ୍‌ ସିଲଡ୍‌ଡେନ୍‌ ଞେନ୍‌ ଆମନ୍‌ଆଡଙ୍‌ ଇନ୍ନିଙ୍‌ ଅଃନେଙ୍ଗାଅମ୍‌ ଆରି ଆମନ୍‌ ନିୟ୍‌ ଆକନୁଡ଼ାୟ୍‌ଅରେଙନ୍‌ ପଡେନ୍‌ ସିଲଡ୍‌ଡେନ୍‌ ଞେନ୍‌ଆଡଙ୍‌ ଇନ୍ନିଙ୍‌ ଏଙ୍ଗାଡଙିଁୟ୍‌ । କେନ୍‌ ଆକନୁଡ଼ାୟ୍‌ଅରନ୍‌ ସାକିନ୍‌ ଡକୋ । 53 କେନ୍‌ ଆବର୍ନେଲୋଙ୍‌ ଅବ୍ରାଆମନ୍‌ ପସିଜଞ୍ଜିଆଡଙ୍‌ କୋର୍‌କୋର୍‌ତମ୍‌ଲେ ଆସିର୍ବାଦଏନ୍‌; କେନ୍‌ଅନ୍ତମ୍‌ ଲାବନନ୍‌ ଆଡ୍ରକୋନେବାନ୍‌ ୟରନେ । 54 ତି ସିଲଡ୍‌ଲ୍ଲନ୍‌ ଆନିନ୍‌ ତି ଆବରୁଲୋଙ୍‌ ଅନମଙନ୍‌ ସାଡ୍‌ଲେ ଗାଗାନେନ୍‌ ଆସନ୍‌ ଆକୁଲମ୍‌ଞ୍ଜିଆଡଙ୍‌ ଓଡ୍ଡେଏନ୍‌, ସିଲତ୍ତେ ଆନିଞ୍ଜି ଗାଗାଡାଲନ୍‌ ବରୁଲୋଙନ୍‌ ତମଗଲ୍‌ ଡକୋଲନେ । 55 ତି ସିଲଡ୍‌ଲ୍ଲନ୍‌ ଲାବନନ୍‌ ଡୋତାନ୍‌ ଡୋଲନ୍‌ ଆ ଡାଙ୍ଗଡ଼ିଅନଞ୍ଜିଆଡଙ୍‌ ଡ ଆପସିଜଞ୍ଜିଆଡଙ୍‌ ଜୋର୍‌ଜୋର୍‌ରେ ଆସିର୍ବାଏନ୍‌; କେନ୍‌ଅନ୍ତମ୍‌ ଲାବନନ୍‌ ଆଡ୍ରକୋନେବାନ୍‌ ୟର୍ରନେ ।