1 ସିଲତ୍ତେ ଲେୟାନ୍‌ ସିଲଡ୍‌ ଆକ୍ରୋଡେନ୍‌ ଦିଣାନ୍‌ ଆଞୁମ୍‌ ଜାକୁବନ୍‌ ଆଡାଙ୍ଗଡ଼ିଅନ୍‌ ତି ଆଡେସା ଆଡାଙ୍ଗଡ଼ିଜି ସରିନ୍‌ ଆନଲ୍‌ରବାଙ୍‌ ଆସନ୍‌ ଗନିଜନ୍‌ ଆସନ୍‌ ଜିରେନ୍ । 2 ତି ଆଡେସା ଆରାଜା ଅମୋରନ୍‌ ଡକୋଏନ୍‌, ଆ ଡାଙ୍ଗାଡ଼ାଅନନ୍‌ ସିକିମନ୍‌ ଦିଣାନ୍‌ଆଡଙ୍‌ ଗିଜେନ୍‌, ଆରି ଆନିନ୍‌ଆଡଙ୍‌ ୟମ୍‌ୟମ୍‌ବତିଡେନ୍‌ । 3 ଆରି ଜାକୁବନ୍‌ ଆ ଡାଙ୍ଗଡ଼ିଅନ୍‌ ବିଣାନ୍‌ ଆମଙ୍‌ ଆ ମନ୍ନଲୋଙନ୍‌ ଆରାଗାଡେନ୍‌ ଆସନ୍‌ ଆନିନ୍‌ ତି ଆଡାଙ୍ଗଡ଼ି ଡୁଙ୍‌ୟମ୍‌ଡାଲେ ଆନିନ୍‌ଆଡଙ୍‌ ଡନୁଙ୍‌ୟମ୍‌ବରନ ବରେନ୍‌ । 4 ତିସିଲଡ୍‌ ସିକିମନ୍‌ ଆପେୟନ୍‌ ଅମୋରାନ୍‌ଆଡଙ୍‌ ବରେନ୍‌, "ଆମନ୍‌ କେନ୍‌ ଆ ଡାଙ୍ଗଡ଼ି ସରିନ୍‌ ଞେନ୍‌ଆଡଙ୍‌ ଅବ୍‌ଞାଙ୍‌ବଜିଁନ୍‌ ।" 5 ତିସିଲଡ୍‌ ଜାକୁବନ୍‌ ଆ ଡାଙ୍ଗଡ଼ିଅନନ୍‌ ବିଣାନ୍‌ଆଡଙ୍‌ ସିକିମନ୍‌ ଆଞରମ୍‌ରମ୍‌ବତିଡେନ୍‌ ଆବର୍ନେ ଅମ୍‌ଡଙେନ୍‌; ତି ଆଡିଡ୍‌ ଆ ଡାଙ୍ଗାଡ଼ାଅନଞ୍ଜି ବସେଙ୍‌ଲୋଙନ୍‌ ତୁର୍ତାଙ୍‌ଲନ୍‌ ଆଡ୍ରକୋଲଞ୍ଜି ଆସନ୍‌ ଜାକୁବନ୍‌ ଆନିଞ୍ଜି ଅନ୍‌ରଙ୍‌ ଜିରାଞଞ୍ଜି ଜାୟ୍‌ କଡ଼ିଙ୍‌ଲେ ସେଡେନ୍‌ । 6 ଆବନେଡ଼ା ସିକିମନ୍‌ ଆପେୟ୍‌ ଅମୋରନ୍‌ ଜାକୁବନ୍‌ ସରିନ୍‌ କଡାଡ଼ିନେବାନ୍‌ ଇୟେନ୍‌ । 7 ଆରି ଜାକୁବନ୍‌ ଆ ଡାଙ୍ଗାଡ଼ାଅନଞ୍ଜି ତି ଆବର୍ନେ ଅମ୍‌ଡଙ୍‌ଲେ ବସେଙନ୍‌ ସିଲଡ୍‌ ଜିର୍ରାଜି; ଆରି, ସିକିମନ୍‌ ଜାକୁବନ୍‌ ଆଡାଙ୍ଗଡ଼ିଅନ୍‌ ସରିନ୍‌ ଲୁଡ୍‌ଲେ ଇସ୍ରାଏଲନ୍‌ ଆ ବିରୁଦଲୋଙ୍‌ ଅଙ୍ଗା ଆଲନୁମ୍‌ ଅଲ୍ଲୁମ୍‌ବୋ ତି ଆକାବ୍ବାଡ଼ା ଲୁମେନ୍‌, ତିଆସନ୍‌ ଆନିଞ୍ଜି ମାଡ ବରାବେଞ୍ଜି । 8 ତିଆଡିଡ୍‌ ଆମୋରନ୍‌ ଆନିଞ୍ଜି ସରିନ୍‌ କଡାଡ଼ିଲନ୍‌ ବରେନ୍‌, "ଡାଙ୍ଗଡ଼ିଅନ୍‌ବେନ୍‌ ଆଡଙ୍‌ ଡାଙ୍ଗଡ଼ାଅଞେନ୍‌ ସିକିମନ୍‌ ମନ୍ନାତେ; ଞେନ୍‌ କାକୁର୍ତିତନାୟ୍‌, ଡାଙ୍ଗଡ଼ାଅଞେନ୍‌ ସରିନ୍‌ ଆନିନ୍‌ଆଡଙ୍‌ ଅଃବିବାବା । 9 ଆରି, ଇନ୍‌ଲେଞ୍ଜି ସରିନ୍‌ ବିବାନେନ୍‌ ଆସନ୍‌ ସନିବ୍‌ଡେୟ୍‌ ବରନ୍‌ ଡକ୍କୋନେତୋ ଡ ଡାଙ୍ଗଡ଼ିଅନ୍‌ବେନ୍‌ ଇନ୍‌ଲେଞ୍ଜିଆଡଙ୍‌ ତିୟ୍‌ଲେନ୍‌ବା, ଡାଙ୍ଗଡ଼ିଅନ୍‌ଲେନ୍‌ ଆମ୍ୱେନ୍‌ ପାଙ୍‌ବା । 10 ତିଡେନ୍‌, ଆମ୍ୱେଞ୍ଜି ଇନ୍‌ଲେଞ୍ଜି ସରିନ୍‌ ଡକୋଲନ୍‌ ଏରପ୍ତିତେ; ଅଡ଼୍‌କୋ ଡେସାନ୍‌ ମୁକାବାବେନ୍‌ ଡକୋ, ତେତ୍ତେ ଡକୋନାବା ଆରି ବେବାରନାବା ଡ ଡନେବା ।" 11 ଆରି, ସିକିମନ୍‌ ଦିଣାନ୍‌ ଆପେୟ୍‌ ଡ ଆବୋଞାଙଞ୍ଜିଆଡଙ୍‌ ବରେନ୍‌, "ଡଅଙ୍‌ଞେନ୍‌ ଗନିୟ୍‌ଗିୟ୍‌ଲୋଙ୍‌ବେନ୍‌ ସନାୟୁମନ୍‌ ଡକୋଏତୋ, ସିଲତ୍ତେ ଇନି ଏବର୍ତନେ, ତିଆତେ ଞେନ୍‌ ତିୟ୍‌ତବେନ୍‌ । 12 ଆମନ୍‌ ଇନିଜି ବେଡ୍‌ତିଁୟ୍‌, ଞେନ୍‌ ଆମନ୍‌ଆଡଙ୍‌ ଅଡ଼୍‌କୋନ୍‌ ତନିୟ୍‌ତିୟଞ୍ଜି ତିୟ୍‌ତମ୍‌, ତଙ୍କାନ୍‌ ନିୟ୍‌ ତିୟ୍‌ତମ୍‌; ବନ୍‌ଡ ଏଙ୍ଗାଲ୍‌ଜାକିଁୟ୍‌ଡେନ୍‌ ଞେନ୍‌ ସରିନ୍‌ କେନ୍‌ ଆ ଡାଙ୍ଗଡ଼ିଆଡଙ୍‌ ଅଃବିବାଇଁୟ୍‌ବା ।" 13 ସିଲତ୍ତେ ସିକିମ୍‌ ଜାକୁବନ୍‌ ଆ ଡାଙ୍ଗାଡ଼ାଅଞ୍ଜି ଆତନାନ୍‌ ଦିଣାନ୍‌ଆଡଙ୍‌ ଆଞରମ୍‌ରମ୍‌ବତିଡେନ୍‌ ଆସନ୍‌ ଆନିଞ୍ଜି ସିକିମନ୍‌ ଡ ଆପେୟନ୍‌ ଅମୋରନ୍‌ ସରିନ୍‌ କଣ୍ତାୟ୍‌ ବର୍ରନ୍‌ କଡାଡ଼ିଲଞ୍ଜି । 14 "ଇନ୍‌ଲେଞ୍ଜି ଏର୍‌ଗନବ୍‌ରେଡନ୍‌ ଆମନ୍‌ରାଜିଆଡଙ୍‌ ତନାନ୍‌ଲେନ୍‌ଆଡଙ୍‌ ଆତନିୟ୍‌ ଆକାବ୍ବାଡ଼ା ଲୁମ୍‌ଲେ ଏରପ୍ତିଆୟ୍‌, ତିଆତେ ଏଲୁମ୍‌ଲାୟ୍‌ଡେନ୍‌, ଇନ୍‌ଲେଞ୍ଜି ଡୁର୍ନାମ ଡେତଲେନ୍‌ । 15 ଅବୟ୍‌ କାବ୍ବାଡ଼ାନ୍‌ ଏଲୁମେଣ୍ଡେନ୍‌, ଇନ୍‌ଲେଞ୍ଜି ଅନ୍ତମ୍‌ ଆମ୍ୱେଞ୍ଜି ଡିଲେ ଓବ୍ବାମରନ୍‌ ଗବ୍‌ରେଡ୍ଡେନାବା, ତିଡେନ୍‌ ଇନ୍‌ଲେଞ୍ଜି ବର୍ନେବେନ୍‌ ଏଅଡ଼େତାୟ୍‌ । 16 ଇନ୍‌ଲେଞ୍ଜି ଆମ୍ୱେଞ୍ଜିଆଡଙ୍‌ ଡାଙ୍ଗଡ଼ିଅନନ୍‌ ଏତିୟ୍‌ତବେନ୍‌ ଡ ଡାଙ୍ଗଡ଼ିଅନ୍‌ବେନ୍‌ ଏଜାତାୟ୍‌, ଆରି, ଆମ୍ୱେଞ୍ଜି ସରିନ୍‌ ଡକୋଲ‌ନ୍‌ ଆବସରିନ୍‌ ମାୟ୍‌ଲନ୍‌ ଏଡକୋନେବା । 17 ବନ୍‌ଡ ଆମ୍ୱେଞ୍ଜି ଗନଡ୍‌ରେଡେବନ୍‌ ଆସନ୍‌ ବର୍ନେଲେନ୍‌ ଏଃନମ୍‌ଡଙ୍‌ଲଡେନ୍‌, ଏତ୍ତେଲ୍‌ଡେନ୍ ଞେନ୍‌ ତି ଆଇସିୟ୍‌ଆଡଙ୍‌ ଓରୋଙ୍‌ଲେ ଏପାଙ୍‌ତେ ।"

18 ତିଆଡିଡ୍‌ ଆନିଞ୍ଜି କେନ୍‌ ଆବର୍ରଞ୍ଜି ଆବର୍ନେ ଅମ୍‌ଡଙ୍‌ଲେ ଅମୋରନ୍‌ ଡ ଆ ଡାଙ୍ଗଡ଼ାଅନନ୍‌ ସିକିମନ୍‌ ସର୍ଡାଏଞ୍ଜି । 19 ଆରି, ତି ଆଡାଙ୍ଗାଡା ଲଜିର୍‌ ତି ଆକାବ୍ବାଡ଼ା ଲୁମେନ୍‌, ଇନିଆସନ୍‌ଗାମେଣ୍ତେନ୍‌ ଆନିନ୍‌ ଜାକୁବନ୍‌ ଆ ଡାଙ୍ଗଡ଼ିଅନ୍‌ଆଡଙ୍‌ ଗୋଗୋୟ୍‌ ଲଡଜେନ୍‌ । ତି ଆସିକିମ୍‌ ଆପେୟନ୍‌ ଅସିଙ୍‌ମରଞ୍ଜି ସିଲଡ୍‌ ଗୋଗୋୟ୍‌ ଗମାଙ୍‌ ଡକୋଏନ୍‌ । 20 ତିସିଲଡ୍‌ ଅମୋରନ୍‌ ଡ ଆ ଡାଙ୍ଗଡ଼ାଅନନ୍‌ ସିକିମନ୍‌ ଆନିନ୍‌ଡମ୍‌ ଆଗଡ଼ାନ୍‌ ଆଡୁଆରା ଜିର୍ରେ ଗଡ଼ାନ୍‌ ଆମନ୍‌ରାଜି ସରିନ୍‌ କଡାଡ଼ିଲନ୍‌ ବରେଞ୍ଜି; 21 "କେନ୍‌ ଆମନ୍‌ରାଜି ଇନ୍‌ଲେଞ୍ଜି ସରିନ୍‌ ସଙ୍ଗତାରଞ୍ଜିତଡ୍‌; ତିଆସନ୍‌ କେନ୍‌ଆନିଞ୍ଜି କେନ୍‌ ଆଡେସାଲୋଙ୍‌ ଡକୋନେନ୍‌ ଡ ବେପାରନ୍‌ ଆସନ୍‌ ରୟଙନ୍‌ ତନିୟନ୍‌ଡେଏତୋ; ଇନିଆସନ୍‌ଗାମେଣ୍ତେନ୍‌ ଗିୟ୍‌ବା, କେନ୍‌ ଆଡେସା ଆନିଞ୍ଜି ଆସନ୍‌ ଡେଏତୁ; ଆରି, ଇନ୍‌ଲେଞ୍ଜି ଆ ଡାଙ୍ଗଡ଼ିଅନଞ୍ଜି ଏଓରୋଙାୟ୍‌ବା ଆରି ଡାଙ୍ଗଡ଼ିଅନ୍‌ଲେଞ୍ଜି ଆନିଞ୍ଜିଆଡଙ୍‌ ଏତିୟ୍‌ବାଜି । 22 ବନ୍‌ଡ ଆନିଞ୍ଜି କେନ୍‌ ଅବୟ୍‌ ବର୍ନେନ୍‌ ଡକୋ, ଅମଙ୍‌ବାଲେନ୍‌ ଅଡ଼୍‌କୋନ୍‌ ଆଓବାମର୍‌ ଆନିଞ୍ଜି ଅନ୍ତମ୍‌ ଗନବ୍‌ରେଡନ୍‌ ଡେଲାୟ୍‌ଡେନ୍‌, ତିଡେନ୍‌ ଆନିଞ୍ଜି ଇନ୍‌ଲେଞ୍ଜି ସରିନ୍‌ ଡକୋଲନ୍‌ ଆବମନ୍‌ରା ଆଡନେ ଆସନ୍‌ ଅଡ଼େତଜି । 23 ଆରନ୍ନାଞ୍ଜି, ଆରନ୍ନା ଡ ଜନ୍ତୁଜି ଇନ୍‌ଲେଞ୍ଜି ଆତେ ଅଃଡ୍ଡେଏ ? ଇନ୍‌ଲେଞ୍ଜି ଆବର୍ନେଞ୍ଜି ତୁମ୍‌ ଏଅଡ଼େବା, ତିଆତେ ଲୁମ୍‌ଲବଡେନ୍‌, ଆନିଞ୍ଜି ଇନ୍‌ଲେଞ୍ଜି ସରିନ୍‌ ଡକୋତଞ୍ଜି ।" 24 ତିଆଡିଡ୍‌ ଅମୋରନ୍‌ ଡ ଆ ଡାଙ୍ଗଡ଼ାଅନନ୍‌ ସିକିମନ୍‌ କେନ୍‌ ଆବର୍ନେଲୋଙ୍‌ ଆଗଡ଼ାନ୍‌ ଆଡୁଆରା ଗଡ୍‌ ଆଜିର୍ରେଞ୍ଜି ଅଡ଼୍‌କୋନ୍‌ ଆ ଓବ୍ବାମର୍‌ଜି ଗନରେଡେବନ୍‌ ଡେଏଞ୍ଜି ।

25 ଆରି ୟାଗି ଡିନା ଡେଏନ୍‌ କି ତେତ୍ତେ ଆମନ୍‌ରାଜି ଅସୁଆଜେଞ୍ଜି, ଦିଣାନ୍‌ ଆବବ୍‌ରେ ସିମିଅନନ୍‌ ଡ ଲେବିନ୍‌, କେନ୍‌ ଜାକୁବନ୍‌ ଆ ଡାଙ୍ଗାଡ଼ାଅନ୍‌ଜି ବାଗୁ ଆ କଡ଼ିବଞ୍ଜି ପାଙ୍‌ଲେ ଅଃବୋର୍ସାଲନ୍‌ ଗଡ଼ାନ୍‌ ଗନେଞ୍ଜି ଆରି ଅଡ଼୍‌କୋନ୍‌ ଓବ୍ବାମରଞ୍ଜିଆଡଙ୍‌ ରବ୍ବୁଆଜେଞ୍ଜି । 26 ଆରି, ଅମୋରନ୍‌ ଡ ଆ ଡାଙ୍ଗଡ଼ାଅନନ୍‌ ସିକିମନ୍‌ଆଡଙ୍‌ କଡ଼ିବନ୍‌ ବାତ୍ତେ ରବୁଲେ ସିକିମନ୍‌ ଆସିଙ୍‌ ସିଲଡ୍‌ ଦିଣାନ୍‌ଆଡଙ୍‌ ଓରୋଙେଞ୍ଜି । 27 ଜାକୁବନ୍‌ ଆ ଡାଙ୍ଗାଡ଼ାଅଞ୍ଜି ଆର୍ରବୁଏଞ୍ଜି ଆମନ୍‌ରାଜି ଆମଙ୍‌ବା ଇୟ୍‌ଲେ ଗଡ଼ାନ୍‌ ଜୁରୁଏଞ୍ଜି, ଇନିଆସନ୍‌ଗାମେଣ୍ତେନ୍‌ ତି ଆମନ୍‌ରାଜି ଆତନାନନ୍‌ଆଡଙ୍‌ ଞମ୍‌ଞମ୍‌ବତିଡେଞ୍ଜି । 28 ମେଣ୍ତାନ୍‌ ଡ ତାଙ୍‌ଲେୟନ୍‌ ଡ ଆଗୋଡୁଞଞ୍ଜି ଅଡ଼୍‌କୋନ୍‌, ଆରି ଗଡ଼ାନ୍‌ ଡ ବସେଙନ୍‌ ଅଡ଼୍‌କୋନ୍‌ ଆଜନବ୍‌ଜି ରୁୟ୍‌ଲେ ପାଙେଞ୍ଜି । 29 ଆରି ଆପସିଜଞ୍ଜି ଡ ଆଡୁକ୍ରିଞ୍ଜିଆଡଙ୍‌ ବଣ୍ତିଲେ ଅଡ଼୍‌କୋନ୍‌ ଡ ଅସିଂଙନ୍‌ ଅଡ଼୍‌କୋନ୍‌ ଆନର୍ଜେ ଜୁରୁଏଞ୍ଜି । 30 ସିଲତ୍ତେ ଜାକୁବନ୍‌ ସିମିଅନନ୍‌ ଡ ଲେବିନ୍‌ଆଡଙ୍‌ ବରେନ୍‌, "ଆମ୍ୱେନ୍‌ କେନ୍‌ ଆଡେସାଲୋଙ୍‌, ଆଗରାମ୍‌ଗାମ୍‌, କିଣାନିଅନ୍‌ ଡ ପରିସିଅନ୍‌ ଆମନ୍‌ରାଜି ଆମଙ୍‌ବା ଡଅଙ୍‌ଞେନ୍‌ ଅବ୍‌ସଅଲେ ବାଉଲ୍ଲି ଏଏମ୍ମେଲିଁୟ୍‌, ମନ୍‌ରାଞେନ୍‌ ଅସୋୟ୍‌ଡମ୍‌, ତିଆସନ୍‌ ଆନିଞ୍ଜି ବିରୁଦଲୋଙ୍‌ଞେନ୍‌ ରୁକୁଲନ୍‌ ଡଅଙ୍‌ଞେନ୍‌ ରବ୍ବୁତିୟ୍‌ଞ୍ଜି; ଏତ୍ତେଲ୍‌ଡେନ୍‌ ଅମରା ଅସିଂଞେନ୍‌ ଆମନ୍‌ରା ଅବ୍‌ଗୁରୁଡେତଜି ।" 31 ଆନିଞ୍ଜି ଜାଲଙ୍‌ଲେ ବରେଞ୍ଜି, "ଜୋଣ୍ତଡ଼ିବଜନ୍‌ ଅନ୍ତମ୍‌ ତନାନ୍‌ଲେନ୍‌ ସରିନ୍‌ ଆଞନର୍ରମ୍‌ ପଙ୍‌ ଆକାବ୍ବାଡ଼ାନ୍‌ ?"