ପର୍ତମ୍ମୁ 32

ଏସୋନ୍‌ ଆନଲ୍‌ରବାଙ୍‌ ଆସନ୍‌ ଜାକୁବନ୍‌ ଅବ୍‌ଜାଡାଲନ୍‌

1 ସିଲତ୍ତେ ଜାକୁବନ୍‌ ଆଜିର୍ରେନ୍‌ ଆଡିଡ୍‌, ଇସ୍ୱରନ୍‌ ଆ ପାଙ୍‌ଲଙ୍‌ବର୍‌ମରଞ୍ଜି ଆନିନ୍‌ ସରିନ୍‌ ଅଲ୍‌ରବାଙେଞ୍ଜି । 2 ଜାକୁବନ୍‌ ଆନିଞ୍ଜିଆଡଙ୍‌ ଗିଜେନ୍‌, ଆରି ଆନିନ୍‌ ବର୍ରନେ, "କେନ୍‌ଆନିଞ୍ଜି ଇସ୍ୱରନ୍‌ ଆଦଡ଼ମର୍‌ଜି; ତିଆସନ୍‌ ତି ଆଡ୍ରକୋନେ ଆଞୁମ୍‌ ମଅନୟିମ୍‌ ଆଗ୍ରାମ୍‌ଗାମ୍‌ ବାଗୁ ଦଡ଼ ଡଡ୍ଡୋଏନ୍‌ ।"

3 ସିଲତ୍ତେ ଜାକୁବନ୍‌ ଆ ବୋଞାଙନ୍‌ ଏସୋନ୍‌ ଆମଙ୍‌ ଅନ୍‌ରଙ୍‌ ଜିରେନ୍‌ ଆମ୍ମୁଙ୍‌ ପାଙ୍‌ଲଙ୍‌ବର୍‌ମରଞ୍ଜିଆଡଙ୍‌ ଆପ୍ପାୟେନ୍‌ ଆନିନ୍‌ ସେଇର ଡେସାନ୍‌ ଇଦୋମ୍‌ ଆ ଡରକୋନେରେଙ୍‌ ଡକୋଲନ୍‌ । 4 ଆରି ଆନିନ୍‌ ଆନିଞ୍ଜିଆଡଙ୍‌ ଏନ୍ନେଲେ ବରେଞ୍ଜି, "ଆମ୍ୱେନ୍‌ ସାଓକାରଞେନ୍‌ ଏସୋନ୍‌ଆଡଙ୍‌ ଇୟ୍‌ବର୍‌ବା, କମ୍ୱାରିନମ୍‌ ଜାକୁବନ୍‌ ଆମନ୍‌ଆଡଙ୍‌ ଅବ୍‌ଜନାଲମ୍‌ ଡ ଞେନ୍‌ ଲାବନନ୍‌ ଆମଙ୍‌ବା ଡକୋଲନାୟ୍‌ ଆରି ନମି ଆନ୍ତାନ୍‌ ଞେନ୍‌ ଡକୋ । 5 ତାଙ୍‌ଲେୟନ୍‌, ଗୋଡୁଞନ୍‌, ଗୋସ୍ସାମେନନ୍‌ ଡ କମ୍ୱାରିମରନ୍‌ ଆରି କମ୍ୱାରିବଜଞ୍ଜି ଞେନ୍‌ଆତେ ଡକୋଜି । ଆରି ଞେନ୍‌ ପ୍ରବୁଞେନ୍‌ ଆଗନିୟ୍‌ଗିୟ୍‌ଲୋଙ୍‌ ସନାୟୁମନ୍‌ ଆଞନାଙ୍‌ ଆସନ୍‌ ଅମଙ୍‌ବାନମ୍‌ ପାଙ୍‌ଲଙ୍‌ବର୍‌ମରଞ୍ଜି ଆପ୍ପାୟ୍‌ଲାୟ୍‌ ।"

6 ପାଙ୍‌ଲଙ୍‌ବର୍‌ମରଞ୍ଜି ୟର୍ରନ୍‌ ଜାକୁବନ୍‌ଆଡଙ୍‌ ବରେଞ୍ଜି, "ଞେନ୍‌ ବୋଞାଙ୍‌ନମ୍‌ ଏସୋନ୍‌ ଆମଙ୍‌ବା ଏଇୟେନ୍‌, ଆମନ୍‌ ଆର୍‌ନବାଙ୍‌ ଆସନ୍‌ ଆନିନ୍‌ ଉଞ୍ଜି ସଅ ମନ୍‌ରାଞ୍ଜି ସରିନ୍‌ ଜିର୍ତାଜି ।" 7 ତିଆସନ୍‌ ଜାକୁବନ୍‌ ମାଡ ବତଙେନ୍‌ ଆରି ବାଉଲ୍ଲିଡେନ୍‌ । ଆନିନ୍‌ ଆମନ୍‌ରାଞ୍ଜି ଡ ମେଣ୍ଡାନ୍‌, କିମ୍ମେଡନ୍‌, ତାଙ୍‌ଲିୟନ୍‌, ଆରି ଓଟଞ୍ଜି ତରଙାନ୍ନା ବାଗୁ ଦଡ଼ ଏମ୍ମେଏନ୍‌ । 8 ଆନିନ୍‌ ଇଃୟମେନ୍‌, "ଏସୋନ୍‌ ଜିର୍ରେ ବଦଡ଼ ଆ ମନ୍‌ରାଜିଆଡଙ୍‌ ତିଡେଞ୍ଜିଡେନ୍‌, ଆରି ବଦଡ଼ ଆ ମନ୍‌ରାଜି ଅଡ଼ୁର୍‌ତଜି ।"

9 ତିଆଡିଡ୍‌ ଜାକୁବନ୍‌ ବର୍ରନେ, "ଆପ୍ପେୟ୍‌ଲେନ୍‌ ଅବ୍ରାଆମନ୍‌ ଆ ଇସ୍ୱର ଆରି ଆପ୍ପେୟ୍‌ଞେନ୍‌ ଇସାକନ୍‌ ଆ ଇସ୍ୱର, ଏ ପ୍ରବୁ ଆମନ୍‌ ଞେନ୍‌ଆଡଙ୍‌ ବର୍ରିୟ୍‌ ଆମନ୍‌ ଡେସାନମ୍‌ ଡ କୁଲମ୍‌ମର୍‌ନମ୍‌ଞ୍ଜି ଆମଙ୍‌ବା ୟର୍ନାୟ୍‌, ଆରି ଞେନ୍‌ ଆମନ୍‌ଆଡଙ୍‌ ମନଙ୍‌ ଏଲୁମ୍‌ତାୟ୍‌ । 10 ଆମନ୍‌ କେନ୍‌ ଆ କମ୍ୱାରି ଆସନ୍‌ ଅଙ୍ଗା ଅଡ଼୍‌କୋନ୍‌ ଆ କାନକାରମ୍‌ ଡ ଅଙ୍ଗା ଅଡ଼୍‌କୋନ୍‌ ଡର୍ନେଡମନ୍‌ ଅବ୍‌ଗିୟ୍‌ତାଏନ୍‌, ଞେନ୍‌ ତିଲୋଙ୍‌ ଅସୋୟ୍‌ ଆଞନାଙ୍‌ ଆସନ୍‌ ଜିଞ୍ଜିନ୍‌ ତଡ୍‌; ଇନିଆସନ୍‌ଗାମେଣ୍ଡେନ୍‌ ଞେନ୍‌ଡମ୍‌ ଡାଙ୍ଗୋଞେନ୍‌ ପାଙ୍‌ଲେ କେନ୍‌ ଆ ଜର୍ଦନ ପଡେନ୍‌, ବନ୍‌ଡ ନମି ଞେନ୍‌ ବାଗୁ ଡଡ଼ ଡେଲିଁୟ୍‌ । 11 କାକୁର୍ତିତନାୟ୍‌, ବୋଞାଙ୍‌ଞେନ୍‌ ଏସୋନ୍‌ ଆସିଲୋଙ୍‌ସିଲଡ୍‌ ଞେନ୍‌ଆଡଙ୍‌ ଡୋବିଁୟ୍‌ । ଇନିଆସନ୍‌ଗାମେଣ୍ଡେନ୍‌ ଞେନ୍‌ ଆନିନ୍‌ଆଡଙ୍‌ ବତଙ୍‌ତିଁୟ୍‌ ଓଡେନ୍‌ନଙ୍‌ ଆନିନ୍‌ ଜିର୍ରେ ଞେନ୍‌ ଡ ଅୟୋଙନ୍‌ ଡ ପସିଜଞ୍ଜିଆଡଙ୍‌ ଇତାୟ୍‌ ତିଡେଜି । 12 ଆମନ୍‌ ତ ବର୍ରନେ, ଞେନ୍‌ ଆମନ୍‌ଆଡଙ୍‌ ଏଆସିର୍ବାଦତମ୍‌, ଆରି ଆନେଙ୍‌ ସମେଁୟ୍‌ଣ୍ଡ୍ରାନ୍‌ ଆଲକିୟ୍‌ ଗୋଗୋଜନ୍‌ ଆସନ୍‌ ଏଙ୍ଗାଲେ ଡିଡିଲେ ଅଃରପ୍ତିନେ, ତି ଅନ୍ତମ୍‌ କେଜ୍ଜାନମ୍‌ ଏଅବ୍‌ଗୋଗୋୟ୍‌ବା ।"

13 ଆରି ଜାକୁବନ୍‌ ତି ଆଡ୍ରକୋନେଲୋଙ୍‌ ତି ଆତଗଲ୍‌ ଡକୋଲନେ, ଆମଙନ୍‌ ଇନି ଡକୋଏନ୍‌, ତେତ୍ତେସିଲଡ୍‌ ଆ ବୋଞାଙନ୍‌ ଏସୋନ୍‌ ଆତନିୟ୍‌ ଆସନ୍‌ ଅବ୍‌ଜାଡାଲନ୍‌ । 14 ବାଗୁ ସଅ ଆଇମେଡନ୍‌ ଆରି ବକୁଡ଼ି ଓବ୍ବାମେଡନ୍‌, ବାଗୁ ସଅ ଆଇମେଣ୍ତାନ୍‌ ଆରି ବକୁଡ଼ି ଓବ୍ବାମେଣ୍ତାନ୍‌, 15 ଆରି ତିରିସ୍‌ଟା ସମ୍ପରା ଆଅନ୍‌ ଓଟନ୍‌ ସରିନ୍‌ ଓବ୍ବାନ୍‌ଆତେ, ବାକୁଡ଼ି ଆକୋଡନ୍‌ ତାଙନ୍‌ ଆରି ଦସଟା ସଣ୍ତନ୍‌, ବକୁଡ଼ି ଆଇନ୍‌ ଗୋଡୁଞନ୍‌ ଆରି ଦସଟା ଓବ୍ବାଗୋଡୋଞନ୍‌ ଅବ୍‌ଜାଡାଲେ ଡକ୍କୋଏନ୍‌ । 16 ଆନିନ୍‌ ଆ ଜନ୍ତୁଜି ଅଡ଼୍‌କୋନ୍‌ ତରଙାନ୍ନା ଏମ୍ମେଏନ୍‌ ଆରି ଆ କମ୍ୱାରିଞ୍ଜି ଆସିଲୋଙ୍‌ ବଗୋସ୍ସା ସୋରୋପ୍ପାୟ୍‌ଲେ ଆନିଞ୍ଜିଆଡଙ୍‌ ବରେଞ୍ଜି, "ଆମ୍ୱେଞ୍ଜି ଆମ୍ମୁଙ୍‌ଲନ୍‌ ଜିର୍ବା, ଆରି ମଡ୍ଡି ମଡ୍ଡିରେଙ୍‌ ଡକୋଡାଲନ୍‌ ଗୋସ୍ସାନ୍‌ ତରଙାନ୍ନା ଏମ୍ମେବା ।" 17 ଆରି ଆରାମ୍ମୁଙ୍‌ଲନ୍‌ ଆକମ୍ବାରିଆଡଙ୍‌ ଆନିନ୍‌ ବରେନ୍‌, "ବୋଞାଙ୍‌ଞେନ୍‌ ଏସୋନ୍‌ ରବାଙ୍‌ଲମ୍‌ କି ବର୍ରମ୍‌ଡେନ୍‌, ‘ଆମନ୍‌ ଆନା ଆ କମ୍ବାରିମର୍‌ ? ଆମନ୍‌ ଅଙ୍ଗାଲୋଙ୍‌ ଜିର୍ତେ ? କେନ୍‌ ଅଡ଼୍‌କୋନ୍‌ ଆନା ଆ ଜନ୍ତୁଜି ?’ 18 ଆମନ୍‌ ଜାଲଙ୍‌ଲେ ବର୍ନା, କେନ୍‌ ଅଡ଼୍‌କୋନ୍‌ କମ୍ୱାରିନମ୍‌ ଜାକୁବନ୍‌ ଆତେ । କେନ୍‌ ଅଡ଼୍‌କୋନ୍‌ ସାଉକାରଞେନ୍‌ ଏସୋନ୍‌ ଆତନିୟ୍‌ ଆସନ୍‌ ଆନାପ୍ପାୟନ୍‌ ଡେଏନ୍‌ । ଆନିନ୍‌ ନିୟ୍‌ କିଣ୍ଡୋଙ୍‌ବାଲେନ୍‌ ଜିର୍ତାୟ୍‌ ।" 19 କେନ୍‌ ଏନ୍ନେଲେ ଆନିନ୍‌ ବାଗୁ, ୟାଗି ଗୋସ୍ସାନ୍‌ ଆସରଣ୍ଡୋଙ୍‌ଲାଞଞ୍ଜି ଅଡ଼୍‌କୋନ୍‌ ଆ କମ୍ବାରିନ୍‌ଆଡଙ୍‌ ବରେଞ୍ଜି, "ଏସୋନ୍‌ ସରିନ୍‌ ଏଲ୍‌ରବାଙେଣ୍ଡେନ୍‌, ଆମ୍ବେନ୍‌ ଏନ୍ନେଲେ ବର୍ନାବା । 20 ଆରି ବର୍ନାବା, ଗିଜା କମ୍ବାରିନମ୍‌ ଜାକୁବନ୍‌ ଞେନ୍‌ଆଡଙ୍‌ ସଣ୍ଡୋଙ୍‌ତଲେନ୍‌; ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଇଃୟମେନ୍‌, ଆମ୍ମୁଙ୍‌ ତନିୟ୍‌ତିୟଞ୍ଜି ଆପ୍ପାୟ୍‌ଲେ ଆନିନ୍‌ଆଡଙ୍‌ ମବ୍‌ଲୟ୍‌ଲେ, ତିକ୍କି ଆନିନ୍‌ ସରିନ୍‌ ଏଲ୍‌ରବାଙ୍‌ତାୟ୍‌, ଏତ୍ତେଲ୍‌ଡେନ୍‌ ଆନିନ୍‌ ଞେନ୍‌ଆଡଙ୍‌ ଜାଲେ ରପ୍ତିଲଙ୍‌ତନ୍‌ ।" 21 ଆନିନ୍‌ ଅବ୍ବାମ୍ମୁଙ୍‌ ଆମଙ୍‌ବାନ୍‌ ତନିୟ୍‌ତିୟନ୍‌ ଆପ୍ପାୟେନ୍‌; ବନ୍‌ଡ ଆନିନ୍‌ ତି ଆତଗଲ୍‌ ଆ ଦଡ଼ଞ୍ଜି ସରିନ୍‌ ଡକୋଲନେ ।

ଜାକୁବନ୍‌ ଆଲ୍‌ଜୁଜ୍ଜେ

22 ତି ଆତଗଲ୍‌ ଆନିନ୍‌ ଡୋଲନ୍‌, ବାଗୁନ୍‌ ଆଡୁକରିନ୍‌ ଡ ବାଗୁନ୍‌ ଆ କମ୍ୱାରିବଜନ୍‌ ଆରି ଏଗାରଟା ପସିଜଞ୍ଜିଆଡଙ୍‌, ଜଦୁକନ୍‌ ଆଲ ଆନପଡ୍‌ ଆସନ୍‌ ଓରୋଙେଞ୍ଜି । 23 ଆରି ଆନିଞ୍ଜିଆଡଙ୍‌ ଅଲନ୍‌ ଅଃପଡେଞ୍ଜି, ଆରି ଆନିନ୍‌ ଆଜନବ୍‌ଜି ଅଡ଼୍‌କୋନ୍‌ ଆନିନ୍‌ଡମ୍‌ ମିୟ୍‌ତାୟ୍‌ ଅଲନ୍‌ ଆପ୍ପାୟେନ୍‌, 24 ବନ୍‌ଡ ଜାକୁବନ୍‌ ତେତ୍ତେ ଆତିନ୍‌ସଜନ୍‌ ଡକୋଲନେ, ଅବୟ୍‌ ମନ୍‌ରାନ୍‌ ଜିର୍ରାୟ୍‌ ଆରି ଆନିନ୍‌ ସରିନ୍‌ ତମ୍ପଗଲ୍‌ ଆସାଆର୍‌ବେଡ୍‌ ଜାୟ୍‌ ଅଲ୍‌ଜୁଜେଏଞ୍ଜି । 25 ବନ୍‌ଡ ତି ଆ ମନ୍‌ରା ଜନିନୟନ୍‌ ଆସନ୍‌ ଏରେନ୍‍ଗୋଜେନ୍‍ ବନ୍‌ଡ ଜିନୟ୍‌ଲେ ଅଃରପ୍ତିଲନ୍‌, ଆନିନ୍‌ ଜାକୁବନ୍‌ ଆବୁଲୁଲୋଙ୍‌ ତିଡେନ୍‌, ଆରି ଜାକୁବନ୍‌ ପଡ଼େୟ୍‌ବୁଲେନ୍‌ । 26 ତି ଆ ମନ୍‌ରା ବର୍ରନେ, "ଞେନ୍‌ଆଡଙ୍‌ ଉମ୍‌ରେଙିଁୟ୍‌; ଇନିଆସନ୍‌ଗାମେଣ୍ଡେନ୍‌ ସାଆରେନ୍‌ ।"

ଜାକୁବନ୍‌ ବର୍ରନେ, "ଆମନ୍‌ ଞେନ୍‌ଆଡଙ୍‌ ଆସିର୍ବାଦଲିଁୟ୍‌ଡେନ୍‌ ଞେନ୍‌ ଆମନ୍‌ଆଡଙ୍‌ ଅମ୍‌ରେଙ୍‌ତମ୍‌ ।"

27 ତି ଆ ମନ୍‌ରା ବର୍ରନେ, "ଅଞୁମ୍‌ନମ୍‌ ଇନି ?" ଆନିନ୍‌ ବର୍ରନେ, "ଜାକୁବ ।"

28 ମନ୍‌ରାନ୍‌ ବର୍ରନେ, "ଅଞୁମ୍‌ନମ୍‌ ଜାକୁବ ଗନାମନ୍‌ ଅଃଡ୍ଡେଏ । ଇନିଆସନ୍‌ଗାମେଣ୍ଡେନ୍‌ ଆମନ୍‌ ଇସ୍ୱରନ୍‌ ଡ ମନ୍‌ରାନ୍‌ ସରିନ୍‌ ଅଲ୍‌ଜ୍ଜୁଜେଲେ ଜିନୟ୍‌ଲମ୍‌ ତିଆସନ୍‌ ଅଞୁମ୍‌ନମ୍‌ ଇସ୍ରାଏଲ ଗାମ୍‌ଲେ ଓଡ୍ଡେତମ୍‌ଜି ।"

29 ତିଆଡିଡ୍‌ ଜାକୁବନ୍‌ ବର୍ରନେ, "ଞେନ୍‌ କାକୁର୍ତିତନାୟ୍‌, ଅଞୁମ୍‌ନମ୍‌ ବର୍ନା ।" ଆନିନ୍‌ ବର୍ରନେ, "ଆମନ୍‌ ଇନିବା ଅଞୁମ୍‌ଞେନ୍‌ ଇନି ଗାମ୍‌ଲେ ବର୍ତିଁୟ୍‌ ?" ସିଲତ୍ତେ ଆନିନ୍‌ ଜାକୁବନ୍‌ଆଡଙ୍‌ ଆସିର୍ବାଦଏନ୍‌ ।

30 ତିଆଡିଡ୍‌ ତି ଆଡ୍ରକୋନେନ୍‌ ଆଞୁମ୍‌ ପେନିଏଲ୍‌*32:30 ଆଗ୍ରାମ୍‌ଗାମ୍‌ ଇସ୍ୱରନ୍‌ ଆମୁକା ଡକ୍କୋଏନ୍‌; ଇନିଆସନ୍‌ଗାମେଣ୍ଡେନ୍‌ ଜାକୁବନ୍‌ ବର୍ରନେ, "ଞେନ୍‌ ଇସ୍ୱରନ୍‌ଆଡଙ୍‌ ଗିୟ୍‌ଡମ୍‌ଗିୟ୍‌ଲାୟ୍‌ ଜନଙ୍‌ଡେନ୍‌ ପୁରାଡ଼ାଞେନ୍‌ ଅମେଙେନ୍‌ ।" 31 ତି ସିଲଡ୍‌ଲ୍ଲନ୍‌ ଜାକୁବନ୍‌ ପନୁଏଲନ୍‌ ଆପ୍ରଡେନ୍‌ ସିଲଡ୍‌, ଓୟୋଙନ୍‌ ଡୁଙ୍‌ଲନାୟ୍‌; ବନ୍‌ଡ ଆନିନ୍‌ ଆଜରୟ୍‌ବୁଲେନ୍‌*32:31 ଆପ୍ରଡ଼େୟ୍‌ବୁଲେନ୍‌ ସିଲଡ୍‌ ଆସୋତ୍ତା ତଙିୟ୍‌ଲନ୍‌ । 32 ତି ଆସନ୍‌ ଇସ୍ରାଏଲ୍‌ମରଞ୍ଜି ନମିଆନ୍ତାନ୍‌ ଅନ୍ନିଙ୍‌ ଆବୁଲୁ ଆସାତାର୍‌ ଅଃଜୋମେଜି, ଇନିଆସନ୍‌ଗାମେଣ୍ଡେନ୍‌ ଆନିନ୍‌ ଜାକୁବନ୍‌ ଆବୁଲୁ ଆସାତାର୍‌ ସୁଙେଏନ୍‌ ।