Arca de noé

13 Hagi Anumzamo’a anage huno Noana asmi’ne, Ke ontahizageno kefo avu’ava zamo’a aviteankina zamagri’ene mopazimine zamahe fanane huku Nagra nagesa nentahue. 14 Hagi kagra hanave zafareti ra ventea* tro nehunka, asa hutanenka hunaraginto. Timo’ma ufre’zankura agu’ane megi’anena fukinu renkaniro. 15 Ana ventema kisanana, zanra’a 150'a mitagi, kahesa’a 25 mitagi, atrure’a 15 mitagi hunka neginka, 16 anagamu no amumpa tvaonte mago mitamofona agema’a hafu’a mita zasikana hagento. Magokaziga kaha hagentenka, ana ventemofo agu’afina ese nonki, anante nonki, agofetu nonki hunka kio.

Tusi’a ti hage’nea naneke

1 Hagi Ra Anumzamo’a anage huno Noana asami’ne, Maka ama mopafima menima mani’naza vahepina kagrake fatgo nera mani’nanke’na negagoe. E’igu kagrane nagaka’anena ventefi mareriho.

7 Ko' runaku nehige’za, Noa’ene nenaro’ene, mofavre zaga’ane anoferahe’zane ventefi mareri’naze. 8,9 Hagi agru osu zagaramimpinti’ene agruma hu’naza zagaramimpinti’ene namaramimpinti’ene, mika zagaramimpintira vene a’ene taretare hu’za Anumzamo’ma kema hu’neaza hu’za Noa’ene ventefi ufre’naze. 10 Hagi 7ni’a zagegna manitageno, kora erigafa huno rigeno, ti hageno refite’ne.

16 Anante Anumzamo’ma kema hu’neaza huno aravere aravere mika ufre varetageno, Ra Anumzamo’a kafana erigi zamante’ne.

17 Ranko’ma ru’neana zagene hanine 40'a knafi kora ruvava huno tusi’a ti hageno ana ventea mopafinti erisga huno mareri’ne. 18 Ana nehuno timo’a reviteno marenerino mopa refitegeno, ventemo’a timofo agofetu me’ne.

23 Anumzamo’a vahe’ene, ne’onse zagarmine, namaramine, zagagafanena zamahe fanane hige’za omanitfa hu’naze. Higeno Noa’ene ventefi mani’namo’za zamagrake kasefa hu’za mani’naze.

3 Hagi 150'a knamofo agu’afi timo’a akoheno taneno urami’ne. 4 Hagi 7ni ikamofona, 17ni zupa ana ventemo’a eramino Ararati agonare eme runtrako hu’ne.

6 Hagi henka 40'a zagegna maniteno Noa’a zaho’ma erikana eri anagino, 7 kotikoti nama huntege vuteno, vano vano nehigeno, timo’a taneno uramigeno mopa efore hu’ne. 8 Hagi mopamo’ma ho’mu hu’nesigu, Noa’a mago maho nama huntegeno, 9 hareno vano hiana manisnia zana omaneno tinke me’negeno ete e’ne. Egeno Noa’a aza antegame teno ventefi avre vazi’ne. 10,11 Avrentegeno 7ni’agna manitegeno, Noa’a ete maho nama huntegeno hareno vu’ne. Hagi ana maho namamo’a kasefa olivi zafa asina atasino agipi haninkofino ana kinagage ehanati’ne. Ana higeno Noa keteno, hago timo’a taneno uramie huno agesa antahi’ne. 12 Mago’ene 7ni’agna maniteno, ana mahona huntegeno hareno vuteno ete ome’ne.

13 Noa’a 601ni’a kafuma nehigeno, pusa ikamofona ese knazupa, mika ama mopafina timo’a ho’mu higeno, Noa’a ana ventemofona amumpafinti anasgeno keana, mopamo’a ho’mu huvagare’negeno ke’ne.

Noa naga ventefinti atirami’naza naneke

15 Anumzamo’a amanage huno Noana asmi’ne, 16,17 kagrane nagaka’anena ventefintira atreta fegi’a atiramiho. Ventefima mani’naza zagagafane, namaramine, mika mopafi vano nehaza zagaraminena, zamavare atrege’za mopafi vu’za eza nehu’za kase hakare hu’za maniho.

Anumzamo Noa’ene hagerfi’nea naneke

8 Hagi mago’ane Anumzamo’a Noanku’ene, mofavre naga’agu’enena amanage huno zamasami’ne, 9 Menina antahio, kagrane, nagaka’ane kagehe’zane hagerfita mani’sunegu huvempage nehue. 10 Hagi ventefinti’ma atiramiza kagranema mani’naza zagagafane namaramine, kumate zagafaramine, trampi zagagafaraminte’ene ana huvempa kea nehue. 11 Nagra huvempa ke’ni’a huama nehue, runena kora atresanugeno zamasimu ante’za mani’naza zagaramine, mopanena tina hageno zamahe fanane osugahie.

13 mago avame’zana monare furagena ante’nanena, negeta antahi vava hugahaze.

7 Anumzamo’a Noana asamigeno amentinti ana kegura nehuno, amageanteno tima hagesifima naga’a zamagu vazisigura ventea tro hu’ne. Fore’ma osu’nea knaza fore hugahie huno Anumzamo’a asamine. Noama amentinti hu’neazamo, ama mopafi vahe’mofo kefo avu’avazazmia eriama nehigeno, Anumzamo’a fatgo nere huno huntene. (Jen-Agf 12:1-8.)

20 E’i ana avamutamina korapama Noama ventema negigeno, Anumzamofo ke eri atrazanagi, Anumzamo’a akoheno zamavega anteno mani’nea avamutamine. Hankino 8'a naga’moke’za ana timo’ma zamahe refitegeno’a, zamaguravazi’ne. (Jen-Agf 6-8) 21 E’i ana timo’a mono tima frezamofo avame zankino, Jisasi Kraisi’ma friteno oti’neazamofo hanavemo tamagura vazi’ne. Hankino mono tima frezamo’a pehena erinotreanki, agru tagutagesareti Anumzamofoma antahimisunazane. 22 Hagi Jisasi’ma monafinka vuno Anumzamofo azantmaga umani’nege’za, maka ankero vahe’mo’zane, maka avamutamimozane, maka hanavezmima me’nea zagaramimo’za Agri agorga’a mani’naze.

37 Na’ankure Noa knafi hu’nazankna avu’ava’za nehnageno Vahe’mofo Mofavrea egahie. (Jen-Agf 6:5-8) 38 Na’ankure tina ohage’nege’za, ana knafina, vahe’mo’za ne’zana nene’za, aka tina nene’za, a’nea e’neriza, ara masi omiami nehazage’no, Noa’a ventefina umareri’ne. 39 Zamagra mago zankura ontahi’za mani’nageno tinko’mo hageno eme zmaheno refite vagare’ne. Vahe’mofo mofavrema enaku’ma hanigeno’a, e’inahu’za fore hugahie. (Jen-Agf 7:6-24) 40 Hagi tare ne’trena hozafi tragote’ne mani’nesnakeno mago’mofo netreno, mago’mofona avregahie. 41 Tare a’tremoke’a witi raga neganesakeno, mago’mofona netreno mago’mofo avregahie.