Arca de noé

Noa sip ta bekugwa

13 Ana God ere mogl, Noa yegl di togwa, Yoba uglo koglo koglo meglkwa i kuda keme beglkwa pre na yoba mudu si goragledi prika. Na kuri ta mogl, yoba mudu si goglsre, makan ama ere kide eraglka. 14 Ana ene we, ede gopa we digwa i, tau si yudre, sip ta bekenatniwa. Sip ta bekenatnga yugugl i we, agai pere pere yenabuka. Ana sip beke kodin, nigl ede yugugl pi dinabedi ene ede nuglo idre, sip meda ya yugugl akie egratniwa. 15 Ana sip siragl mere sie yei bekenatnga i we, yegl eratnga, sip olto 130 mita mere bekidre, prak 22 mita mere bekidre, ana ede mitna enabuka i, 13 mita mere bekenatniwa. 16 Ene sip idaule bekidre, sip dagigle wagle kugl kar ere ede mitna enatnga ba sip bre yomara magigl 1 mita ikne kugl kar erekratnga. Agai i yoko yenabuka. Ana sip dagigle wagle dua ta ersre, sip yugugl bogl suota tebe atne kuratnga. Bogl ta atne kuglsre, ta suna kuglsre, ta mitna ibo kuratniwe di, yegl di togwa.

Nigl kamun podo sugwa

1 Ana okuo Yawe ere mogl, Noa yegl di togwa, Yoba mudu erme meglkwa i we, ye mudu mabuno kide erikwa. Kide erikwa ba ene swara yoba du motnga kaniga. Yegl pre ene yobanma mudu bogl ede sip yugugl pio.

7 Ana Noa yogo, ebie yogo, wama ebino bogl yeigo, ye nigl kamun ikra sinabukra we di prisre, ede sip yugugl eigwa. 8 Eigo, agl bugla kane kane yoba si gogl, tawa tenaiglkwa kuno erukwa ya te, agl bugla kane kane yoba si gogl, tawa tenaiglkwa kuno erekrukwa ya te, kua kane kane ya taragl kane kane makan mina wanigwa i, 9 mudu suo suode wigwa. Taragl kane kane wigwa i we, ta kumugl yogo, ta abai yogo, suo suode ede u sip yugugl Noa moglmara wigwa. God unaiglmiwe di Noa di tomere wigwa. 10 Ana ege 7-pela de ikra dudugo, nigl kamun ikra sugwa.

16 Taragl kane kane mudu meglkwa ta kumugl yogo, ta abai yogo, suo suode, God unaiglme dumere ede sip yugugl u kodigwa. Ana yoba ya taragl kane kane sip yugugl u, mogl kodigo, Yawe dua yogugl togwa.

17 Ana kamun ege 40-pela de si moglko, nigl makan ake wai didre, ede mitna pi, sip ake ple dugwa. 18 Ake ple didre, ede mitna kaima ogo, sip nigl yaudomugl wan moglkwa.

23 Ana God yegl mere yoba ya agl bugla ya dua kabu ya kua ya taragl kebra makan mina wanigwa mudu si goglko, Noa bogl akie sip yugugl meglkwa ikra keme goglkre, kor meglkwa.

3 nigl dare ede atne pi moglkwa. Nigl dare ede atne pi moglko, ana ege 150 de ikra ede ogo, nigl dare ede atne kaima ogwa. 4 Dare ede atne kaima ogo, ana ba 7 mun, de namba 17 i we, sip ikra dumo makan ta Ararat we dimara muglo ibo u pai moglkwa.

6 Ana muglo meglbi tau ama u nogugl eigo, Noa ege 40-pela de kan moglsre, dua kebra ta sip mina ere paduglkwa yauro edidre, 7 kua ta kagie kotkot we digwa i meda edugwa. Edugo, kua i pru di bage bage pi, wanugwa. Pru di wan mogl, aglke ikne ukre, nigl mudu ede atne ogwa igne pra, wan moglkwa. 8 Ana Noa ye nigl mere pai moglmo mo ede atne omada di prisre, kua yumugl ta i meda edugwa. 9 Edugo, kua yumugl pru di wan mogl, dumo ta ake morabuka dokugwa ba nigl makan ake wai di pai moglkwa pre dumo ta ake morabuka ta yekrukwa. Ta yekruko, kua yumugl aglke ede ikne u, Noa sip mina moglmara ugo, Noa ogo duglo si meda edugwa. Edugo, kua ye ogo mina akugo, ye yu sip yugugl edugwa. 10 Edidre, ye aglke kor ege 7-pela de moglsre, kua yumugl i meda edugwa. 11 Edugo, kua yumugl pru di wan mogl, pi min paugo aglke ede ikne ugwa. Ugwa igne, ye ede ta oliv we digwa yaudo ta bro kike yugwa. Yaudo ta bro kike yugo, Noa nigl ede atne ogwa pamedi prukwa. 12 Noa yegl prisre, ye aglke kor dagl ege 7-pela de mogl, kua ikra i meda edugwa. Edugo, kua pru di ede ikne ukrukwa.

13 Ana Noa bugla yugu 601 ne kodugwa igne, ba 1 mun, de namba 1 i we, nigl mudu dare ede atne ogwa. Ogo, Noa sip idaule mitna ikne sada boglsre, kan meda edugwa, nigl mudu dare kodugwa paugo, kanugwa.

15 Makan mudu kugla dugo, God ere mogl, Noa yegl di togwa, 16 Ene ebin bogl yebr, wanma ebino bogl yebi, ede sip meda pio. 17 Ana taragl kane kane ene bogl akie sip mina meglkwa i, kua, agl bugla, dua kabu, ya taragl kane kane makan mina wanigwa taragl i, ene ama i pi sip meda edio. Edibi, ye gagro mere kiglbi, ede bage bage pi, moraiglmiwe di, yegl di togwa.

8 God ka yegl didre, ye ama Noa wama bogl di te, yegl dugwa, 9 Ene prio! Na nana ene ka kaima di te padrarika. Ka kaima di te padrarika i, ene pre ya ene gawanma okuo moraiglkwa pre panabuka. 10 Ene yoba pre panan, taragl kane kane ene sip yugugl meglkwa igne akie meglkwa i, ye ama pre panabuka. Kua ya agl bugla ya dua kabu kane kane ya taragl kane kane dumo makan mina meglkwa i pre panabuka. 11 Ana na ka kaima di te padiglka i, yegl diga, okuo nigl kamun podo aglke kor ta yoba ya taragl kane kane mudu si goragledi ukrabuka. Te, makan mudu ere kide eragledi ama ka kaima ta ukrabe di, yegl dugwa.

12,13 God ka yegl di kodidre, ye ama yegl dugwa, Na titokubun kamun kua mina ediga boglkwa. Na ka kaima di te padiglka ikra pre obuno dinabedi ediga boglkwa. Ka i, ene yoba pre ya, te taragl mudu maginagle meglkwa pre aimadi kamin panabuka.

7 Noa ye God pre meduglkwa pre God taragl tau plau dinabe dugwa igne, Noa God kuduglmo goglsre, ye ebie gagiglma gogl dinaiglmedi sip bekugwa. Ye nigl ta sugo, kankrukwa ba ye God pre meduglkwa pre bekugwa. Te, Noa pre meduglmara i mina ye makandigle yoba mudu meglkwa i, kide erimedi i nogugl edugo, God ye pre meduglmara i, yagl du moglmedi kanugwa.

19,20 Te, ene prio. Noa egemo yoba mere kide meglko, Krais ye murubuglomo mina yoba i meglmara pidre, ka di togwa. Ka di togwa yobamo i erme gogl kodidre, kiano mina kane paigwa. Okna Noa sip beke moglkwa igne, yoba nomane inaiglmedi God kanana sugl moglkwa ba ye ka i sedigwa. Ana nigl podo sugwa igne, yoba suom ta, 8-pela keme sip yugugl meglko, God ye ere yugo, wakai meglkwa. 21 Kuno ere ene nigl biglkwa igne, nigl atne pidre, ede egli wigwa i, piksa mere yegl paugwa. Piksa i, God Noa yobama ake ple di togo, sip yugugl wakai meglmere ene ama wakai moraiglmedi ake ple di togwa mere yegl paugwa pre diga. Te, ene nigl biglkwa i, ogono nagino deglbi i, nigl si kake ede enabuka pre buglkrikwa ba ene nomano mina kaima God duglo boramnedi prikwa i, i nogugl edinamnedi nigl biglkwa. Ene nigl biglko, Jisas Krais adigl u kor omara i mina God ene wakai moraiglmedi ake ple di te moglkwa. 22 Jisas Krais moglkwa i, ye heven ibo pidre, God ogo wo mina ame di moglko, angelo ya taragl tau gigledi meglkwa mo yobuglno podo paugwa i, ye moglmara atne mogl kodigwa.

37 Kuno yegl mere Na Yoba Wam unaglka i, Noa egemo yomere mere yegl yenan, yoba pre kan erekraiglkwa. 38 Noa egemo yoba gun yei, kaya mokna podo nedre, abu idre, abroma yagl tedre, ere meglkwa. Ye pra munedi ere meglko, Noa ede sip yugugl ogo, 39 yoba meda meglkwa i, pre kan erekre, meglko, nigl kamun podo sugwa igne, ye pre kan erikwa. Na Yoba Wam moglka i, unaglka igne, kuno yegl mere panabiwe dugwa.

40 Jisas yegl didre, ama yegl dugwa, Ege i, yoba suo kaya mokna ere yaraiglmara kogon eribr, God swara ta auro i ede enan, ta yoko morabuka. 41 Te, abu suo wit mogo akie si deduagle ere miur, God swara ta auro i ede enan, ta yoko morabuka.