1 Ba ene ogon mogo buglo sidre, Yoba i, yoba kide meglkwa ba na yoba wakai mole dinga i, kuno paikrukwa. Ye mabuno kide erimere ene ama etnga pre ene ka tage teo dinga igne, ene ama ka tage naro dinga mere yegl paugwa. 2 Mabuno kide yegl beglkwa i, God mabuno du ersre, ka tage tomedi prumga. 3 Prumga ba ene pitnga God yoba yegl ka tage tenabuka kuno erukwa ba na mabuno yegl boglbo, ye ka tage narekrabedi pitno? 4 Mo God ene mitn gogl, nomane kor inatnedi kanana sugl moglsre, mabuno wakai kaima ere te moglkwa i, kide pitno? God ene mabuno wakai te moglkwa i, nomanen yake tenatnga pre erumedi prekitnga paugwa.

5 Ba ene nomane kor inakiursre, nomanen si gigle dinga i, ka tage u podo enabedi ere motnga. God kubrabuka egemo udre, ye mabuno du mina ka tage tenabuka ege ede nogugl unan, inatnga. 6 God yoba swara swarade mabunono erimere kuno yegl ere te ikne edenabuka.* 7 Edidre, yoba aimadi kamun kor moragledi prisre, God na wakai etniwe didre, ka wakai di narabedi prisre, mabuno wakai ege ege konbo dokugwa i, God ye aimadi kamun kor morabuka i, tenabuka. 8 Tenabuka ba yoba ta ege ege yene we di prisre, ka kaima sika sikre, mabuno kide sika sigwa i, God dem podo kubrisre, ka tage tenabuka. 9 Yoba mudu mabuno kide beglkwa i, giugl podo prisre, ibun podo inaiglkwa. Juda yoba komono ibi, Jentail yoba mokomugl inaiglkwa. 10 Ba yoba mudu mabuno wakai beglkwa i, God ye wakai erimedi ka wakai di tedre, dem muduo wida di padigl tenabuka. Komono kana Juda yoba tedre, mokomugl Jentail yoba tenabuka. 11 I siragl pre God yoba mudu mabuno swara keme ere togwa.

12 Ana Jentail yoba God lomo pre kan erekre, tadaglme erikwa i, God ka tage tenabuka. Lo pre kan erekrikwa i pre teke erekraiglkwa. Te Juda yoba God lomo pre kan ersre, tadaglme erikwa i, God lo idre, ka tage tenabuka. 13 I siragl pre God lomo pre kan ersre keme God gumuglo mina du ta moglkraiglkwa ba ege ege duglo beglbi, du moraiglkwa.

14 Jentail yoba God lomo prekrikwa ba ege sike ta lo pamere konbo sidre, duglo beglkwa. Duglo beglkwa igne, ye yene mabuno wakai sika sinamga pamedi i nogugl edigwa. 15 I nogugl edidre, God lomo ama deno muduno mina bogl atne edumedi i nogugl edigo, deno muduno pogl nogwa i, ama i nogugl edugwa. Wakai etne dumo mo kide etne dumo mo God lomo atne pamedi i nogugl edugwa. 16 I nogugl edugo, ege swara ta unan, God Jisas dedenan, yoba nomane teke atne paugwa i, kot ere tenabuka. Na ka wakai dimere yegl paugwa.

17 Ba ene Juda yoba meglkwa i we, No Juda yoba kra. God lo no norumiwa. God bogl si dakagl muniwa. 18 God nomanemo prumniwa. Te God lomo mina skul dumga pre No mabuno wakai pre mitna edumne digwa. 19 Te, yoba gumuglno kin yogwa i, konbauna obuno dumnedi prisre, mim meglkwa i, abuglageno munedi prisre, 20 du paigwa ya gak kebra neno yagle munedi prikwa. I siragl pre God lomo mabuno kaima ya ka kaima pre dugwa i, pre pogl si kodumnedi prikwa. 21 Ene yoba ka beke tenga i, enene ka beke teno? Yoba kunogl nekraiglmedi ka beke tenga i, ene kunogl neno? 22 Mo abu kunogl nekrio dinga i, ene abu kunogl neno? Taragl kibi kane kane kamage ere teigwa i, kide kaima pitnga ba ene ede lotu yuguno pidre, taraglno kunogl neno? 23 God lo narumedi kagin ake mitna edinga i, God kagie kide inabedi lomo si biglki dino? 24 God kamo bage ta okna yegl beglkwa, Yoba yugobuno pere meda meglkwa i, ene Juda yoba mabunono kandre, God kagie kide teimiwe* di, yegl beglkwa.

25 Ene Juda yoba nagino puduo nagie boglsre, yoba wakai munedi prikwa i, ene ege ege lo duglo beglbi, praiwa. Ba lo duglo boglkribi, yoba nagino puduo nagie boglkrikwa i bogl kuno meglkwa. 26 Te, nagino puduo nagie boglkrikwa i lo mudu dumere sika sibi, God ye Juda yoba mere meglmedi kanabuka. 27 Te, ene Juda yoba lo ake moglsre, nagino beglkwa ba nagino boglkrikwa yoba lo sika sibi, ene lo si biglki digwa yoba meglme dinaiglkwa.

28 Ka kaima yoba ta Juda yagl abu suo wano morabuka ba Juda kaima ta moglkrabuka. Te nagino beglkwa mabuno kaima i, nagino meda beglkwa pre ta manugwa. 29 Juda yoba kaima i, dem muduo suna ime God duglo boran, ye Juda kaima morabuka. Te nagino puduo kaima beglkwa i, lo dumere nagino meda boglkrikwa ba Mudu Murubuglo kiano mina eruko, kiano mina nagino beglkwa mere yegl paugwa. Yoba i, yoba ye debino sikraiglkwa ba God debino sinabuka.