1 Ana na ka komono ta diga i, yegl diga, yoba tadaglmeno u podo ogwa ba God ye yoba yoko kaima ere inagledi prukwa mabunomo i ama ede u podo kide kaima ome diga. Yegl pre nono siragl eramne? Nono prumun, God ege ege nono yoko kaima ere wakai ere noro pai morabuka keme paugwa pre nono tadaglme ere pai mun, aglau ta paikrumiwe di, nono yegl prisre, tadaglme aimadi ere pai moramno? 2 Mabuno yegl ka kaima ta erekramga! Nono Jisas bogl akie gunga pre nono tadaglme mabuno mina atne moglkrumga. Nono tadaglme mabuno mina atne moglkrumga pre tadaglme aimadi ere pai moramga i, kuno erekrukwa. 3 Nono Jisas bogl gune diga i, ene pre pogl sinaiglmedi prika. Yoba nigl atne eigo, nigl mogl winabo dumere mere yegl, God nono Jisas Krais moglmara i atne kra ede kodugo, atne mogl kodumga pre Jisas goglmara i, nono ye bogl akie gunga mere yegl paugwa. 4 God ye nono Jisas bogl i swara edugwa i, nono Jisas goglmara i ye bogl akie goglsre, akie kobuglo mur mina atne pai, ama Jisas bogl akie adigl u kor enaiglmedi erukwa. Krais goglko, God nem ye yobuglomo pai kawa togwa i, i nogugl ede, ye ere i kor edumere yegl, nono ama kiano mina ere i kor edugwa pre nono kor moglsre, mabuno kor eramga kuno erukwa.

5 Ana nono Jisas bogl u swara omga pre ye goglmere mere yegl nono ama gunga. Nono ye bogl akie gunga pre ye adigl u kor omere yegl nono ama adigl u kor enamga keme paugwa. Ka kaima nono ye bogl akie adigl u kor omga. 6 Nono prumga, Jisas ede prak mina goglkwa igne, God ye nono okna tadaglme yugobunomo mina atne munga i, ede prak mina si dudugwa. Ye yegl erukwa i, tadaglme yobuglomo dudinan, nono tadaglme niglmo kogonmo erekraiglmedi erukwa. 7 I siragl pre nono Jisas bogl akie gunga pre nono okna tadaglme mina atne kane pamga i, God ye nono kane pamnara no i meda edugwa.

8 Ana nono Krais bogl akie gunga pre nono prumga i, nono erme ye bogl akie kor moramga keme paugwa. 9 I siragl pre Krais goglsre, adigl u kor ogwa i, ye aglke kor ta goglkrabuka, aimadi kamun kor morabuka. I siragl pre geglkwa yobuglomo i ye si dudu kodugwa pre ye aglke kor geglkwa mabuno i mina atne moglkrukwa. 10 Jisas goglkwa i, ye ege swara keme goglsre, tadaglme yobuglomo si dudu kodugwa. Te, ye adigl u kor pidre, erme kor moglkwa i, ye God bogl akie miurka.

11 Ana Jisas goglsre, adigl u kor ogo, God bogl akie miurere yegl, ene ama yegl prio! Krais Jisas goglmara i, nono ye bogl akie gunga pre tadaglme mabuno i mina ta atne moglkrumnedi praiglkwa. Te, Jisas adigl u kor pidre, God bogl akie miurere kuno yegl, nono ama God bogl akie muniwedi praiglkwa. 12 Ene erme God bogl akie meglkwa pre tadaglme mabuno i ene bitno morabedi kanige erekrio! Nono ogono nagino bogl makandigle munga pre tadaglme mabuno nono bitno mere yegl moran, mabuno kide siragl mere ogono nagino mina pogglau borabuka i, duglo boramga i kuno ta erekrukwa. 13 Yegl pre ene ogono nagino tadaglme mabuno duglo boglsre, mabuno kide erabedi kanige erekrio! Ene yegl erekre, enene mudu meglmere God teo. Ene ta praiglkwa i, No goglsre, adigl ede u kor omgra we di prisre, ogono nagino mabuno du erabedi God teo! 14 I siragl pre erme tadaglme mabuno ene bitno morabuka i, kuno ta erekrukwa. Ene lo mina ta atne kra meglbi, kaima tadaglme mabuno ene bitno morabuka paugwa ba ene lo mina atne ta moglkrikwa. God ene yoko kaima ere wakai ere te moglko, ene ye moglmara swara i mina atne meglkwa pre tadaglme mabuno ene erme bitno moglkrabuka i, kuno paugwa.

15 Ana nono erme lo mina ta atne moglkre, God moglmara swara i mina atne munga pre, nono siragl eramne? God no wakai kan kodumedi prisre, tadaglme aimadi ere pai moramno? Kodo! Nono yegl ta erekramga. 16 Yoba niglno kogono yoba mabunono i, ene prikwa. Yoba ta niglmo kogonmo ere tenagledi prisre, ye kamo duglo boraluwe dinan, ye kaima yoba i moglmara mogl atne ede, niglmo kogonmo yoba morabuka. Kuno yegl mere, ene tadaglme mabuno duglo bogln, ene tadaglme mabuno mina atne mogl, niglmo kogonmo yoba mere yegl moglsre, goratnga. Ba ene God kamo duglo bogln, ene ye niglmo kogonmo yoba moglsre, mabuno du boratnga. 17,18 Ba na gun yedre, God di wakai yei teiga i, ene erme tadaglme mabuno niglmo kogonmo yoba moglkrikwa pre God di wakai yei teiga. Ene okna tadaglme mabuno mina atne kane paigwa ba yoba tau Jisas kamo ene beke teigo, ene deno muduno bogl pre mediglkwa. Yegl eriko, God ene tadaglme mina kane paimara i, ene i meda edugo, ene erme mabuno du niglmo kogonmo yoba mere yegl meglkwa.

19 Ana na ere mogl, yoba niglno kogono yoba pre ka ebrie diga i, ene pre pogl sinaiglkwa pre diga. Nono makandigle yoba munga i, mabunono yegl paugwa. Ege tau ka tau pre pogl sikrumga ba ka ebrie prumga igne, nomane idre, pre pogl sumga. Ana ene okna ere mogl, ogono nagino mabuno kide ya mabuno deglbi niglmo kogonmo ere tenabedi teigwa. Ene okna yegl erikwa pre mabuno kide mere kide plau dugwa. Yegl erikwa ba erme ene ogono nagino mabuno du niglmo kogonmo erabedi teo! Ene yegl eribi, God mabunomo ta pamere yegl eraiglkwa.

20 Ene okna tadaglme niglmo kogonmo ere teigwa igne, ene mabuno du i mina atne moglkrikwa. 21 Ene okna tadaglme mabuno swara i mina atne wan mogl, mabuno kide kane kane erikwa pre erme ene pre ikne edidre, agai geglkwa. Ene okna mabuno kide erimara i mina taragl wakai ta ene meglmara plau dumo? Ta manugwa. Mabuno kide i mina geglkwa mabuno keme plau dugwa. 22 Yegl paugwa ba ene okna tadaglme mina atne kane paigo, God ene i meda edugwa pre erme ene God yobama mogl kodidre, ye niglmo kogonmo yoba meglkwa. Te, ene okuo God bogl aimadi kamun kor moraiglkwa. 23 Nono tadaglme ere kodumga pre topomo geglkwa keme inamga paugwa. Topo yegl inamga paugwa ba ta ikunga. I siragl pre God ere mogl, nono Yaglno Kade Jisas Krais kogon erumara i mina, aimadi kamin kor moramga i, yoko kaima noro kodugwa.