1 Agrama abarama wagle, na God lomo pre ene ka tau di tenaglka. Ene God lomo pre kan erikwa pre na ka dinaglka i, ene pre pogl sinaiglmedi prika. Na God lomo pre ka dinaglka i, yegl dinaglka, God lomo i, yoba kor meglkwa i keme bitno moglkwa. Yoba geglkwa i, ye lo mina atne moglkrikwa. 2 Na ka ebrie swara ta dibo, pramga. God lomo dugwa i, yagl abu ta bogl ibr, abu i ye wie kor morabuka igne aimadi ye bogl akie morabre dugwa. Ba ye wie goran, abu i lo i mina ta atne moglkrukwa pre ye yoko moglkwa. 3 Yegl pre abu wie ta kor moran, ye ede yagl kor ta enan, abu i yagl kunogl nome dinamga. Yegl dinamga ba ye wie ta goran, abu i lo i mina atne moglkre, yoko moglkwa pre ye yagl kor ta enan, ye yagl i kunogl nekrukwa.

4 Ana na lo pre diga i, yegl pre diga, Krais ede prak mina goglkwa igne i ene akie geglkwa pre ene erme lo mina atne moglkrikwa. God ene Jisas bogl akie goraiglmedi erukwa i, ene Jisas bogl swara kaima moglsre, akie adigl u kor ebi, God ene mabuno wakai ta boraiglmedi prumere yegl, ene boraiglkwa pre erukwa. 5 Nono okna deno muduno goglo pamara i mina atne munga igne, God lomo prumga ba nono prisre, duglo boglkunga. God lomo tadaglme pre dugwa i nono prisre, tadaglme keme poglo di pre, ere ede podo enamnedi punga. Tadaglme kane kane munara pogglau boglko, nono ogono nagino mina tadaglme kane kane ersre, kiano mina gogl kodumga. 6 Ba erme we, Jisas goglmara i nono akie gunga pre lo mina atne moglkrumga. Okna lo mina atne kane pamga ba God nono i meda edugo, erme lo mina kane paikre, yoko munga. Nono okna God kogonmo eramnedi erumga i, ye lomo bogl atne edimara i duglo bogl, kogonmo eramnedi erumga ba erme nono kogon yegl eramnedi erumga i kide kodo, ye Murubuglomo swara yobuglo bogl noran, God kogonmo kaima eramga pre God nono i meda edugwa.

7 Yegl paugwa pre God lomo kide yome dinamno? Ka kaima yegl ta dikramga. I siragl pre ye lomo i mina nono tadaglme mabuno siragl mere paugwa i pre kan erumga. God lomo, Bubuno goglkrio*ta dikruma, na mabuno kide ta erekriedi priko. 8 Yegl pre God lomo Yoba pere taraglno bubuno goglkrio dugwa i, wakai dugwa ba na lo i prika igne, tadaglme mabuno na moglmara atne paugwa i kogon podo ere, na taragl kane kane bubuno goratnedi eruko, na bubuno goglka. I siragl pre lo ta paikrukwa igne, tadaglme yobuglomo ta paikrukwa ba lo paugwa igne, tadaglme yobuglomo paugwa.

9 Ana na okna God lomo kaima pre pogl sikrika igne, kor mogl, wakai moglka. Yegl erika ba okuo na God lomo siragl mere dugwa i pre pogl siga igne, tadaglme yobuglo ere, na si goglkwa mere yegl paugwa. 10 God lomo i, yoba duglo beglbi, kor moraiglkwa pre yogwa ba na duglo boglkrika pre God lomo na moglmara i, geglkwa mabuno i nogugl ede narukwa. 11 I siragl pre God lomo yegl dumiwedi tadaglme na bakagl nare, na ake nu si, na si goglkwa. 12 Yegl pre nono pre pogl sinamga. God lomo ya ye siragl mere erio didre, erekrio dugwa i, yene dugwa pre wakai pai, du paugwa.

13 Ana na diga, God lomo wakai yome diga ba na ka ta ama diga i, God lomo na moglmara i, geglkwa mabuno i nogugl edume diga. Yegl pre siragl we dinamne? God lomo na si goglme dinamno? Ka kaima yegl ta dikramga. Tadaglme na si goglkwa. Tadaglme ere mogl, God lomo yegl yegl dumiwedi, na si biglke dinabedi ake nu si, na si goglkwa. Te, God ye tadaglme na moglmara kogon siragl mere ta erabuka i erabedi kanige erukwa i, na God lomo mina nomane idre, tadaglme i taragl kide kaima yomedi kanaglka pre kanige erukwa.

14 Ana nono prumga, God lomo i, God yene di norukwa pre wakai yogwa. God lomo wakai yogwa ba na makandigle yoba moglka. Na yobuglna paikrukwa pre tadaglme yobuglo ere mogl, na si kane sugo, na tadaglme niglmo kogonmo ere teiga. 15 Na mabuno tau erika i, siragl pre erie? di, kinana gudu moglka. I siragl pre na mabuno tau eragledi prika i, erekre, mabuno tau kide pre, erakiurka i erika. 16 Na mabuno kide erekragledi prika pre na God lomo wakai yomedi prika i, nogugl paugwa. 17 Yegl pre na kaniga mabuno kide i, na nana ta erekrika ba tadaglme na dena muduna mina suna paugwa i, erukwa. 18 I siragl pre na pre kan erika i, na dena muduna goglo paugwa i mina taragl wakai swara kaima ta paikrukwa. Na mabuno wakai keme eragledi prika ba na yobuglna ta paikrukwa pre na ta erekrika. 19 Na di kodiga, na mabuno wakai eragledi prika i erekre, mabuno kide na ta erekragledi prika i, na erika. 20 Ba na kaniga, nana mabuno tau erakiurika i erika pre na nana erekrika ba tadaglme na dena muduna mitna atne paugwa i erukwa.

21 Ana na mabuno yegl mere paugo, kaniga, na mabuno wakai eragledi prika ba mabuno kide ama magigl mogl, na yobuglo ere narukwa mere yegl pamedi kaniga. 22 I siragl pre na nomana mina God lomo wakai kaima yomedi prika. 23 Yegl prika ba na ama kaniga i, tadaglme mabuno ogona nagna mina atne pai mogl, na nomana mina kuda bogl tedre, yobuglo ere, na si kane sumedi kaniga. 24,25 Aya! Na yagl kide kaima ta moglka. Na nomana mina God lomo mina atne mogl, dugl boragledi prika ba na dena muduna goglo paugwa i, tadaglme mabuno mina atne moglkwa pre tadaglme keme eratnedi prukwa. Na erme ogona nagna gogl, burabuka i mina atne kane pai, tadaglme ere moglka. Ira na ere inabe? Na God di wakai yei teiga i, nono Yaglno Kade Jisas Krais kogon erumara i mina na ere i kodugwa pre di wakai yei teiga.