13 ڮال مولانا للنبي نوح: جات نهاية هاذا الزمن، ولاهي انفرق البشر كاملين من الوجود بيهلي بسببهم امتلات لارض من الظلم. لاهي انبيدهم وانبيد لارض امعاهم. 14 وعدل لراصك سفينة من لعمد لمتان، وابني فيها ابيوت وادهنها بالطين من الڮدام ومن النڮر اياك الما ما يدخل فيها. 15 وتبينها بهاذي الطريقة: طول السفينة يعود 150 ميتر، وعرظها يعود 25 ميتر، وطولها اعلى الفوڮ يعود 15 ميتر. 16 واتعدل فيها مغطاية يعود امبينها امع السفينة 50 سانتيمتر، واتعدل فيها باب، واتعدل فيها ثلاثة طوابق، التحتاني والوسطاني والفوڮاني.

1 ومن فم ڮال الله تعالى للنبي نوح: ادخل فالسفينة انتا وكل أسرتك، بيَّلي اجبرتك وحدك صالح فهاذا الجيل.

7 وادخل النبي نوح فالسفينة هو وأولادو واعيالو واعليات أولادو اياك يسلكو من ما الطوفان. 8 ودخلو املي الحيوانات لحلال والحيوانات اللي ماهم احلال والطيور والحيوانات اللي يزحفو اعلى اكروشتهم. 9 وجاو للنبي نوح ودخلو فالسفينة اعلى شكل أزواج اذكر ونيثي كيف ما اطلب مولانا من النبي نوح. 10 وعاڮب اسبعة أيام جا الطوفان اعلى لارض.

16 اذكر ونيثي من كل مخلوق كيف ما اطلب مولانا من النبي نوح. وعاڮب ذاك اڮفل الله تعالى باب السفينة.

17 وواصل الطوفان مشيه اعلى لارض مدة 40 يوم، ورڮب ما الطوفان السفينة فوڮ لارض. 18 وكانت المياه الياسرة اتواصل مشيها اعلى لارض والسفينة ماشة فوڮ الما.

23 وفرق مولانا من اعلى سطح لارض كل مخلوق اسوا من البشر والحيوانات والزواحف واطيور السما، كاملين فرقو من لارض ولا ابڮا ماهو نوح واللي امعاه فالسفينة.

3 واتراجعت المياه عن لارض اشوي اشوي. وعاڮب 150 يوم، 4 فاليوم 17 من الشهر السابع، وڮفت السفينة اعلى اكدا أراراط.

6 وعاڮب 40 يوم افتح النبي نوح الكوة اللي عدل فالسفينة. 7 ومشّا اغراب واتم طاير فوڮ لارض يلين بدات المياه تيبس عن لارض. 8 وعاڮب ذاك مشّا النبي نوح احمامة اياك يشوف إلى عادت المياه يبست عن لارض. 9 ولا اجبرت لحمامة ابليدة تنزل فيها بيهلي المياه مزالت امغطية لارض كاملة. ورجعت لحمامة شور النبي نوح فالسفينة. ومد ايدو واحكمها ودخلها شورو فالسفينة. 10 وحانا اسبعة أيام اخرين ومشّا لحمامة من السفينة مرة اخرا. 11 ورجعت شورو امع اغروب الشمس رافدة فخشمها ورڮة من صدراية الزيتون اجديدة. وافهم النبي نوح اعلن المياه مصتها لارض. 12 وحانا اسبعة أيام اخرين وبعدين مشّا لحمامة ولا رجعتلو هاذي المرة.

13 وفاليوم لأول من الشهر لأول من سنة 601 من حياة النبي نوح، فهاذا الوقت كانت المياه بدات تيبس عن لارض. وارفع النبي نوح مغطاية السفينة وشاف اعلن لارض تيبس حته.

15 وكلم مولانا النبي نوح وڮالّو: 16 اوخظ من السفينة انتا واعيالك وأولادك واعليات أولادك. 17 ووخظ كل نوع من المخلوقات الحيين اللي امعاك، من الطيور والحيوانات والزواحف اياك يتوالدو فلارض ويكثارو.

8 وكلم مولانا النبي نوح وامعاه أولادو وڮالّو: 9 آنا ظرك لاهي انعدل عهدي امعاكم وامع نسلكم اللي جاي اوراكم. 10 وامع كل مخلوق حي امعاكم من الطيور والحيوانات اللي يُربّاو وكل حيوانات لخلا، وكل اللي خاظ من السفينة وكل مخلوق حي اعلى لارض. 11 ولاهي انعدل عهدي امعاكم ولا تيت لاهي نسمح باعلن اتفرق مياه الطوفان كل مخلوق حي مرة اخرا، ولا تيت لاهي نسمح باعلن الطوفان يجي ويخسر لارض مرة اخرا.

13 لاهي اندير خط الندية فالسما ويعود علامة العهد امبيني وامبين لارض.