1 واخلڮ فذيك الساعة عن يهوذا اتفرڮ عن اخوتو واسكن عند راجل من عدلام اسمو حيرة. 2 وشاف فم منت راجل كنعاني اسمو شوع واتخيم امعاها. 3 وحملت منو وخلاتلو اطفيل سماه عير. 4 وحملت مرة اخرا وخلات اطفيل وسماتو أونان. 5 و عاڮب ذاك حملت مرة اخرا اطفيل وسماتو شيلة وكان يهوذا فمدينة كزيب وقت اخلاڮة ولو.

6 واڮبظ يهوذا لبكرو عير امرة اسمها ثامار. 7 وبيهلي عير كان إنسان شرير، كتلو الله تعالى. 8 وڮال يهوذا لأونان: ادخل شور اعيال خوك واتكي امعاها وعدل لخوك نسل اياك يزيد اسم عير خوك اللي اتوفا . 9 واعرف أونان اعلن النسل ماهو لاهي يعود لو وكان كل مرة يتكي امع اعيال خوه يصب منيه اعلى التراب اياك ما يعدل لخوه نسل. 10 وكانت شغلتو هاذي ماهي زينة فعينين الله تعالى وكتلو املي. 11 وڮال يهوذا لثامار انسيبتو: خليك أرملة فدار بوك يلين يكبر ولي شيلة. وڮال يهوذا امبينو امع راصو: ما اندور يموت شيلة كيفما ماتو اخوتو. وامشات ثامار وابڮات فدار بوها.

12 وعاڮب فترة من الزمن اطويلة ماتت اعيال يهوذا اللي هي منت شوع. وإلين اوفات التعزية امشا يهوذا شور الرواڮيج اللي كانو يززو غنمو فتمنة وامعاه صاحبو حيرة العدلامي. 13 وانڮال لثامار: اراعي انسيبك جاي لتمنة اياك يزز غنمو. 14 وڮامت وفسخت الباس لأرملة وغطات اوجهها اياك تتخفا اعليه وڮعدت عند مدخل عينايم اللي اعلى طريڮ تمنة بيهَلي عرفت اعلن شيلة اكبر وماهم لاهي يخيموها امعاه. 15 وإلين شافها يهوذا شك اعلنها امرة سفيهة بيهَلي كانت امغطية اوجهها.

16 وصد شورها فزر الطريڮ وڮال: خليني انعاشرك. ولا كان شاك اعلنها انسيبتو. وڮالت: شلاهي تعطيني اياك اتعاشرني؟ 17 وڮالها: لاهي انمشّيلك اجدي من غنمي. وڮالتلو: مندرا يكانك لاهي تعطيني شي ترهن بيه يلين اتمشّيلي اجديك؟ 18 وسولها: شنهي الضمانة اللي تبغي نعطيك؟ وڮالتلو: خاتمك واڮلادتك ودبوسك اللي رافدهم . واعطاها ذاللي طلبت وعاشرها وحملت منو. 19 وعاڮب ذاك ڮامت وامشات وكشحت عن اوجهها ولبست الباس لأرملة.

20 وإلين مشّا يهوذا اجدي امع صاحبو العدلامي اياك يڮبظ ذاللي ارهن بيه من عند لمرة، ما اجبرها. 21 وسول الرجالة اللي ساكنين فم: وينهي لمرة السفيهة اللي كانت ڮاعدة اعلى الطريڮ فعينايم؟ وڮالو: ما كانت هون فذي لبليدة أي امرة سفيهة . 22 وارجع شور يهوذا وڮالّو: ما ريتها وڮالولي أهل ذيك لبليدة: هون ما كانت فيه أي امرة سفيهة . 23 وڮالّو يهوذا: خليها تحكم ذاللي عندها، آنا ما اندور يجوقو الناس فيَّ. آنا حاولت انمشّي هاذا اجدي اياك انخلصها يغير انتا ما اجبرتها.

24 وعاڮب 3 اشهر انڮال ليهوذا: انسيبتك ثامار هي ازنات وحملت. وڮال يهوذا: مرڮوها اياك تنحرڮ بالنار . 25 وإلين وخظوها مشّات لانسيبها وڮالت: آنا احملت من صاحب هاذو لأشياء . اتحقق لمن هاذا الخاتم وهاذي لڮلادة والدبوس؟ 26 واعترف يهوذا اعلن هاذو لأشياء لو وڮال: هي أصلح مني بيَّلي ما عرستها من ولي شيلة. ولهاذا السبب ما ڮط عاشرها يهوذا عاڮب ذاك.

27 وإلين ابرات جبرو اعلن فكرشها اتواما. 28 ووقت بريها وخظ واحد من اتريكتها ايدو وحزمت فيه لولادة شرويطة حمرة وڮالت: هاذا خاظ هو لأول. 29 يغير هو رجع ايدو وخاظ خوه وڮالت: شنهي ذي الوخظة اللي خظت ؟ واُسما فارص اللي معناها الوخظة . 30 وعاڮب ذاك خاظ خوه وايدو محزومة بشرويطة حمرة واُسما زارح.