1 ودنكس النبي يوسف اعلى بوه وابكا اعليه وضمو شورو. 2 واطلب النبي يوسف من أطبائو الخاصين اعلنهم يحنطو بوه. وحنطو لأطباء النبي إسرائيل. 3 واعطاو 40 يوم يحنطوه وابكاو اعليه المصريين مدة 70 يوم. 4 وإلين اوفات فترة التعزية اتكلم النبي يوسف امع أهل دار فرعون وڮال: يلين اتعودو تبغوني وراضيين اعليَ، اندوركم تتكلمو امع فرعون واتڮولولو: 5 آنا بويَ حلفني وڮالي: آنا عدت لاهي انموت واندورك تدفني فلقبر اللي احفرت لنفسي فارض كنعان. وظرك طالبك اعلنك اتخليني نمشي اياك ندفن بويَ وعاڮب ذاك لاهي نرجعلك. 6 وڮالّو فرعون: ڮوم وامشي وادفن بوك اللي استحلفك. 7 وامشا النبي يوسف اياك يدفن بوه وامشاو امعاه ضباط فرعون والوجهاء كاملين اللي فارض مصر. 8 وامشاو املي أهل دار النبي يوسف كاملين و أهل النبي يعقوب كاملين ، ولا خلاو اوراهم فارض جاسان ماهو التركة ولعليات و حيوانهم. 9 وامشاو امع النبي يوسف مركبات وفرسان وكانو اجماعة اكبيرة.

10 وإلين لحڮو حرث أطاد اللي اعلى الزر الشرقي من نهر الأردن، ڮامو يبكو فم اعلى النبي يعقوب وخلاهم النبي يوسف يبكو لمدة 7 أيام. 11 وامنين شافو الكنعانيين اللي ساكنين فذيك لبليدة، المصريين يبكو فحرث أطاد ڮالو: المصريين يبكو بكي امتين. وسماو ذيك لبليدة أبل مصراييم (اللي معناها بكي المصريين ) وهي فشرق نهر الأردن.

12 وبهاذي الطريقة عدلو أولاد النبي يعقوب ذاللي وصاهم بيه بوهم 13 ورفدوه شور ارض كنعان ودفنوه فالحرث اللي فالمكفيلة اللي اڮريب من ممرا، وهو الحرث اللي اشراه النبي إبراهيم من عفرون الحيثي اياك يعود مقبرة. 14 و عاڮب يلين ادفن بوه، رجعو شور مصر النبي يوسف و اخوتو والناس كاملة اللي جات امعاهم اياك يدفنو بوهم.

15 وحسو اخوت النبي يوسف بالخوف بيهلي بوهم مات وڮالو امبيناتهم: يڮد يوسف ينتقم منا اعلى ذاللي عدلنالو . 16 وڮامو و مشّاو رسالة للنبي يوسف اتڮول: وصانا بوك سابڮ يموت وڮالنا: 17 ڮولو ليوسف: اخوتك عدلولك شي خاسر حته يغير طالب منك اتسامحهم اعلى جريمتهم و ذنبهم. وظرك نحنا طالبين منك اعلنك تسمحلنا جريمة ذاللي عدلنا نحنا اعبيد إله بوك. وابكا النبي يوسف بسبب رسالتهم. 18 وڮاسوه اخوتو وسجدو ڮدامو وڮالو: نحنا اراعينا عدنا اعبيد لك. 19 يغير النبي يوسف ڮالهم: لا اتخافو! مندرا يكاني آنا مولانا اياك انحاكمكم اعلى اذنوبكم؟ 20 انتوما انويتو بيَّ الشر يغير مولانا انوا بيَّ الخير، واقصد مولانا اعلنو يحقق هاذي النتيجة ، اعلنو يخلي ياسر من الناس يحياو. 21 ولا اتخافو، وآنا لاهي انعيلكم وانصير اعلى أولادكم. وبهاذي الطريقة رَيح اڮلوبتهم.

22 وابڮا النبي يوسف هو و أهل بوه فمصر وعاش النبي يوسف 110 سنوات. 23 وعاش النبي يوسف وشاف أولاد أفرايم واحفادو. وهو شاف املي أولاد ماكير ول منسى. وانتسبو أولاد ماكير للنبي يوسف. 24 وڮال النبي يوسف لاخوتو: آنا عدت لاهي انموت يغير مولانا امعاكم ولاهي يهتم بيكم ولاهي يوخظكم من هاذي لارض شور لارض اللي اتعهد بيها للنبي إبراهيم والنبي إسحاق والنبي يعقوب. 25 وحلّف النبي يوسف أولاد إسرائيل وڮالهم: يلين يوخظكم مولانا من هاذي لارض ارفدو اعظامي من هون. 26 وعاڮب ذاك مات النبي يوسف وهو عمرو 110 سنوات. وحنظوه وداروه فتابوت فمصر.