1 وڮام النبي إسحاق وعيط ليعقوب واطلبلو البركة ووصاه اعلنو لا يتخيم امع اعليات كنعان. 2 وڮالّو: ڮوم وامشي شور واد أرام شور دار بتوئيل بو أمك واتخيم امع وحدة من امنات خالك لابان. 3 ومولانا القدير يعطيك البركة ويعدلك مثمر اياك يتفرعو منك ياسر من لأُمم. 4 ويعطيك انتا وذريتك بركة النبي إبراهيم اياك تورث لارض اللي عايش فيها ظرك كيفت أجنبي، هاذي لارض اللي اعطاها مولانا للنبي إبراهيم. 5 ومشّا النبي إسحاق يعقوب، وڮاس يعقوب واد أرام بل امنين ساكن لابان ول بتوئيل لأرامي، خو رفقة، اللي هي أم عيسو ويعقوب.

6 وشاف عيسو اعلن النبي إسحاق اطلب البركة ليعقوب ومشّاه شور واد أرام اياك يختار من فم اعيالو. وشاف املي اعلن وصا النبي إسحاق يعقوب وڮالّو: لا تتخيم من أي امرة كنعانية. 7 ويعقوب اسمع لوالديه وامشا شور واد أرام. 8 واعرف عيسو اعلن اعليات كنعان ما رضاو النبي إسحاق. 9 ڮام وامشا شور عمو إسماعيل واتخيم امع محلة خت نبايوت ومنت إسماعيل ول النبي إبراهيم وزادها امع اعلياتو لخرات.

10 ويعقوب امشا من بئر السبع واعد حاران. 11 وفطريڮو اجبر ابليدة وبات فيها بيهلي عاد وقت اطياح الشمس. واڮبظ حجرة ودارها احذا راسو وبات فم. 12 واحلم حلم وشاف فيه امطاليع اعلى لارض وراسهم ماس السما وملايكة مولانا يطلعو وينزلو اعليهم. 13 والله تعالى نفسو فوڮهم يڮول: آنا هو الله تعالى إله جدك إبراهيم وإله بوك إسحاق، والتراب اللي تاكي اعليها ظرك لاهي نعطيهالك ولذريتك 14 اللي لاهي اتعود ياسرة كيف احصي التراب ولاهي اتڮيس الغرب والشرڮ والشمال والجنوب ويتباركو شعوب لارض كاملين بسببك انتا وذريتك. 15 آنا اراعيني امعاك نرعاك شور بل امنين ڮايس ولاهي انرجعك شور هاذي لارض ولاني لاهي انخليك مافت عدلتلك ذاللي اتعهدتلك بيه كامل. 16 ومن فم اوعا يعقوب من ارڮادو وڮال: فالحقيقة الله تعالى حاضر هون وآنا ما كنت عالم بيه. 17 وانخلع النبي يعقوب وڮال: هاذي لبليدة المقدسة، تشابه لدار مولانا وباب الجنة.

18 وبكر يعقوب امع الصباح واڮبظ الحجرة اللي دارها احذاه وقت ارڮادو ووڮفها ودار اعليها شي من الزيت اياك يخصصها لمولانا. 19 وسما هاذي لبليدة بيت إيل اللي معناه دار مولانا. وكان اسم المدينة سابڮ ذا هو لوز. 20 وانذر النبي يعقوب نذر وڮال: إلى عاد مولانا امعايَ وارعاني فهاذي الطريڮ اللي ماشي فيها واعطاني اوكيل نوكلو واعطاني الباس نلبسو، 21 وارجعت سالم لدار بويَ، لاهي انعدلو إلهي، 22 واتعود هاذي الحجرة اللي وڮفتها هي دار مقدسة لمولانا ولاهي نعطيك العشر من ذاللي ترزقني بيه.