1 واسكن النبي يعقوب فارض كنعان بل امنين كان بوه النبي إسحاق متغرب . 2 وهاذي هي امردة النبي يعقوب.

فالوقت اللي كان فيه يوسف اصغير عندو 17 سنة امشا يسرح لغنم امع اخوتو اللي أولاد بلهة وزلفة اعليات بوه النبي يعقوب. وڮام يوسف وبلغ بوه النبي يعقوب بلأمور اللي ماهي زينة اللي يعدلو اخوتو. 3 وكان النبي يعقوب اللي هو إسرائيل يبغي يوسف أكثر من أولادو لخرين بيهلي يوسف جبرو وهو شيباني وخيط النبي يعقوب ليوسف لبسة مميزة. 4 وإلين افطنو اخوتو اعلن النبي يعقوب يبغي يوسف أكثر منهم كرهوه وعادو يڮولولو لكلام الخاسر يوم عاڮب يوم.

5 واحلم يوسف حلم وردو اعلى اخوتو وبسبب ذاك كرهوه حته . 6 وڮالهم: اسمعو ذا الحلم اللي احلمتو، 7 آنا شفت فالحلم اعلنا نحزمو شي من اعراش الڮمح فالحرث وشفت حزمتي ڮامت ووڮفت وازڮنو بيها احزمكم وسجدولها . 8 وڮالولو اخوتو: انتا معناه اعلنك اتدور اتسودنا وللا تملك اعلينا؟ وكرهوه حته بسبب أحلامو واكلامو.

9 واحلم يوسف حلم اوخر وردو اعلى اخوتو وڮالهم: احلمت حلم اوخر وشفت فيه اعلن الشمس والقمر و11 نجمة سجدولي. 10 ورد الحلم اعلى اخوتو واعلى بوه. ونصحو بوه وڮالّو: ذا الحلم اللي احلمتو شنهو ؟ انتا شاك اعلني آنا وأمك واخوتك لاهي انجوك ونسجدولك؟ 11 وحسدوه اخوتو يغير بوه النبي يعقوب لم هاذا لكلام فڮلبو.

12 وعاڮب ذاك امشاو اخوتو اياك يسرحو اغنم بوهم اڮريب من مدينة شكيم. 13 وعاڮب فترة من الزمن ڮال النبي إسرائيل ليوسف: اخوتك مالهم يرعاو لغنم فشكيم؟ وهاي اياك انمشّيك شورهم. وڮال يوسف: اراعيني. 14 وڮال النبي يعقوب: امشي واعرفلي اخبار اخوتك واخبار لغنم وارجعلي واعطيني اخبارهم. وامشا يوسف من واد حبرون يلين شكيم. 15 واجابر امعاه راجل جبرو ذاهب فالحرث وسولّو: انتا اتلود لمن؟ 16 وڮالّو يوسف: آنا انلود لخوتي، حڮلا ڮولّي بل امنين يسرحو اغنمهم ؟ 17 وڮال الراجل: هوما امشاو من هون واسمعتهم يڮولو: وهاو نمشو شور دوثان. واتلب يوسف اثر اخوتو يلين اجبرهم فدوثان. 18 وإلين شافوه من ابعيد وسابڮ يڮرب منهم اتأمرو اعليه اياك يكتلوه. 19 وڮالو امبيناتهم: اراعي صاحب لأحلام جاي. 20 وهاو نكتلوه ونزرڮوه فواحد من هاذو الحسيان وانڮولو اعلن كالو حيوان لخلا وانشوفو يكان أحلامو لاهي يوفاو؟ 21 وإلين اسمع رأوبين اكلامهم اختر يسلكو وڮال: ما نكتلوه 22 لا اتسيلو الدم ، يغير زرڮوه فهاذا الحاسي اللي فالخلوات ولا اتمدولو ايديكم بالخاسر. رأوبين اقترح ذاك بيهلي كان يدور يجبر طريقة يسلكو بيها منهم ويرجعو لبوه. 23 وإلين جا يوسف لخوتو فسخولو لبستو المميزة. 24 وڮبظوه وزرڮوه فالحاسي وكان الحاسي ما فيه الما.

25 وإلين ڮعدو اياك يوكلو الطعام شافو من ابعيد رفڮة من أولاد إسماعيل جاية من جلعاد ماشين واعدين مصر واجمالهم امحملة من لبهارات وأنواع من العلك وأنواع من الزيوت للعلاج. 26 وڮال يهوذا لخوتو: شنهي الفايدة من اكتيل خونا و انسيلو دمو؟ 27 وهاو انبيعوه لأولاد إسماعيل وانبرأو ايدينا من دمو بيهلي هو خونا ومن لحمنا، ووافقوه اخوتو اعلى ذي الفكرة .

28 وإلين ڮربو منهم أولاد إسماعيل اللي كانو تجار من مديان، ڮامو اخوت يوسف ووخظوه من الحاسي وباعوهلهم بعشرين ڮطعة من الفظة وامشاو التجار بيوسف شور مصر. 29 وعاڮب فترة من الوقت، جا رأوبين للحاسي اياك يسلك يوسف. وإلين ما جبرو أشيان عندو ذاك وشطط الباسو بيه الحزن. 30 وارجع رأوبين شور اخوتو يڮول: الطفيل ماهو فالحاسي! وآنا ظرك شلاهي انڮول لبويَ؟ 31 وڮبظو اخوت يوسف لبستو المميزة وذبحو عتروس وغمسو لبسة يوسف فدم العتروس 32 وامشاو بلبسة يوسف شور بوهم النبي يعقوب وڮالولو: نحنا اجبرنا هاذي اللبسة. و خرص يكانها لولك يوسف وللا ابدي؟ 33 وشاف النبي يعقوب اعلن هاذي اللبسة هي ليوسف وڮالهم: هاذي اللبسة لولي. وحش من الخلوات انتش من لحمو وكالو. 34 وكدر النبي يعقوب من هاذا الخبر وشطط الباسو والبس الباس التعزية وابكا ياسر من لأيام اعلى يوسف. 35 وإلين جاو أولادو كاملين اياك يعزوه ابالهم وڮالهم: آنا لاهي نبكي إلى يوم موتي اعلى ولي يوسف. وابكا النبي يعقوب اعلى يوسف. 36 وباعو تجار الإسماعيلين يوسف فمصر لفوطيفار ضابط لفرعون ورئيس الحرس.