1 واخلڮ عاڮب يلين اسكن النبي يعقوب وأسرتو فمدينة شكيم، اعلن خاظت دينة منت ليئة اللي خلاتها للنبي يعقوب اياك تتعرف اعلى طافيلات جيرانهم اللي احذاهم. 2 فذا شافها شكيم ول حمور الحوي شيخ ذيك لبليدة واڮبظها واغتصبها وضيع شرفها. 3 وانغرم ڮلبو بدينة منت النبي يعقوب وابغاها وڮال اعليها الشعر. 4 وڮال شكيم لبوه حمور: اطلبلي هاذي لمرة من عند أهلها اياك نتخيم امعاها.

5 واسمع النبي يعقوب اعلن شكيم ضيع شرف منتو دينة. وكانو أولاد النبي يعقوب فذا الوقت يرعاو لغنم فالخلوات وتم ساكت النبي يعقوب يلين رجعو أولادو. 6 وجا حمور بو شكيم لنبي يعقوب اياك يخطب لولو دينة منت النبي يعقوب. 7 وجاو أولاد النبي يعقوب من الخلوات عاڮب يلين سمعو لخبار. وكانو منفڮعين ومجلجين بيهلي شكيم ارتكب جريمة فإسرائيل باغتصابو المنت النبي يعقوب وهاذي فاحشة. 8 وڮال حمور: ولي شكيم ابغا منتكم ونختير نطلبهالو منكم اياك يتخيم امعاها. 9 ناسبونا وعرسونّا امناتكم واتعرسو امع امناتنا 10 وعيشو امعانا ولارض اراعيها ڮدامكم تاجرو فيها وسكنو وملكو فيها. 11 وڮال شكيم لبوها واخوتها: خلوني نحظا برضاكم، ذا كامل اللي اتدورو لاهي نعطيهلكم. 12 لاهي نعطيكم الصداق ذاللي تطلبو مني. وذاللي اندور هو اعلنكم اتخيموني امع منتكم.

13 وجاوبو أولاد النبي يعقوب شكيم وبوه حمور بنوع من التخزية بيهلي شكيم ضيع شرف ختهم. 14 وڮالولهم: ما انڮدو انخيمو ختنا امع راجل ماهو مزين بيهلي هاذا عار عندنا. 15 يغير نحنا انوافقو اعلى طلبكم يلين اتعودو كيفتنا واتزينو كل اذكر فيكم. 16 وعاڮب ذاك عدنا انڮدو انخيموكم امناتنا و نتخيمو نحنا املي من امناتكم وانعيشو امبينكم وانعودو شعب واحد. 17 وإلين ما تسمعونا وما اتزينو رجالتكم لاهي نڮبظو ختنا ونمشو بيها.

18 وازيان اكلامهم عند حمور وعند ولو شكيم. 19 وما ابطا شكيم عن يُزيّن بيهلي كان يبغي دينة منت النبي يعقوب. وكان املي اكبير فعين بوه وأهلو. 20 وجاو حمور و ولو شكيم شور مجلس اللي كان عند باب المدينة وڮالو لرجالتها: 21 هاذو الڮوم هوما اجماعة عايشين فسلام امعانا. اعطونا انخلوهم يعيشو فلارض ويتاجرو فيها بيهلي لارض واسعة ڮدامهم وانڮدو نتخيمو امع امناتهم ويتخيمو امع امناتنا. 22 ڮالونّا عنهم اياك يڮدو يعيشو بيناتنا ويعودو امعانا شعب واحد، يالتنا انزينو كل اذكر فينا. 23 عاڮب ذاك يعود حيوانهم واغنمهم وكل ذاللي يملكو هو لنا. خلونا انوافقوهم اعلى ذاللي طلبو منا اياك يعيشو بيناتنا.

24 واڮبلو الرجالة كاملين اللي كانو الحاضرين فمجلس المدينة كلام حمور وشكيم اعلن يُزيّن كل اذكر فالمدينة.

25 وفالنهار الثالث فالوقت اللي كانو الرجالة حاسين بألام الزيانة، ڮامو شمعون ولاوي أولاد النبي يعقوب واخوت دينة وڮبظو اسيوفهم ودخلو المدينة وكتلو الذكور كاملين. 26 وكتلو املي حمور وشكيم بالسيف وڮبظو دينة من دار شكيم وامشاو بيها امعاهم. 27 وجاو أولاد النبي يعقوب للمدينة اللي فيها الرجالة اللي ماتو وڮبظو كل شي فالمدينة بيهملي ضيعو شرف ختهم. 28 وڮبظو اغنمهم وابڮرهم واحميرهم وكل شي اوخر فالمدينة وفحرايثهم 29 وحبسو تركتهم واعلياتهم كاملين ونهبو ثروتهم كاملة وكل ذاللي كان فالديار.

30 وڮال النبي يعقوب لشمعون ولاوي: انتوما جبتولي المشاكل وكراهية الكنعانيين والفريزيين اللي ساكنيين فهاذي لارض، ونحنا كيفما تعرفو اجماعة اڮليلة وإلين يجتمعو ضدي ويهجمو اعليَّ لاهي نهلك آنا وداري. 31 وڮالّو شمعون ولاوي: مندرا يكان من حقو يعامل ختنا كيفت امرة عاهرة؟