1 وواصل النبي يعقوب رحلتو يلين لحڮ لارض حاران. 2 وخرص فزرو وشاف حاسي فحرث وشاف عندو 3 ڮلفات من لغنم يرعاو احذا الحاسي بيهلي كانو الناس يسڮو ڮلفات لغنم من ذا الحاسي. وكانت الحجرة اللي اعلى فم الحاسي اكبيرة. 3 وكانو رعيان لغنم كاملين يجتمعو عندها ويكحزو الحجرة عن فم الحاسي ويسڮو اغنمهم وعاڮب ذاك يرجعو الحجرة مرة ثانية اعلى فم الحاسي.

4 وڮالهم النبي يعقوب: يا اخوتي انتوما جايين من امنين؟ وڮالولو: نحنا جايين من حاران. 5 وڮالهم: مندرا يكانكم تعرفو لابان ول ناحور؟ وڮالولو: اهيه نعرفوه حته. 6 وڮالهم: شماسي هو؟ وڮالولو: هو معافي، واراعيها منتو راحيل جاية امع اغنمهم. 7 وڮالهم النبي يعقوب: النهار ذا هو مزال اطويل وظرك ما هو وقت اجميع لغنم. ڮومو تسڮو لغنم وامشو تسرحوهم. 8 وڮالولو: ما انڮدو انعدلو ذاللي ڮلت سابڮ يجتمعو ڮلفات لغنم كاملين ورعيانهم اياك انڮومو وانكحزو الحجرة اللي اعلى فم الحاسي ونسڮو لغنم.

9 وفالوقت اللي كان يتكلم فيه النبي يعقوب امع الرعيان، جات راحيل امع اغنم بوها بيهلي كانت هي املي راعية. 10 وإلين شافها النبي يعقوب ڮام واتڮدم وكحز الحجرة عن فم الحاسي واسڮا اغنم خالو لابان. 11 وسلم النبي يعقوب اعلى راحيل وڮام يبكي. 12 وڮالها اعلنو قريب لبوها واعلنو ول رفقة. وڮامت راحيل وامشات اياك اتعلم بوها.

13 وإلين اسمع لابان باخبار ول اختو، ادفع يتلڮالو وضمو وجابو لدارو. ورد النبي يعقوب اعلى لابان ذاللي اخلڮ كامل. 14 وڮال لابان للنبي يعقوب: انتا من عظمي ولحمي. واسكن النبي يعقوب عند لابان مدة اشهر.

15 وڮال لابان للنبي يعقوب: انتا تشتغل عندي مجانا بسبب اعلنك قريب لي؟ ڮولّي شنهو اخلاصك؟ 16 وكان عند لابان منتين اسم لكبيرة ليئة واسم الصغيرة راحيل. 17 وكانت ليئة زينة يغير راحيل كان جمالها أكثر. 18 وابغا النبي يعقوب راحيل، وڮال لخالو لابان: لاهي نخدمك مدة سبع سنوات اياك نتخيم امع راحيل منتك الصغيرة. 19 وڮالّو لابان، إلى عدت لاهي تتخيم امعاها أخير عندي حته من انخيمها امع راجل اوخر. اسكن عندي. 20 واشتغل النبي يعقوب لابان مدة سبع سنوات اياك يتخيم امع راحيل. والنبي يعقوب ما حس بمرور هاذي السنوات السبعة بيه عزتو راحيل.

21 وڮال النبي يعقوب للابان: اعطيني اعيالي نتخيم امعاها بيهلي وفيت شغلتي امعاك. 22 وڮام لابان واجمع جيرانو كاملين وعيطلهم لندوية العرس. 23 وإلين عاد الليل اڮبظ لابان منتو ليئة وجابها للنبي يعقوب واتخيم امعاها. 24 واعطا لابان خادمو زلفة لمنتو ليئة اياك تخدمها.

25 وامع الصباح افطن النبي يعقوب اعلن اللي اتكات امعاه هي ليئة! وڮال النبي يعقوب للابان: شنهو ذاللي عدلتلي؟ آنا امالي اشتغلتلك مدة سبع سنوات اياك نتخيم امع راحيل؟ اعلاش خزيت بيَّ؟ 26 وڮالّو لابان: ماهو من عادة ابلدنا اعلنا انخيمو المنت الصغيرة سابڮ لكبيرة. 27 كمل أسبوعك امع ليئة وعاڮب ذاك انخيمك امع راحيل وتشتغلي مدة سبع سنوات اخرات. 28 واڮبل النبي يعقوب ذا اللي ڮالّو لابان وكمل أسبوعو امع ليئة. واعطاه لابان راحيل منتو اياك يتخيم امعاها. 29 واعطا لابان خادمو بلهة لراحيل اياك تخدمها. 30 واتخيم النبي يعقوب امع راحيل، وابغاها أكثر من ليئة واشتغل امع خالو لابان مدة سبع سنوات اخرات.

31 وإلين شاف الله تعالى اعلن ليئة ما يبغيها النبي يعقوب اجعلها مولانا تجبر الذرية، يغير راحيل كانت عاڮر. 32 وحملت ليئة من النبي يعقوب وخلاتلو اطفيل وسماتو رأوبين اللي معناه اراعي الطفيل. بيهلي ليئة ڮالت: فالحقيقة الله تعالى شاف ضعفي. وراجلي عاد يبغيني. 33 وحملت ليئة مرة اخرا وخلات اطفيل وڮالت: الله تعالى اعطاني اطفيل ثاني بيهلي اسمع واعرف اعلني كنت مكروهة. وسماتو شمعون اللي معناه السمّاع. 34 وحملت مرة ثالثة وخلات اطفيل ثالث وڮالت ليئة: ظرك فهاذي المرة لاهي يبڮا امعايَ راجلي بيَّلي خليتلو اثلت أولاد. وسمات اطفيل الثالث لاوي اللي معناه يبڮا. 35 وحملت المرة الرابعة وخلات اطفيل املي. وڮالت ليئة: فهاذي المرة لاهي نحمد الله تعالى. وسمات اطفيلها يهوذا اللي معناه الحمد. ووڮفت ليئة عاڮب اخلاڮة يهوذا من البري.