1 ولا ڮد النبي يوسف يحكم راصو عن البكي ڮدام الناس اللي امعاه، وازڮا وڮال: وخظو الناس كاملة من هون. ولا ابڮا حد امع النبي يوسف فالوقت اللي عرف لخوتو فيه عن راصو . 2 وابكا الفوڮ وسمعوه المصريين وسمعوه أهل دار فرعون. 3 وڮال النبي يوسف لاخوتو: آنا يوسف! مندرا يكان بويَ مزال سالم ؟ ولا ڮدو اخوتو يجاوبوه بيهم الخلعة. 4 وڮال النبي يوسف لاخوتو: ڮربو مني. وڮربو منو وڮال: آنا خوكم يوسف اللي بعتوه عبد شور مصر. 5 ولا تتأسفو ظرك ولا تتكدرو من اعلنكم بعتوني هون بيهلي مولانا مشّاني ڮدامكم اياك يسلكلكم حياتكم 6 بيهلي فاتو مضات سنتين من المجاعة فهاذي لارض ومزالو اخمس سنوات ماهو لاهي يعود فيهم لا حرث ولا حصاد. 7 ومشّاني مولانا ڮدامكم اياك يعدل منكم اجماعة باڮية فلارض ويسلكلكم ارواحكم بمعجزة عظيمة. 8 وبالتالي مانكم انتوما اللي مشيتوني هون يغير هو مولانا اللي عدلني مستشار اعلى ارض مصر وشيخ اعلى دار فرعون وحاكم اعلى ارض مصر كاملة. 9 ڮومو بالعجلة وارجعو شور بويَ وڮولولو: ولك يوسف يڮول: آنا عدلني مولانا شيخ اعلى ارض مصر كاملة ، وهاي جاي سافر شوري بالعجلة ولا تبطا، 10 ولاهي اتعود ساكن فارض جاسان اياك اتعود اڮريب مني انتا وأولادك وأولاد أولادك وغنمك وبڮرك وذا كامل اللي عندك. 11 وانصير اعليك هوك بيهلي المجاعة لاهي اتواصل خمس سنوات اخرات، ولانك لاهي تحتاج لأي اطعام لا انتا ولا عائلتك ولا بهايمك. 12 واراعيكم انتوما وخويَ بنيامين شايفين باعلني آنا هو اللي انخاطبكم. 13 وعلمو بويَ باعلني عت حاكم فارض مصر واخبروه عن اللي شفتو وعجلو بامجيبة بويَ لهون. 14 وضم النبي يوسف بنيامين وابكاو فبلد. 15 وضم النبي يوسف شورو باڮي اخوتو وابكا امعاهم. وعاڮب ذاك حدنهم اتجرو اخوتو اعلنهم يخاطبوه.

16 واعلم فرعون بالخبر وانڮالّو اعلن اخوت النبي يوسف جاو وافرح فرعون هو واعبيدو بهاذا الخبر. 17 وڮال فرعون للنبي يوسف: اطلب من اخوتك اعلنهم يرفّدو اعلى دوابهم الطعام ويرجعو لارض كنعان 18 اياك يجيبو بوهم وأسرهم ويجو لعندي اياك نعطيهم أزين ابلدة عندي فارض مصر اياك يتمونكو بخيرها. 19 واعطيت السلطة اعلنك اتڮولهم يڮبظولهم عربات من ارض مصر اياك يرفدو اعليهم أولادهم واعلياتهم وبوهم ويجو لهون لعندي. 20 ولا يشطنهم ذاللي لاهي يخلو اوراهم من ادبش ، بيَّلي اعطيتهم خيرات مصر كاملين.

21 وعدلو أولاد يعقوب اللي هو إسرائيل ذاللي اطلب منهم فرعون، واعطاهم النبي يوسف عربات وزاد للطريڮ. 22 واعطا لكل واحد منهم الباس وخص بنيامين باثلت مية ڮطعة من الفظة واخمس لبسات . 23 ومشّا املي لبوه 10 احمير مرفدة من أزين شي فمصر و10 احمير مرفدة بالڮمح وامبورو وزاد لبوه لسفرو. 24 وبعدين اعطاهم الذن بيمشو وڮالّهم: لا تتخاصمو فالطريڮ.

25 وامشاو من مصر وجاو لبوهم النبي يعقوب اللي هو إسرائيل فارض كنعان 26 وڮالولو: يوسف مزال سالم! وهو حاكم اعلى ارض مصر كاملة. وبركت اعليه الجتمة ولا صدقهم. 27 وإلين خبروه بذا كامل اللي ڮالهم يوسف وشاف لعربات اللي مشّاهم اياك يجيبوه شور ارض مصر، فرحت روحو. 28 وڮالهم: آنا كافيني اعلن ولي يوسف مزال سالم! لاهي انڮيسو وانشوفو سابڮ انموت.