1 وعاڮب ذا بسنتين من الزمن احلم فرعون حلم. وشاف فيه راصو، وهو واڮف احذا نهر النيل. 2 وفذا شاف 7 بڮرات شكلهم زين واسمانات واخظو من النهر وعادو يسرحو فالربيع . 3 وفذا شاف 7 بڮرات اخرات شكلهم شين واضعيفات طلعو اوراهم من النهر ووڮفو احذا البڮرات لخرات اعلى زر النهر. 4 وكالو البڮرات الشوينات والضعيفات ذوك البڮرات 7 اللي شكلهم زين واسمانات. وفذا اوعا فرعون.

5 وارڮد واحلم مرة ثانية وفذا شاف 7 سنابل من الڮمح نابتين فعرش واحد زينين واملانين من الڮمح. 6 وعاڮب ذاك شاف 7 سنابل يابسين حرڮتهم ريح الشرق نبتو اوراهم، 7 وصرطو السنابل اليابسين ذوك 7 اللي املانين من الڮمح. واوعا فرعون واعرف اعلنو كان يحلم.

8 وإلين عاد امع الصباح كان فرعون ماهو متمونك وڮام ومشّا لرجالتو كاملين اللي يفسرو لأحلام فمصر والناس الحكماء كاملين ورد اعليهم حلمو ولا اجبر حد يفسرلو .

9 وعاڮب ذاك ڮال رئيس السڮاية لفرعون: آنا اليوم متذكر اذنوبي. 10 يلين انفڮع فرعون اعلى اعبيدو احبسني آنا ورئيس الخبازة فحبس دار رئيس الحرس. 11 واحلم كل واحد منا حلم فنفس الليلة وكان تفسير كل حلم يتوافق امع ذا اللي اخلڮ لصاحبو. 12 وكان امعانا فم شاب عبراني عبد لرئيس الحرس وردينا اعليه أحلامنا وفسر لكل واحد منا حلمو. 13 وذاللي فسرلنا هو اللي اخلڮ عاڮب ذاك، ورجعني فرعون لشغلتي ورئيس الخبازة علڮو اعلى خشباية. 14 ومشّا فرعون وعيط للنبي يوسف. وامشاو الجنود وجابوه بالعجلة من الحبس واحلقولو راسو وبدلو الباسو ووڮّفوه ڮدام فرعون. 15 وڮال فرعون للنبي يوسف: آنا شفت حلم ولا اجبرت حد يفسرولي، واسمعت اعلنك يلين تسمع حلم اتڮد اتفسرو. 16 وڮال النبي يوسف: آنا ما عندي الفضل فهاذا يغير مولانا هو اللي لاهي يعطي لفرعون التفسير لحلمو. 17 وڮال فرعون للنبي يوسف: شفت راصي فالحلم وآنا واڮف اعلى زر النهر. 18 وفذا 7 بڮرات شكلهم زين واسمانات واخظو من نهر النيل وعادو يسرحو فالربيع. 19 وفذا شفت 7 بڮرات اخرات شكلهم شين واضعيفات طلعو اوراهم من النهر، ولا ڮط شفت فارض مصر كاملة شي يشابلهم فاشوين. 20 وكالو البڮرات الشوينات والضعيفات ذوك 7 بڮرات لأولات اللي اسمانات. 21 وامع اعلنهم سرطوهم تمو الا اضعيفات كيفلي ما كالوهم وتمو الا اشوينين كيفما كانو. وفذا وعيت. 22 وشفت فحلمي الثاني 7 سنابل زينين واملانين من الڮمح نابتين فعرش واحد. 23 وفذا شفت 7 سنابل يابسين حرڮتهم ريح الشرق نبتو اوراهم، 24 وصرطو السنابل اليابسين السنابل لملانين. وعاڮب ذاك آنا رديت اعلى السحرة ذوك لأحلام لأثنين ولا اجبرت امبينهم أي آرڮاج يفسرهملي.

25 وڮال النبي يوسف لفرعون: أحلام فرعون هوما عندهم تفسير واحد ومولانا نعت لفرعون ذاللي ناوي يعدل. 26 البڮرات الزينات 7 هوما عبارة عن 7 سنوات وسنابل الزينين 7 هوما املي عبارة عن 7 سنوات والحلمين هوما عندهم تفسير واحد. 27 والبڮرات الشوينات الضعيفات 7 اللي طلعو اوراهم هوما 7 سنوات وسنابل الفارغات 7 المحروڮين بريح الشرق لاهي يعودو 7 سنوات من الجوع. 28 ولاهي يخلڮ ذاللي ڮلت لفرعون بيهلي مولانا نعت لفرعون ذاللي ناوي يعدل. 29 لاهي يجو 7 سنوات من التمانكت حته لارض مصر كاملة. 30 ولاهي يتلبوهم 7 سنوات من الجوع يلين ينساو الناس التمانكت اللي جات لارض مصر ولاهي اتخسر المجاعة لارض. 31 ولاهي يضيع كل اثر التمانكت فلارض بسبب ذيك المجاعة اللي تتلبو بيهَلي لاهي اتعود امتينة حته. 32 واتكرر الحلم اعلى فرعون مرتين بيهلي هاذي ارواية قدرها مولانا ولابد من تخلڮ بالعجلة. 33 وظرك يالة فرعون يلود لراجل قادر اعلى حسن التدبير وحكيم يوليه اعلى هاذي لارض . 34 ويالة يدير فرعون مراقبين اعلى ارض مصر اياك يڮبظو خمس لرباح فسنوات التمانكت 7. 35 ويجمعو الطعام كامل فسنوات الخير اللي جايين ويخزنو الڮمح بأوامر فرعون ويلموه فالمدن اياك يعود الطعام فالمخزن 36 وزاد لأهل مصر فسنوات المجاعة 7 اللي لاهي اتسود اعلى ارض مصر اياك ما يهلكو بالجوع.

37 وازيان هاذا لكلام عند فرعون ورجالتو. 38 وڮال فرعون لضباطو: مندرا يكانا انڮدو نجبرو حد يشابه لهاذا الراجل اللي فيه روح مولانا؟ 39 وعاڮب ذا ڮال فرعون للنبي يوسف: بيهلي مولانا نعتلك هاذا كامل، ولا خالڮ حد قادر اعلى حسن التدبير وحكيم كيفتك، 40 لهاذا السبب عينتك حاكم اعلى مملكتي، ولاهي يعدل شعبي ذاك كامل اللي اتڮولّو ولا هو لاهي يعود أعظم منك يكون آنا صاحب العرش. 41 وعاڮب ذاك ڮال فرعون للنبي يوسف: اراعيني درتك مسؤول اعلى ارض مصر كاملة. 42 واڮلع فرعون خاتمو من ايدو ودارو فايد النبي يوسف ولبسو بالباس من الكتان الغالي ودار فرڮبتو اڮلادة من الذهب. 43 وركبو فالمركبة الثانية اللي اوراه . وعيطو جنود فرعون وڮالو للناس: اركعو ڮدامو! وعينو فرعون حاكم اعلى ارض مصر كاملة . 44 وڮال فرعون للنبي يوسف: آنا هو فرعون وآنا آمر اعلن ما يعدل حد أي شي فارض مصر من دون إذنك. 45 وسما فرعون النبي يوسف باسم صفنات فعنيح وخيمو امع أسنات منت فوطيفارع كاهن فمدينة أون، وعادت سلطة النبي يوسف اكبيرة فارض مصر كاملة. 46 وكان النبي يوسف عندو 30 سنة وقت تعيينو حاكم اعلى مصر. وعاڮب يلين امشا من حضرة فرعون عاد يسافر فارض مصر كاملة. 47 وفسنوات التمانكت 7 نبتت لارض ياسر من اصدر . 48 واجمع النبي يوسف الطعام كامل الموجود فارض مصر لمدة ذوك سنوات 7 وخزنو فالمدن لحبوب اللي جايين من لحراث اللي احذاهم. 49 وخزن النبي يوسف كميات اكبار من الڮمح يلين وڮف عن حسبتهم بيهم الكثرة .

50 وخلات أسنات منت فوطيفارع كاهن أون للنبي يوسف ولين سابڮ يجو سنوات الجوع. 51 وسما النبي يوسف البكر منسى اللي معناه اللي خلاني ننسا وڮال: بيهلي مولانا نساني صعوباتي كاملين و أهل دار بويَ كاملين . 52 والثاني سماه أفرايم اللي معناه اللي يثمر بضعف وڮال: بيهلي مولانا عدلني مثمر فلارض اللي انهنت فيها.

53 وعاڮب ذاك اوفاو سنوات التمانكت 7 اللي اعلى ارض مصر 54 وجاو 7 سنوات المجاعة كيفما ڮال النبي يوسف وخلڮت مجاعة فكل البلدان يغير ارض مصر كان الطعام فيها امعرم. 55 وإلين جات المجاعة اعلى ارض مصر كاملة ڮام الشعب يعيط اعلى فرعون يدورو الطعام. وڮال فرعون للمصريين كاملين: ڮيسو يوسف وعدلو ذاللي يڮولكم كامل . 56 وامتانت المجاعة اعلى ارض مصر كاملة وافتح النبي يوسف المخازن وباع الطعام للمصريين يغير المجاعة امتانت فارض مصر. 57 وجاو أهل المدن لخرين لمصر شور النبي يوسف اياك يشرو الڮمح بيهلي المجاعة كانت امتينة فلارض كاملة.