1 وامشا النبي يعقوب فطريڮو واتلڮاولو ملايكة مولانا. 2 وإلين شافهم النبي يعقوب ڮال: هاذا جيش مولانا. وسما ذيك لبليدة باسم محنايم اللي معناه المعسكر.

3 ومشّا النبي يعقوب امراسيل ڮدامو شور خوه عيسو فارض سعير اللي فمنطقة أدوم. 4 ووصاهم وڮالهم: ذاللي لاهي انڮولكم هو اللي اندوركم اتڮولو لشيخي عيسو: هاذا هو اللي يڮولك عبدك يعقوب: آنا عشت عند لابان إلى ظرك 5 وعاد عندي لبڮر ولحمير ولغنم ولعبيد ولخدم ومشّيتلك رسالة يا شيخي انعلمك لعلاك ترضا اعليَ.

6 ورجعو امراسيل النبي يعقوب وڮالولو: نحنا جينا لخوك عيسو واراعيه جايك وامعاه 400 راجل. 7 وانخلع النبي يعقوب ياسرة من الخلعة وڮسم ارواڮيج اللي امعاه ولغنم ولبڮر والبل اعلى مجموعتين 8 وڮال: يلين يهجم عيسو اعلى وحدة من ذو الجماعات الثنتين وإلين يفرڮها اعلى لأقل ذيك لخرا تسلك.

9 واطلب النبي يعقوب مولانا وڮال: يا إله جدي النبي إبراهيم وإله بويَ النبي إسحاق يا الله تعالى اللي ڮالّي: ارجع شور ارضك وشور أهلك ولاهي نعرفلك شي. 10 آنا ما نستحق كل فضلك ذاللي عدلتلي، آنا اڮطعت نهر الأردن ولا كان عندي ما هو دبوسي وظرك اراعيني راجع وامعايَ اجماعتين. 11 يا مولانا سلكني من ايد خويَ عيسو بيّلي آنا خايف من يجيني ويهجم اعليَّ ويهجم اعلى لعليات والتركة. 12 انتا ڮلتلي يا مولانا: لاهي نعرفلك شي وانعدل ذريتك ڮد احصي التراب اللي ما اتڮد تنعد بسبب كثرتها.

13 وبات النبي يعقوب ذيك الليلة، واڮبظ وجهز من ذاللي عندو من أملاك هدية لخوه عيسو. 14 وكانت هاذي الهدية: 200 عنز و 20 عتروس و200 نعجة و20 كبش 15 و30 ناڮة وحيرانهم و40 بڮرة و10 ثيران و20 احمارة و10 حمير. 16 واعطا هاذا كامل لعبيدو كل ڮلفة اعلى زر وڮال لعبيدو: اتڮدمو ڮدامي وخلو امبين كل ڮلفة من الحيوان مسافة امع لخرا. 17 ووصا لعبد الڮدامي وڮالّو: يلين تجبر خويَ عيسو ويسولك: انتا عبد من؟ وامنين واعد؟ ومن هو صاحب هاذي ڮلفة الحيوان اللي ڮدامك؟ 18 جاوبو انتا وڮولّو: هاذا كامل من حيوان النبي يعقوب اللي مشّاه لشيخو عيسو واراعيه هو نفسو جاي اورانا.

19 وڮال النبي يعقوب املي ارواڮيج لخرين اللي ماشيين اورا ڮلفات الحيوان بنفس الوصية وڮال: 20 اتڮولولو املي: اراعي عبدك يعقوب جاي اورانا. وكان النبي يعقوب يڮول امبينو امع راصو: لاهي انبرد اخلاڮو بهاذو الهدايا اللي ڮدامي وعاڮب ذاك يلين نجابرو لعلاه يرضا عني. 21 وامشات هدايا النبي يعقوب ڮدامو وابڮا النبي يعقوب وبات ذيك الليلة فالمخيم.

22 وڮام النبي يعقوب فذيك الليلة واڮبظ اعلياتو واخدمهم وأولادو 11 واڮطع من نهر يبوق. 23 وعاڮب يلين مشّاهم هوما وذاك كامل اللي عندو شور الزر الثاني من النهر، 24 ابڮا النبي يعقوب فم وحدو. وفذا اتفاتن امعاه آرڮاج يلين اطلع الفجر. 25 وإلين شاف الراجل اعلنو ما ڮد يغلب النبي يعقوب، خبطو اعلى حرڮفتو وانڮلع مفصل حرڮفة النبي يعقوب وقت ديڮتو امع الراجل. 26 وڮالّو الراجل: خليني نمشي بيهلي الفجر اطلع. وڮالّو النبي يعقوب: ماني لاهي انخليك تمشي سابڮ اتباركني. 27 وسولو الراجل: شنهو اسمك؟ وڮالّو: اسمي يعقوب. 28 وڮالّو الراجل: اسمك ما اتلا يعقوب يغير عاد إسرائيل اللي معناه اتفاتن امع مولانا بيكلي اتفاتنت امع مولانا والناس واغلبتهم. 29 وسولو النبي يعقوب: شنهو اسمك؟ وڮالّو الراجل: اعلاش اتسولني عن اسمي؟ وبارك الراجل النبي يعقوب. 30 وسما النبي يعقوب هاذي لبليدة فنيئيل اللي معناها بل امنين اجابرت امع مولانا وجها لوجه ولا مت. 31 وإلين امشا النبي يعقوب عن فنيئيل ظهرت اعيله الشمس وعاد يمشي وهو يظلع من حرڮفتو. 32 ولهاذا السبب ما يوكلو أولاد إسرائيل يلين اليوم العصبة اللي اعلى المفصل الحرڮفة بيهلي الراجل اخبط النبي يعقوب فهاذي لبليدة.