1 وارحل النبي يعقوب اللي هو إسرائيل امع ذاللي عندو من أملاك وإلين وصل لبليدة اسمها بئر السبع ڮام واذبح اذبيحة وڮدمها قربان لإله بوه النبي إسحاق. 2 وڮال مولانا للنبي يعقوب اللي هو إسرائيل فحلم: يعقوب يعقوب. وجاوبو: اراعيني. 3 وڮالّو: آنا هو الله إله بوك لا اتخاف من اتڮيس ارض مصر لاهي انعدلك أمة عظيمة فم. 4 لاهي انتافڮك شور مصر ولاهي انرجعك املي لارضك ولاهي يغمظلك يوسف عينيك بايديه وقت موتك.

5 وامشا النبي يعقوب من بئر السبع. و ڮامو أولادو و دارو بوهم النبي يعقوب وتركتهم واعلياتهم فلعربات اللي مشّا فرعون اياك يرفدوهم . 6 وڮبظو امعاهم اغنمهم وامتعتهم اللي حصلو اعليها فارض كنعان وجاو كاملين لمصر. 7 وجاب النبي يعقوب امعاه لمصر أولادو وأولادهم من تركة وطافيلات وذريتو كاملة .

8 وهاذو هوما اسامي بني إسرائيل اللي جاو امعاه لمصر، النبي يعقوب وأولاودو، رأوبين بكر النبي يعقوب. 9 وأولاد رأوبين هوما حنوك وفلو وحصرون وكرمي. 10 وأولاد شمعون، يموئيل ويامين وأوهد وياكين وصوحر وشاول ول الكنعانية.

11 وأولاد لاوي، جرشون وقهات ومراري. 12 وأولاد يهوذا، عير وأونان وشيلة وفارص وزارح. وماتو عير وأونان فارض كنعان وأولاد فارص هوما حصرون وحامول. 13 وأولاد يساكر، تولاع وفوة ويوب وشمرون. 14 وأولاد زبلون، سارد وإيلون وياحلئيل. 15 هاذو كاملين أولاد ليئة اللي خلات للنبي يعقوب فواد أرام امع منتو دينة. وكان عدد أولادو وامناتو وأولادهم من ليئة 33.

16 وأولاد جاد، صفيون وحجي وشوني وأصبون وعيري وأرودي وأرئيلي. 17 وأولاد أشير، يمنة ويشوة ويشوي وبريعة وختهم سارح. وأولاد بريعة هوما حابر وملكيئيل. 18 وهاذو هوما أولاد زلفة خادم ليئة اللي اعطاها لابان وكان عدد ذريتها اللي خلات للنبي يعقوب 16 آرڮاج .

19 وأولاد راحيل اعيال النبي يعقوب هوما النبي يوسف وبنيامين. 20 واخلڮو للنبي يوسف فارض مصر منسى وأفرايم اللي خلاتهملو أسنات منت فوطيفارع كاهن فمدينة أون. 21 وأولاد بنيامين هوما بالع وباكر وأشبيل وجيرا ونعمان وإيحي وروش ومفيم وحفيم وأرد. 22 هاذو هوما ذرية راحيل اللي خلات للنبي يعقوب وعددهم كاملين 14 آرڮاج.

23 وول دان هو حوشيم. 24 وأولاد نفتالي هوما ياحصيئيل وجوني ويصر وشليم. 25 هاذو هوما أولاد النبي يعقوب اللي خلاتلو بلهة خادم راحيل اللي اعطهالها بوها لابان وعددهم كاملين 7 ارواڮيج. 26 وكان عدد ارواڮيج كاملين اللي خرجو من صلب النبي يعقوب واللي جاو لمصر 66 آرڮاج، من دون حسبة اعليات أولادو. 27 وأولاد يوسف اللي خلڮولو فمصر هوما ارڮاجين وبهاذا يعود عدد اجماعة بني إسرائيل اللي فمصر70 آراڮاج.

28 و مشّا النبي يعقوب اللي هو إسرائيل يهوذا ڮدامو شور النبي يوسف اياك ينعتلو الطريڮ اللي واعدة جاسان. 29 وجهز النبي يوسف مركبتو واركبها اياك يتلڮا لبوه النبي يعقوب اللي هو إسرائيل فجاسان. وإلين وصل لعندو ڮام وضم النبي يوسف وابكا ياسر من الوقت. 30 وڮال النبي يعقوب اللي هو إسرائيل للنبي يوسف: ظرك عت انڮد انموت عاڮب يلين شفت وجهك واعرفت اعلنك مزلت سالم. 31 وخاطب النبي يوسف اخوتو ودار بوه وڮالهم: آنا لاهي انڮيس ظرك فرعون اياك انڮولّو اعلن اخوتي ودار بويَ اللي كانو ساكنين فارض كنعان جاوني. 32 وهوما رعيان للحيوان وشغلتهم هي سرحة الحيوان ولهاذا السبب جابو امعاهم اغنمهم وابڮرهم وذا كامل اللي عندهم . 33 وإلين يدعيكم ويسولكم: انتوما شغلتكم شنهي؟ 34 ڮولولو: شغلتنا سرحة الحيوان من صغرنا إلى ظرك، نحنا وكيفما كانو اباتنا املي. ڮولولو ذاك اياك يخليكم تسكنو فارض جاسان بيهلي المصريين ما يبغو الرعيان.