1 وڮال مولانا للنبي يعقوب: ڮيس بيت إيل واسكن فم وابني مذبح لمولانا اللي اظهرلك فالوقت اللي كنت فيه هارب من خوك عيسو. 2 وآمر النبي يعقوب أسرتو والناس لخرين اللي كانو امعاه وڮالهم: زرڮو لأصنام اللي عندكم واطهرو وبدلو الباسكم، 3 واتعالو انڮيسو بيت إيل اياك نبني فم مذبح لمولانا اللي استجابلي يلين كنت فضيقة وتافڮ امعايَ فالطريڮ اللي امشيت فيها. 4 وڮامو واعطاو لنبي يعقوب لأصنام كاملين اللي كانو عندهم ولبدل اللي كانو فوذنيهم واردمهم النبي يعقوب تحت الصدراية لكبيرة اللي فشكيم.

5 ومن فم رحلو، وهيمن رعب مولانا اعلى المدن اللي احذاهم يلين عادو ما يڮدو يهاجموهم ولا يتلبوهم. 6 ولحڮو النبي يعقوب والجماعة اللي كانت امعاه مدينة لوز اللي فكنعان واللي اسمها الثاني هو بيت إيل. 7 وابنا النبي يعقوب مذبح فم وسما ذي لبليدة بيت مولانا بيهلي مولانا اظهرلو فالوقت اللي كان فيه هارب من خوه عيسو. 8 وماتت فم دبورة اللي كانت اترظع رفقة واندفنت تحت الصدراية لكبيرة اللي احذا بيت إيل واُسمات لبليدة ألون باكوت اللي معناها صدراية البكي.

9 واظهر مولانا للنبي يعقوب مرة اخرا عاڮب ارجوعو من واد أرام وباركو 10 وڮالّو: اسمك ما اتلا يعقوب يغير عاد اسمك إسرائيل اللي معناه اتدايڮ امع مولانا. وسماه مولانا إسرائيل. 11 وڮالّو مولانا: آنا هو مولانا القدير: ڮوم واكثار ويخلڮو منك أُمم ومنك لاهي يوخظو ملوك. 12 ولارض اللي اعطيتها لإبراهيم وإسحاق عاطيهالك ولذريتك من عاڮبك املي. 13 وامشا عنو مولانا من لبليدة اللي اظهرلو فيها. 14 واڮبظ النبي يعقوب حجرة ووڮفها الفوڮ كيفت علامة العهد وكب اعلى الحجرة شي من عصير العنب اياك يعود قربان وشي من الزيت اياك يخصصها لمولانا. 15 وسما النبي يعقوب ذي لبليدة بيت إيل اللي معناه دار مولانا بيهلي مولانا اتكلم امعاه فم.

16 ورحلو من بيت إيل. وإلين عادو فمسافة اڮريب من أفراتة، حست راحيل باللية البري واثڮال اعليها البري. 17 وإلين اصعاب حته اعليها البري ڮالتلها لمرة اللي اتعاونها: لا اتخافي بيهلي لاهي يخلڮلك اطفيل ثاني. 18 وإلين كانت اتحاول تتنفس وقت موتها سمات اطفيلها بن أوني اللي معناه ول حزني. يغير النبي يعقوب سماه بنيامين اللي معناه ول ايدي العربية. 19 وعاڮب ذاك ماتت راحيل واندفنت احذا الطريڮ اللي ڮايسة أفراتة اللي هي بيت لحم. 20 ووڮّف النبي يعقوب حجرة اعلى اقبرها، ومزالت معروفة بحجرة اقبر راحيل يلين ظرك. 21 اواصل النبي يعقوب اللي هو إسرائيل سفرو وابنا اخيامو اورا برج اسمو عدر. 22 وفالوقت اللي كان فيه النبي يعقوب اللي هو إسرائيل ساكن فذيك لارض، عاشر رأوبين بلهة خادم بوه واعلم إسرائيل بالقضية.

وهاذو هوما أولاد النبي يعقوب لإثنى عشر:

23 أولاد ليئة، اللي هوما: رأوبين اللي هو بكر النبي يعقوب وشمعون ولاوي ويهوذا ويساكر وزبلون. 24 وأولاد راحيل اللي هوما: يوسف وبنيامين. 25 وأولاد بلهة خادم راحيل، اللي هوما: دان ونفتالي. 26 وأولاد زلفة خادم ليئة، اللي هوما: جاد وأشير. وهاذو هوما أولاد النبي يعقوب اللي خلڮولو فواد أرام.

27 وجا النبي يعقوب لبوه النبي إسحاق فممرا اللي هي قرية أربع المعروفة بحبرون وهي بل امنين اتغربو فيها النبي إبراهيم والنبي إسحاق. 28 وعاش النبي إسحاق يلين 180 سنة. 29 ومات وانضم شور اسلافو شيباني حته ودفنوه أولادو، النبي يعقوب وعيسو.