1 وعاڮب فترة انڮال للنبي يوسف: بوك ماهو امصحح. وڮاسو النبي يوسف وامعاه أولادو منسى وأفرايم. 2 وانڮال للنبي يعقوب: اراعي ولك جاك . واستجمع قوتو وڮام واڮعد اعلى متكاه. 3 وڮال النبي يعقوب للنبي يوسف: آنا اظهرلي مولانا القادر فالوقت اللي كنت فيه فلوز فارض كنعان وباركني 4 وڮالّي: اندور انعدلك مثمر وانكثر أولادك ولاهي يجي نسلك شعوب ياسرين ونعطي لذريتك هاذي لارض إلى الأبد. 5 وظرك أولادك منسى وأفرايم اللي اجبرتهم فمصر سابڮ انجيك، عادو أولادي ويورثوني كيفما يورثني رأوبين وشمعون. 6 وأولادك اللي لاهي يخلڮولك عاڮبهم ذاللي لاهي يورثو لاهي يعود تحت اسم اخوتهم منسى وأفرايم. 7 وآنا يلين كنت راجع من سهل أرام اتوفات اعليَّ راحيل فالطريڮ فارض كنعان اڮريب من أفراتة ودفنتها فالطريڮ اللي واعدة أفراتة اللي هي بيت لحم.

8 وشاف النبي يعقوب اللي هو إسرائيل أولاد النبي يوسف وسولو : منهوما هاذو؟ 9 وڮالّو النبي يوسف: هاذو هوما أولادي اللي ارزقني بيهم مولانا هون. وڮال النبي يعقوب: ڮربهم مني اياك نطلبهم من مولانا البركة. 10 وكانو عينين النبي يعقوب اللي هو إسرائيل اضعاف وشوفتو ما كانت زينة وڮرب النبي يوسف أولادو من النبي يعقوب وحبهم وضمهم . 11 وڮال النبي يعقوب اللي هو إسرائيل للنبي يوسف: ما كنت شاك اعلني لاهي انشوف وجهك مرة ثانية واراعي مولانا نعتلي أولادك . 12 وعاڮب ذاك، بعد النبي يوسف التركة عن النبي يعقوب واسجد ڮدامو. 13 واكرد النبي يوسف أفرايم بايدو العربية ووڮفو احذا زر النبي يعقوب العسري واكرد منسى بايدو العسرية ووڮفو احذا زر النبي يعقوب العربي. 14 ومد النبي إسرائيل ايدو العربية عن قصد ودارها اعلى راس أفرايم وهو الصغير، وايدو العسرية اعلى راس منسى امع اعلنو هو البكر.

15 واطلب النبي يعقوب البركة للنبي يوسف وڮال: مولانا اللي عبدوه اباتي النبي إبراهيم والنبي إسحاق، مولانا اللي ارعاني من اخلاڮتي يلين اليوم، 16 الملاك اللي سلكني من كل أنواع شر، طالبو ينزل البركة فهاذو التركة ومن خلالهم يكبر اسمي واسم اباتي النبي إبراهيم والنبي إسحاق. ويكثرو حته فلارض.

17 وإلين شاف النبي يوسف اعلن بوه دار ايدو العربية اعلى أفرايم ما ازيان ذاك عندو واحكم ايد بوه اياك يحولها من راس أفرايم شور راس منسى. 18 وڮال النبي يوسف لبوه: ذاك ما يصح يا بويَ هاذا هو البكر. دير ايدك العربية اعلى راسو. 19 وآبا النبي يعقوب وڮال: آنا عارف هاذا يا ولّي آنا عارف هاذا. وهو املي لاهي يعود أمة اكبيرة يغير خوه الصغير لاهي يعود أعظم منو وذريتو ياسر من الأُمم. 20 واطلبلهم البركة فذاك انهار وڮال: بني إسرائيل لاهي يستعملو اسمكم فالبركة ڮايلين: يعدلّك مولانا كيفت أفرايم وكيفت منسى. وبهاذي الطريقة ڮدم أفرايم اعلى منسى.

21 وعاڮب ذاك ڮال النبي يعقوب اللي هو إسرائيل للنبي يوسف: آنا ڮربت من الموت، يغير مولانا لاهي يعود امعاكم ويرجعكم شور ارض اباتكم. 22 وبما اعلنك فوڮ اخوتك، آنا عاطيك ارض شكيم فكنعان اللي اڮبظتها من الأموريين بسيفي وقوسي.