1 واطرات فلارض مجاعة مرة ثانية تشابه الذيك اللي خلڮت فزمن النبي إبراهيم. وڮام النبي إسحاق وڮاس مدينة جرار اللي فيها أبيمالك ملك الفلشطيميين. 2 واظهر الله تعالى للنبي إسحاق وڮالّو: لا تڮيس مصر، يغير اسكن فلبليدة اللي لاهي انعتلك. 3 اسكن فهاذي لبليدة ولاهي انعود امعاك ولاهي انباركك ولاهي نعطيك انتا ونسلك هاذي لارض كاملة اياك انعدل ذاللي احلفت بيه لبوك إبراهيم. 4 ولاهي انكثر نسلك يلين يعود ڮد انجوم السما فلكثرة، ولاهي نعطيكم هاذي لارض كاملة وبنسلك لاهي يتباركو شعوب لارض كاملين، 5 بيهلي إبراهيم طاعني وطبق أوامري ووصاياي واحكامي وشريعتي.

6 ولذاك السبب اسكن النبي إسحاق فمدينة جرار. 7 وإلين سولوه أهل المدينة عن اعيالو، ڮالهم: هي اختي. بيهلي كان خايف يڮول اعلنها اعيالو اياك ما يكتلوه أهل المدينة بسبب رفقة بيهلي كانت امرة زينة حته. 8 وعاڮب يلين اعطا النبي إسحاق فترة من الزمن فمدينة جرار، اخلڮ اعلن أبيمالك ملك الفلشطيميين خرص مرة من كوتو وشاف النبي إسحاق يتعاير امع اعيالو رفقة. 9 وڮام ومشّالو يجيه، وڮال: ظاهرلي اعلن رفقة فالحقيقة هي اعيالك، انتا مالك ڮلتلي اعلنها اختك؟ وڮالّو النبي إسحاق: كنت خايف اعلني لاهي ننكتل بسببها. 10 وڮالّو أبيمالك: شنهو اللي عدلتنا؟ كان اهوين اعلى أي واحد منا يعاشر رفقة واتعود جبتنا ذنب. 11 واطلب أبيمالك من الشعب كامل وڮالهم: اللي منكم يمس هاذا الراجل واعيالو يدور ينكتل.

12 واحرث النبي إسحاق فارض جرار واحصد نفس السنة مية مرة ذاللي احرث بيهلي الله تعالى بارك فيه. 13 وكبرت قيمتو وامتلا من الدنية يلين عاد غني حته. 14 وكان عندو ياسر من لغنم ولبڮر ولعبيد يلين عادو الفلشطيميين يتعينو فأملاكو.

15 ولذاك السبب ردمو الفلشطيميين الحسيان كاملين اللي جهروهم اعبيد بوه النبي إبراهيم.

16 وڮال أبيمالك للنبي إسحاق: امشي عنّا بيكلي انتا عدت امتن واغنى منا.

17 وامشا النبي إسحاق من المدينة شور واد الجرار واسكن فيه.

18 وڮام النبي إسحاق واجهر مرة اخرا الحسيان اللي انجهرو فزمن النبي إبراهيم واللي ردموهم الفلشطيميين عاڮب موت بوه. وسما الحسيان باساميهم اللي سماهم النبي إبراهيم. 19 وجهرو اعبيد النبي إسحاق حاسي فواد جرار وجبرو فيه ياسر من الما الصالح لشراب. 20 واتخاصمو رعيان مدينة جرار امع رعيان النبي إسحاق وڮالولهم: هاذا الما هو لنا نحنا. وسما النبي إسحاق الحاسي باسم حاسي عسيق اللي معناه الديڮة، بيهملي ادايڮو امعاه اعليه. 21 وڮامو اعبيد النبي إسحاق وجهرو حاسي ثاني وخلڮت اعليه الديڮة املي. وسما النبي إسحاق الحاسي سطنة اللي معناها العداوة. 22 وامشا النبي إسحاق من فم واجهر حاسي ثاني ولا ادايڮو اعليه هاذي المرة. وسما النبي إسحاق ذي الحاسي رحوبوت اللي معناها مولانا يوسع ارضك. وڮال: الله تعالى وسع ارضنا ولاهي نكثارو فلارض.

23 ومن فم امشا النبي إسحاق واعد بئر السبع. 24 واظهرلو الله تعالى فذيك الليلة اللي جا فيها لبئر السبع وڮالّو: آنا هو إله بوك إبراهيم لا اتخاف بيّلي آنا امعاك وانباركك ولاهي انكثر ذريتك بسبب عبدي إبراهيم. 25 وابنا النبي إسحاق فم مذبح وصلى لله تعالى، وابنا فم خيمة وجهرو اعبيدو حاسي.

26 وجا أبيمالك من مدينة جرار للنبي إسحاق وامعاه أَحُزَّاتُ مستشارو وفيكول رئيس جيشو، 27 وڮالهم النبي إسحاق: شواساكم اتجوني، وانتوما اكرهتوني وصعتوني من عندكم؟ 28 وڮالولو: ظاهرنا اعلن الله تعالى امعاك وبالتالي ڮالنا: خلينا نتعاهدو. وكل واحد منا يحلف للوخر 29 اعلنك ما اتعدلّنا شي خاسر كيف نحنا ما عدلنالك شي خاسر، ولا عدلنالك يكون الخير، ومشّيناك بالسلامة، واراعيك انتا ظرك امبارك من مولانا.

30 وڮام النبي إسحاق وعدلهم شي من اطعام وكالوه وشربو. 31 وبكرو امع الصباح واحلف كلهم للوخر، ووادعهم النبي إسحاق وامشاو اعلى العافية.

32 وفنفس ذاك النهار جاو اعبيد النبي إسحاق وڮالولو: نحنا اجبرنا الما فالحاسي اللي اجهرناه. 33 وسماه النبي إسحاق شبعة اللي معناه سبعة ومن ذاك اليوم يلين ظرك عاد اسم ذيك المدينة بئر السبع. 34 وإلين عاد عيسو عندو 40 سنة اتخيم امع مرتين هوماتي يهوديت منت بيري الحيثي وعاڮبها بسمة منت إيلون الحيثي. 35 وذو لعليات الثنتين تعبو إسحاق ورفقة.