1 وآمر النبي يوسف شيخ اعبيدو وڮالّو: املا ازڮايب الرجالة يلين يمتلاو من الطعام ودير فظة كل واحد منهم ففم ازڮيبتو 2 ودير ففم ازڮيبة خوهم الصغير كاسي اللي من الفظة واملي فظة ڮمحو. وڮام وعدل ذاللي اطلب منو النبي يوسف. 3 وإلين عاد انهار من غد ڮيمو الرجالة باحميرهم. 4 ولا بعدو عن المدينة حته، يلين ڮال النبي يوسف لشيخ اعبيدو: ادفع اورا الرجالة وإلين تدارك بيهم ڮولهم: اعلاش اتكافو شي متعدل بشي راخي؟ 5 هاذي مالها الكاس اللي يشرب منها الحاكم ويعرف من خلالها لڮزانة ؟ انتوما عدلتو ارواية خاسرة. 6 وإلين اتلاحڮ بيهم خاطبهم بهاذا لكلام وڮالولو: 7 اعلاش يتكلم شيخنا بهاذا لكلام؟ حاشا لعبيدك يعدلو هاذا النوع من لأمور. 8 اراعي الفظة اللي اجبرناها فافام ازڮايبنا جبناهالك امعانا من ارض كنعان، ابسيمحالة نسرڮو الفظة وللا الذهب من دار شيخك؟ 9 اللي تجبر عندو الكاس منا يالتو يموت وانعودو نحنا لخرين املي اعبيدك. 10 وڮال: لاهي انعدلو ذاللي ڮلتو واللي لاهي نجبرها الكاس عندو لاهي يعود عبد لي والباڮين هوما ابرياء. 11 وجا لكل واحد منهم واڮبظ ازڮيبتو وافتحها واطرحها اعلى التراب. 12 وابدا ضابط النبي يوسف يلود للكاس فزڮايبهم من ازڮيبة اكبيرهم لزڮيبة اصغيرهم واجبر الكاس فازڮيبة بنيامين. 13 وڮامو يزوڮو ويشطو الباسهم بيهم ثقل ذاللي اخلڮلهم وارفد كل واحد منهم ازڮيبتو اعلى احمارو ورجعو شور المدينة اللي فيها النبي يوسف. 14 وادخل يهوذا واخوتو شور دار النبي يوسف وجبروه فم وسجدو ڮدامو. 15 وڮالهم النبي يوسف: ذي الجريمة اللي عدلتو شنهي؟ انتوما ما تعرفو اعلن راجل كيفتي يڮد يعرف ذاللي اخلڮ من خلال لڮزانة ؟ 16 وڮال يهوذا: شلاهي انڮولو لشيخنا وابسيمحالة انبرؤا روسنا؟ مولانا اكشف إثم اعبيدك. نحنا وذاللي انجبر عندو الكاس انعودو اعبيدك. 17 وڮال النبي يوسف: حاشاني انعدل ذاك! يغير الراجل اللي انجبر عندو الكاس يعود عبد لي وانتوما ڮيمو شور بوكم بالسلامة. 18 وڮرب منو يهوذا وڮال: يا شيخي خلي عبدك ينطق بكلمة ڮدامك ولا تنفڮع اعلى عبدك بيهلي سلطتك متڮادة امع سلطة فرعون. 19 شيخي سول اعبيدو: مندرا يكان عندكم بو وللا خو؟ 20 وجاوبنا شيخي: عندنا بو شيباني وول شيخوختو الصغير. مات خوه اشڮيڮو وابڮا هو وحدو من أمو. وبوه يبغيه. 21 وڮلت لعبيدك: جيبوهلي اياك انشوفو بعينيَ. 22 وڮلنا لشيخي: ما يڮد الطفيل يخلي بوه اياك ما يموت بوه يلين يمشي عنو. 23 وڮلت لعبيدك: يلين ما اتجيبو خوكم مانكم لاهي اتشوفو وجهي.

24 وإلين جينا لعبدك بونا ڮلنالو ذاللي ڮال شيخي. 25 وامنين ڮال بونا: ارجعو واشرونا الطعام، 26 ڮلنالو : ما انڮدو نمشو هوك ما فتنا امشينا بخونا امعانا. بينلي ما انڮدو انڮابلو الراجل وخونا الصغير ماهو امعانا. 27 وڮالّنا عبدك بونا: انتوما تعرفو اعلن اعيالي خلاتلي اطفيلين 28 ضاع اعليَّ واحد منهم وڮلت: هو وڮطع تڮطيع. ولا شفتو يلين ظرك. 29 وإلين تڮبظو ولي هاذا الصغير واخلڮلو شي اتعودو درتوني شيباني امكدر افقبري . 30 وإلين نرجع شور عبدك بويَ اللي متعلقة روحو بالطفيل ويعود الطفيل ماهو امعانا 31 ويشوف اعلن الطفيل ماهو امعانا لاهي يموت وانعودو نحنا اعبيدك اكتلنا بونا انعودو درناه شيباني امكدر افقبرو. 32 بيهلي عبدك اضمن الطفيل لبوه وڮلت: يلين ما انجيبولك امعايَ انعود اذنبت افحقك مدة الحياة. 33 وآنا راجي من شيخي يڮبظني كيفت عبد لو بل الطفيل ويخلي الطفيل يمشي امع باڮي اخوتو 34 بيَّلي ابسيمحالة انڮد نرجع لبويَ والطفيل ماهو امعايَ وانشوف ذا كامل اللي لاهي يخلڮ لبويَ ؟