1 وامشاو الإسماعيلين بيوسف شور مصر واشراه من عندهم مصري اسمو فوطيفار ضابط لفرعون ورئيس الحرس. 2 وكان الله تعالى امع يوسف وانجح فشغلتو واسكن دار شيخو المصري. 3 وشاف المصري اعلن الله تعالى كان امع يوسف واعلنو ينجح فكل شي يعدلو. 4 وارضا اعليه شيخو وعدلو الوكيل فدارو وعدلو المسير لأملاكو كامل. 5 وبارك الله تعالى دار المصري وكل اللي عندو من أملاك فالدار والحرث بفضل يوسف. 6 وودع أملاكو كامل ليوسف ولا اتلا فوطيفار مشغول يكون باوكيل اطعامو بيهلي يوسف اهتم بكل شي.

وكان يوسف هيئتو زينة ووجهو زين 7 ولا ابطات يلين اشتهاتو اعيال شيخو وڮالت: اتكي امعايَ. 8 وآبا وڮالها: آنا شيخي ودعلي ذا كامل اللي عندو فهاذي الدار ولا اشغل نفسو بأي شي فيها. 9 وهاذي الدار ما فيها حد أعظم مني، ولا امنع عني شي يكون انتي بيكلي اعيالو. وابسيمحالة آنا انعدل هاذا الشر العظيم وانعدل ذنب فحق مولانا؟ 10 وآبا عنها يوسف امع اعلنها كانت اتلح اعليه يوم عاڮب يوم. 11 واخلڮ فواحد من النهارات اعلن يوسف ادخل الدار اياك يعدل شغلتو ولا كان فالدار أي حد من لعبيد، 12 وكردتو اعيال فوطيفار من لباسو وڮالت: اتكي امعايَ! وخلا لباسو امعاها واهرب الڮدام. 13 وإلين شافت اعلنو آبا واهرب الڮدام وخلا لباسو فايديها، 14 عيطت لهل دارها وڮالتلهم: خرصو ذاللي اخلڮ! هاذا العبراني اللي جابلي مولا خيمتي فالدار ادخل شور بيتي وحاول يغتصبني وازڮيت الفوڮ . 15 وإلين اسمعني رڮبت حسي وازڮيت، خلا لباسو امعايَ واهرب الڮدام. 16 وخلات لباسو احذاها يلين ارجع مولا خيمتها للدار. 17 وردت اعليه نفس لمردة وڮالت: ادخل لعبد العبراني اللي جبتنا شور بيتي اياك يغتصبني 18 وإلين رڮبت حسي وازڮيت خلا لباسو فزري واهرب الڮدام.

19 وإلين اسمع شيخو اكلام اعيالو ذاللي اتهمت بيه يوسف، انفڮع اعليه. 20 واحكم يوسف ودخلو فالحبس امع امحابيس الملك. 21 يغير الله تعالى كان امع يوسف واعطاه ياسر من الخير. وارضا اعليه مسؤول لكبير اللي اعلى الحبس. 22 واعطاه المسؤولية اعلى لمحابيس كاملين وعدلو مسؤول عن ذا كامل اللي يخلڮ فالحبس. 23 وكلف مسؤول الحبس يوسف بكل شي بيهلي الله تعالى كان امعاه وذاك كامل اللي عدل يوسف ينجحو الله تعالى .