1 وإلين اسمع النبي يعقوب اعلن الڮمح امعرم فمصر ڮال لأولادو: مالكم ڮاعدين تتخازرو ؟ 2 آنا اسمعت اعلن الڮمح امعرم فمصر، امشو شورها واشرونا الڮمح اياك نبڮاو حيين ولا انموتو. 3 وامشاو 10 من خوت النبي يوسف يشرو الڮمح من مصر. 4 يغير بنيامين خو النبي يوسف ما مشّاه النبي يعقوب امع اخوتو خايف يخلڮلو شي . 5 وجاو أولاد النبي إسرائيل اللي هو يعقوب لمصر امع القبايل لخرين الجايين اياك يشرو الڮمح بيهلي المجاعة كانت امتينة فارض كنعان املي.

6 وكان النبي يوسف هو اللي حاكم اعلى مصر والمسؤول عن بيع الڮمح لأهلها كاملين، وجاو اخوتو وسجدولو. 7 وإلين شافهم اعرفهم يغير هو غبا راصو عنهم وخاطبهم بكلام نشفان وسولهم: من امنين جايين؟ وڮالولو: من ارض كنعان اياك نشرو الطعام. 8 وامع اعلن عن النبي يوسف اعرفهم هوما ما عرفوه. 9 وفذا اتذكر النبي يوسف أحلامو اللي احلمها عنهم وڮالّهم: انتوما جواسيس وجيتو اياك تكتشفو نقاط الضعف اللي ماهم محمين فارضنا . 10 وڮالولو: ابدي نحنا اعبيدك جينا اياك نشرو الطعام. 11 نحنا كاملين أولاد راجل واحد، وامناء ولانا جواسيس.

12 يغير هو ڮالهم: ابدي انتوما جيتو اياك تكتشفو نقاط ضعفنا. 13 وڮالولو: نحنا اعبيدك، 12 خو أولاد راجل واحد ساكنين فارض كنعان وخونا الصغير ابڮا عند بونا وخونا لوخر واقد. 14 وڮالهم: ارواية هي كيفما ڮتلكم. انتوما جواسيس. 15 وانحلف اعلى حياة فرعون اعلنكم مانكم لاهي تمشو من هون ما فتو جبتو خوكم الصغير وبذيك الطريقة تثبتو اعلنكم ڮايلين الحڮ. 16 مشّو واحد منكم اياك يجيبلي خوكم الصغير والباڮين لاهي يبڮاو هون فالحبس يلين تثبت صحة اكلامكم. وإلين اتعودو ما ڮلتو الحڮ، حالف بحياة فرعون اعلنكم حڮ جواسيس . 17 ودخلهم فابلد فالحبس مدة 3 أيام. 18 وفاليوم الثالث ڮالهم: عدلو ذاللي ڮتلكم اياك تحياو بيَّلي آنا راجل يتقا مولانا. 19 إلى عتو فالحقيقة صادقين خلو واحد منكم يبڮا رهينة فالوقت اللي يڮبظو لخرين الڮمح ويڮيسو ادياركم اللي جيعانين 20 يغير امشو جيبولي خوكم الصغير اياك نتحقق من صدقكم. وعدلو ذاللي ڮالهم. 21 وڮالو امبيناتهم: فالحقيقة نحنا عدلنا شي خاسر لخونا، نحنا شفنا ضيقتو فوقت يلين اطلبنا الرحمة ولا اسمعنالو، ولذاك جاتنا هاذي الضيقة. 22 وڮال رأوبين: امالي ڮلتلكم لا اتمسوه ولا اسمعتوني؟ واراعينا ظرك نحنا مطالبين بدمو. 23 ولا كانو عالمين اعلن النبي يوسف فاهم اكلامهم بيهلي كان يتكلم امعاهم عن طريق مترجم. 24 وامشا عنهم وڮام يبكي وعاڮب ذاك ارجعلهم واتكلم امعاهم وفالنهاية اڮبظ شمعون وكتفو ڮدام عينيهم. 25 وآمر النبي يوسف اشغاغيلو يملاولهم ازڮايبهم من الڮمح ويرجعو فظة كل واحد منهم فازڮيبتو ويعطوهم زاد فاطريڮهم. وعدلو اشغاغيلو ذاللي ڮالهم النبي يوسف. 26 ورفّدو احميرهم الڮمح وامشاو من ارض مصر.

27 وإلين وڮفو اياك يباتو ليلتهم افتح واحد منهم ازڮيبتو فبل امنين باتو اياك يوكّل احمارو وشاف فظتو بيهَلي كانت مديورة ففم الزڮيبة. 28 وڮال لخوتو: آنا فظتي رجعتلي. شوفو اراعيها فازڮيبتي. وخافو وانخلعو واتخارصو امبيناتهم وڮالو: ذاللي عدلّنا مولانا شنهو؟ 29 وإلين جاو لبوهم النبي يعقوب فارض كنعان ردو اعليه ذاللي اخلڮلهم وڮالو: 30 الراجل الحاكم اعلى مصر خاطبنا بنشاف وشك اعلنا جواسيس اعلى لارض 31 وڮلنالو: نحنا ارواڮيج امناء ولانا جواسيس. 32 نحنا 12 خو أولاد بونا وواحد منا واقد والصغير ابڮا امع بونا فارض كنعان. 33 وڮالّنا الراجل شيخ الدولة : اياك نتحقق من اعلنكم ڮايلين الحڮ خلو واحد منكم عندي رهينة وامشو باطعامكم شور أهلكم اللي جيعانين . 34 وجيبولي خوكم الصغير وبهاذي الطريقة نعرف اعلنكم مانكم جواسيس واعلنكم ارواڮيج امناء ونطلسلكم خوكم واتعدلو تجارتكم فهاذي الدولة بكل حرية. 35 وإلين بداو يكبو ازڮايبهم اجبر كل واحد منهم فظتو فازڮيبتو وإلين شافو هوما وبوهم ذاك، خافو كاملين بيهم الفظة اللي جبرو فازڮايبهم. 36 وڮالّهم بوهم: انتوما احرمتوني من أولادي. ولي يوسف واقد وشمعون واقد واراعيكم انتوما امبعدين عني بولي بنيامين . هاذو المشاكل كاملين طاحو اعليَّ. 37 وڮالّو رأوبين: اكتل أولادي يلين ما نرجع بيه شورك ودعولي ولاهي انرجعولك. 38 وڮال: ولي ماهو لاهي يمشي امعاكم بيهلي ڮط مات خوه وهو ابڮا وحدو. وإلين يوقعلو شي فالطريڮ واعد مصر، اتعودو نزلتو شيبي بحزن شور قبري.