1 وادخل النبي يوسف اعلى فرعون وڮالّو: بويَ واخوتي جاو امع اغنمهم وابڮرهم وذاللي عندهم كامل من ارض كنعان واراعيهم ظرك فارض جاسان . 2 واڮبظ 5 من اخوتو وڮدمهم لفرعون. 3 وسولهم فرعون: انتوما شغلتكم شنهي؟ وڮالولو: اعبيدك يسرحو الحيوان كيفما اباتهم كانو . 4 وجينا اياك نسكنو فارض مصر بيهلي حيوان اعبيدك ما عندهم ابليدة يسرحو فيها بسبب متن الجوع فارض كنعان، وطالبينك ظرك اتخلي اعبيدك يسكنو فارض جاسان. 5 وڮال فرعون للنبي يوسف: بوك واخوتك جاوك. 6 وارض مصر ڮدامك وسكّن بوك واخوتك فأزين لارض، خليهم يسكنو فارض جاسان، وإلى عدت تعرف من فيهم عندو خبرة اعطيه مسؤولية سرحة حيواني . 7 وعاڮب ذاك ڮام النبي يوسف وجاب بوه لفرعون و طلب النبي يعقوب مولانا ينزل فيه البركة. 8 وسول فرعون النبي يعقوب: انتا عندك كم من سنة؟ 9 وجاوب النبي يعقوب فرعون وڮالّو: آنا عمري 130 سنة وذاك اشوي وكانت حياتي صعيبة اعليَّ ولا فت الحڮت اعمار اباتي. 10 واطلب النبي يعقوب البركة لفرعون وامشا عنو. 11 وسكّن النبي يوسف بوه واخوتو فارض جاسان احذا مدينة رعمسيس واعطاهم أزين أراضيهم كيفما آمر فرعون. 12 واعطا النبي يوسف لبوه واخوتو وأهل دار بوه الطعام اعلى حسب عدد أولادهم.

13 وافرق الطعام فارض مصر بسبب متن المجاعة ويبست ارض مصر وارض كنعان. 14 واجمع النبي يوسف الفظة كاملة اللي فارض مصر وفارض كنعان بسبب الڮمح اللي اشراو منو الناس، وجابها لخزينة فرعون. 15 وإلين فرقت الفظة من ارض مصر وكنعان جاو كل المصريين للنبي يوسف وڮالولو: اعطينا الطعام. حڮلا لا اتخلينا انموتو ڮدام عينيك؟ نحنا ما تلات عندنا فظة اخرا اياك نشرو بيها الڮمح. 16 وڮالّهم: يلين تفرق فظتكم جيبولي حيوانكم نعطيكم مقابلو الطعام. 17 وجابولو حيوانهم واعطاهم النبي يوسف الطعام مقابل الخيل ولغنم ولبڮر ولحمير. وبهاذي الطريقة بدل حيوانهم كامل مقابل الطعام فذيك السنة. 18 وإلين اوفات ذيك السنة جاوه السنة الثانية و ڮالولو: مانا لاهي نجحدو اعلى شيخنا اعلن فظتنا فرقت واعلن حيوانا عاد عند شيخنا ولا اتلا عندنا ماهو ابدانا واحرايثنا. 19 لا اتخلينا انموتو نحنا وارضنا ڮدام عينيك! اشرينا نحنا وارضنا مقابل الطعام: وانعودو نحنا اعبيد لفرعون، وأراضينا لاهي يعودو لو، واعطينا لحبوب نزرعوهم اياك نحياو ولا انموتو ولا يعودو أراضينا يابسين.

20 وبهاذي الطريقة اشرا النبي يوسف لفرعون ارض مصر كاملة بيهلي المصريين كاملين باعو أراضيهم بسبب المجاعة اللي امتانت اعليهم وعادت لارض كاملة لفرعون. 21 واستعبد النبي يوسف شعب مصر كامل من بدايتها لاخرها لفرعون. 22 ولا خلا يكون ارض الكهان اللي ما اشراها بيهلي الكهان كان عندهم دخل خاص من عند فرعون وكانو عايشين من هاذا الدخل ولهاذا السبب ما باعو ارضهم.

23 وڮال النبي يوسف للشعب: اراعيني اشريتكم اليوم انتوما وأراضيكم وعدتو اعبيد لفرعون. وهاكو لحبوب اياك تحرثوهم فالتراب 24 ويعود فوقت الحصاد اعلنكم تعطو لفرعون الخمس المحصول واتخلولو لروصكم لاربع لاخماس الباڮين اياك اتعود عندكم لحبوب لارضكم والطعام لكم انتوما وأهل دياركم واتركتكم الصغار. 25 وڮالولو: انتا سلكتنا يالتك ترضا اعلينا يا شيخنا وانعودو اعبيد لفرعون. 26 ومن ذاك الوقت إلى يومنا هاذا، اجعل النبي يوسف قانون الخمس وهي ضريبة اعلى ارض مصر كاملة تحصل لفرعون يكون ارض الكهان اللي ماهي تحت ملك فرعون.

27 وسكنو بني إسرائيل فمصر فارض جاسان وجمعو فيها ياسر من الملاك و كبرو فيها واكثارو يلين عاد عددهم اكبير. 28 وعاش النبي يعقوب فارض مصر 17 سنة وعاد عمرو 147 سنة. 29 وإلين ڮرب من الموت عيط لولّو النبي يوسف وڮالّو: يلين اتعود تسمعلي ڮوم ودير ايدك تحت ڮايمتي واتعهدلي اعلنك لاهي اتعدل ذاللي لاهي نطلب منك بنزاهة وكرامة: وغايتي هي: اعلنك ما تدفني فارض مصر يلين انموت. 30 يلين انموت اندورك ترفدني من مصر وتدفني فمقبرة اباتي. وڮالّو النبي يوسف: اندور انعدل كيفما اطلبت مني. 31 وڮالّو النبي يعقوب: احلفلي. واحلفلو النبي يوسف. واسجد النبي يعقوب اعلى راس متكاه اياك يشكر مولانا.