1 وإلين عرفت راحيل اعلنها عاڮر، غارت من ختها ليئة وڮالت للنبي يعقوب: اعطيني أولاد وللا لاهي انموت. 2 وانفڮع اعليها النبي يعقوب وڮالها: انتي اثرك شايفتني انحل محل مولانا اللي منعك من تجبري التركة؟ 3 وڮالت راحيل للنبي يعقوب: اراعي خادمي بلهة، عاشرها اياك انعود بأولادي منها. 4 واعطات راحيل للنبي يعقوب خادمها بلهة. 5 وحملت بلهة وخلات للنبي يعقوب اطفيل. 6 وڮالت راحيل: مولانا استجابلي وارزقني باطفيل. وسمات راحيل الطفيل دان اللي معناه اقضالي مولانا حاجتي. 7 وحملت بلهة خادم راحيل مرة ثانية وخلات للنبي يعقوب اطفيل اوخر. 8 وڮالت راحيل: آنا ادايڮت امع اختي ياسر من الديڮات واغلبتها. وسمات راحيل الطفيل الثاني باسم نفتالي اللي معناه ديڮاتي.

9 وإلين شافت ليئة اعلنها ما تلات تجبر التركة، ڮبظت خادمها زلفة واعطاتها للنبي يعقوب يعاشرها. 10 وخلات زلفة خادم ليئة اطفيل للنبي يعقوب. 11 وڮالت ليئة: مزين حظي. وسمات اطفيل جاد ومعناه الحظ الزين. 12 وخلات زلفة خادم ليئة اطفيل ثاني 13 وڮالت ليئة: آنا فرحانة ولعليات لاهي يسموني الفرحانة! وسمات ليئة الطفيل الثاني باسم أشير اللي معناه الفرحان.

14 وامشا رأوبين شور الحرث فزمن حصاد الڮمح، واجبر اڮريب منو نبتة اسمها *اللفاح وجابها لأمو ليئة. وڮالت راحيل لليئة: اعطيني من ذا اللفاح اللي جابلك ولك. 15 وڮالتلها ليئة: انتي ما كافيك اعلنك اڮبظتي مني راجلي، وظرك هامك املي تڮبظي اللفاح ولي؟ وڮالتلها راحيل: لاهي انخلي النبي يعقوب يبات الليلة امعاك بدل للفاح. 16 وإلين ارجع النبي يعقوب من الحرث فالليل، خاظت ليئة تتلڮالو وڮالتلو: انتا يالتك اتبات امعايَ الليلة بيّلي آنا اكريتك بنبتة لفاح ولي. وعاشرها النبي يعقوب فذيك الليلة. 17 واستجاب مولانا لليئة وحملت املي وخلات للنبي يعقوب ول خامس. 18 وڮالت ليئة: مولانا اعطاني كريتي بيّلي اعطيت خادمي لراجلي. وسمات ليئة ولها باسم يساكر اللي معناه يشتغل بكرية. 19 وحملت ليئة مرة اخرا وخلات للنبي يعقوب ول سات. 20 وڮالت ليئة: آنا اعطاني مولانا معطا زين، وظرك راجلي عاد اعطيني قيمتي بيّلي خليتلو ست أولاد. وسمات ليئة ولها السات باسم زبولون اللي معناه يكرمني. 21 وخلات املي ليئة للنبي يعقوب اطفيلة وسماتها دينة.

22 واذّكر مولانا راحيل واستجابلها وافتحلها رحمها. 23 وحملت وخلات اطفيل وڮالت: اڮلع مولانا عني عاري. 24 وسمات راحيل اطفيلها باسم يوسف اللي معناه يزيد. وڮالت: الله تعالى يزيدني باطفيل اوخر.

25 وإلين ابرات راحيل اعلى يوسف ڮال النبي يعقوب للابان: خليني نمشي واعد بلي وارضي. 26 واعطيني اعلياتي وأولادي اللي اشتغلتلك بيهم، وخليني نمشي بيكلي انتا تعرف الشغلة اللي عدلتلك. 27 وڮالّو لابان: إلى عدت راضي اعليَّ آنا طالبك عنك تبڮا امعايَ بيّلي آنا عدلت لڮزانة وظهرلي اعلن الله تعالى باركني بسببك انتا. 28 وڮال املي: ڮولّي شنهو اخلاصك ونعطيهلك. 29 وڮالّو يعقوب: انتا تعرف الطريقة اللي اشتغلتلك بيها وتعرف املي اعلن ما اخلڮ شي لغنمك فالوقت اللي كانت عندي نرعاها. 30 وذاللي كان عندك سابڮ انجيك عاد أكثر حته والله تعالى باركك يلين جيتك آنا. وظرك آنا اينتا لاهي نوحل فتحصال الرزق لعيّالي؟ 31 وسولو لابان: شنعطيك؟ وڮالّو النبي يعقوب: لا تعطيني شي يغير إلى عدت تبغي اتعدلّي مسلة وحدة: لاهي نرعا غنمك ونهتم بيها، 32 وخليني نوخظ اليوم امبين غنمك كاملة وتعزل منهم كل كبش ونعجة ارڮط وللا اشهب، وكل اخروف اكحل، وكل عنز وعتروس ارڮط وللا اشهب ويعود هاذا اخلاصي. 33 واتعود امانتي تشهد اعلى صدقي فلأيام الجايين. وإلين اتجيني اياك اتخرص الحيوان اللي خلصتني بيه، واجبرت عندي عنز وللا عتروس ماهم رڮط وللا شهب وللا اخروف اكحل لاهي يعودو مسروڮين. 34 وڮال لابان: انعدلو ذاللي ڮلت. 35 واعزل لابان فذاك النهار لعتاريس الرڮط والشهب وكل عنز رڮطة وللا اشهبة وكل اخروف اكحل واعطاهم لأولادو اياك يسرحوهم. 36 وعدل امبينو وامبين النبي يعقوب مسافة اثلت أيام وواصل النبي يعقوب فرعاية اغنم لابان.

37 واڮبظ النبي يعقوب اعراش خظر من 3 أنواع من الصدر وڮشرهم اياك يظهر لخطوطة البيظ اللي فيهم. 38 وڮام وڮف هاذو لعراش اللي ڮشرهم فبلديات ماشي فيهم الما اياك يعودو لعراش فالما يلين يجو لغنم اياك يشربو. وكانو لغنم يتلاڮحو فنفس الوقت اللي جاو فيه اياك يشربو الما. 39 وكانو لغنم يتلاڮحو ڮدام لعراش ويولدو جديان وخرفان فيهم اخطوطة وللا شهب وللا رڮط. 40 وكان النبي يعقوب يعزل هاذو عن اغنم لابان ويديرهم امع غنمو. وإلين يلحڮ وقت تلڮاج يخلط غنمو اللي فيهم اخطوطة وللا لغنم الكحل كاملين امع اغنم لابان. وبهاذي الطريقة كثر غنمو. 41 يلين كانو لغنم لمتان يتلاڮحو كان النبي يعقوب يوّڮف لعراش فلبليدات اللي فيهم الما ڮدام لغنم اياك يشربو ويتلاڮحو ڮدامهم. 42 وإلين يعودو لغنم الضعيفة هوما اللي يتلاڮحو ما يدير لعراش ڮدامهم. وبذي الطريقة عادو لغنم الضعيفين للابان ولغنم لمتان للنبي يعقوب. 43 وعاد النبي يعقوب غني حته واكثارو غنمو وخدمو واعبيدو واجمالو واحميرو.