1 واسمع النبي يعقوب اعلن أولاد لابان يڮولو: اڮبظ يعقوب كل شي من عند بونا واجمع هاذي الثروة كاملة. 2 ولاحظ النبي يعقوب اعلن معاملة لابان لو اتغيرت وما اتلات كيف كانت. 3 وڮال الله تعالى للنبي يعقوب: ارجع شور بل اباتك وشور أهلك وآنا لاهي انعود امعاك.

4 وڮام النبي يعقوب ومشّا لراحيل وليئة اياك يجوه شور الخلوات بل امنين يرعا لغنم. 5 وڮالّهم: آنا لاحظت اعلن معاملة بوكم امعايَ اتغيرت ولا تات كيف كانت، يغير إله اباتي كان ومزال امعايَ. 6 انتوماتي تعرفو اعلني اشتغلت لبوكم بقوتي كاملة. 7 يغير بوكم خزا بيَّ وغير اخلاصي 10 مرات يغير مولانا ما خلاه يظلمني. 8 يلين يڮول اعلن اخلاصي هي لغنم اللي فيها انڮط، ولدت كاملة جديان وخرفان فيهم انڮط. وإلين يڮول: اخلاصك هي لغنم اللي فيها اخطوطة، تولد كاملة خرفان وجديان فيهم اخطوطة. 9 ومولانا اڮبظ اغنم بوكم واعطاهالي. 10 وإلين يتلاڮحو فيه لعتاريس امع لمعيز شفت فحلم اعلن كل لعتاريس اللي لاهي يتلاڮحو امع لمعيز فيهم اخطوطة وللا انڮط وللا شهب. 11 وڮالّي ملاك مولانا فالحلم: يا يعقوب! وڮلتلو: اراعيني. 12 وڮال: خرص ولاهي اتشوف اعلن لعتاريس كاملين اللي لاهي يتلاڮحو امع لغنم فيهم اخطوطة وللا انڮط وشهب بيَّلي آنا شفت كل شي عدلولك لابان. 13 آنا هو مولانا اللي اظهرلك فبيت إيل بل امنين صبيت الدهن اعلى الحجرة اياك اتخصصهالي وانذرتلي نذر. ظرك ڮوم وامشي من هاذي لبليدة وارجع شور ابليدتك. 14 وڮالولو راحيل وليئة: مندرا يكان عندنا شي نورثوه فأملاك بونا؟ 15 وهو يعاملنا كيف ارواڮيج ما يعرفهم بيهلي باعنا وكال فظتنا. 16 وهاذي الثروة كاملة اللي اڮبظ مولانا من بونا هي لنا ولأولادنا، ولهاذا السبب عدل ذاللي ڮالك مولانا.

17 وركّب يعقوب اعلياتو وأولادو اعلى الجمال 18 وصاڮ غنمو كاملة ڮدامو وذاك كامل اللي اجمع فواد أرام وڮاس بوه النبي إسحاق فارض كنعان.

19 وفذا الوقت كان لابان امشا يزز لوبر من غنمو وڮامت راحيل وسرڮت أصنام بوها. 20 و اخدع النبي يعقوب لابان لأرامي ولا ڮالّو اعلنو ماشي. 21 واهرب يعقوب رافد ذا كامل عندو واڮطع من نهر الفرات ماشي اعلى جيهة اكدا جلعاد.

22 واعلم لابان فاليوم الثالث اعلن النبي يعقوب اهرب. 23 واڮبظ لابان اخوتو وامشا يڮص اثر النبي يعقوب مدة سبعة أيام يلين اتلاحڮ بيه فاكدا جلعاد. 24 واظهر مولانا للابان لأرامي فحلم فالليل وڮالّو: عسك من اتڮول ليعقوب أي شي اسوا خاسر وللا صالح.

25 وإلين اجابر لابان امع النبي يعقوب كان النبي يعقوب فات ابنا خيمتو فكدية جلعاد وابنا لابان واخوتو اخيامهم فم املي. 26 وڮال لابان للنبي يعقوب: ذاللي عدلتلي شنهو؟ انتا اخدعتني وامشيت بامناتي كيفت حد رافد محبوسات فالحرب. 27 اعلاش اجحدت عني اعلنك ماشي وخزيت بيَّ؟ اعلاش ما علمتني اعلى لأقل انعود عدلتلك ندوية من لغنا والهول والطبول والتيدينيت. 28 ولا خليتني املي انضم وانحب امناتي وأولادهم؟ انتا الطريقة اللي اهربت بيها ما كانت زينة. 29 آنا ڮاد انعدلّك شي ماهو مونك يغير إله بوك ڮالّي البارح: عسك من اتڮول ليعقوب أي شي اسوا خاسر وللا صالح. 30 وانتا ظرك امشيت بيكلي اتوحشت دار بوك يغير اعلاش اسرڮت أصنامي اللي نعبدهم؟ 31 وڮالّو النبي يعقوب: آنا كنت خايف من اعلنك تڮلع مني امناتك. 32 وظرك اللي تجبر عندو أصنامك يعود الموت عقابو. ڮوم ونبش وسط ادبش أقاربنا وشي اجبرتو لك عندي، ڮبظو. والنبي يعقوب ما كان عالم باعلن راحيل سرڮت أصنام لابان. 33 وادخل لابان فخيمة النبي يعقوب وخيمة ليئة واخيام اخدمهم ولا اجبر فيهم شي. وخاظ من خيمة ليئة وادخل شور خيمة راحيل. 34 وكانت راحيل فاتت ڮبظت لأصنام ولمتهم فراحلة الجمل وڮعدت اعليهم. ونبش لابان خيمة راحيل ولا اجبر فيها شي. 35 وڮالت راحيل لبوها لابان: لا تنفڮع اعليَّ بيّلي ما انڮد انڮوم شورك بيهلي اعليَّ الدورة. وعاڮب نبش لابان كل خيمة، ما اجبر أصنامو.

36 وانفڮع النبي يعقوب وعيب لابان وڮالّو: شنهو ذنبي وشنهي خطيئتي اياك تتلبني منفڮع؟ 37 انتا نبشت ذا كامل اللي عندي ولا اجبرت شي من أصنامك. إلى عدت اجبرتو ديرو ڮدام أقاربي وأقاربك اياك يحكمو بيناتنا. 38 مدة 20 سنة اللي عشتها عندك ما اكتلت لك انعاجك وللا امعيزك ولا كلت كبش من غنمك. 39 ولا جبتلك أي شه موكولة فلخلا اعلى العكس آنا اللي كنت نتحمل المسؤولية وانتا كنت تطلبها مني اسوا كانت انتكلت فلخلا فالليل وللا النهار. 40 وآنا كان يثقل اعليَّ الحمان فالنهار وفالليل البرد والرڮاد طار من عينيَ. 41 آنا عادلي 20 سنة فدارك، 14 سنة منها اشتغلتلك اياك نتخيم امع امناتك وست سنوات اياك نسرح غنمك وانتا غيرت اخلاصي اعشر مرات. 42 لولا إله جدي النبي إبراهيم واللي خايف املي منو بويَ النبي إسحاق، اتعود صعتني عنك ما امحاذيني شي. يغير مولانا شاف ظلمك لي وتعب ايدي وحذرك البارح.

43 وڮال لابان: لمنات هوماتي امناتي ولأولاد أولادي ولغنم غنمي ذاللي اتراعي فيه هو لي، يغير شلاهي انعدل لمناتي وأولادهم ظرك من شي متعدل؟ 44 شوف، خلينا انعدلو عهد امبيناتنا اليوم، ويعود هاذا العهد شاهد بيني وبينك. 45 واڮبظ النبي يعقوب حجرة ووڮفها الفوڮ اياك اتعود علامة العهد. 46 وڮال لأقاربو: اجمعو شي من لحجار. وڮامو وجمعو لحجار وعدلوها كومة منها وكالو احذاها. 47 وسماها لابان لأرامي يجر سهدوثا بلغتو اللي معناها كومة الشهادة. وسماها النبي يعقوب جلعيد اللي معناها كومة الشهادة بلغتو. 48 وڮال لابان: هاذي الكومة من لحجار شاهدة اليوم بيني وبينك ولهاذا السبب اُسمات جلعيد. 49 و اُسمات املي باسم المصفاة بيهلي لابان ڮال: الله تعالى لاهي يعود شاهد بيني وبينك يلين يتغيب واحد منا عن لوخر. 50 وإلين اتسيئ معاملتك امع امناتي وللا تتخيم اعليهم، مولانا يدور يشوفك ولاهي يعود حاكم امبيني امعاك حته ولعت آنا ماني عالم بيك. 51 وڮال لابان املي: لاهي اتعود هاذي الكومة وهاذي الحجرة اللي وڮفت بيني وبينك 52 شاهدين اعلني ماني لاهي نتخطا هاذي الكومة وهاذي الحجرة اياك انعدلّك شي خاسر، وانتا املي لا تتخطاهم اياك اتعدلّي شي خاسر. 53 ويعود إله النبي إبراهيم وإله ناحور وإله بوهم حاكم امبيناتنا. واحلف النبي يعقوب بمولانا اللي يتقيه بوه النبي إسحاق. 54 وعاڮب ذا ڮام النبي يعقوب وڮدم اذبيحة لمولانا فالكدية وعيط لأقاربو اياك يوكلو فبلد الطعام. وكالو وباتو ليلتهم فالكدية. 55 وامع الصباح ڮام لابان وحب وضم امناتو وأولادهم واطلبلهم البركة وڮيم ماشي راجع شور بلو.