1 وخرص النبي يعقوب من ابعيد وشاف عيسو جاي وامعاه 400 راجل، وڮسم النبي يعقوب أولادو امبين ليئة وراحيل ولخدم الثنتين. 2 ودار لخدم وأولادهم فالڮدام ومن فم ليئة وأولادها وفالوراني راحيل ويوسف. 3 واتڮدمهم النبي يعقوب واسجد اعلى التراب سبع مرات يلين ڮرب من خوه. 4 وڮام عيسو دافع اياك يتلاڮا امعاه وضم النبي يعقوب وحبو وڮامو لأثنين يبكو. 5 وخرص عيسو اوراه وشاف لعليات والتركة وڮال: من هوما هاذو اللي امعاك؟ وڮال النبي يعقوب: هاذو هوما التركة اللي انعم بيهم مولانا اعلى عبدك يعقوب. 6 وعاڮب ذاك ڮربو لخدم الثنتين امع أولادهم وسجدو ڮدام عيسو. 7 وعاڮبهم ڮربت ليئة وأولادها وسجدو هوما املي. وعاڮب ذاك ڮربت راحيل ويوسف وسجدو هوما املي ڮدامو. 8 وسول عيسو النبي يعقوب: شنهو قصدك بهاذو ڮلفات الحيوان اللي اجابرت امعاهم؟ وڮالّو النبي يعقوب: اعطيتهملك اياك انسڮريك بيهم. 9 وڮالّو عيسو: آنا عندي ياسر يا خويَ اڮبظ شورك حيوانك. 10 وڮال النبي يعقوب: ابدي إلى عدت اصا اسڮريت اعليَّ آنا طالبك تڮبل هديتي. بيَّلي آنا شفت وجهك وانتا ارضيت عني وآنا فرحت اليوم وعدت الا كيفت آرڮاج شاف مولانا. 11 وآنا طالبك تڮبل هاذي الهدية اللي مشيتهالك بيهلي مولانا ارزقني بكل شي. والح النبي يعقوب اعلى عيسو يلين اڮبل الهدية.

12 وڮال عيسو للنبي يعقوب: ڮيم ولاهي نمشي ڮدامك واتلبني انتا. 13 وڮالّو النبي يعقوب: يا شيخي انتا تعرف اعلن اتريكتي اصغيرين ولغنم ولبڮر اللي عندي فيهم البن. وإلين انتعبوهم ولو يوم واحد لاهي يموتو كاملين. 14 اتخطا ڮدامي انتا يا شيخي وآنا تالبك اعلى اكياسة اعلى حسب اللي ڮادة لغنم واعلى حسب طاقة التريكة يلين نتلاحڮ بيك يا شيخي فمدينة سعير.

15 وڮالّو عيسو: ايوا اصا لاهي انخلي امعاك ارواڮيج من اللي متافڮين امعايَ. وڮالّو النبي يعقوب: ذاك ماهو ضروري. آنا هدفي الوحيد هو اعلنك ترضا اعليَّ يا شيخي. 16 وڮيم عيسو فطريڮو ذاك النهار راجع شور سعير. 17 يغير النبي يعقوب ارحل شور ابليدة اسمها سكوت وابنا لراصو دار وابنا لغنمو امبارات ولهاذا السبب اُسمات ذي لبليدة بسكوت اللي معناها امبارات.

18 وامنين امشا النبي يعقوب من واد أرام اوصل بالسلامة المدينة شكيم اللي فارض كنعان وابنا اخيامو امڮابل المدينة. 19 واشرا النبي يعقوب لارض اللي ابنا فيها خيمتو من أولاد حمور بو شكيم بمية ڮطعة من الفظة. 20 وابنا فم مذبح وسماه إله إسرائيل هو مولانا.