1 وعاڮب ذاك اخلڮ اعلن مستشارين اللي هوما سڮاي الملك وخبازو عدلو شي خاسر لشيخهم ملك مصر. 2 وانفڮع فرعون اعلى رئيس السڮاية ورئيس الخبازة 3 ودارهم فحبس دار رئيس الحرس فلبليدة اللي كان يوسف محبوس فيها. 4 ووصا رئيس الحرس يوسف اياك يهتم بيهم. 5 وعاڮب انهارات اشوي احلم فنفس الليلة كل من سڮاي الملك وخبازو اللي فالحبس وكان حلم كل واحد منهم معناه الخاص. 6 وجاهم يوسف امع الصباح واجبرهم ماهم متمونكين. 7 وسولهم:انتوما ذاللي امكدر اعليكم شنهو؟ 8 وڮالولو: كل واحد منا احلم حلم ولا امعانا حد يفسرهملنا. وڮال يوسف: امال تفاسير لأحلام خاصين بمولانا؟ ردوهم اعليَّ.

9 ورد رئيس السڮاية حلمو اعلى النبي يوسف وڮال: شفت فحلمي صدراية عنب ڮدامي 10 فيها 3 اعراش وإلين اطلع اورڮهم خاظ منهم نوار ولا ابطاو لعراش يلين خاظ منهم عنب طايب. 11 وفذا كانت كاس فرعون فايدي واڮبظت العنب واعصرتو فكاس فرعون واطرحت الكاس فايدو. 12 وڮالّو النبي يوسف: راعي هاذا هو تفسير حلمك، 3 اعراش هوما 3 أيام. 13 وعاڮب 3 أيام لاهي يرضا اعليك فرعون ولاهي يرجعك شور شغلتك بل امنين تسڮي فرعون كيفما كنت اتعدل سابڮ ذا . 14 يغير يلين يخلڮ ذا لا تنساني واحسن اعليَّ اذكرني عند فرعون ووخظني من هاذا الحبس 15 بيَّلي آنا جابوني من ارض العبرانيين وهون ما عدلت شي خاسر اياك يديروني فهاذا الحبس.

16 وإلين شاف رئيس الخبازة اعلن النبي يوسف فسر الحلم بتفسير زين ڮالّو : آنا املي شفت حلم اعلن 3 اطباڮ من امبورو فوڮ راسي. 17 وكان الطبڮ الفوڮاني املان من ياسر من أنواع لكسور اللي يعدلهم الخباز لفرعون. يغير كانو الطيور يوكلوهم من فوڮ الطبڮ اللي فوڮ راسي. 18 وڮال النبي يوسف: راعي تفسير حلمك! لطباڮ 3 هوما 3 أيام. 19 وعاڮب 3 أيام لاهي يڮطع فرعون راسك ولاهي يعلڮك اعلى خشباية ولاهي يوكلو الطيور لحمك.

20 وكان اليوم 3 هو يوم عيد ميلاد فرعون وعدل ندوية لرجالتو كاملين وجاب من الحبس رئيس السڮاية ورئيس الخبازة ووڮفهم ڮدامو. 21 ورجع رئيس السڮاية لشغلتو وارجع يڮدم الكاس لايد فرعون. 22 يغير رئيس الخبازة علڮو اعلى خشباية كيفما فسرلهم النبي يوسف أحلامهم. 23 يغير رئيس السڮاية ما اذكر النبي يوسف لفرعون وانسا اخبارو.