1 وامتانت المجاعة فلارض. 2 وإلين فرقو الڮمح اللي جابوه من مصر ڮالهم بوهم: ارجعو واشرولنا الطعام. 3 وڮال يهوذا: حذرنا الراجل تحذير امتين وڮال: مانكم لاهي اتشوفو وجهي يلين ما اتجيبو خوكم امعاكم. 4 وإلين اتعود لاهي اتمشّي خونا امعانا، لاهي نمشو ونشرولك الطعام. 5 إلى عاد ماهو ذاك، مانا لاهي نمشو بيهلي الراجل ڮالّنا: مانكم لاهي اتشوفو وجهي يلين ما اتجيبو خوكم امعاكم. 6 وڮال النبي يعقوب اللي هو إسرائيل: اعلاش عدلتولي شي خاسر وڮلتو للراجل اعلن عندكم خو اوخر؟ 7 وڮالو: هو الراجل استجوبنا حته عن روصنا وعن قبيلتنا وسولنا: مندرا يكان بوكم سالم؟ مندرا يكان عندكم خو؟ وجاوبناه اعلى أسئلتو. ونحنا ابسيمحالة لاهي نعرفو اعلنو لاهي يڮولنا: جيبولي خوكم هون؟ 8 وڮال يهوذا للنبي إسرائيل بوه: مشّي اطفيل امعايَ وانڮومو ونمشو ونحياو ولا انموتو نحنا وانتا وأولادنا كاملين. 9 وآنا ضامنو ومن ايدي تطلبو. وإلين ما انرجعو وانوڮفو ڮدامك انعود عدلتلك شي خاسر طول عمري. 10 و لو كنا ما اتأخرنا فالسفر انعودو ارجعنا مرتين. 11 وڮالهم بوهم: إلى عاد لابد من ذا عدلوه وڮبظو امعاكم هدايا للراجل واملاو ازڮايبكم من أحسن شي فارضنا، ونوعين من العلك ولعسل ولبهارات ولفستق واللوز. 12 وڮبظو امعاكم فظة اخرا والفظة اللي رجعت ففام ازڮايبكم ورجعوهالو. لعلهم يعودو اسهاو. 13 وامشو امعاكم بخوكم وڮومو ارجعو للراجل. 14 وينعم اعليكم مولانا القدير بالرحمة عند الراجل ويطلسلكم خوكم لوخر وبنيامين املي. وإلين يعودو لابدالهم من يضعيو اعليَّ اراهم يضعيو اعليَّ.

15 وڮبظو الرجالة الهدايا والفظة مرتين وخوهم وبنيامين وامشاو واعدين مصر ووڮفو ڮدام النبي يوسف.

16 وإلين شاف النبي يوسف بنيامين ڮال للعبد اللي مسؤول عن الدار: دخل الرجالة شور الدار واذبح اذبيحة وجهزها بيهلي هاذو الرجالة لاهي يتغداو امعايَ. 17 وعدل الراجل ذاللي ڮالّو النبي يوسف ودخل الرجالة شور دارو. 18 وإلين اُدخلو شور دار النبي يوسف مسهم الخوف وڮالو: نحنا انجبنا هون اياك يهجمو اعلينا الجنود ويكردونا ويستعبدونا ويڮبظو احميرنا بسبب فظتو لأولة اللي رجعت فازڮايبنا. 19 واتڮدمو شور مسؤول دار النبي يوسف وڮالولو عند مدخل الباب: 20 اسمع يا شيخنا نحنا جينا هون فالمرة لأولة اياك نشرو الطعام. 21 يغير يلين بركنا حيوانا فالخلوات وافتحنا ازڮايبنا اجبر كل راجل منا فظتو كاملة ففم ازڮيبتو وجبناها امعانا اياك انردوهالكم 22 وجبنا امعانا فظة اخرا اياك نشرو بيها الطعام ونحنا ما نعرفو من دار فظتنا فازڮايبنا. 23 وڮالهم: عودو متمونكين ولا اتخافو بيهلي إلهكم وإله بوكم اعطاكم كنز فازڮايبكم وفظتكم وصلتلي. وعاڮب ذاك وخظلهم خوهم شمعون. 24 ودخل الراجل اخوت النبي يوسف شور دارو واعطاهم الما اياك يغسلو كرعيهم وشي من الحش لحميرهم. 25 وعاڮب يلين جهزو الهدايا امحانين النبي يوسف يجي وقت الظهر بيهلي سمعو اعلنهم لاهي يوكلو اطعام امعاه فدارو.

26 وإلين جا النبي يوسف لدار جابولو الهدايا اللي رفدوها امعاهم شور الدار و سجدو ڮدامو. 27 وسولهم عن احوالهم وڮال: مندرا يكان بوكم اللي خبرتوني عنو، صحتو زينة؟ مندرا يكانو مزال سالم ؟ 28 وڮالولو: عبدك بونا صحتو زينة وهو مزال سالم وسجدولو. 29 واتلفت النبي يوسف وشاف خوه اشڮيڮو بنيامين وڮال: هاذا هو خوكم الصغير اللي خبرتوني عنو؟ وڮال: ينعم مولانا اعليك يا ولي. 30 وادفع النبي يوسف شور بل خلوتة وابكا فم بيهلي عواطفو حنت لخوه. 31 ومن فم اغسل وجهو وخاظ واوفا من البكي وڮال: ڮدمو الطعام. 32 وڮدمو لو الطعام وحدو ولخوتو وحدهم وللمصريين اللي امعاهم وحدهم بيهلي احرام اعلى المصريين اعلنهم يوكلو امع العبرانيين بيهلي ذاك عيب عندهم. 33 وڮعدو كاملين ڮدامو بحسب اعمارهم من لكبير إلى الصغير وكلهم خرص لوخر منبهرين. 34 وڮدملهم حصص من الطعام من طابلتو وكانت ڮرعة بنيامين اخمس مرات ڮرعات اخوتو وكالو وشربو يلين شبعو.