1 وإلين استكهل النبي إسحاق واضعاف بصرو ڮام وعيط لوَلو لكبير عيسو وڮالّو: يا ولي. وڮالّو عيسو: اراعيني يا بويَ. 2 وڮالّو النبي إسحاق: آنا عدت شيباني ولاني عارف اينتا لاهي انموت. 3 ظرك اڮبظ دبشك ونشاباتك وقوسك وڮيس الخلوات وصيّدلي، 4 وعدلّي اطعام زين عندي وجيبولي اياك نوكل منو اياك نطلب مولانا يبارك فيك سابڮ انموت.

5 وفذا سمعت رفقة اكلام النبي إسحاق امع عيسو. وإلين امشا عيسو واعد الخلوات اياك يصيد فريسة ويجيبها لبوه النبي إسحاق، 6 ڮالت رفقة ليعقوب: آنا اسمعت بوك يڮول لخوك عيسو: 7 صيّدلي فريسة وعدلّي اطعام زين عندي اياك نوكل ونطلب الله تعالى يبارك فيك سابڮ انموت. 8 ظرك اصا يا ولي اسمع ذاللي لاهي نطلب منك. 9 ڮيم ماشي شور امراح لغنم واختر منهم جديين وجيبهملي اياك انعدل لبوك اطعام زين عندو. 10 وتعطيه لبوك اياك يوكل واياك يباركك انتا سابڮ يموت. 11 وڮال يعقوب لأمو رفقة: انتي تعرفي اعلن خويَ عيسو هو راجل امزغب، وآنا ما فيَّ ياسر من الزغب. 12 وإلين يمسني بويَ ويعرف اعلني خزيت بيه وانعود نجبر لعنة بل البركة. 13 وڮالت رفقة ليعقوب: لعنتك اعليَّ آنا، اسمعلي انتا اوتوف وامشي وجيبلي الجديان لأثنين اللي اطلبتهم منك.

14 وامشا يعقوب واختار جديين وجابهملها وطبخت رفقة اطعام زين عند النبي إسحاق. 15 وڮبظت لبسة زينة من الباس عيسو ولها لكبير اللي كانت عندها فالدار واعطاتها ليعقوب اياك يلبسها. 16 وغطات ايديه ورڮبتو بجل الجديان لأثنين. 17 واعطاتو الطعام الزين اللي طبخت امع *امبورو.

18 وجا يعقوب لبوه النبي إسحاق وڮالّو: يا بويَ. وڮالّو النبي إسحاق: اراعيني يا ولي، ڮولّي انتا أي أولادي؟ 19 وڮالّو يعقوب: آنا ولك لكبير عيسو، وعدلتلك ذاللي اطلبت مني. وظرك ڮوم اوكل من ذاللي صيدتلك اياك تطلبلي البركة. 20 وڮالّو النبي إسحاق: ابسيمحالة ڮديت اتصيد بهاذي العجلة؟ وڮالّو يعقوب: الله تعالى إلهك اسبلي اطريڮي. 21 وڮال النبي إسحاق ليعقوب: ڮرب مني انمسك اياك نعرف يكانك ولي عيسو حڮ حڮ وللا ابدي. 22 وڮام يعقوب وڮرب من بوه ومس النبي إسحاق يعقوب وڮالّو: صوتك صوت يعقوب يغير ايديك هوما ايدين عيسو. 23 ولا ڮد النبي إسحاق يعرف يعقوب بيهلي ايديه كانو املانات من ازغب كيف ايدين عيسو. وڮام النبي إسحاق وبارك يعقوب. 24 وسولو: انتا هو ولّي عيسو؟ وڮالّو يعقوب: اهيه آنا هو بعد. 25 وڮالّو النبي إسحاق: اعطيني نوكل من ذاللي صيدت اياك نطلبلك البركة. وڮام النبي يعقوب وجابلو الطعام وكال منو وجابلو عصير العنب واشرب منو.

26 وڮال النبي إسحاق ليعقوب: وهاي جاي وضمني يا ولي. 27 وڮام يعقوب وڮرب من النبي إسحاق وضمو وشم إسحاق ريحة الباس يعقوب واطلبلو البركة وڮال: اراعيها ريحة ولي كيفت ريحة حرث امباركو الله تعالى.

28 ينعم اعليك مولانا

من ما السحاب

ومن خير التراب

ويكثرلك مولانا

من الڮمح والعنب

29 الشعوب لاهي يخدموك

والقبايل لاهي يسجدولك

واتعود شيخ اعلى اخوتك

وأولاد أمك لاهي يكبروك

واتعود الناس اللي تلعنك ملعونة

والناس اللي اتباركك لاهي اتعود مباركة

30 وإلين اوفا النبي إسحاق من طلبة البركة ليعقوب، امشا يعقوب من عند بوه. فذا ارجع عيسو من الخلوات. 31 واطبخ هو املي الطعام الزين وجابو لبوه النبي إسحاق وڮال: ڮوم يا بويَ واوكل من صيد ولّك، واطلبلي البركة. 32 وڮالّو النبي إسحاق: انتا منهو؟ وڮالّو عيسو: آنا ولك لكبير عيسو. 33 وڮبظت النبي إسحاق الرعدة وڮال لعيسو: منهو اصا ذاللي جابلي من فريستو ووكّلني منها سابڮ اتجي واطلبتلو البركة؟ وهو اللي لاهي يعود امبارك. 34 وإلين اسمع عيسو اكلام بوه النبي إسحاق ڮام وازڮا الفوڮ وڮال: اطلبلي البركة آنا املي يا بويَ! 35 وڮالّو النبي إسحاق: آنا خزا بيَّ يعقوب واڮلع منك بركتك. 36 وڮال عيسو: مالو اسمو يعقوب اللي معناه الخداع؟ اراهو خزا بيَّ مرتين، اڮبظ بكوريتي وظرك اڮبظ بركتي. وڮال للنبي إسحاق: ما خليتلي شي من البركة؟ 37 وڮالّو النبي إسحاق: آنا عدلتو شيخ اعليك وعدلت اخوتو كاملين اعبيدو، واطلبت مولانا يكثرلو من الڮمح والعنب. وظرك شانڮد انعدلك انتا؟ 38 وڮالّو عيسو: مندرا يكان عندك الا بركة وحدة يا بويَ؟ اطلبلي مولانا آنا املي يا بويَ! وڮام عيسو يبكي الفوڮ. 39 وڮالّو بوه النبي إسحاق:

لاهي اتعود ساكن فارض يابسة

ما ينزل اعليها الما

40 لاهي اتعيش بسيفك،

ولاهي اتعود عبد لخوك،

يغير يلين اتثور اعليه

لاهي اتكسر كل ثڮل دارو اعليك

41 واحقد عيسو اعلى خوه يعقوب بسبب البركة اللي اطلبلو النبي إسحاق، وڮال عيسو امبينو امع راصو: اڮريب يدور يموت بويَ، وعاڮب ذاك نكتل خويَ يعقوب. 42 وسمعت رفقة ذاللي اتوعد بيه عيسو ليعقوب. وڮامت ومشات ليعقوب وڮاتلو: عيسو يخطط اياك يكتلك. 43 وظرك اسمعلي يا ولي وڮيم واهرب شور خويَ لابان اللي فحاران. 44 واسكن عندو أيام ماهم ياسرين يلين يهناو افڮايع خوك. 45 وإلين يهناو افڮايعو وينسا اللي عدلتلو انتا، عاڮب ذاك اندور انمشيلك اتجي من حاران. اعلاش ننحرم منكم لأثنين فنفس اليوم؟

46 وعاڮب ذاك ڮالت رفقة للنبي إسحاق: آنا اكرهت روحي بسبب امنات الحيثيين. وإلين يتخيم يعقوب امع امرة حيثية من هاذي لارض تشابه لعليات عيسو، يعود موتي اشبه من حياتي.