Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
Sapanga ampwagila Noa, "Amwi kwaakoma bandu boti ndaba atweli bandu banga ni ikia. Naakoma pamu nu nndema. Henu, ujilenganakiya Sapina kwi imbau yu nkongu wu mpengu. Bagula yumba nkati je homu na gupakia lami kunza nu nkati. Gujilenganakiya ana, Ulasu waki gubiya meta mia moja na selasini na tisa, upana waki meta ishilini nunhwanu nu ulasu waki ukujenda kunani meta komi nu nhwanu. Sapina heji jibiya ja golopa itatu na jejibii nu nndyangu kulutengu. Jilenganakiya nu nhagaa, kabee ujileka napwasi nusu mita kati ju nhagaa nu ligolu.
Masi gingi gatwele mu nndema
Bambu Sapanga ampwagila Noa, "Jingala nkati ja sapina wehapa pamu na bana baku boti, ndaba kati ja bandu boti baatama masoba gaku gani, nugubweni wehapa kajika jaku ndi weguhenga ganagajetake.
Noa nu nhwanamundu na bana baki na aka ahanamundu bajingala nkati ja sapina ili kujepana nu kutwele kwa masi. Inyama yeijetakiki kupiki litambiku ni inyama yanga kujetakeka kupiki litambiku ni ijuni ni iumbi yoti yeikwaba, ibeli ibeli, ikambaku ni mikolu, bajingala nkati ja sapina pamu na Noa ngati Sapanga eanndagalakiya. Egapeta masoba saba, masi gingi gatumbuliya kuguyekale nndema.
inyama yoti yeyajingala mu sapina babia makambaku nu nkolu ngati Sapanga eanndagalakia. Ndipala Sapanga jwapunga nndyangu ejajingala pe Noa.
Masi gingi gaendaliya kuba munndema kwa masoba alubaini. Iyula jaendaliya kuna na masi gaendalia kujonzukeka nu kujitondabe sapina nukujebe panani ja masi. Masi gaendaliya kujonzukeka ngani punndema na sapina jajebala panani jaki.
Sapanga jakoma kila kiumbi sesabii punndema, bandu ni inyama ni iumbi yeikwaba ni ijuni yukulianga. Noa pe na bajabii naku pamu nkati ja sapina ndi babalama.
masi gaendaliya kupongoka mbolimboli. Egapeta masoba mia moja hamsini, masi gabiya gapungasiki ngani. Elahika lisoba la komi na saba ja mwei wa saba, sapina jatola panani ji itombi yuku Alalati.
Egapeta masoba alubaini, Noa, japungula lindilisa lejwabii julenganaki mu sapina je heji, jilipia likongoo kunza nalombi ngaselakelubuka kabete jatama koku mbaka masi egajomaliya. Ndipala Noa jijipia inzeba ili jakalinga ngati masi gapungasiki panani ju nndema. Lakini, ndaba masi gabiya gakona gayekalii nndema gwoti, inzeba je heji ngasejapatiki pandu pukutola, jakelubuka kwaka noa mu sapina. Noa jatondabiya kuboku jijikamula nukujikelabuu mu sapina. Noa jalendaliya kabee kwa masoba saba, ndipala jijipia kabee inzeba jela. Inzeba je heji jakelubuka pakamii koni jitotwi limbandi libei li mizeituni mu ndomu jaki. Ndienu Noa jamanya ndi masi gabiya gapungasiki mu nndema. Ndienu jalendaliya kabee kwa masoba saba, jijipia kabee inzeba jela, sapwali heji inzeba ngase jakelabwiki kabete.
Noa, pajabii na yaka mia sita na jimu, lisoba lu kutumbuli la mwei gu kutumbuli, masi gabia gajomiki mu nndema. Noa jayekula kipuniku sa sapina na pajalinga jabona nndema wabiya kujomiki.
Hapa Sapanga ampwagila Noa, "Pita kunza jasapina, wehapa pamu nu nhwanu waku na bana baku na akaahanu babu. Wiipia ijuni yoti ni inyama yoti ni iumbi yomi yengi yoti yeyabii pamu na wehapa ili yapapana nukujonzukeka pundema."
Ndipala Sapanga ampwagila Noa na bana baki, "Lelenu meka lilaganu langu na mwanganya ni kibeleku sinu, ni iumbi yoti yomi, Ijuni ni inyama yukupugwa ni inyama imwikioli na yoti yeihumiki mu sapina pamu na mwanganya. Meka lilaganu langu na mwanganya ana iumbi yoti yomi nganaikomi kabee kwa masi gingi wala ngakwipitii kabeti masi gingi gukuhalabana nndema."
Meka lusisi lwangu ku maundi, nalwombi lwibiya nginyuli ji lilaganu kati jangu nu nndema.
Ku kuhobale Sapanga andakaliya Noa kupete majambu giliya ga giipitila monikatai gaguge gabiya gakona ngasegapiti. Anzetakiya Sapanga, jasenga safina jaokuliwa jombi pamu na alongu baki. Ku kupete kuhobale kwaki nndema watenda kutemuliwa, najombi Noa jajetakewa palongi jaka Sapanga kupete kuhobale kwaki.
Haba ndi bala babakana kunzoane Sapanga pajalendaliya ngani kipindi Noa pajabiya juandaa safina. Nkati ja safina je heji babi bandu asokopi pena, yani bandu nani, babaokuliwa mu masi, masi ge gala gabiya lilenganu lu ubatisu gogunhoko mwanganya sajenu. Ubatisu nga sindu sukuboa usapu mu nhnhyega, ila ndi lilaganu kwaka Sapanga lelihengeka mu moju gogulangi ngasegubii na mahakau. Junhokua kwi indela jukuyoka kwaka Yesu Kilisitu, jojuwe jajenda kunani kwaka Sapanga na henu jutami kumalele, julongoswa na Atumi, akolongu na baabii nu uwesu nkolongu bu kunani kwaka Sapanga.
Ngati ekwabii mu masoba gaka Noa, ndi ekwibiya ejwihika Mwana waka Mundu. Ndaba masoba haga kabula jukutwele masi punndema bandu akubika akakula na kunywa, atogulika nukutola aka mbomba, mbaka lisoba Noa pajajingala munhwatu nkolongu gobugukema safina. Bombi ngasebamanyiki siipitila kii mbaka masi pagatwelila punndema nakajola boti. Hela ndi ekwibiya pajihika Mwana waka Mundu. Masoba gegala bandu abeli biibiya ku lituhi, jumu biitenda kunzuku najongi biitenda kundeka. Aka nyongo abeli biibiya apola kilebi, jumu biitenda kunzuku na jongi biitenda kundeka.